ߞߊ߲ߞߊ߲߫: ߕߋ߬ߟߋ߫ ߂߅ ߞߣߐ߫߸ ߢߊߘߌߡߌ߲ߕߐ߫ ߡߐ߰ ߅߀߀ ߟߊ߫ ߝߙߊ߬ߝߙߊ ߓߘߊ߫ ߘߐߓߛߏ߫ ߝߌߛߙߌ ߟߊ߫

ߞߵߊ߬ ߕߊ߬ ߞߏߟߌ߲ߞߏߟߌ߲ ߕߟߋ߬ ߁߭ ߡߊ߬ ߞߵߊ߬ ߛߌ߰ ߊ߬ ߕߋ߬ߟߋ߫ ߂߅ ߢߌ߲߬ ߠߊ߫߸ ߞߊ߲ߞߊ߲߫ ߕߌ߲߬ߞߎߘߎ߲ ߘߊ߲ߘߊߛߏ ߞߊ߬ ߓߙߊߡߊߖߊ߲ߓߊ߲߫ ߠߋ߬ ߛߌ߰ ߛߋ߲߬ߠߊ߫߸ ߞߊ߬ ߢߊߘߌߡߌ߲ߕߐ߫ ߡߐ߰ ߅߀߀ ߟߊ߫ ߝߙߊ߬ߝߙߊ ߘߊ߲ߘߊ߫ ߝߌߛߙߌ ߟߊ߫، ߡߍ߲ ߛߌ߰ ߘߊ߫ ߛߋ߲߬ߠߊ߫ ߞߏ߲߬ߓߏ ߝߋߙߋ߲ߓߊ߫ ߞߡߊ߬ߙߊ߬ ߓߟߏ߫߸ ߞߵߏ߬ ߞߍ߫ ߊ߬ ߕߊ߫ ߡߊ߬ߜߍ߲ ߘߌ߫ ߖߡߊ߬ߣߊ ߟߊߥߙߎߞߌ ߘߐ߫߸ ߊ߬ ߣߌ߫ ߞߊ߬ ߞߊ߲ߕߌ߮ ߞߐߡߊߓߌ߲ߓߌ߲߫ ߊ߬ ߟߊ߫ ߢߍߥߟߊ߫ ߓߘߍ ߟߎ߬ ߘߐ߫، ߓߙߊߡߊߖߊ߲ߓߊ߲ ߣߌ߲߬ ߛߊߓߎ߫ ߟߊ߫߸ ߡߐ߰ ߅߀߀ ߣߌ߫ ߞߐ߫ ߢߊ ߟߊߞߊ߬ ߘߊ߫߸ ߞߵߊ߬ߟߎ߬ ߓߐ߫ ߝߎߦߋ߲ߧߊ ߘߐ߫߸ ߞߵߊ߬ߟߎ߫ ߓߌ߬ߟߊ߬ ߜߍ ߘߐ߫.

