ߞߏ߲ߞߏߜߍ ߕߋ߬ߟߋ߫ ߂߁ ߓߊ߯ ߛߋ߫ ߞߏߕߊ߲߫߸ ߟߏ߲ߓߊ ߘߏ߫ ߟߋ߬ ߦߴߏ߬ ߘߌ߫ ߘߎߢߊ߫ ߞߣߐ߫߸ ߡߍ߲ ߦߋ߫ ߛߌ߲ߡߌ߲߫ ߞߊ߲ ߠߎ߬ ߕߐ߯ߟߊ߫ ߟߏ߲ߓߊ ߘߌ߫، ߒ߬ߓߊ߬߸ ߖߌ߬ߣߍ߫ ߟߞߊ߬ߙߊ߲߬ߠߌ߲߬ߠߊ߬ ߛߌߦߊߡߊ߲߫ ߠߋ߬ ߓߍ߫߸ ߡߍ߲ ߠߎ߬ ߡߙߌߦߊ ߦߋ߫߸ ߞߏ߫ ߟߐ߲ߠߌ߲ ߛߐ߬ߘߐ߲߬ ߛߌߟߊ ߟߎ߬ ߘߐ߫ ߣߐ߰ߡߊ߲ ߦߋ߫ ߛߌ߲ߡߌ߲߫ ߞߊ߲ ߠߋ߬ ߘߌ߫߸ ߊ߬ߟߋ ߟߋ߬ ߜߎ ߦߋ߫ ߖߡߊ߬ߣߊ ߟߊ߫ ߥߙߎߞߌ ߕߍߡߊߞߟߏ ߘߌ߫.
ߣߊ߲߬ߝߏ߯ ߌߛߎ߬ߡߊ߬ߌ߯ߟߊ߫ ߖߊ߰ߓߌ߫ ߞߵߊ߬ ߦߌ߬ߘߊ߬߸ ߞߏ߫ ߞߊ߲ ߝߘߊ߫ ߢߊ߫ ߕߍ߫ ߊ߬ ߝߐߓߊ߮ ߟߊ߫، ߝߊߦߌߘߊ߫߸ ߡߌ߬ߙߌ߲߬ߘߌ ߟߊ߫ ߢߣߊߡߦߊ ߘߍ߲ߣߍ߲߫ ߞߊ߲ ߠߋ߬ ߟߊ߫.
<<ߊ߲ ߛߍߥߊߣߍ߲߫ ߓߌ߬ ߞߏߛߓߍ߫؛ ߓߊߏ߬߸ ߊ߲ ߘߴߊ߲ ߓߊߘߋ߲ߡߊ ߟߎ߬ ߦߟߌߓߌ߬ߟߊ߬߸ ߊ߬ߟߎ߬ ߘߴߊ߬ ߟߐ߲߫߸ ߞߏ߫ ߡߐ߱ ߕߴߛߋ߫ ߞߍ߫ ߟߊ߫ ߝߏߦߌ߬ ߘߴߌ ߖߍ߬ߘߍ ߞߐ߫، ߡߐ߱ ߡߊ߫ ߘߎߢߊ߫ ߟߐ߲ߠߌ߲߫ ߛߌ߫ ߟߊߛߐ߬ߘߐ߲߬ ߌ ߟߊ߫ ߞߊ߲ ߞߐ߫، ߡߐ߱ ߡߊ߫ ߞߍ߫ ߞߏ߫ ߛߌ߫ ߞߊ߬ߟߊߡߊ߬ ߡߎߣߎ߲߬߸ ߌ ߟߊ߫ ߞߊ߲ ߢߌ߬ߣߊߡߊ߬، ߡߐ߱ ߞߍ߫ ߟߊ߫ ߞߏ ߓߍ߯ ߞߊ߬ߟߊߡߊ߬ ߌ ߟߊ߫ ߞߊ߲ ߠߋ߬ ߘߐ߫، ߏ߬ ߘߐ߫߸ ߊ߲ ߠߊ߫ ߞߊ߲ ߦߴߊ߲ ߖߍ߬ߘߍ ߘߏ߫ ߟߋ߬ ߘߌ߫߸ ߡߍ߲ ߠߊ߫ ߢߣߊߡߦߊ ߦߴߊ߲ ߖߍ߬ߘߍ ߟߊ߫ ߢߣߊߡߦߊ ߘߌ߫߸ ߡߍ߲ ߠߊ߫ ߛߊ߬ߦߊ ߦߴߊ߲ ߖߍ߬ߘߍ ߟߊ߫ ߛߊ߬ߦߊ ߘߌ߫، ߊ߲ ߠߊ߫ ߞߊ߲ ߕߎߣߎ߲ ߦߴߊ߲ ߖߍ߬ߘߍ ߕߎߣߎ߲ ߠߋ߬ ߘߌ߫.>>
