ߊ߬ߟߌ ߓߊߘߊ߬ߙߊ ߞߐ߲ߘߍ߫߸ ߊ߬ߟߋ ߡߍ߲ ߦߋ߫ ߊߡ ߜ߭ߙߎߔ ߗߋߕߌ߯ߓߊ߸ ߣߴߊ߬ ߦߋ߫ ߖߌ߬ߣߍ߬ ߥߊߟߌߝߊ߫ ߘߏ߲ߛߏ ߟߎ߬ ߘߏ߫ ߘߌ߫߸ ߏ߬ ߟߋ ߛߐ߬ߘߐ߲߬ ߘߊ߫ ߘߎߢߊ߫ ߘߓߊ߬ߓߌߟߊ ߘߏ߫ ߡߊ߬، ߒ߬ߓߊ߬߸ ߏ߬ ߞߎ߲߬ߢߐ߲߮ ߓߊ߯ ߛߋ߫ ߞߏߕߊ߲߫߸ ߊ߬ߟߋ ߕߴߊ߬ ߕߊ ߏ߬ ߞߍ߫ ߟߊ߫ ߛߍߥߊ߫ ߘߐߞߏߟߏ߲߫ ߘߌ߫߸ ߊ߬ ߦߴߊ߬ ߞߍ߫ ߟߊ߫ ߥߙߎߞߌ߫ ߘߐߞߏ ߟߎ߬ ߛߌߟߊ ߟߊߞߊ߭ ߟߋ߬ ߘߌ߫.
ߊ߬ߟߋ ߟߊ߫ ߛߊ߲߬ߞߎ߲߬ߓߍ߲ ߕߍ߫ ߞߍ߫ ߟߴߊ߬ ߓߟߏ߫ ߝߙߎ߬ߝߙߎ߬ ߘߐ߬ߕߍ߰ ߜߊ߲ߛߊ߲߫ ߘߌ߫߸ ߊ߬ߟߌ ߓߊߘߊ߬ߙߊ ߞߐ߲ߘߍ߫ ߦߴߊ߬ ߟߊ߫ ߛߊ߲߬ߞߎ߲߬ߓߍ߲߬ ߞߊߙߏ ߘߌ߫ ߟߊ߫ ߖߌ߬ߣߍ߬ ߝߎߣߎ߲ߞߋ ߟߎ߫ ߟߋ߬ ߡߊ߬، ߏ߬ ߟߋ ߞߏߛߐ߲߬߸ ߊ߬ ߞߊ߬ ߝߐ߰ߓߍ߬ ߜߙߊ ߘߏ߫ ߞߍ߫ ߓߌ߬ ߓߌߟߏ߲ ߣߌ߲߬ ߡߊ߬ ߂߀߂߅ ߘߓߊ߬ߓߌߟߊ ߕߟߋ߬ ߁߄ ߡߊ߬ ߞߊ߲ߞߊ߲߫ ߝߐ߬ߓߍ߬ߦߊ߬ߟߊ ߟߎ߬ ߟߊ߫ ߓߏ߲ߓߊ ߟߊ߫߸ ߞߊ߬ ߓߊ߯ߙߊ ߘߏ߫ ߟߎ߫ ߡߊߘߊ߲߫߸ ߊ߬ ߞߍߕߐ߫ ߡߍ߲ ߠߎ߬ ߛߌ߰ ߟߊ߫ ߛߋ߲߬ߠߊ߫ ߟߊ߬ߞߐ߰ߟߌ ߘߊߞߎ߲ ߘߐ߫߸ ߊ߬ ߣߌ߫ ߘߎ߰ߘߋ߲߬ ߓߘߍ߬ߦߊ ߛߌߟߊ ߞߊ߲߬، ߟߊ߬ߞߐ߬ߟߌ ߏ߬ ߡߍ߲ ߘߊߡߌ߬ߣߊ߬ߕߐ߫ ߞߊ߲ߞߊ߲߫ ߘߓߊ߬ߓߌߟߊ ߣߌ߲߬ ߕߟߋ߬ ߁߈ ߣߴߊ߬ ߁߉ ߡߊ߬.