ߞߊ߲ߞߊ߲߫ ߘߊ߲ߘߊߛߏߓߊ ߞߏߞߏ߫ ߞߣߐߟߊ ߘߐߞߍ߫ ߘߊ߫ ߖߊ߲߬ߖߏ߲ ߠߋ߬ ߟߊ߫ ߓߌ߬ ߓߌߟߏ߲ ߣߌ߲߬ ߡߊ߬ ߂߀߂߅ ߞߏߟߌ߲ߞߏߟߌ߲ ߕߋ߬ߟߋ߫ ߂߅߸ ߣߊߟߌ߬ߡߎ߲߫ ߓߙߊߡߊߖߊ߲ߓߊ߲ߓߊ ߘߏ߫ ߞߎ߲߬ߘߏ߲ ߘߌ߫߸ ߝߙߊ߬ߝߙߊ ߘߐߓߛߏ ߘߌ߫ ߝߌߛߙߌ ߟߊ߫، ߊ߬ ߞߏ ߘߊߡߌ߬ߣߊ߬ ߘߊ߫ ߞߏߟߌ߲ߞߏߟߌ߲ ߕߟߋ߬ ߁߭ ߟߋ߬ ߡߊ߬߸ ߖߊ߬ߕߋ߬ߘߐ߬ߛߌ߰ ߓߟߋߓߟߋ ߣߌ߲߬ ߡߍ߲ ߞߍ߫ ߘߊ߫ ߕߙߎ߬ ߘߌ߫ ߞߊ߬ ߡߐ߰ ߅߀߀ ߞߍ߫ ߦߋߟߌߟߊ ߘߌ߫ ߞߊ߲ߞߊ߲߫ ߡߙߊ߬ߓߊ߰ߘߊ߬ ߟߏ߯ߟߎ ߞߣߐ߫߸ ߞߵߊ߬ ߕߊ߬ ߛߌ߯ߙߌ߲߫ ߡߊ߬߸ ߞߊ߬ ߣߊ߬ ߡߊ߲߬ߖߊ߲߬ߠߊ߬ ߣߌ߫ ߞߙߎ߬ߛߊ߬ ߣߌ߫ ߞߊߦߌߙߊߥߊ߯ߣߍ߲߫ ߘߐ߫߸ ߞߵߊ߬ ߟߊߓߊ߲߫ ߞߊ߲ߞߊ߲߫ ߖߍ߬ߘߍ ߡߊ߬، ߏ߬ ߟߎ߬ ߢߊ߫ ߘߌߡߌ߲ߕߐ ߟߎ߬ ߘߴߊ߬ ߝߐ߫ ߓߌ߬ ߞߏ߫ ߊߟߊ߫ ߕߊ߲ߘߏ߫.

ߣߌ߲߬ ߞߏ ߞߍ߫ ߘߊ߫ ߞߏ߲߬ߓߏ ߝߋߙߋ߲ߓߊ߫ ߞߡߊ߬ߙߊ߬ ߟߊ߫ ߟߊ߬ߛߌ߲߬ߠߌ߲ ߠߋ߬ ߞߣߐߡߊ߬߸ ߊ߬ߟߋ ߡߍ߲ ߦߋ߫ ߘߐ߬ߓߛߏ߬ߟߌ߬ߟߊ߫ ߘߌ߫ ߢߊߘߊ߲ߘߊ ߘߐ߫߸ ߊ߬ ߣߌ߫ ߞߊ߲ߞߊ߲߫ ߘߊ߲ߘߊߛߏߓߊ ߝߘߏ߬ߓߊ߬ ߗߋߕߌ߮ ߟߋ߬ ߦߴߊ߬ ߘߌ߫، ߊ߬ ߞߊ߬ ߣߌ߲߬ ߞߏ ߟߊߥߟߌ߬ ߡߙߌߦߊ ߡߍ߲ ߡߊ߬߸ ߏ߬ ߓߐ߫ ߘߊ߫ ߟߋ߬ ߜߍߟߊ߫߸ ߝߏ߫ ߞߊ߬ ߕߊ߬ߡߴߊ߬ ߖߍ߬ߘߍ ߟߐ߲߫ ߦߙߐ ߞߊ߲߬، ߓߊ߸ ߊ߬ ߟߊߥߟߌ߬ ߘߊ߫ ߡߐ߰ ߅߀߀ ߟߋ߬ ߟߊ߫ ߞߏ ߡߊ߬߸ ߏ߬ ߥߊ߫ ߘߴߊ߬ ߟߐ߬ ߤߊ߲߯ ߡߐ߰ ߆߁߃ ߘߐ߫، ߝߣߊ߫߸ ߖߊ߲߬ߞߊ߬ߙߏ߬ߕߐ߬ ߜߘߍ߫ ߟߎ߫ ߕߊ߬ ߘߴߊ߬ߟߎ߬ ߓߟߏ߫߸ ߝߙߊ߬ߝߙߊ߫ ߕߎ߲߬ ߕߍ߫ ߡߍ߲ ߠߎ߬ ߢߊ ߞߊ߲߬، ߡߐ߰ߦߊ ߤߌߣߊ ߡߊ߬߸ ߏ߬ ߟߎ߬ ߡߊߘߍ߬ߡߍ߲߬ ߘߴߊ߬ߟߎ߬ ߟߊ߫ ߞߣߐ߬ߘߐ߬ߝߟߌ ߘߐ߫.