ߊ߬ ߞߵߊ߬ ߦߌ߬ߘߊ߬ ߞߏ߫ ߛߌ߲ߡߌ߲߫ ߞߊ߲ ߠߎ߬ ߞߐߡߊߓߌ߲ߓߌ߲ ߣߴߊ߬ߟߎ߬ ߛߊ߲ߞߘߐߕߊ߭߸ ߏ߬ ߟߋ ߟߐ߲ߠߌ߲ ߖߘߌߖߘߌ߫ ߟߊ߫߸ ߞߊ߬ ߟߐ߲ߠߌ߲ ߠߊߛߐ߬ߘߐ߲ ߝߣߊ߫ ߣߐ߰ߦߊ߬.
<<ߞߏ ߺ ߏ ߺ ߞߏ߫ ߣߴߊ߬ ߞߊ߬ߙߊ߲߬ ߘߊ߫ ߥߊߟߌ߫ ߞߊ߲ ߘߐ߫߸ ߣߴߊ߬ ߡߊ߫ ߝߐ߫ ߖߡߊ߬ߣߊ߬ߘߋ߲ ߠߎ߬ ߛߌ߲ߡߌ߲߫ ߞߊ߲ ߘߐ߫߸ ߊ߬ ߕߍ߫ ߝߊ߰ߡߎ߲߫߸ ߊ߬ ߕߍ߫ ߓߟߏߦߊ߫ ߢߊ߫ ߛߌ߫ ߡߊ߬، ߞߊ߬ ߓߊ߲߫߸ ߛߌ߲ߡߌ߲߫ ߞߊ߲ ߠߎ߬ ߟߋ߬ ߖߍ߬ߘߍ ߛߘߊߘߐ߫߸ ߊ߲ ߧߋ߫ ߛߋ߫ ߟߊ߫ ߞߊ߲߫ ߜߘߍ ߟߎ߬ ߝߣߊ߫ ߞߊ߬ߙߊ߲߬ ߠߊ߫.>>
ߊ߬ ߞߵߊ߬ ߞߊ߲ߠߊߘߌ߫ ߞߎ߲߬ߠߊ߬ߛߌ߮ ߟߎ߫ ߡߊ߬߸ ߞߵߊ߬ ߓߍ߲߬ ߛߌ߲ߡߌ߲߫ ߞߊ߲ ߠߎ߬ ߟߊߘߏ߲߬ ߞߏ ߡߊ߬ ߖߡߊ߬ߣߊ ߞߊ߬ߙߊ߲߬ߕߊ ߟߎ߬ ߟߊ߫، ߊ߬ ߓߊ߲߫ ߘߊ߫ ߞߊ߬ ߕߊ߲߬ߘߏ߬ߟߌ ߟߊߛߋ߫ ߞߎ߲߬ߠߊ߬ߛߌ߮ ߡߊ߬߸ ߞߵߏ߬ ߞߎ߲߭ ߞߍ߫ ߝߊ߬ߛߏ߬ ߞߊ߲ ߠߎ߬ ߟߊߞߎ߲߬ߠߊ߬ߛߌ߰ߦߊ ߘߌ߫ ߖߌ߬ߣߍ߫ ߛߌ߰ߞߊ߲߬ ߞߎߘߊ ߞߣߐ߫߸ ߞߊ߬ ߓߊ߲߫ ߞߵߊ߬ ߦߌ߬ߘߊ߬ ߞߏ߫ ߖߡߊ߬ߣߊ ߓߊ߯ߙߊ߫ ߞߊ߲ ߦߋ߫ ߛߌ߲ߡߌ߲߫ ߞߊ߲ ߠߋ߬ ߘߌ߫߸ ߥߊߟߌ߫ ߞߊ߲ ߠߎ߬ ߕߍ߫ ߝߋߎ߫.
