ߔߏߟ ߓߌߦߊ߫ ߛߊ߲߬ ߉߂ ߟߋ߬ ߕߋ߲߬߸ ߊ߬ ߓߘߊ߫ ߛߊ߲߬ ߓߌߣߊ߯ߣߌ߲߫ ߣߌ߫ ߞߐ߫ ߞߍ߫ ߖߡߊ߬ߣߊ ߞߎ߲߬ߠߊ߫، ߊ߬ ߟߊ߫ ߞߘߐ߬ߦߊ ߏ߬ ߓߍ߯ ߣߴߊ߬ ߕߊ߫߸ ߊ߬ ߓߘߴߊ߬ ߦߌ߬ߘߊ߬ ߞߏ߫ ߊ߬ ߦߋ߫ ߡߊ߬ߡߌ߬ߘߊ߬ߟߌ߬ߟߊ ߟߋ߬ ߘߌ߫ ߂߀߂߅ ߞߏ߲ߓߌߕߌ߮ ߕߟߋ߬ ߁߂ ߞߊ߲ߕߌ߯ ߢߣߊߕߊߟߌ߫ ߣߊ߬ߕߐ ߘߐ߫، ߒ߬ߓߊ߬߸ ߘߋ߲ߡߌߛߍ߲߫ ߞߙߎ ߟߋ߬ ߣߐ߬ ߊ߬ߟߎ߬ ߟߊߘߍ߬ ߟߊ߫ ߞߊ߬ ߝߘߊ߫ ߞߊߡߋߙߎߣ ߕߌ߲߬ߞߎ߬ߘߎ߲߬ ߛߌߦߊߡߊ߲߫ ߠߊ߫߸ ߞߊ߬ ߥߊ߫ ߛߓߍߝߙߏߞߏ ߘߏ߫ ߘߌ߫ ߋߕߎߘߌ߫ ߞߎߓߋߘߊ ߟߊ߫߸ ߛߍߝߊ ߞߋ߲߬ߥߟߎ߬ ߄߀ ߦߋ߫ ߡߍ߲ ߞߣߐ߫߸ ߞߏ߫ ߔߏߟ ߓߌߦߊ߫ ߟߊ߫ ߡߊ߬ߡߌ߬ߘߊ߬ߟߌ ߓߟߏߟߊߘߍ߫ ߛߙߊ ߟߵߏ߬ ߘߌ߫߸ ߊ߬ ߣߌ߫ ߞߵߊ߬ ߓߟߏߡߊߜߍ߲߫ ߊ߬ ߟߊ߫ ߓߙߊߡߊߖߊ߲ߓߊ߲ ߝߣߊ߫ ߘߐ߫.
ߞߊ߲ߕߌ߯ߘߊ ߝߘߏ߬ߓߊ߬ ߞߟߊ߬ߕߌ߮ ߞߊ߬ ߣߌ߲߬ ߞߏ ߕߊ߲߬ߘߏ߫ ߟߋ߬ ߞߏߛߓߍ߫߸ ߣߊߟߌ߬ߡߎ߲߬ ߛߟߊߕߌ߯ ߝߍߙߑߘߌߣߊ߲߫ ߒߜ߭ߐ߫ ߒߜ߭ߐ߫ ߘߌ߫߸ ߏ߬ ߡߍ߲ ߞߵߊ߬ߟߎ߬ ߟߊߛߣߍ߫ ߞߊ߲ߕߌ߯ ߞߎߓߋ ߟߊ߫ ߞߊ߬ߣߌ߲߬. ߞߋ߲߬ߥߟߎ߬ ߄߀ ߡߍ߲ ߠߊߘߍ߬ߣߴߊ߬ߟߎ߬ ߓߟߏ߫ ߣߌ߲߬߸ ߞߋ߲߬ߥߟߎ߬ ߃߀ ߟߋ߬ ߞߍߕߐ߫ ߞߵߊ߬ ߟߊ߫ ߢߣߊߕߊߟߌ ߓߟߏߟߊߘߍ ߛߙߊ߬߸ ߞߵߊ߬ ߕߐ߬ ߞߋ߲߬ߥߟߎ߬ ߁߀ ߞߍ߫ ߞߵߊ߬ ߟߊ߫ ߓߙߊߡߊߖߊ߲ߓߊ߲ ߓߟߏߘߐߓߍ߲ ߠߎ߬ ߞߍ߫.