ߓߌ߬ ߖߊ߲߬ߖߏ߲ ߣߌ߲߬ ߘߐ߫߸ ߛߏ ߡߐ߰ߘߐ߬ߜߍ߬ ߛߌߦߊߡߊ߲߫ ߕߘߍ߬ ߞߣߍ ߞߊ߲߬߸ ߞߵߏ߬ ߟߊ߫ ߡߙߊ߬ߦߊ߬ߞߊ߲ߞߋ ߟߎ߫ ߞߊ߲߬، ߕߌ߲߬ߞߎߘߎ߲ ߞߎ߲߬ߠߊ߬ߛߌ߰ߟߊ ߞߐߦߌߘߊ ߕߘߍ߬ ߞߣߍ ߞߊ߲߬߸ ߣߊߟߌ߬ߡߎ߲߬ ߘߊ߯ߘߐ ߗߋߕߌ߮ ߘߌ߫، ߞߊ߲ߕߌ߮ ߟߊ߫ ߞߐߙߍ ߝߣߊ߫ ߕߘߍ߬ ߞߣߍ ߞߊ߲߬߸ ߏ߬ ߡߍ߲ ߞߐߦߌ߬ߘߊ߬ ߘߊ߫ ߓߐ߬ߟߐ߲߬ߞߊ߫ ߞߊ߬ߡߊߙߊ߬ ߊߦߌߛߊ߬ ߘߎ߲߬ߓߎ߬ߦߊ߬ ߓߟߏ߫، ߏ߬ ߕߊ߲߬ߘߏ߬ ߘߊ߫ ߦߋ߲߬ ߓߌ߬߸ ߊ߬ ߞߍ ߘߐ߫ ߞߊ߬ ߖߊ߲߬ߞߊ߬ߙߏ߬ߕߐ ߘߏ߫ ߟߎ߫ ߟߊ߫ ߓߊߛߌ߫ ߞߏ ߖߐ߰ߣߍ ߕߊ߬ ߞߊ߲ߞߊ߲߫ ߞߣߐ߫.

ߞߟߌߣߍ߲ ߠߎ߬ ߟߊߛߣߍ ߣߌ߫ ߖߊ߬ߡߊ ߟߊߛߌ߱ ߘߐ߫߸ ߞߊ߲ߞߊ߲߫ ߞߊ߬ߝߏ߬ߙߋ߲ ߗߋߘߋ߲߫ ߓߟߏߡߊߞߊ߬ߣߍ߲ ߞߊ߲ߕߌ߮ ߞߊ߬ ߖߊ߬ߕߋ߬ߘߐ߬ߛߌ߮ ߣߌ߲߬ ߕߊ߲߬ߘߏ߬ ߞߏߛߓߍ߫، <<ߛߟߊߕߌ߮ ߣߌ߫ ߓߐ߬ߟߐ߲߬ߞߊ ߟߎ߬߸ ߞߊ߬ߝߏ߬ߙߋ߲ ߞߏߟߊߕߍ߮ ߟߎ߬ ߕߐ߯ ߘߐ߫߸ ߊ߬ ߣߌ߫ ߞߊ߲ߞߊ߲ߞߊ ߓߍ߯، ߒ ߧߋ߫ ߕߊ߲߬ߘߏ߬ߟߌ߬ ߞߙߍߞߙߍߣߍ߲߫ ߠߊߛߋ߫ ߟߊ߫ ߞߏ߲߬ߓߏ ߝߋߙߋ߲ߓߊ߫ ߞߡߊ߬ߙߊ߫ ߡߊ߬ ߣߌ߲߬ ߞߏ ߘߐ߫߸ ߊߘߡߊߦߊ ߡߊߘߍ߬ߡߍ߲ ߞߏߛߐ߲߬ ߊ߬ ߖߍ߬ߘߍ ߖߎߝߘߊ ߟߊ߫، ߊ߬ ߘߏ߲߬߸ ߌ ߓߊ߯ ߡߐ߰ ߞߋߟߋ߲߫ ߢߊ ߟߊߞߊ߬߸ ߌ ߓߘߊ߫ ߘߋ߲ߓߦߊ߫ ߞߋߟߋ߲߫ ߠߋ߬ ߢߊ ߟߊߞߊ߬ ߏ߬ ߘߌ߫، ߣߴߌ ߘߏ߲߬ ߞߊ߬ ߞߐߙߍ߫ ߞߋߟߋ߲ ߢߊ ߟߊߞߊ߬߸ ߏ߬ ߦߋ߫ ߞߍߢߐ߲߯ߝߍ ߛߌ߲ߛߌ߲߫ ߠߊ߫ ߟߋ߬ ߞߌ߲߬ߘߊ ߟߎ߬ ߣߌ߫ ߣߐ߬ߘߎ߮ ߟߎ߬ ߣߌ߫ ߛߌ߰ߘߊ ߟߎ߬ ߞߣߐ߫.>> ߊ߬ ߞߵߏ߬ ߟߋ ߝߐ߫.