ߟߞߊ߬ߙߊ߲߬ߠߌ߲ ߡߊ߬ߘߎ߮߮ ߘߐ߫߸ ߓߊߛߓߊ߬ߕߌ߫ ߛߘߌ߬ߓߋ߫ ߞߊ߬ ߟߊߒߡߊ߫ ߞߟߊߒߞߋ߫ ߕߊ߬߸ ߞߵߊ߬ ߓߍ߲߬ ߘߋ߲ߣߍ߲ ߠߎ߬ ߟߊ߫ ߢߊߦߋߟߌ ߡߊ߬ ߞߊ߬ߙߊ߲߬ߓߏ߲ ߠߎ߬ ߞߣߐ߫.
<< ߣߴߌ ߦߴߊ߬ ߝߍ߬ ߞߵߊ߬ ߟߐ߲߫ ߞߏ߫ ߛߌ߲ߡߌ߲߫ ߞߊ߲߫ ߞߊߙߊ߲ ߠߋ߬ ߕߐ߬ߣߐ ߞߊ߫ ߓߏ߲߬߸ ߌ ߦߋ߫ ߦߙߌ߫ ߖߎ ߘߏ߫ ߢߍ߲߱ ߕߋ߬ ߛߌߛߍ߲߬، ߌ ߦߋ߫ ߓߊ߲߫߸ ߌ ߦߋ߫ ߢߍ߲߰ ߜߘߍ߫ ߟߎ߫ ߓߌ߬ߟߴߊ߬ ߞߘߐ߫߸ ߊ߬ ߞߍ߫ ߘߊ߫ ߝߊ߬ߟߌ ߘߌ߫ ߥߟߊ߫ ߓߊ߭߸ ߤߊߡߊ߲ߕߍ߫ ߛߊ߱، ߌߟߋ ߖߍ߬ߘߍ ߞߊߣߊ߬ ߛߓߍߟߌ߫ ߜߘߍ߫ ߛߌ߫ ߞߍ߫ ߊ߬ ߟߊ߫߸ ߌ ߦߋ߫ ߘߋ߲ߣߍ߲ ߠߎ߬ ߡߊߢߌ߬ߣߌ߲߬ߞߊ߬߸ ߞߏ߫ ߡߎ߲߬ ߦߋ߫ ߣߌ߲߬ߝ ߌ ߘߴߊ߬ ߦߋ߫߸ ߊ߬ߟߎ߫ ߖߍ߬ߘߍ ߘߌ߫ ߦߙߌ ߏ߬ ߕߐ߮ ߝߐ߫߸[ … ]>>
ߊ߬ ߞߊ߬ ߢߊߝߐߟߌ߫ ߞߍ߫ ߝߣߊ߫߸ ߞߵߊ߬ ߦߌ߬ߘߊ߬ ߞߏ߫ ߘߋ߲ߣߍ߲ ߦߋ߫ ߛߋ߫ ߟߊ߫ ߟߊ߬ߞߙߐ߬ߛߌ߬ߟߌ ߞߍ߫ ߟߴߊ߬ ߛߌ߲ߡߌ߲߫ ߞߊ߲ ߠߋ߬ ߘߐ߫߸ ߞߊ߬ ߢߊߦߋߟߌ ߞߍ߫ ߏ߬ ߘߐ߫߸ ߞߊ߬ ߛߋ߫ ߞߏ ߟߎ߬ ߛߌ߰ ߟߊ߫ ߢߐ߲߮ ߘߟߊ߫ ߊ߬ ߖߘߍ߬ ߦߋ߫߸ ߞߵߊ߬ ߛߐ߬ߘߐ߲߬ ߡߐ߰ ߡߊ߫ ߢߊߝߐߟߌ߫ ߞߍ߫ ߊ߬ ߦߋ߫. ߊ߬ ߓߊ߲߫ ߘߊ߫ ߝߣߊ߫߸ ߜߟߍ߬ߦߊ ߡߍ߲ ߠߎ߬ ߦߋ߫ ߥߊߟߌ߫ ߞߊ߲ ߞߊ߬ߙߊ߲ ߘߐ߫߸ ߞߊ߬ ߢߊߝߐߟߌ߫ ߞߟߊߒߞߋ߫ ߞߍ߫ ߏ߬ ߞߊ߲߬.
