ߖߡߊ߬ߣߊ ߞߊ߲ ߠߎ߬ ߟߊߥߊ߲߬ߞߊ߲ ߣߴߊ߬ߟߎ߬ ߞߐߡߊߓߌ߲ߓߌ߲ ߦߋ߫ ߡߌ߬ߙߌ߲߬ߘߌ ߡߊߘߍ߬ߡߍ߲߬ ߞߏ ߟߋ߬ ߘߌ߫، ߒ߬ߓߊ߬߸ ߖߌ߬ߣߍ߫ ߖߡߊ߬ߣߊ ߞߣߐ߫߸ ߛߌ߬ߞߊ߲ ߞߐߡߊߓߌ߲ߓߌ߲ ߢߌ߲߬ߧߊ (ߛߞߢ) ߓߘߊ߫ ߛߋ߲߬ߕߊ߬ ߓߟߋߓߟߋ߫ ߞߍ߫߸ ߞߊ߬ ߛߌ߰ߞߊ߲߬ ߞߎߘߊ ߖߊ߬ߕߋ߬ߘߐ߬ߛߌ߮ ߘߋ߲߫ ߆ ߀߀߀ ߜߌ߬ߙߌ߲߬ߘߌ߫߸ ߡߍ߲ ߠߎ߬ ߘߟߊߡߌ߬ߣߊ߬ߣߍ߲߫ ߒߞߏ ߣߌ߫ ߊߘߑߟߊߡ ߘߐ߫.

ߖߊ߲߬ߖߏ߲ ߣߌ߲߬ ߞߍ߫ ߘߊ߫ ߞߎߣߎ߲ߟߏ߲ ߠߋ߬߸ ߂߀߂߅ ߘߓߊ߬ߓߌߟߊ ߕߟߋ߬ ߆ ߡߊ߬߸ ߙߝ߭ߌߦߋߙߊ߫ ߖߌ߰ߦߊ߬ߓߏ߲߬ߓߊ ߟߊ߫ ߞߐߣߊߞߙߍ߫، ߖߡߊ߬ߣߊ ߛߌ߲߬ߝߏ߲߬ߘߊ ߟߎ߬ ߞߐߦߌ߬ߘߊ߬ߣߍ߲߫ ߕߘߍ߬ ߞߣߍ ߞߊ߲߬߸ ߝߘߊ߬ߝߌ߲߬ ߞߊ߲ ߠߎ߬ ߡߊߞߊ߲ߞߊ߲ߓߊ߮ ߟߎ߬ ߛߌߦߊߡߊ߲߫ ߕߘߍ߬ ߞߣߍ ߞߊ߲߬߸ ߒߞߏ ߣߌ߫ ߊߘߑߟߊߡ ߘߎ߲ߓߎߘߋ߲ ߠߎ߬ ߝߣߊ߫ ߕߘߍ߬ ߞߣߍ ߞߊ߲߬، ߖߌ߬ߣߍ߫ ߛߌ߰ߞߊ߲߬ ߞߘߐ߫ ߕߊ߬ߡߌ߲߬ߣߍ߲ ߓߍ߯ ߘߟߊߡߌ߬ߣߊ߬ߣߍ߲߫ ߠߋ߬ ߒߞߏ ߘߐ߫ ߝߊߦߌߘߊ߫؛ ߒ߬ߓߊ߬߸ ߊߘߑߟߊߡ ߝߣߊ߫ ߓߘߊ߫ ߓߊ߬ߟߊ߲ ߞߊߘߌ߫߸ ߏ߬ ߡߍ߲ ߦߋ߫ ߝߎߟߊߞߊ߲ ߛߓߍߛߎ߲ ߘߌ߫.