<<ߛߊ߲߭ ߺ ߊ ߺ ߛߊ߲߬߸ ߒ ߧߋ߫ ߒ ߢߊ ߡߊߖߌ߰ ߟߊ߫ ߟߋ߬ ߒ ߠߊ߫ ߢߣߊߡߦߊ ߞߘߐ߫، ߒ ߡߊ߲߫ ߞߎ߬ߛߊ߲߫ ߝߙߎ߬ߝߙߎ߬ ߘߐ߬ߕߍ߰ ߟߊ߫߸ ߒ ߧߋ߫ ߒ ߧߊ߫ ߘߎߢߊߘߐߕߍ߮ ߟߋ߬ ߘߐߞߎߘߎ߲ߞߎߘߎ߲߫ ߠߊ߫߸ ߞߵߊ߬ ߡߊߝߟߍ߫ ߒ ߘߌ߫ ߡߎ߲߬ ߕߊ߬߸ ߞߊ߬ ߡߎ߲߬ ߓߌ߬ߟߊ߬߸ ߒ ߘߌ߫ ߡߎ߲߬ ߞߍ߫ ߒ ߠߊ߫ ߖߡߊ߬ߣߊ ߦߋ߫.>> ߊ߬ ߞߵߏ߬ ߟߋ ߝߐ߫ ߜߊ߬ߙߊ ߣߌ߲߬ ߘߐ߫. ߊ߬ ߟߊ߫ ߢߍߥߟߊ ߦߋ߫ ߡߍ߲ ߘߌ߫ ߏ߬ ߘߐ߫ ߕߋ߲߬߸ ߏ߬ ߟߋ ߘߋ߲ߡߌߛߍ߲ ߥߙߍߓߊߓߊ ߟߊߘߍ߱ ߘߌ߫߸ ߞߊ߬ ߡߐ߰ ߅߀߀ ߢߐ߲߰ ߠߊߞߐ߯ ߗߍ߬ ߘߐ߫ ߡߛߏ߬ ߘߐ߫߸ ߞߊ߲ߞߊ߲߫ ߣߊ߬ߓߊ߰ߦߊ߬ ߞߣߐ߫߸ ߞߵߊ߬ߟߎ߫ ߞߊ߬ߙߊ߲߬ߧߊ߫ ߊ߬ߟߎ߫ ߖߘߍ߬ߞߊ߬ߣߌ߲߬ ߥߊߟߌߘߊ ߟߊߘߊ߲߫ ߢߊ ߟߊ߫߸ ߊ߬ ߣߌ߫ ߥߊߟߌߘߊ ߡߊߡߊ߬ߙߊ ߣߌ߫ ߖߘߍ߬ߟߊ߬ߥߙߎߞߌ ߛߌߟߊ߫ ߞߍ߲ߘߍ.
ߟߊ߬ߞߐ߰ߟߌ ߢߌ߲߬ ߘߏ߲߬ ߞߍߣߍ߲߫ ߊ߬ߟߌ ߓߊߘߊ߬ߙߊ ߖߍ߬ߘߍ ߞߎ߲߬ ߣߊ߲ߝߟߏ ߟߋ߬ ߟߊ߫߸ ߊ߬ ߞߵߊ߬ ߦߌ߬ߘߊ߬ ߝߣߊ߫ ߞߏ߫ ߡߐ߰ ߛߌ߫ ߕߍ߫ ߖߌ߬ߣߍ߬ ߞߣߐ߫߸ ߡߍ߲ ߞߵߊ߬ ߘߍ߬ߡߍ߲߬ ߘߙߐߡߍ ߟߊ߫ ߣߌ߲߬ ߞߏ ߘߐ߫߸ ߊ߬ ߘߏ߲߬ ߕߍ߫ ߘߙߐߡߍ ߝߣߊ߫ ߢߌߣߌ߲߫ ߠߊ߫ ߡߐ߰ ߝߍ߬ ߣߌ߲߬ ߟߊ߬ߞߐ߰ߟߌ ߘߐ߫، ߊ߬ ߦߴߊ߬ ߝߍ߬ ߟߋ߬ ߘߐߙߐ߲߫߸ ߊ߬ ߟߊ߫ ߟߊ߬ߞߐ߬ߟߌ ߣߌ߲߬ ߕߐ߬ߣߐ ߦߋ߫ ߛߋ߫ ߡߐ߱ ߟߎ߫ ߡߊ߬، ߟߊ߬ߞߐ߰ߟߌ ߣߌ߲߬ ߘߐ߫߸ ߛߙߋߓߍ߫ ߟߕߊߡߌ߲ ߦߴߊ߬ ߘߐ߫߸ ߏ߬ ߝߘߊߕߐ߫ ߊ߬ ߟߊ߫ ߟߊ߬ߞߐ߰ߟߌ ߞߎߓߋߘߐ ߟߋ߬ ߟߊ߫߸ ߡߍ߲ ߡߊߡߙߊ߬ߣߍ߲߫ ߞߟߊ߬ߡߊ߬ߓߊ߯ ߓߟߏ߫߸ ߏ߬ ߡߍ߲ ߠߊߞߐ߯ߣߍ߲߫ ߝߊ߬ߙߊ߲߬ߛߌ߬، ߝߣߊ߫߸ ߟߊ߬ߞߐ߰ߟߌ߬ ߞߙߎ ߘߐߕߟߊߕߐ߫ ߁߀ ߠߋ߬ ߘߌ߫߸ ߞߊ߬ ߝߊ߬ߓߘߍ ߘߏ߫ ߢߌߣߌ߲߫ ߏ߬ ߞߋߟߋ߲ߞߋߟߋ߲ ߠߊ߫، ߝߊ߬ߓߘߍ ߏ߬ ߟߎ߬ ߝߣߊ߫ ߕߍ߫ ߞߍ߫ ߟߊ߫ ߡߐ߰ ߟߎ߬ ߘߌ߫߸ ߘߋ߲ߡߌߛߍ߲ ߠߎ߬ ߟߊ߫ ߕߎ߬ߡߊ߬ ߕߍ߫ ߡߍ߲ ߠߎ߬ ߓߟߏ߫ ߘߋ߫، ߓߊ߬ߙߌ߬߸ ߡߍ߲ ߠߎ߬ ߘߌ߫ ߛߋ߫ ߘߋ߲ߡߌߛߍ߲ ߠߎ߬ ߟߊ߫ ߞߏ ߞߎ߬ߘߎߛߌ߰ ߟߴߊ߬ߟߎ߬ ߞߊ߲ߠߊ߫.