<< ߊ߬ ߝߟߐߡߊ߸ ߊ߬ߟߋ߫ ߣߍ߲߭ ߦߋ߫ ߛߴߊ߬ ߝߐ߫ ߟߊ߫ ߞߊ߲ ߏ߬ ߘߐ߫ ߡߎߣߎ߲߬߸ ߞߏ߫ ߦߙߌ، ߊ߬ ߝߌߟߊߣߊ߲߫߸ ߛߏ߬ߓߏ ߡߍ߲ ߦߴߊ߬ ߞߘߐ߫߸ ߌ ߦߴߊ߬ ߡߊߞߊ߬ߙߊ߲߬ߧߊ߫ ߛߏ߬ߓߏ ߏ߬ ߕߐ߮ ߝߐ߫ ߟߊ߫ ߞߊ߲ ߏ߬ ߘߐ߫، ߞߊ߬ ߓߊ߲߫߸ ߊ߬ ߦߋ߫ ߛߋ߫ ߛߏ߬ߓߏ ߏ߬ ߝߊ߬ߘߌ ߟߎ߬ ߕߐ߮ ߝߐ߫ ߟߊ߫.>>
ߊ߬ߟߋ ߟߊ߫ ߝߐߟߌ߫ ߘߐ߫߸ ߛߌ߲ߡߌ߲߫ ߞߊ߲߫ ߞߊߙߊ߲ ߠߋ߬ ߤߊߞߟߌ ߟߊߞߊ߬ ߟߊ߫߸ ߞߊ߬ ߞߊ߲߫ ߜߘߍ ߟߎ߬ ߝߣߊ߫ ߞߊ߬ߙߊ߲ ߞߍ߫ ߣߐ߰ߦߊ߬ ߝߋ߲ ߘߌ߫.
ߡߊ߬ߡߊ߬ߘߌ߬ ߛߓߊߞߎߘߊ߫ ߞߡߊ߬ߙߊ߫ ߞߊ߬ ߢߊߝߐߟߌ߫ ߞߍ߫ ߞߵߊ߬ ߓߍ߲߬ ߞߊ߲߫ ߜߘߍ߫ ߞߊߙߊ߲ ߣߌ߫ ߛߌ߲ߡߌ߲߫ ߞߊ߲߫ ߞߊߙߊ߲ ߘߊ߲߬ߝߘߊ߬ߓߐ ߡߊ߬، ߞߊ߬ ߓߊ߲߫ ߞߊ߬ ߞߏߟߊߒߞߏߡߊ߫ ߞߍ߫ ߞߵߊ߬ ߓߍ߲߬ ߛߌ߲ߡߌ߲߫ ߞߊ߲ ߣߌ߫ ߥߊߟߌ߫ ߞߊ߲ ߠߎ߬ ߡߊ߬.