ߛߌ߰ߞߊ߲߬ ߘߟߊߡߌߘߊ ߣߌ߲߬ ߦߋ߫ ߛߌ߰ߞߊ߲ ߞߐߡߊߓߌ߲ߓߌ߲ ߢߌ߲߬ߧߊ ߣߌ߫ ߛߌ߲ߡߌ߲߫ ߞߊ߲ ߠߎ߬ ߟߊ߫ ߢߌ߲߬ߘߍ߫ ߝߊ߬ߛߏ߬ߟߊ߬ߞߊ (ߞߏߟߊߡ) ߠߊ߫ ߞߏߟߊߘߍߢߐ߲߯ߦߊ ߥߟߏߒߘߐ ߘߏ߫ ߟߋ߬ ߘߌ߫߸ ߏ߬ ߡߍ߲ ߢߍߡߌ߬ߘߊ߬ߣߍ߲߫ ߟߏ߲ߛߋߓߊߟߌߕߍ߫ ߞߏ߬ߣߊ߬ߕߍ߬ ߓߟߏ߫߸ ߞߵߏ߬ ߟߊ߫ ߞߊ߲߫ ߝߌ߬ߟߊ ߢߌ߲߬ ߠߎ߬ ߘߎ߲ߓߎ ߟߎ߬ ߞߊ߲߬߸ ߒߞߏ ߝߘߏ߬ߓߊ߬ ߘߎ߲ߓߎ ߣߌ߫ ߊߘߑߟߊߡ ߘߎ߲ߓߎ، ߏ߬ ߘߏ߲߬ ߠߊߥߟߌ߬ߣߍ߲߫ ߛߌ߰ߞߊ߲ ߞߣߐߘߐ ߝߊ߰ߡߎ߲ ߠߋ߬ ߡߊ߬߸ ߏ߬ ߡߍ߲ ߕߐ߲ߛߋ߲ ߅߲ ߞߊ߬ ߝߊ߲߬ߞߊ߬ ߘߌ߫ ߝߊ߬ߛߏ߬ ߞߊ߲ ߠߎ߬ ߡߊ߬߸ ߞߏ߫ ߊ߬ߟߎ߬ ߓߘߊ߫ ߞߍ߫ ߞߎ߲߬ߠߊ߬ߛߌ߰ ߞߊ߲ ߘߌ߫.

ߡߏ߬ߤߊߡߍߘ ߛߋ߬ߙߌߝ ߡߍ߲ ߦߋ߫ ߛߞߢ ߞߊ߲ߕߌ߮ ߘߌ߫߸ ߏ߬ ߞߊ߬ ߣߌ߲߬ ߞߏ ߕߊ߲߬ߘߏ߬ ߞߏߛߓߍ߫: <<ߖߌ߬ߣߍ߬ߞߊ ߓߍ߯߸ ߌ ߞߍ߫ ߘߊ߫ ߞߊ߲߫ ߛߌ߫ ߝߐ߫ ߟߊ߫߸ ߊ߬ ߓߍ߯ ߛߌ߰ߞߊ߲ ߣߌ߲߬ ߞߣߐߘߐ ߢߊߦߋ ߟߋ߬ ߞߊ߫ ߞߊ߲߫߸ ߛߊ߫ ߛߓߍ߬ߘߏ߲߬ ߘߌ߫ ߞߍ߫ ߖߡߊ߬ߣߊ ߞߏ ߟߎ߬ ߟߊ߫ ߞߊ߬ ߛߐ߬ߘߐ߲߬ ߢߝߍߕߊ߯ߟߌ ߜߘߌߛߌ߱ ߘߐ߫، ߏ߬ ߟߋ ߘߐ߫߸ ߓߊ߯ߙߊ ߣߌ߲߬ ߦߋ߫ ߊ߲ ߠߊ߫ ߓߍ߯ߦߊ ߦߌ߬ߘߊ߬ߟߊ߲ ߠߋ߬ ߘߌ߫߸ ߊ߬ ߣߌ߫ ߜߍߦߊ ߕߐ߰ߡߊ߬ߛߙߋ ߞߏ ߟߎ߬ ߘߐ߫.>>

