߂߀߂߅ ߞߏߟߌ߲ߞߏߟߌ߲ ߕߟߋ߬ ߈ ߡߊ߬߸ ߖߋ߬ߟߌ߬ߓߊ߬ߟߊ߫ ߣߊ߲߬ߕߌ߮ ߟߎ߬ ߡߊߘߏ߬ߣߌ߲߬ ߛߊ߲ߡߊߞߎߟߎ߲ ߘߏ߫ ߖߌ߰ ߘߊ߫ ߓߙߊ߬ߒ߬ߘߐ߬ ߓߟߏ ߡߊ߬ ߓߐ߬ߓߐߖߎ߬ߟߊ߬ߛߏ߫߸ ߓߙߎߞߌߣߊ߫ ߝߊ߬ߛߏ߫ ߖߡߊ߬ߣߊ ߞߊ߲߬߸ ߓߌ߬ߟߊ߬ߒ߬ߘߐ ߘߏ߫ ߞߏߛߐ߲߬، ߓߙߎߞߌߣߊ߫ ߝߊ߰ߡߊ ߟߎ߬ ߡߊ߫ ߕߏ߫ ߛߌ߰ ߘߐ߫ ߏ߬ ߞߏ ߝߍ߬߸ ߣߊ߲߬ߕߌ߰ ߁߁ ߡߍ߲ ߠߎ߬ ߕߘߍ߬ ߛߊ߲ߡߊߞߎߟߎ߲ ߣߌ߲߬ ߞߣߐ߫߸ ߊ߬ߟߎ߫ ߞߵߊ߬ߟߎ߬ ߓߍ߯ ߡߌ߬ߣߊ߬߸ ߏ߬ ߟߋ ߞߏ ߞߎߡߊ ߓߘߊ߫ ߣߊ߬ ߛߌߦߊߦߊ߫ ߛߊ߫.

ߟߊ߬ߛߋ߬ߟߌ߬ ߛߓߍ ߡߍ߲ ߠߊߖߍ߲ߛߍ߲߫ ߘߊ߫ ߞߐ߬ߟߏ߲ ߣߌ߲߬ ߡߊ߬߸ ߞߏߟߌ߲ߞߏߟߌ߲ ߕߋ߬ߟߋ߫ ߉߸ ߖߋ߬ߟߌ߬ߓߊ߬ߟߊ߫ ߛߊ߲ߡߊ߫ ߣߊ߲ߕߌ߯ߘߊ ߓߟߏ߫ (NAF)߸ ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߛߊ߲ߡߊߞߎߟߎ߲ ߡߍ߲ ߖߌ߰ ߘߊ߫ ߦߋ߲߬߸ ߏ߬ ߟߋ ߤߍߙߑߞߎ߳ߟ ߛߋ߫ ߛߊ߲߫ ߕߑߙߊ߲ߕ ߘߌ߫ (C-130 Hercules)߸ ߘߐ߬ߜߍߘߍ߲ ߠߋ߬ ߞߵߊ߬ ߟߐ߬ ߊ߬ ߞߎ߲߬ߛߌ߲߬ ߠߊ߫ ߓߙߎߞߌߣߊ߫ ߝߊ߬ߛߏ߬ ߟߊ߫߸ ߞߵߏ߬ ߞߎ߲߭ ߞߍ߫ <<ߛߋߒߞߏߟߊ߫ ߝߙߋߞߋ>> ߘߏ߫ ߘߌ߫߸ ߡߍ߲ ߞߵߊ߬ ߛߐ߬ߘߐ߲߫ ߊ߬ ߥߌ߬ߟߌ ߞߐߝߍ߬ ߟߋߜ߭ߐߛ، ߊ߬ߟߎ߫ ߞߵߊ߬ ߝߐ߫ ߞߏ߫ ߛߊ߲ߡߊߞߎߟߎ߲ ߣߌ߲߬ ߕߊ߯ߕߐ߫ ߕߘߍ߬ ߔߕߏ߬ߞߌ߬ߟߊ߫ ߟߋ߬ (ߔߐߙߑߕߎ߳ߜ߭ߊߟ) ߡߎ߬ߙߊ߲߬ ߞߏ߬ ߗߋߦߊߟߌ ߘߏ߫ ߟߊ߫.