<< ߣߴߌ ߞߊ߬ ߛߌ߲ߡߌ߲߫ ߞߊ߲߫ ߞߊߙߊ߲ ߕߊ߬߸ ߊ߬ߟߋ ߦߋ߫ ߛߓߍߟߌ߫ ߞߊߙߊ߲ ߠߋ߬ ߘߌ߫ ߊ߲ ߓߟߏ߫߸ ߊ߬ ߕߍ߫ ߞߎߡߊ ߟߎ߬ ߞߘߐ ߞߊ߬ߙߊ߲߬ ߘߌ߫، [ … ] ߌ ߓߊ߯ ߥߊߟߌߞߊ߲ ߕߊ߬ ߛߌߛߍ߲߬߸ ߣߴߌ ߥߊ߫ ߘߊ߫ ߘߋ߲ߣߍ߲ ߘߌ߫ ߥߊߟߌ߫ ߞߊ߲ ߞߊ߬ߙߊ߲߬ߕߊ ߟߊ߫߸ ߞߏ߫ ߝߌ߬ߟߊ߫ ߟߋ߬ ߦߴߊ߬ ߡߊ߬ ߦߋ߲߬، ߝߟߐߡߊ ߡߎߣߎ߲߬߸ ߝߏ߫ ߊ߬ ߦߋ߫ ߞߊ߲ ߏ߬ ߖߍ߬ߘߍ ߓߊߖߎ ߟߐ߲߫ ߝߟߐ߫߸ ߏ߬ ߞߐߝߍ߬߸ ߊ߬ ߦߋ߫ ߛߓߍߟߌ ߝߣߊ߫ ߞߊ߬ߙߊ߲߬߸ ߞߊ߬ ߣߊ߬ ߟߐ߲ߞߏ ߞߊ߬ߙߊ߲߫ ߏ߬ ߞߐߝߍ߬ ߛߊ߫.>>
ߊ߬ߟߋ߫ ߞߵߊ߬ ߦߌ߬ߘߊ߫ ߟߋ߬ ߝߊߦߌߘߊ߫߸ ߞߏ߫ ߖߡߊ߬ߣߊ ߟߊ߫ ߥߙߎߞߌ ߘߍ߲ߣߍ߲߫ ߊ߬ ߟߊ߫ ߘߐ߬ߖߊ ߟߋ߬ ߟߊ߫߸ ߞߊ߬ ߛߋ߫ ߛߌ߲ߡߌ߲߫ ߞߊ߲ ߠߎ߬ ߟߊߘߏ߲߬ ߠߊ߫ ߖߡߊ߬ߣߊ ߞߊ߬ߙߊ߲߬ߕߊ ߟߎ߬ ߟߊ߫.
ߊ߲ ߛߋ߫ ߘߊ߫ ߣߝߊ߬ߖߌ߫ ߛߏ߬ߙߌ߬ ߞߐ߲ߘߍ߫ ߡߊߛߐ߬ߘߐ߲߬ ߠߊ߫ ߜߋߟߋ߲ߜߋߟߋ߲ ߛߌߟߊ ߝߍ߬߸ ߊ߬ߟߋ ߦߋ߫ ߗߋߕߌ߯ ߛߙߍߞߍ ߟߋ߬ ߘߌ߫ ߟߞߊ߬ߙߊ߲߬ߠߌ߲ ߞߏߕߌ߯ߘߊ ߟߊ߫، ߊ߬ ߞߊ߬ ߛߌ߲ߡߌ߲߫ ߞߊ߲ ߠߎ߬ ߟߐ߬ߘߎ߮ ߢߊߝߐ߫ ߟߐ߲ߞߏ ߟߊ߫ ߞߎ߲߬ߠߊ߫߸ ߊ߬ ߣߌ߫ ߛߌ߲߬ߝߏ߲߬ߘߊ ߟߎ߬ ߟߊ߫ ߞߎ߲߬ߠߊ߫، ߊ߬ ߛߐ߰ ߘߊ߫ ߛߌ߲ߡߌ߲߫ ߞߊ߲ ߖߍ߬ߘߍ ߞߘߐ ߘߐߕߋ߭ ߟߋ߬ ߡߊ߬ ߡߎߣߎ߲߬.