ߞߊ߬ߙߊ߲߬ߡߐ߯ ߓߊ߬ߓߊ߫ ߡߊ߬ߡߊߘߌ߫ ߖߊ߰ߣߍ߬ ߡߍ߲ ߦߋ߫ ߒߞߏ ߛߌ߲߬ߝߏ߲߬ߧߊ߬ߟߌ߬ ߖߊ߯ߓߡߊ ߞߊ߲ߕߌ߮ ߘߌ߫߸ ߣߌ߲߬ ߞߏ ߘߌߦߊ߫ ߘߴߏ߬ ߦߋ߫ ߞߏߛߓߍ߫: <<ߒ ߕߘߍ߬ ߞߏ ߡߍ߲ ߦߋ߫ ߟߊ߫ ߛߌ߬ߓߏ ߘߐ߫߸ ߏ߬ ߟߋ ߒ ߢߊߞߘߐ߫ ߣߌ߲߬ ߓߌ߬.>> ߊ߬ ߓߊ߲߫ ߘߊ߫ ߞߵߊ߬ ߟߊߛߋ߫ ߝߣߊ߫ ߞߏ߫ ߒߞߏ ߛߋߞߏߦߊ ߟߎ߬ ߟߏ߲ߘߐߦߊ ߦߋ߫ ߛߋ߲߬ߠߊ߫ ߜ߭ߎ߯ߜ߭ߐߟ ߟߊ߫ ߘߟߊߡߌߘߊߟߊ߲ ߞߣߐ߫߸ ߏ߬ ߡߍ߲ ߓߊ߯ߙߊ ߟߎ߬ ߘߌ߫ ߞߎ߲߭ߘߏ߲߬ ߘߓߊ߬ߓߌߟߊ ߢߌ߲߬ ߠߊߓߊ߲ ߠߊ߫.

ߛߟߊߕߌ߯ ߡߎߛߊ߫ ߓߊߟߊ߲ߘߎ߯ ߖߊߟߏ߫ ߡߍ߲ ߦߋ߫ ߒߞߏ ߝߘߏ߬ߓߊ߬ ߘߎ߲ߓߎ ߞߊ߲ߕߌ߮ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߘߟߊߡߌߘߊߟߌ ߡߍ߲ ߞߍߣߍ߲߫ ߣߌ߲߬߸ ߏ߬ ߦߋ߫ <<ߛߋ߲߬ߕߊ߬ߓߊ߫ ߟߋ߬ ߘߌ߫ ߖߡߊ߬ߣߊ ߓߘߍ߫߬ߓߘߍ߬ߟߌ ߕߊ߯ ߢߊ ߘߐ߫>>، ߊ߬ ߓߊ߲߫ ߘߊ߫ ߞߵߊ߬ ߦߌ߬ߘߊ߬ ߒߞߏ ߘߏ߲߬ߞߏ ߟߎ߬ ߦߋ߫ ߘߏ߫ ߟߴߊ߬ߟߎ߫ ߘߐ߲߬ߛߋ߲ ߞߊ߲߬߸ ߞߵߊ߬ ߟߐ߲߫ ߞߏ߫ ߞߎ߲߬ߠߊ߬ߛߌ߮ ߢߊ ߟߐ߬ ߕߎߡߊ ߓߘߊ߫ ߛߴߊ߬ߟߎ߬ ߘߐ߫ ߓߊ߯ߙߊ߫ ߞߏ ߘߐ߫، ߊ߬ ߡߊ߫ ߘߊ߲߬ ߏ߬ ߡߊ߬ ߘߋ߬߸ ߊ߬ ߞߵߊ߬ ߞߊ߲ߠߊߘߌ߫ ߞߎ߲߬ߠߊ߬ߛߌ߮ ߡߊ߬ ߌߞߐ߫߸ ߞߏ߫ ߖߊ߱ߣߌ߲߬߸ ߞߎ߬ߙߎ߲߬ߘߎ߫ ߛߌ߲߬ߝߏ߲߬ߠߊ߬ߞߊ ߡߍ߲ ߠߊߘߊ߲ߕߐ߫ ߛߌ߰ߞߊ߲ ߣߌ߲߬ ߕߐ߲ߛߋ߲߫ ߅ ߢߍ߫߸ ߏ߬ ߦߋ߫ ߝߊ߬ߛߏ ߛߓߍߟߌ ߟߎ߬ ߘߊ߲ߞߎ߲߫.