ߖߋ߬ߟߌ߬ߓߊ߬ߟߊ߫ ߛߊ߲ߡߊ߫ ߣߊ߲ߕߌ߯ߘߊ ߓߋߟߋ߲ߕߌ߮ ߟߊ߫ ߝߐߟߌ߫ ߘߐ߫߸ ߊ߬ߟߋ ߡߍ߲ ߕߐ߯ ߞߏ߫ ߋߤߌߡߍ߲ ߋߖ߭ߏߘߊߡ߸ ߊ߬ ߞߊ߲߫ ߞߏ߫ <<ߟߊ߬ߞߊ߲߬ߘߌ߬ߟߌ ߡߙߌߘߐ߫ ߞߊߟߌ߲>> ߠߋ߬ ߞߏߛߐ߲߬߸ ߛߊ߲ߡߊߞߎߟߎ߲ <<ߖߌ߰ ߘߊ߫ ߞߊߟߌߦߊ߫ ߘߐ߫>> ߓߐ߬ߓߐߖߎ߬ߟߊ߬ߛߏ߫، ߊ߬ߟߎ߬ ߞߊ߲߫ ߞߏ߫߸ ߏ߬ ߘߏ߲߬ ߕߍ߫ ߛߊ߬ߙߌ߬ߦߊ߬ ߛߐߛߐ߫ ߘߌ߫߸ ߏ߬ ߦߋ߫ ߘߎߢߊ߫ ߟߊ߬ߞߊ߲߬ߘߊ߬ߟߌ ߕߊ߯ߛߌߟߊ ߟߋ߬ ߘߌ߫.

ߊ߬ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߣߊ߲߬ߕߌ߮ ߡߍ߲ ߠߎ߬ ߕߘߍ߬ ߛߊ߲ߡߊߞߎߟߎ߲ ߞߣߐ߫߸ ߝߏߦߌ߬ ߡߴߏ߬ ߟߎ߫ ߛߐ߬ߘߐ߲߬߸ ߊ߬ߟߎ߬ ߓߍ߯ ߞߍ߲ߘߍ ߟߋ߬، ߊ߬ ߣߌ߫ ߞߏ߫ ߓߙߎߞߌߣߊ߫ ߝߊ߬ߛߏ߫ ߝߊ߰ߡߊ ߟߎ߫ ߞߵߊ߬ߟߎ߬ ߟߊߓߍ߲߬ <<ߓߊ߯ߙߊ ߣߌ߫ ߟߏ߲ߟߊ߲ߧߊ ߓߏ߲߬ߧߊ>> ߟߋ߬ ߞߣߐ߫، ߞߏ߫ ߊ߬ߟߎ߬ ߦߋ߫ ߢߊ߫ ߢߌߣߌ߲ ߞߊ߲߬ ߞߏ ߟߎ߬ ߡߊ߬ ߕߋ߲߬߸ ߛߊ߫ ߗߋߦߊߟߌ ߘߴߊ߬ ߟߊ߫ ߛߌߟߊ ߘߊߓߊ߲߫߸ ߣߌ߫ ߝߙߋߞߋ ߓߊ߲߫ ߘߊ߫ ߝߎߟߋ߲߫ ߠߊ߫ ߕߎ߬ߡߊ ߡߍ߲ ߠߊ߫ ߞߊ߬ߣߌ߲߬.

ߓߊ߬ߙߵߊ߬ ߣߊ߬ ߘߊ߫ ߞߍ߫ ߘߙߎ߬ߞߌ߬ߣߍ߲߬ ߞߊ߲ߓߊ ߘߌ߫ ߟߋ߬ ߞߐߟߊ߫ ߘߋ߬، ߓߊߏ߬߸ ߟߊ߬ߛߋ߬ߟߌ ߘߏ߫ ߞߍ߫ ߘߊ߫ ߞߌ߬ߢߍ߬ߞߏ߲߬ߞߏ߬ ߞߊߝߏ ߟߎ߬ ߟߊ߫ ߢߌ߲߬ߘߍ ߓߟߏ߫ (ߞߞߢ)߸ ߞߙߎߝߊߢߐ߲߯ߦߊ ߏ߬ ߡߍ߲ ߠߊߘߊ߲ߣߍ߲߫ ߓߙߎߞߌߣߊ߫ ߝߊ߬ߛߏ߬ ߓߟߏ߫߸ ߊ߬ ߣߌ߫ ߡߊ߬ߟߌ ߣߌ߫ ߖߋ߬ߟߌ߬ߓߊ߬ߘߎ߯߸ ߊ߬ߟߎ߬ ߓߐ ߞߐ ߣߌ߲߬ ߘߐ߫ ߛߘߋߦߊߥߏ ߘߐ߫، ߒ߬ߓߊ߬߸ ߓߙߎߞߌߣߊ߫ ߝߊ߰ߡߊ ߟߎ߬ ߞߊ߲߫ ߞߏ߫ ߊ߬ߟߎ߬ ߓߘߊ߫ ߛߊ߲ߡߊߞߎߟߎ߲ ߡߌ߬ߣߊ߬߸ ߞߵߊ߬ ߞߣߐ߫ ߡߐ߯ ߁߁ ߡߌ߬ߣߊ߬߸ ߊ߬ߟߎ߫ ߘߏ߲߭ ߞߏߛߐ߲߬ ߓߙߎߞߌߣߊ߫ ߛߊ߲ߡߟߊ ߘߐ߫ ߣߌ߫ ߘߌ߬ߢߍ߬ߟߊ߬ߢߌߣߌ߲߫ ߣߌ߫ ߘߌ߬ߢߍ߬ߡߊ߬ߞߏ߫ ߕߍ߫.

