[audio_player id=4193]

ߝߐ߰ߓߍ߬ ߜߙߊ ߟߋ߬ ߞߍ߫ ߘߊ߫ ߞߊ߲ߞߊ߲߫ ߕߌ߲߬ߞߎߘߎ߲ ߝߐ߰ߓߍ߬ߦߊ߬ߟߊ ߟߎ߬ ߟߊ߫ ߓߏ߲ߓߊ ߟߊ߬ߘߍ߬ ߝߏ߮ ߞߣߐ߫ ߓߌ߬߸ ߡߍ߲ ߞߍ߫ ߘߊ߫ ߞߊ߲ߞߊ߲߫ ߓߌ߬ߟߊ߬ߢߐ߲߰ߡߊ ߣߌ߫ ߞߌ߬ߓߊ߬ߙߏ߬ߦߊ߬ߟߌ ߗߋߕߌ߮ ߓߟߏ߫߸ ߡߊ߬ߡߊ߬ߘߌ߬ ߞߊ߲ߛߊ߲ ߘߎ߲ߓߎߦߊ߫، ߊ߬ ߞߊ߬ ߝߐ߰ߓߍ߬ߦߊ߬ߟߊ ߟߎ߬ ߦߟߌߓߌ߬ߟߊ߬ ߞߎ߲߬ߘߏ߬ߣߌ߲߬ ߛߓߍ ߡߊߓߏ߲߬ߧߊ߬ ߞߏ ߟߋ߬ ߘߐ߫ ߜߘߋߜߘߋ߫. ߞߵߊ߬ ߦߌ߬ߘߊ߬ ߞߏ߫ ߞߎߡߊߛߏ߫ ߓߏߟߏ߲ߝߘߊ ߟߎ߬ ߓߘߊ߫ ߞߍ߫ ߞߎߡߊߛߏ߫ ߓߊ ߖߍ߬ߘߍߍ ߘߌ߫߸ ߏ߬ ߡߍ߲ ߣߌ߫ ߛߊ߬ߙߌ߬ߦߊ ߕߍ߫ ߓߍ߲߬ ߠߊ߫ ߢߐ߲߮ ߡߊ߬ ߞߊ߬ߣߌ߲߬.

