߂߀߂߅ ߣߍߣߍߓߊ ߕߟߋ߬ ߁߭ ߡߊ߬߸ ߖߡߊ߬ߣߊ߬ߘߋ߲ ߠߎ߬ ߟߊ߫ ߞߟߌߟߌ߫ ߛߌߦߊߡߊ߲ ߞߐߝߍ߬߸ ߞߏ߫ ߝߏ߫ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߦߋ߫ ߞߍ߫ ߡߊ߬ߡߌ߬ߘߊ߬ߟߌ߬ߟߊ ߘߌ߫߸ ߒ߬ߓߊ߬ ߖߌ߬ߣߍ߫ ߛߏ߬ߙߌ߬ߡߊ߬ߘߋ߲ ߠߎ߬ ߝߣߊ߫ ߓߘߊ߫ ߞߊ߬ߝߏ߬ ߞߎ߲ߕߌ߮ ߞߟߌ߫ ߘߋ߬߸ ߞߏ߫ ߊ߬ ߦߴߊ߬ ߕߟߏߡߊߟߐ߬ ߖߡߊ߬ߣߊ߬ߘߋ߲ ߠߎ߬ ߟߊ߫ ߡߎ߬ߕߎ߲߬.

ߖߌ߬ߣߍ߫ ߛߏ߬ߙߌ߬ߡߊ߬ߘߋ߲߬ ߝߊ߲ߞߊ ߛߌ߲ߘߌ ߛߊ߲߬ ߆߇ ߛߊ߲߬ߞߎ߲߬ߓߍ߲ ߛߋ߲߭ߝߍ߬߸ ߖߡߊ߬ߣߊ ߣߊ߲߬ߕߌ߰ ߞߎ߲ߕߌ߮ ߟߎ߬ ߓߍ߯ ߘߝߊߣߍ߲߫ ߕߘߍ߬ ߡߍ߲ ߞߣߍ ߞߊ߲߬ ߞߎߓߋ߫ ߡߏ߬ߤߊ߬ߡߍ߬ߘ ߅߲ ߠߊ߫، ߒ߬ߓߊ߬߸ ߘߊ߯ߘߐ ߞߎ߲߬ߕߌ߮ ߞߟߍ߬ߕߌ߰ ߌߓߙߊߤߌߡߊ߫ ߛߏߙߌ߬ ߓߊ߲߬ߜ߭ߎߙߊ߬ ߞߊ߬ ߞߎߡߊ߫ ߡߞߊߓߊߣߍ߲ ߝߐ߫ ߦߋ߲߬ ߠߋ߬߸ ߞߵߊ߬ ߓߍ߲߬ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߞߏ ߡߊ߬.

ߊ߬ ߞߊ߬ ߞߎߡߊ ߡߍ߲ ߠߎ߬ ߝߐ߫߸ ߊ߬ ߖߊ߲߬ ߕߘߍ߬ ߊ߬ ߝߐߕߊ ߟߎ߬ ߞߐ߫߸ ߡߍ߲ ߠߎ߬ ߓߍ߯ ߛߎߡߊ߲ߣߍ߲߫ ߕߍ߬ߘߍ߫ ߊ߬ ߓߟߏ߫ ߖߐ߲ߖߐ߲߫߸ ߊ߬ ߡߴߊ߬ߟߎ߬ ߝߐ߫ ߦߋ߲߬ ߕߋ߲߬ ߝߣߊ߫، ߊ߬ ߞߵߊ߬ ߦߌ߬ߘߊ߫ ߘߐ߬ߕߊߡߌ߲ ߞߊ߲ߕߌ߮ ߟߊ߫ ߞߏ߫ ߊ߬ ߦߴߊ߬ <<ߕߟߏߡߊߟߐ߬ ߖߌ߬ߣߍ߫ ߡߌ߬ߙߌ߲߬ߘߌ߫ ߖߘߍ߬ߕߌ߮ ߣߌߘߐߕߊ>> ߟߊ߫ ߛߍߣߍ߲߬، ߞߵߊ߬ ߛߊߓߎ ߞߍ߫ ߟߊ߬ߡߊ߰ ߘߊ߲ߘߐ ߡߍ߲ ߠߎ߬ ߓߘߊ߫ ߕߊ߬ߡߌ߲߫ ߕߋ߬ߟߋߝߌ߬ߟߊ ߣߌ߲߬ ߘߐ߫ ߖߡߊ߬ߣߊ ߞߣߐ߫߸ ߓߍ߯ ߦߋ߫ ߞߊ߬ߛߌ ߟߊ߫ ߞߏ߫ ߝߏ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߦߋ߫ ߞߍ߫ ߡߊ߬ߡߌ߬ߘߊ߬ߟߌ߬ߟߊ ߘߌ߫ ߞߊ߲ߕߌ߯ ߢߣߊߕߊߟߌ߫ ߣߊ߬ߕߐ ߘߐ߫.