<< ߛߌ߲ߡߌ߲ߞߊ߲ ߦߋ߫ ߞߊ߲߫ ߠߋ߬ ߘߌ߫ ߸ ߡߐ߱ ߣߐ߬ ߞߊ߲߫ ߝߟߐ ߡߍ߲ ߞߊ߬ߙߊ߲߬ ߠߴߊ߬ ߘߋ߲ߣߍ߲ߠߡߊ ߊ߬ ߥߟߏߣߊ ߥߟߴߊ߬ ߟߊ߫ ߞߐߙߍ ߞߣߐ߫ ߸ ߞߵߊ߬ ߝߐ߫. ߊ߬ߟߋ ߟߋ߬ ߣߊ߫ ߞߊ߲ ߣߌ߫ ߓߊߘߋ߲ߧߊ߫ ߞߊ߲ ߘߌ߫ ߸ ߘߋ߲ߣߍ߲ ߕߟߏ ߛߐ߰ ߘߊ߫ ߞߊ߲ ߡߍ߲ ߡߍ߲ ߡߊ߬ ߟߎ ߞߣߐ߫.>>
ߊ߬ ߞߊ߬ ߘߏ߫ ߝߐ߫ ߛߌ߲ߡߌ߲߫ ߞߊ߲ ߠߎ߬ ߕߐ߬ߣߐ ߝߣߊ߫ ߞߊ߲߬߸ ߞߵߊ߬ ߓߍ߲߬ ߟߐ߲ߠߌ߲ ߕߊ߫ ߝߊ߲߭ ߡߊ߬. <<ߕߐ߬ߣߐ ߡߍ߲ ߦߋ߫ ߛߌ߲ߡߌ߲ߞߊ߲ ߠߊ߫ ߟߞߊ߬ߙߊ߲߬ߠߌ߲ ߘߊߞߎ߲ ߘߐ߫ ߸ ߏ߬ ߟߋ ߘߋ߲ߣߍ߲ ߞߎ߲߬ߣߍ ߣߴߊ߬ ߦߟߌ ߘߊߦߍ߬ߟߍ ߘߌ߫ ߞߊ߬ߞߘߐ߫ ߞߵߊ߬ ߓߍ߲߬ ߛߌ߲ߡߌ߲ߞߊ߲ ߡߊ߬. ߞߊ߬ߙߊ߲ ߣߌ߫ ߟߐ߲ߣߌ߲ ߣߌ߫ ߞߏߟߐ߲ ߣߌ߫ ߟߐ߲ߞߏ ߟߊߛߐ߬ߘߐ߲߬ ߘߌߡߊ߲߫ ߊ߬ߟߋ ߟߋ߬ ߝߍ߬ ߞߊ߬ ߕߊ߬ߡߌ߲߬ ߥߊߟߌߞߊ߲ ߞߊ߲߬ ߔߊߣߊ߲ߥߎ߫߹>>
ߊ߬ ߟߊ߫ ߝߐߟߌ߫ ߘߐ߫߸ ߞߏ߫ ߎ߳ߣߍߛߑߞߏ ߟߋ߬ ߦߋ߫ ߡߊ߲߬ߕߏ߲߬ ߠߊߘߍ߬ߣߍ߲ ߠߎ߬ ߟߊ߫ ߛߌ߲߬ߝߏ߲߬ߧߊ߬ߟߌ ߘߌ߫ ߟߊ߬ߞߟߏ߬ߞߟߏ߬ߟߌ ߣߌ߫ ߟߐ߲ߞߏ ߣߌ߫ ߟߐ߲ߣߌ߲ߦߊ ߞߊߡߊ߲ ߠߎ߬ ߘߐ߫. ߎ߳ߣߍߛߑߞߏ ߖߎ߭ ߛߌ߰ߣߍ߲߬ ߘߎߢߊ߫ ߟߐ߲ߣߌ߲ߦߊ ߣߴߊ߬ ߞߊ߲ ߠߎ߬ ߟߊߡߊ߲߬ߘߌ ߣߌ߫ ߟߐ߲ߞߏ ߣߌ߫ ߟߊ߬ߞߟߏ߬ߞߟߏ߬ߟߌ ߟߊߖߘߌߥߊ ߛߌߟߊ߫ ߛߎߘߎ߲ ߠߎ߬ ߟߊߥߊ߲߬ߞߊ߲߬ ߞߊ߲ ߠߋ߬ ߡߊ߬.