ߞߌ߬ߢߍ߬ߞߏ߲߬ߞߏ߬ ߞߊߝߏ ߟߎ߬ ߟߊ߫ ߢߌ߲߬ߘߍ ߞߵߊ߬ ߟߊߛߋ߫߸ ߡߍ߲ ߞߊ߲ߕߌ߮ ߦߋ߫ ߊߛߡߌ߫ ߜ߭ߏ߬ߦߌ߬ߕߊ߬ ߘߌ߫߸ ߞߏ߫: <<ߖߋ߬ߟߌ߬ߓߟߊ߬ߞߊ ߟߎ߬ ߟߊ߫  ߛߊ߲ߡߊߞߎߟߎ߲߫ C-130 ߘߐߜߍ߬ߘߍ߲߬ ߘߊ߫߸ ߝߏ߫ ߊ߬ ߖߌ߰ ߘߊ߫ ߓߐ߬ߓߐߖߎ߬ߟߊ߬ߛߏ߫ ߞߏߟߌ߲ߞߏߟߌ߲ ߕߟߋ߬ ߈ ߡߊ߬ ߓߙߊ߬ߒ߬ߘߐ߬ ߓߟߏ ߡߊ߬߸ ߞߵߊ߬ ߛߐ߬ߘߐ߲߬ ߊ߬ ߦߋ߫ ߓߙߎߞߌߣߊ߫ ߝߊ߬ߛߏ߫ ߖߡߊ߬ߣߊ ߞߎ߲߬ߘߐ߫.>> ߊ߬ߟߎ߫ ߞߊ߬ ߛߊ߲ߡߊߞߎߟߎ߲ ߠߊ߫ ߖߌ߰ߟߌ߬ ߞߏ ߟߋ߬ ߝߐ߫߸ ߞߊ߬ ߓߊ߲߫ ߞߵߊ߬ߟߎ߬ ߡߙߌߦߊ ߟߎ߬ ߘߌ߫߸ ߞߵߊ߬ ߛߐ߬ߘߐ߲߬ ߊ߬ߟߎ߬ ߡߊ߫ ߖߋ߬ߟߌ߬ߓߊ߬ߟߊ߫ ߖߡߊ߬ߣߊ ߡߙߌߦߊ߫ ߞߏߝߐ߫ ߊ߬ߟߎ߬ ߟߊ߫ ߞߎߡߊ ߘߐ߫.

ߞߊ߬ߕߎ߲߯߸ ߊ߬ ߦߋ߫ ߡߐ߰ ߛߌߦߊߡߊ߲߫ ߢߣߊ߫ ߞߏ߫ ߛߊ߲ߡߊߞߎߟߎ߲ ߣߌ߲߬ ߥߊߕߐ߫ ߕߘߍ߬ ߓߋߣߍ߲߫ ߠߋ߬߸ ߏ߬ ߟߋ ߞߎߡߊ ߦߋ߫ ߦߙߐ߫ ߛߌߦߊߡߊ߲߫ ߘߐ߫، ߒ߬ߓߊ߬߸ ߖߋ߬ߟߌ߬ߓߊ߬ߟߊ߫ ߣߌ߫ ߓߙߎߞߌߣߊ߫ ߖߡߊ߬ߣߊ߸ ߏ߬ ߟߎ߬ ߡߙߌߦߊ ߟߎ߫ ߟߋ߬ ߢߊߝߐߣߍ߲߫ ߣߌ߲߬.

ߓߍ߯ ߞߏ߬ߣߌ߲ ߞߵߊ߬ ߟߐ߲߫ ߞߘߐ߬ߡߊ߲߬߸ ߞߏ߫ ߓߍ߲߬ߓߊ߫ ߕߍ߫ ߖߋ߬ߟߌ߬ߓߟߊ߬ ߣߌ߫ ߞߌ߬ߢߍ߬ߞߏ߲߬ߞߏ߬ ߖߡߊߣߊ ߢߌ߲߬ ߠߎ߬ ߕߍ߫، ߓߊߏ߬߸ ߖߋ߬ߟߌ߬ߓߊ߬ߟߊ߫ ߞߊ߬ ߞߏߓߊ߫ ߟߋ߬ ߞߍ߫ ߊ߬ߟߎ߬ ߣߌ߫ ߛߘߋߦߊߥߏ ߕߍߟߊ ߝߙߋߞߋ ߘߐ߫߸ ߊ߬ߟߎ߬ ߟߊ߫ ߓߐߟߌ ߛߋ߲߭ߝߍ߬ ߂߀߂߃ ߟߊ߫߸ ߞߏߟߊ߲ߘߌߦߊ ߞߏߛߐ߲߬ ߛߘߋߦߊߥߏ ߓߟߏ߫.

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.