ߏ߬ ߟߋ ߘߐ߫߸ ߛߟߊߕߌ߯ ߡߊ߬ߡߊ߬ߘߌ߬ ߞߊ߲ߛߊ߲ ߘߎ߲ߓߎߦߊ߫߸ ߊ߬ߟߋ ߡߍ߲ ߦߋ߫ ߕߌ߲߬ߞߎߘߎ߲ ߗߋߕߌ߮ ߘߌ߫߸ ߏ߬ ߞߵߊ߬ ߓߟߏߞߍ߫ ߕߐ߲ߛߋ߲ ߅߲ ߠߋ߬ ߟߊ߫߸ ߏ߬ ߡߍ߲ ߦߋ߫ ߞߎߡߊ߫ ߟߊ߫ ߞߎߡߊߛߏ߫ ߓߏߟߏ߲ߝߘߊ ߟߎ߫ ߞߊ߲߬، <<ߏ߬ ߟߎ߬ ߞߣߐߞߏ ߡߎ߰ߡߍ ߦߋ߫ ߞߎߡߊߛߏ߫ ߓߊ ߢߍߥߟߊ ߟߎ߫ ߟߋ߬ ߘߌ߫߸ ߊ߬ ߣߴߊ߬ ߓߍ߯ ߦߋ߫ ߝߢߐߞߎ߲߫ ߞߋߟߋ߲߫ ߠߋ߬ ߝߣߊ߫ ߘߌ߫.>> ߕߐ߲ߛߋ߲ ߆ ߝߣߊ߫ ߞߵߏ߬ ߞߊ߲߬ߟߊ߫ ߞߵߊ߬ ߦߌ߬ߘߊ߬ ߞߏ߫ ߓߏߟߏ߲ߝߘߊ ߏ߬ ߟߎ߬ ߟߊ߫ ߓߊ߯ߙߊ ߞߎ߲߬ߕߊ߮ ߦߋ߫ ߛߊ߲߭ ߛߊ߬ߓߊ߫ ߟߋ߬ ߘߌ߫߸ ߊ߬ߟߎ߬ ߘߌ߫ ߟߊߞߎߘߦߊ߫، ߏ߬ ߟߋ ߘߐ߫߸ ߞߏ߫ ߊ߬ߟߎ߬ ߓߘߊ߫ ߞߏ߫ ߟߎ߫ ߟߊߞߙߐ߬ߛߌ߫ ߏ߬ ߞߏߢߊ ߘߐ߫ ߕߋ߲߬ <<ߡߍ߲ ߠߎ߬ ߓߍ߲߬ߣߍ߲߬ ߕߍ߫ ߓߊ߯ߙߊ ߥߊ߫ ߢߊ ߡߊ߬߸ ߦߏ߫ ߛߊ߬ߙߌ߬ߦߊ߫ ߞߵߊ߬ ߝߐ߫ ߢߊ ߡߍ߲ ߡߊ߬.>> ߊ߬ ߓߊ߲߫ ߘߊ߫ ߞߊ߬ ߖߊ߬ߛߙߋ߬ߡߊ߬ߟߊ ߞߍ߫߸ ߞߏ߫ <<ߛߊ߬ߙߌ߬ߦߊ ߘߌ߫ ߟߊߕߊ߯ߡߊ߫߸ ߣߌ߫ ߢߣߊߕߐߡߐ߲ߠߌ߲߫ ߕߍ߫߸ ߞߎߡߊߛߏ߫ ߓߏߟߏ߲ߝߘߊ ߡߍ߲ ߺ ߍ ߺ ߡߍ߲߫ ߦߟߍ߬ߡߊ߲߬ߣߍ߲߫ ߞߊ߬ ߞߍ߫ ߞߎߡߊߛߏ߫ ߓߊ ߘߌ߫߸ ߊ߬ ߓߍ߯ ߘߊ ߓߍߣߊ߬ ߕߎ߲߯ ߜߙߏ߫.>> ߞߏ߫ ߓߊߏ߬߸ ߞߎߡߊߛߏ߫ ߓߏߟߏ߲ߝߘߊ ߣߌ߫ ߕߏ߲߬ߜߏ߬ ߟߊ߬ߘߊ߲ ߡߊ߲߫ ߞߊ߲߫ ߝߋߎ߫߸ ߏ߬ ߦߋ߫ ߓߊߖߎ ߖߍ߬ߘߍ ߕߊ ߟߋ߬ ߘߌ߫߸ ߦߏ߫ ߍߙߍߝߌ ߣߌ߫ ߍߙ.ߕߋ.ߖ߭ߋ ߟߎ߬ ߦߋ߫ ߢߊ ߡߍ߲ ߡߊ߬.

ߊ߬ ߞߊ߬ ߛߙߊ߬ߣߎ߲ ߡߍ߲ ߞߍ߫ ߊ߲ ߘߌ߫ ߝߐ߰ߓߍ߬ ߜߙߊ ߞߐ ߘߐ߫ ߞߣߍߡߊ߬߸ ߛߟߊߕߌ߯ ߘߎ߲߬ߓߎߦߊ߬ ߞߵߊ߬ ߦߌ߬ߘߊ߫ ߒ߬ ߠߊ߫ ߦߋ߲߬ ߞߏ߫: <<ߊ߲ ߓߍߣߊ߬ ߕߊ߯ߡߊ ߘߏ߫ ߛߌ߰ ߛߋ߲߬ߠߊ߫ ߕߋ߬ߟߋߝߌ߬ߟߊ ߣߌ߲߬ ߘߐ߫ ߜߋ߬ߟߎ߲߬ߠߌ߲߬ ߞߊ߲ߡߊ߬، ߞߌ߬ߓߊ߬ߙߏ߬ߘߊ߬ ߛߌ߫ ߕߍ߫ ߛߊ߬ߙߌ߬ߦߊ߬ ߟߊ߫ ߞߎߡߊ߫ ߝߐߣߍ߲ ߏ߬ ߡߊߓߏ߲߬ߧߊ߬ ߟߊ߫߸ ߞߏ߫ ߘߌ߫ ߟߊߕߐ߲߫ ߏ߬ ߟߊ߫ ߢߊ߫ ߡߊ߬߸ ߊ߬ ߣߌ߫ ߡߍ߲ ߞߊ߫ ߞߊ߲߫ ߛߊ߬ߙߌ߬ߦߊ߬ ߓߟߏ߫.>> ߊ߬ߟߎ߬ ߟߊ߫ ߕߊ߯ߡߊ ߏ߬ ߘߏ߲߬ ߞߍߕߐ߫ ߞߊ߲ߞߊ߲߫ ߡߎ߰ߡߍ ߕߌ߲߬ߞߎߘߎ߲ ߡߎ߰ߡߍ ߟߋ߬ ߞߣߐ߫.