ߖߡߊ߬ߣߊ ߣߊ߲߬ߕߌ߰ ߞߎ߲ߕߌ߮ ߟߊ߫ ߞߎߡߊ ߡߍ߲ ߘߏ߲߬ ߦߋ߫ ߣߌ߲߬߸ ߕߟߋ߬ ߘߊ߲ߘߐ߫ ߟߋ߬ ߢߣߊߕߊߟߌ ߡߊ߬ߡߌ߬ߘߊ߬ߟߌ ߕߐ߯ ߟߊߘߏ߲ ߠߊ߫ ߡߎ߬ߕߎ߲߬، ߞߟߍ߬ߕߌ߯ ߌߓߙߊߤߌߡߊ߫ ߛߏߙߌ߬ ߓߊ߲߬ߜ߭ߎߙߊ߬ ߞߏ߬ߣߌ߲ ߞߊ߬ ߕߡߊ߬ߖߌ ߓߐ߫ ߟߋ߬ ߞߊ߲ߕߌ߮ ߘߐ߫߸ ߞߏ߫ ߊ߬ߟߎ߬ <<ߓߘߊߡߊߢߌ߲>> ߠߋ߬ ߘߌ߫߸ ߊ߬ ߣߴߊ߬ߟߎ߬ <<ߓߌߣߍ߲߫>> ߞߊ߲ߕߌ߮ ߞߍ߬ߙߍߝߍ߬ ߕߎ߬ߡߊ߬ ߓߍ߯߸ ߓߊ߬ߙߌ߬ ߞߏ߫ ߢߊ ߞߊߣߊ߬ ߟߊߜߊ߲߫ ߖߡߊ߬ߣߊ߬ߘߋ߲ ߠߎ߬߬ ߞߊ߬ߛߌ߬ ߞߊ߲ ߞߐ߫ ߘߋ߬.

ߊ߬ ߞߵߊ߬ ߦߌ߬ߘߊ߬ ߞߏ߫: <<ߊ߲ ߧߴߊ߲ ߢߊ ߡߊ߬ ߖߐ߫߸ ߊ߲ ߘߏ߲߬ ߓߌߣߍ߲߫ ߞߵߊ߲ ߠߊ߫ ߛߏ߬ߙߌ߬ߡߊ߬ߘߋ߲߬ ߠߎ߬ ߡߐ߬ߟߐ߲ ߠߊߕߊ߲߬ߞߊ߬߸ ߞߊ߬ ߛߋ߫ ߞߍߞߋߟߋ߲ߘߌ ߛߌ ߓߙߎ߬ߞߍ߬ ߟߊ߫߸ ߞߊ߬ ߡߊ߬ߝߊ ߕߏ߫ ߊ߬ ߡߊ߬߸ ߏ߬ ߟߎ߬ ߡߍ߲ ߠߎ߬ ߦߋ߫ ߖߊ߬ߡߊ ߟߊ߫ ߛߎߘߊ߲ ߓߊ߬ߙߏ߲߬ߡߊ ߘߌ߫ ߞߊ߬ߣߌ߲߬.>> ߊ߬ ߞߵߏ߬ ߝߐ߫ ߞߵߊ߬ ߟߊ߫ ߞߎߡߊ ߞߎ߲߬ߘߏ߲ ߞߍ߫ ߣߊ߲߬ߕߌ߮ ߟߎ߬ ߞߟߌ ߟߋ߬ ߘߌ߫߸ ߞߣߐߜߍߦߊ ߡߊ߬ ߞߊ߲ߕߌ߮ ߦߋ߫߸ ߛߴߊ߬ ߘߴߊ߬ ߟߊ߫ ߜߘߌߛߌ߯ߟߌ ߘߊߓߊ߲߫ ߢߊ ߡߍ߲ ߡߊ߬.

ߣߊ߲߬ߕߌ߮ ߟߎ߬ ߟߊ߫ ߞߟߌߟߌ ߡߍ߲ ߦߋ߫ ߣߌ߲߬߸ ߣߌ߲߬ ߦߋ߫ ߞߏ߫ ߞߎߘߊ ߟߋ߬ ߘߌ߫ ߝߊߦߌߘߊ߫، ߖߡߊ߬ߣߊ ߓߘߍ߬ߓߘߍ߬ߟߌ ߘߏ߲߬ ߦߋ߫ ߢߊ߫ ߟߋ߬ ߡߊ߬ ߕߋ߲߬߸ ߡߍ߲ ߘߐߞߣߍߣߍ߲߫ ߕߍ߫، ߓߊߏ߬߸ ߡߐ߰ ߛߌ߫ ߡߊ߫ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߡߙߌߦߊ ߟߐ߲߫ ߡߎߣߎ߲߬߸ ߞߵߊ߬ ߓߍߍ߲߬ ߢߣߊߕߊߟߌ߫ ߣߊ߬ߕߐ ߣߌ߲߬ ߞߏߢߊ ߟߎ߫ ߡߊ߬، ߊ߬ ߞߏ߬ߣߌ߲߸ ߞߐ߬ߓߊ߬ߟߏ߲߸ ߂߀߂߅ ߣߍߣߍߓߊ ߕߋ߬ߟߋ߫ ߃ ߟߋ߬ ߦߋ߫ ߡߊ߬ߡߌ߬ߘߊ߬ߟߌ߬ߟߊ ߟߎ߬ ߟߊ߫ ߕߐ߯ ߟߊߘߏ߲ ߞߎ߲߬ߝߊ߮ ߘߌ߫.

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.