ߝߊߦߌߛߊߟ ߕߌ߲ߓߌߘߌ߲ߘߓߊ ߢߍߓߊ߯ ߝߟߐ ߓߘߊ߫ ߛߙߊ߬ߣߎ߲ ߕߊ߬ ߞߵߊ߬ ߦߌ߬ߘߊ߬ ߞߏ߫ ߓߘߍ߬ߓߘߍ߬ߟߌ ߟߊ߬ߥߊ߲߬ߞߊ߲߬ߠߌ߲߬ ߞߏ ߝߏߦߌ߬ ߞߊߣߊ߬ ߞߍ߫ ߊߟߊ߫ ߟߊ߫ ߦߙߐ߫ ߛߊߣߌ߲ߡߊ߲ ߞߣߐ߫ ߡߎ߬ߕߎ߲߬، ߏ߬ ߝߐ߫ ߘߴߊ߬ ߓߟߏ߫ ߘߐ߬ߛߊ߬ߙߌ߬ ߞߊߙߊ߲ ߘߏ߫ ߟߋ߬ ߞߐ ߘߐ߫ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߦߋ߫ ߕߏ߰ߝߏ ߘߏ߫ ߓߟߏ߫.

ߕߏ߰ߝߏ ߡߍ߲ ߕߐ߯ ߞߏ߫ ߞߊ߲ߓߍ߲ ߢߊߕߋߟߋ߲ߢߐ߲߯ߠߊ (ߟߊ߬ ߞߐ߲ߝ߭ߍߙߑߖ߭ߊ߲ߛ ߙߋߔߎ߳ߓߟߌߞߍ߲)߸ ߏ߬ ߟߋ ߞߊ߬ ߞߎ߬ߙߣߊ߬ ߞߊߙߊ߲ ߘߏ߫ ߛߌ߲߬ߝߏ߲߬ߧߊ߬ ߞߐߣߊߞߙߌ߫ ߕߌ߲ߓߌߘߌ߲ߘߓߊ ߝߊߦߌߛߊߟ ߞߣߐ߫ ߞߎߣߎ߲߬ ߛߌ߬ߣߌ߲߬ߟߏ߲ ߡߊ߬߸ ߞߵߏ߬ ߞߍ߫ ߊ߬ߟߎ߬ ߟߊ߫ ߓߊ߯ߙߊ߫ ߘߊߡߌߣߊ ߘߌ߫߸ ߦߏ߫ ߏ߬ ߢߐ߲߰ ߞߍ߫ ߘߊ߫ ߞߊ߲ߞߊ߲߫ ߞߣߐ߫ ߢߊ ߡߍ߲ ߡߊ߬ ߒߓߋ߲ߓߊߞߙߐ߫߸ ߊ߬ߟߎ ߦߋ߫ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߋ߬ ߞߐߡߊߓߌ߲ߓߌ߲߫ ߠߊ߫߸ ߞߎ߬ߙߊ߬ߣߊ ߝߣߊ߫ ߞߊ߬ߙߊ߲߬ߣߍ߲߫ ߏ߬ ߟߋ ߦߋ߫، ߒ߬ߓߊ߬߸ ߖߊ߲߬ߖߏ߲ ߏ߬ ߟߋ ߛߋ߲߭ߝߍ߬ ߛߊ߫߸ ߢߍߓߊ߯ ߟߊ߱ߖߌ߬ ߡߊߡߊߘߎ߫ ߛߊߟߌߥߎ߬ ߞߡߊ߬ߙߊ߫ ߞߊ߬ ߛߙߊ߬ߣߎ߲ ߕߊ߬ ߞߊ߬ ߞߎߡߊ߫ ߞߏ ߟߎ߬ ߥߊ߫ ߢߊ ߞߊ߲߬: ߞߏ ߺ ߏ ߺ ߞߏ߫ ߦߋ߫ ߓߘߍ߬ߓߘߍ߬ߟߌ߬ ߞߏ ߘߌ߫߸ ߛߐ߲߬ ߕߍ߫ ߞߍ߫ ߟߊ߫ ߏ߬ ߡߊ߬ ߡߌ߬ߛߙߌ ߟߊ߫ ߦߊ߲߬ ߡߎ߬ߕߎ߲߬.

 <<ߖߡߊ߬ ߟߊ߬ߘߍ߬ ߝߏߦߌ߬ ߡߎ߬ߕߎ߲߬߸ ߣߌ߫ ߞߎߡߊ߫ ߘߌ߫ ߞߍ߫ ߓߘߍ߬ߓߘߍ߬ߟߌ ߞߊ߲߬ ߊ߬ ߞߣߐ߫߸ ߝߏ߫ ߞߵߏ߬ ߞߍ߫ ߝߊ߲߬ ߜߘߍ߫ ߟߋ߬߸ ߝߊߦߌߛߊߟ ߡߌ߬ߛߙߌ ߞߏ߬ߣߌ߲ ߕߍ߫ ߝߋߎ߫.>> ߢߍߓߊ߮ ߞߵߏ߬ ߟߋ ߝߐ߫ ߛߏ߬ߛߏ߬ ߞߊ߲ ߘߐ߫ ߊ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߦߋ߫.