ߓߟߏߟߊߘߍ߫ ߛߎ߮ ߣߌ߲߬ ߓߘߊ߫ ߡߐ߱ ߟߎ߬ ߡߙߌߦߊ ߛߌߦߊߦߊ߫ ߞߊ߬ ߞߎߡߊ߫ ߡߌߛߍ߲ ߛߌߦߊߦߊ߫، ߓߊߏ߬߸ ߊ߬ߟߋ ߛߌ߰ ߘߊ߫ ߖߡߊ߬ߣߊ ߞߎ߲߬ߠߊ߫ ߞߊ߬ߦߌ߯ ߁߉߈߂ ߟߋ߬ ߟߊ߫، ߝߣߊ߫߸ ߊ߬ ߟߊ߫ ߟߐ߬ߒ߬ߞߋ߬ߟߊ߬ ߛߋߦߌߣߊ߲ ߠߋ߬ ߞߍ߫ ߟߐ߮ ߦߴߊ߬ ߟߊ߫ ߢߐ߲߮ ߞߐ߫ ߕߋ߲߬߸ ߞߵߊ߬ ߛߌ߭ ߖߊ߲߬ߝߊ߬ߣߍ߲߬ߓߊ ߕߏ߫߸ ߊ߬ ߣߴߊ߬ ߓߘߊ߫ ߡߍ߲߫ ߓߘߍ߬ߓߘߍ߬ߟߌ ߘߐ߫ ߞߏߛߓߍ߫، ߊ߬ ߛߊ߲߬ ߉߂ ߟߋ߬ ߕߋ߲߬߸ ߞߊ߲ߕߌ߮ ߡߍ߲ ߠߎ߬ ߦߋ߫ ߘߎߢߊ߫ ߞߣߐ߫ ߕߋ߲߬߸ ߊ߬ߟߋ ߟߋ߬ ߞߊ߫ ߞߘߐ߬ ߏ߬ ߟߎ߬ ߓߍ߯ ߘߌ߫߸ ߊ߬ ߓߘߊ߫ ߛߊ߲߬ ߄߃ ߝߣߊ߫ ߞߍ߫ ߖߡߊ߬ߣߊ ߞߊ߲ߕߌ߯ߦߊ ߟߊ߫.
ߊ߬ ߟߊߘߌߦߊߢߍߓߊ߮ ߟߎ߬ ߞߊ߲߫ ߞߏ߫ ߖߡߊ߬ߣߊ߬ ߡߙߊ ߟߐ߲ߠߌ߲ ߦߴߊ߬ ߟߊ߫߸ ߖߡߊ߬ߣߊ ߘߐߛߎߡߊߣߍ߲߫ ߊ߬ ߕߋ߬ߟߋ ߣߌ߲߬ ߝߣߊ߫ ߘߐ߫، ߓߊ߬ߙߌ߬߸ ߊ߬ ߟߊߜߏߦߊߢߍߓߊ߮ ߟߎ߬ ߞߊ߲߫ ߞߏ߫ ߊ߬ ߣߐ߬ ߊ߬ ߞߝߊ߫ ߟߊ߫ ߝߊ߲߬ߞߊ ߡߊ߬ ߟߋ߬߸ ߊ߬ ߕߴߊ߬ ߝߍ߬ ߞߵߊ߬ ߘߌ߫ ߡߐ߰ ߜߘߍ߫ ߛߌ߫ ߡߊ߬، ߞߊ߲ߕߌ߯ ߢߣߊߕߊߟߌ ߞߏ߬ߣߌ߲ ߓߍߣߊ߬ ߞߍ߫ ߂߀߂߅ ߞߏ߲ߓߌߕߌ߮ ߕߟߋ߬ ߁߂ ߡߊ߬، ߘߋ߲ߡߌߛߍ߲ ߠߎ߬ ߞߏ߬ߣߌ߲ ߛߐ߲߭ߖߊ߬ ߢߊ ߡߍ߲ ߦߴߊ߬ ߞߏ ߘߐ߫ ߣߌ߲߬߸ ߏ߬ ߓߘߴߊ߬ ߦߌ߬ߘߊ߬ ߞߏ߫ ߘߋ߲ߡߌߛߍ߲ ߠߎ߬ ߝߣߊ߫ ߦߴߊ߬ ߝߍ߬ ߊ߬ߟߎ߬ ߦߋ߫ ߛߐ߬ߘߐ߲߫ ߖߡߊ߬ߣߊ ߞߏ߫ ߛߌߦߊߡߊ߲߫ ߘߐ߫ ߡߎ߬ߕߎ߲߬߸ ߞߊ߬ ߦߟߍ߬ߡߊ߲ ߠߊߘߏ߲߬ ߞߏ ߟߎ߬ ߟߊߕߊ߯ߡߊ߫ ߢߊ ߘߐ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
Aucun commentaire pour le moment.