ߊߘߑߟߊߡ ߞߊ߲ߕߌ߮߸ ߞߏ߲߬ߓߏ ߡߊߡߊߘߎ߫ ߛߊߣߎߛߌ߬ ߖߊߟߏ߫ ߞߵߊ߬ ߦߌ߬ߘߊ߬ ߞߏ߫ ߟߊ߬ߞߎ߲߬ߠߊ߬ߛߌ߰ߦߊ߬ߟߌ ߣߌ߲߬ ߦߋ߫ <<ߊ߬ ߛߋ߲߬ߢߊ߬ ߝߟߐ ߟߋ߫߬ ߘߌ߫ ߖߡߊ߬ߣߊ ߞߣߐ߫>>߸ ߞߊ߬ ߛߌߟߊ ߟߊߞߊ߬ ߝߊ߬ߛߏ߬ ߞߊ߲ ߠߎ߬ ߦߋ߫߸ ߞߊ߬ ߓߊ߲߫ ߞߵߊ߬ߟߎ߬ ߘߊ߲ߞߎ߲߫.

ߣߝߊ߬ߖߌ߫ ߛߏ߬ߙߌ߬ ߞߐ߲ߘߍ߫ ߡߍ߲ ߦߋ߫ ߟߞߊ߬ߞߟߏ߬ߞߟߏ߬ߟߌ ߞߏߕߌ߯ߘߊ ߟߊ߫߸ ߏ߬ ߞߵߊ߬ ߦߌ߬ߘߊ߬ ߞߏ߫: <<ߞߏ߫ ߟߊߥߊ߲ߞߊ߲߫ ߕߍ߫ ߞߏ߫ ߟߊߥߊ߲ߞߊ߲ ߡߍ߲ ߞߊ߲߬ ߝߋߎ߫߸ ߏ߬ ߞߏ ߟߎ߬ ߢߊߝߐ ߘߌ߫ ߞߊ߲߫ ߘߐ߫߸ ߓߍ߯ ߦߋ߫ ߡߍ߲ ߢߊߦߋ߫߸ ߊ߬ ߣߌ߫ ߛߓߍߟߌ߫ ߘߐ߫߸ ߓߍ߯ ߦߋ߫ ߝߊ߰ߡߎ߲߬ ߠߊ߫.>> ߏ߬ ߘߐ߫߸ ߞߏ߫ ߛߌ߰ߞߊ߲߬ ߞߏ ߣߌ߲߬ ߓߘߊ߫ ߞߍ߫ ߞߎ߲߬ߠߊ߬ߛߌ߮ ߡߊߘߍ߬ߡߍ߲߬ ߞߏ߬ߓߊ߫ ߟߋ߬ ߘߌ߫.

ߒߞߏ ߢߊߢߌߣߌ߲ ߣߴߊ߬ ߦߙߌߥߊߟߌ ߘߏ߲߬ߖߟߎ߬ߡߊ ߘߍ߭ (ߒ.ߢ.ߦ.ߘ) ߞߊ߲ߕߌ߮ ߞߐ߬ߓߌ߬ߞߐ߬ ߓߎߙߊߡߊ߬ ߞߊ߬ߓߊ ߞߵߊ߬ ߦߌ߬ߘߊ߬ ߞߏ߫: <<ߊ߬ ߟߊߘߊ߲ ߞߎ߲߭ ߦߋ߫ ߖߊ߬ߡߊ ߓߟߏߟߊߛߐ߬ߘߐ߲ ߡߍ߲ ߘߌ߫߸ ߊ߲ ߘߴߏ߬ ߞߍ߫ ߞߵߊ߬ ߓߐ߫ ߊ߬ ߛߌߟߊ ߝߍ߬߸ ߛߊ߫ ߐ߲߰ߤߐ߲ ߡߍ߲ ߢߌߣߌ߲ ߦߴߌߘߐ߫ ߢߣߊߕߊߟߌ ߝߍ߬߸ ߏ߬ ߦߋ߫ ߛߋ߫ ߛߎߘߊ߲߫ ߠߊ߫…ߊ߲ ߧߴߊߟߊ߫ ߕߊ߲߬ߘߏ߬ ߟߊ߫ ߊ߲ ߠߊ߫ ߞߊ߲ ߠߎ߬ ߓߌ߬ߟߊ ߘߐ߫ ߞߛߊߞߊ ߢߌ߲߬ ߘߐ߫߸ ߊ߲ ߕߎ߲߬ ߡߴߊ߬ ߟߐ߲߫ ߞߏ߫ ߢߌ߲߬ ߘߌ߫ ߞߍ߫ ߊ߲ ߢߣߊ߫.. ߊ߲ ߕߍ߬ߘߍ߫ ߊ߬ ߖߌ߰ ߟߊ߫ ߞߏ߫ ߓߊ߯ߙߊ ߡߍ߲ ߘߌ߫ ߞߍ߫ ߊ߲ ߞߐ߫߸ ߏ߬ ߟߋ ߞߍߣߴߊ߲ ߢߣߊ ߣߌ߲߬.>>