ߊ߬ߟߌ ߓߊߘߊ߬ߙߊ ߘߏ߲߬ ߡߙߌߦߊ ߜߍߣߍ߲߫ ߠߋ߬ ߣߌ߲߬ ߞߏ ߘߐ߫߸ ߊ߬ ߞߊ߲߫ ߞߏ߫ ߝߏ߫ ߞߊ߬ ߛߋ߫ ߘߋ߲ߡߌߛߍ߲ ߠߎ߬ ߤߊ߲ߞߟߌ ߟߊߞߊ߬߬ ߟߊ߫ ߟߋ߬߸ ߊ߬ߟߎ߬ ߦߋ߫ ߛߴߊ߬ߟߎ߫ ߥߟߌ߬ ߟߴߊ߬ߟߎ߫ ߖߘߍ߬ ߟߊ߫߸ ߞߵߊ߬ߟߎ߫ ߟߐ߬ ߊ߬ߟߎ߫ ߖߘߍ߬ ߟߊ߫، ߞߵߏ߬ ߟߊߒߡߊ ߕߊ߬ ߊ߬ ߖߍ߬ߘߍ ߡߊ߬߸ ߊ߬ߟߋ ߡߍ߲ ߠߊߞߐ߯ ߘߊ߫ ߂߀߁߄ ߠߊ߫߸ ߏ߬ ߞߍ߫ ߘߊ߫ ߟߊ߬ߞߐ߬ߟߌ߬ ߘߌ߫߸ ߡߍ߲ ߕߐ߬ߣߐ ߥߙߊ߬ ߘߴߊ߬ ߞߊ߲߬߸ ߊ߬ ߘߏ߲߬ ߦߴߏ߬ ߟߋ ߛߌߟߊ߫ ߞߋߟߋ߲ ߝߣߊ߫ ߞߊ߲߬ ߣߌ߲߬.
ߊ߬ ߞߊ߲߫ ߞߏ߫ ߖߊ߬ߕߋ߬ߘߐ߬ߛߌ߮ ߣߌ߲߬ ߦߋ߫ <<ߝߌߛߙߌ ߟߋ߬ ߘߌ߫ ߞߵߊ߬ ߘߌ߫ ߖߡߊ߬ߣߊ ߡߊ߬>> ߡߙߌߦߊ߫ ߞߋߟߋ߲߫ ߠߋ߬ ߘߏ߲߬ ߦߴߏ߬ ߞߘߐ߫: ߝߏ߫ ߌ ߕߐ߬ߣߐ ߟߋ߬ ߦߋ߫ ߛߴߌ ߟߊ߫ ߖߡߊ߬ߣߊ ߡߊ߬. <<ߊߘߡߊߘߋ߲ ߓߊ߯ ߛߐ߬ߘߐ߲߫ ߖߡߊ߬ߣߊ ߞߣߐ߫߸ ߊߟߊ߫ ߞߊ߬ ߤߙߍ ߞߴߌ ߦߋ߫ ߞߵߌ ߕߐ߬ߣߐ ߟߊߛߋ߫ ߖߡߊ߬ߣߊ ߏ߬ ߡߊ߬߸ ߏ߬ ߦߋ߫ ߞߎ߲߬ߠߊ߬ߦߋ߬ߙߋ߲߬ ߞߏ ߟߋ߬ ߘߌ߫ ߘߋ߬.>> ߊ߬ ߞߵߏ߬ ߟߋ ߞߍ߫ ߊ߬ ߟߊ߫ ߞߎߡߊ ߞߎ߲߬ߘߏ߲ ߘߌ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
Aucun commentaire pour le moment.