ߜߊ߬ߙߊ ߞߎ߲߬ ߝߌߟߊߣߊ߲ ߘߐ߫ ߛߊ߫߸ ߛߟߊߕߌ߯ ߡߊ߬ߡߊ߬ߘߌ߬ ߞߊ߲ߛߊ߲ ߘߎ߲ߓߎߦߊ߫ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߛߓߍ ߘߏ߫ ߟߊߖߍ߲ߛߍ߲߫ ߘߊ߫ ߓߌ߬ߟߊ߬ߢߐ߲߰ߡߊ ߞߏߟߊߕߍ߯ ߛߊ߲ߘߐ ߓߟߏ߫߸ ߡߍ߲ ߦߋ߫ ߓߟߐߟߐ߫ ߞߊ߲߫ ߖߌߦߊߞߊ߲ ߠߎ߬ ߣߴߊ߬ ߞߎߡߊߛߏ ߟߎ߬ ߟߊߕߐ߲߫߸ ߊ߬ ߣߌ߫ ߝߐ߬ߓߍ߬ߦߊ߬ߟߊ ߡߍ߲ ߠߎ߬ ߡߊ߫ ߞߎ߲߬ߠߊ߬ߛߌ߮ ߟߊ߫ ߔߊ߬ߔߘߊ ߕߊ߬߸ ߏ߬ ߟߎ߬ ߕߍ߫ ߕߘߍ߬ ߟߊ߫ ߖߊ߲߬ߖߏ߲߬ߓߊ߬ ߛߌ߫ ߟߊ߬ߥߊ߲߬ߞߊ߲߬ߠߌ߲ ߓߊ߯ߙߊ ߘߐ߫ ߡߎ߬ߕߎ߲߬، ߊ߬ ߞߵߊ߬ ߦߌ߬ߘߊ߬߸ ߞߏ߫ ߊ߬ߟߋ ߝߣߊ߫ ߦߋ߫ ߞߎߡߊ߫ ߞߋߟߋ߲ ߏ߬ ߟߋ ߞߊ߲߬߸ ߊ߬ ߘߏ߲߬ ߦߋ߫ ߛߊ߬ߙߌ߬ߦߊ߬ ߝߐߣߍ߲ ߏ߬ ߟߎ߫ ߟߋ߬ ߟߊߕߊ߯ߡߊ߫ ߟߊ߫ ߝߣߊ߫. <<ߊ߲ ߧߋ߫ ߓߍ߯ ߦߟߌߓߌ߬ߟߊ߬ ߟߴߏ߬ ߟߋ ߘߐ߫߸ ߡߍ߲ ߺ ߍ ߺ ߡߍ߲߫ ߞߊ߬ ߡߙߌߘߐ ߏ߬ ߞߊߓߊ߲ߓߐ߫߸ ߊ߲ ߝߣߊ߫ ߞߍߕߐ߫ ߟߋ߬ ߛߊ߬ߙߌ߬ߦߊ ߏ߬ ߟߊߕߊ߯ߡߊ߫ ߟߊ߫ ߝߛߊߦߌ߫.>> ߞߊ߲ߛߊ߲߫ ߞߵߏ߬ ߟߋ ߦߌ߬ߘߊ߬.

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.