ߊ߬ ߞߊ߬ ߦߟߌߓߌߟߊߟߌ߫ ߞߟߏߡߊ ߘߏ߫ ߞߍ߫߸ ߞߵߊ߬ ߓߍ߲߬ ߛߌ߲ߡߌ߲߫ ߞߊ߲ ߠߎ߬ ߘߊ߲ߞߎ߲߫ ߞߏ ߡߊ߬ ߞߎ߲߬ߠߊ߬ߛߌ߮ ߓߟߏ߫. <<ߖߌ߬ߣߍ߬ ߞߊ߲ߓߍ߲ ߛߌ߰ߞߊ߲߬ ߞߎߘߊ ߕߐ߲ߛߋ߲ ߅߲ ߓߘߊ߫ ߝߊ߬ߛߏ߬ ߞߊ߲ ߠߎ߬ ߟߌ߬ߤߟߊ ߛߊ߲ߞߘߐߕߊ߬ ߛߊ߬ߙߌ߬ߦߊ߬ ߓߟߏߡߊ߬. ߡߐ߰ ߞߊ߫ ߞߊ߲߫ ߞߊ߬ ߦߟߌߡߊߘߌߦߊ߫ ߛߌ߲ߡߌ߲ߞߊ߲ ߠߎ߬ ߟߊ߫ ߛߌߣߌ߲ߢߍߛߌ߮ ߘߐ߫ ߝߊ߬ߛߏ ߞߎ߲߬ߠߊ߬ߛߌ߮ ߟߊ߫ ߢߍߥߟߊ߫ ߞߎߘߊ߫ ߣߊ߬ߕߐ ߟߎ߬ ߘߐ߫.>>
ߛߌ߲ߡߌ߲߫ ߞߊ߲ ߠߎ߬ ߟߏ߲ߓߊ߫ ߞߏ ߣߌ߲߬ ߕߍ߰ߣߍ߲ ߞߵߊ߬ ߓߐ߫ ߊ߬ ߟߊ߫ ߞߏ߲ߞߏߜߍ ߕߋ߬ߟߋ߫ ߂߁ ߣߌ߲߬ ߡߊ߬߸ ߛߌ߲ߡߌ߲߫ ߞߊ߲ ߠߎ߬ ߟߊߘߏ߲߭ ߟߞߊ߬ߙߊ߲߬ߠߌ߲ ߢߍߥߟߊ ߘߐ߫߸ ߏ߬ ߟߋ ߝߣߊ߫ ߞߎߡߊ ߦߋ߫ ߛߍ߬ߘߏ߲߬ߠߊ ߓߍ߯ ߘߊ߫ ߡߎ߬ߕߎ߲߬، ߞߊ߬ߕߎ߲߯߸ ߊ߲ ߢߊ ߛߙߋߦߊ߫ ߘߊ߫ ߡߍ߲ ߡߊ߬ ߞߣߍ ߞߊ߲߬߸ ߛߌ߲ߡߌ߲߫ ߞߊ߲ ߠߎ߬ ߕߍ߫ ߟߊ߬ߣߐ߰ ߝߋ߲߫ ߘߌ߫ ߥߙߎߞߌ ߘߐ߫߸ ߊ߬ߟߎ߬ ߦߋ߫ ߥߙߎߞߌ ߓߊߖߎ ߟߋ߬ ߘߌ߫.
ߟߏ߲ߞߊߛߌߦߊ߫ ߞߡߊ߬ߙߊ߬߸ ߛߌߕߊ߲߬ ߞߊ߬ߓߊ߸ ߞߵߊ߬ ߘߌ߫ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߡߊ߬.
Aucun commentaire pour le moment.