ߖߊ߲߬ߖߏ߲ ߘߟߊߞߊ߬ ߘߊ߫ ߛߞߎ߬ ߘߌߡߊ߲ ߠߎ߬ ߟߋ߬ ߟߊ߫ ߒߞߏ ߘߐ߫߸ ߊ߬ ߣߌ߫ ߊߘߑߟߊߡ ߘߐ߫، ߝߊߕߎߡߊߕߊ߬ ߘߋ߲ߓߊߢߌߡߊ߫ ߕߎ߲߬ߞߙߊ߬ ߣߌ߫ ߕߎߙߊߡߊ߲ߓߊ ߟߎ߫ ߞߊ߬ ߝߏ߮ ߟߊߛߐ߲ߞߐ߫ ߛߞߎ߬ ߘߌߡߊ߲ ߠߎ߬ ߟߊ߫.

ߖߊ߲߬ߖߏ߲ ߣߌ߲߬ ߞߎ߲߭ߝߊ߰ ߘߊ߫ ߕߌ߲ߞߌ߫ ߓߎ߰ߓߎ߰ߣߍ߲ ߠߎ߬ ߟߋ߬ ߟߊ߫߸ ߡߍ߲ ߛߍߥߊ ߕߘߍ߬ ߓߍ߯ ߟߊ߫߸ ߞߵߏ߬ ߞߎ߲߭ ߞߍ߫ ߢߊ ߟߐ߭ ߘߌ߫ ߊ߲ ߠߊ߫ ߞߊ߲ ߠߎ߬ ߘߐ߫، ߖߡߊ߬ߣߊ߬ ߘߐ߬ߕߊ߰ߡߊ ߞߏ ߘߏ߫ ߡߙߌߦߊ ߦߋ߫ ߝߊ߬ߛߏ߬ ߞߊ߲ ߛߍ߬ߘߏ߲߬ߠߊ ߟߎ߬ ߟߊ߫߸ ߖߐ߲߰ߛߴߊ߬ߟߎ߬ ߘߌ߫ ߛߋ߫ ߘߏ߲߬ ߠߊ߫ ߖߡߊ߬ߣߊ ߥߏ߬ߣߍ߲ ߣߴߊ߬ ߥߏ߬ߓߊ ߟߎ߬ ߟߊ߫߸ ߞߊ߬ ߛߌ߰ߞߊ߲ ߢߊߝߐ߫ ߞߊ߬ ߞߐ߲߰ ߕߎߟߊߝߌ߲ ߕߋ߬ߟߋ߫ ߂߁ ߞߊ߲ߘߟߌ ߢߍ߫.

ߞߙߊ߬ߞߐ߬ߞߊ ߞߊ߬ߟߐ߸ ߖߌ߬ߓߙߌ߬ߟߊ߫ ߞߐ߲ߘߍ߫߸ ߏ߬ ߟߎ߫ ߟߋ߬ ߕߘߍ߬ ߞߣߍ ߞߊ߲߬ ߞߊ߬ ߛߌߟߊߓߐߛߐ߯ߣߊ߫ ߞߐߦߌ߬ߘߊ߬