ߊ߬ ߘߏ߲߬ ߡߊ߫ ߞߎߡߊ ߣߌ߲߬ ߝߐ߫ ߡߊ߬ߟߍ߬ߟߌ߬ ߓߟߏ ߡߊ߬ ߝߋߎ߫߸ ߊ߬ ߞߵߊ߬ ߝߐ߫ ߟߋ߬ ߊ߬ ߡߊ߫ ߓߎ߬ ߕߏ߫ ߞߟߏ߫ ߡߊ߬، ߊ߬ ߞߊ߲߫ ߞߏ߫ ߓߍ߲߬ߒ߬ߛߋ߲߬ߡߊ߬ ߢߌ߬ߣߌ߲߬ߠߊ߫ ߣߕߊ߬ߓߊ߬ߕߌ߯ ߖߘߍ߬ߞߎ߲߬ߞߊ߬ߘߊ߲߬ߠߊ ߟߎ߬ ߦߋ߫ ߘߌ߯ߣߊ ߟߋ߬ ߞߍ߫ ߟߴߊ߬ߟߎ߬ ߖߎߝߊ߫ ߞߣߐߟߊ ߟߝߊ߫ ߝߋ߲ ߘߌ߫ ߡߎ߬ߕߎ߲߬.

<<ߘߏ߫ ߟߎ߫ ߦߴߊߟߊ߫ ߓߊ߬ߕߏ߬ ߟߊ߫߸ ߓߊ߬ߙߌ߬ ߊߟߊ߫ ߡߊ߲߫ ߘߴߏ߬ ߟߎ߬ ߦߋ߫، ߡߍ߲ ߠߎ߬ ߦߴߊ߬ߟߎ߬ ߜߛߋߞߘߎ߬ ߟߊ߫ ߓߙߊߡߊߖߊ߲ߓߊ߲ ߘߐ߫ ߡߐ߰ ߜߘߍ ߟߎ߬ ߦߋ߫ ߣߌ߲߬߸ ߊ߬ߟߎ߬ ߕߴߊ߬ ߞߍ߫ ߟߊ߫ ߞߎ߲߲߬ߕߌ߮ ߟߊ߫ ߘߌߦߊߢߍ߫ ߡߊ߬ ߘߋ߬߸ ߊ߰ ߞߍ߫ ߟߴߊ߬ߟߎ߬ ߓߟߏ߫ ߊ߬ߟߎ߫ ߖߍ߬ߘߍ ߟߊ߫ ߕߐ߬ߣߐ ߟߋ߬ ߞߏߛߐ߲߬.>> ߊ߬ ߞߵߏ߬ ߟߋ ߝߣߊ߫ ߝߐ߫.

ߊ߬ ߟߊ߫ ߞߎߡߊ ߟߊߕߎ߲߱ ߘߐ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߦߋ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߞߟߌ߫ ߟߊ߫ ߡߍ߲ ߡߊ߬߸ ߏ߬ ߟߋ ߖߡߊ߬ߣߊ ߟߊ߫ ߖߛߎ߬ߛߎߡߊ ߤߊߡߌ߲ ߛߌ߱ ߘߌ߫ ߓߍ߯ ߟߊ߫: <<ߒ ߧߴߊߟߊ߫ ߕߙߊ߫ ߟߊ߫߸ ߢߍߓߊ߮ ߓߍ߯ ߕߐ߯ ߘߐ߫߸ ߊ߬ ߦߋ߫ ߖߌ߬ߣߍ߬ ߟߊߞߊ߲ߘߊ߫ ߡߐ߰ ߞߏߙߏ߲ ߠߎ߫ ߡߊ߬، ߡߐ߰ ߛߌ߫ ߦߋ߫ ߖߊ߫ ߜߊߛߌ ߞߊ߲߬ ߊ߬ ߖߍ߬ߘߍ ߟߊ߫ ߣߊ߬ߝߊ ߞߏߛߐ߲߬߸ ߌ ߘߴߌ ߕߊ ߏ߬ ߛߐ߬ߘߐ߲߬ ߝߋߎ߫، ߓߊ߬ߙߵߌ ߦߴߊ߬ ߞߍ߫ ߖߌ߬ߣߍ߬ ߟߊ߫ ߖߛߎ߬ߛߎߡߊ ߟߋ߬ ߞߊ߲߬.>>

ߟߊ߲ߖߌ߬ ߡߊߡߊߘߎ߫ ߛߊߟߌߥߎ߬ ߞߡߊ߬ߙߊ߫ ߞߵߊ߬ ߦߌ߬ߘߊ߫ ߟߊ߬ߓߊ߲ ߘߐ߫ ߛߊ߫߸ ߞߏ߫ ߡߌ߬ߛߙߌ ߦߋ߫ ߛߊߟߌ ߣߌ߫ ߓߊ߬ߕߏ ߕߐ߭ ߟߎ߬ ߞߍ߫ ߦߙߐ ߟߋ߬ ߘߌ߫߸ ߓߊ߬ߙߌ߬ ߓߘߍ߬ߓߘߍ߬ߟߌ߬ ߞߎߡߊ ߞߍ߫ ߦߙߐ߫ ߕߍ߫ ߝߋߎ߫߸ ߥߟߊ߫ ߓߘߍ߬ߓߘߍ߬ߟߌ ߖߡߊ߬ ߟߊ߬ߘߍ߸ ߏ߬ ߦߙߐ߫ ߕߍ߫ ߡߎ߰ߡߍ߫.

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.