ߞߊ߲ߞߊ߲߫ ߡߙߊ߬ߓߊ߮ ߞߐߦߌߘߊ ߞߊ߬ ߣߌ߲߬ ߞߏ ߕߊ߲߬ߘߏ߬߸ ߞߵߊ߬ ߦߌ߬ߘߊ߬ ߞߏ߫ <<ߣߌ߲߬ ߦߋ߫ ߞߏ߲߬ߓߏ ߝߋߙߋ߲ߓߊ߫ ߞߡߊ߬ߙߊ߬ ߟߊ߫ ߥߊ߬ߣߌ߲߬ߞߋ߬ ߢߌ߬ߡߊ߬ߦߊ ߟߋ߬ ߦߌ߬ߘߊ߬ ߟߊ߫߸ ߞߊ߲ߞߊ߲߫ ߕߌ߲߬ߞߎߘߎ߲ ߛߌ߰ߓߊ߮ ߟߎ߬ ߤߊߡߌ߲ ߦߊ߬ߙߊ ߘߐ߫.>>

ߞߏ߲߬ߓߏ ߝߋߙߋ߲ߓߊ߫ ߖߍ߬ߘߍ ߞߊ߬ ߛߙߊ߬ߣߎ߲ ߕߊ߬߸ ߞߵߊ߬ ߞߏ ߕߊ߬ߡߌ߲߬ ߢߊ ߢߊߝߐ߫߸ ߊ߬ ߟߊߥߟߌ߬ߣߴߊ߬ ߓߟߏ߫ ߡߍ߲ ߡߊ߬߸ ߊ߬ ߣߴߊ߬ ߛߋ߫ ߘߊ߫ ߟߊ߬ߢߌߣߌ߲ ߡߍ߲ ߠߎ߬ ߓߐ߫ ߟߊ߫ ߜߍߟߊ߫، ߊ߬ ߞߵߊ߬ ߦߌ߬ߘߊ߬ ߞߏ߫ ߣߌ߲߬ ߠߊߥߟߌ߬ߣߍ߲߫ ߡߐ߰ ߛߍ߰ߣߍ߲ ߠߎ߬ ߡߊߘߍ߬ߡߍ߲ ߠߋ߬ ߡߊ߬߸ ߞߵߏ߬ ߞߎ߲߭ ߞߍ߫ ߥߙߎߞߌ ߛߌߟߊ ߡߍ߲ ߠߎ߬ ߦߋ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߓߟߏ߫߸ ߏ߬ ߘߏ߫ ߟߋ߬ ߣߌ߲߬ ߘߌ߫، ߊ߬ߟߋ ߟߊ߫ ߢߊߦߋߟߌ߫ ߘߐ߫߸ ߞߏ߫ ߣߌ߫ ߡߐ߱ ߟߎ߬ ߓߘߊ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߕߐ߮ ߟߊߘߛߏ߫ ߞߵߊ߬ ߞߍ߫ ߓߞߥ ߘߌ߫، ߊ߬ߟߋ ߝߣߊ߫ ߦߋ߫ ߞߐߙߍ ߟߊ߫ ߕߐ߯ ߟߊߣߍ߲ ߠߋ߬ ߕߊ߬ ߟߊ߫߸ ߏ߬ ߡߍߍ߲ ߦߋ߫ ߟߊ߱ߦߌ߬ ߡߊ߬ߡߊ߬ߘߌ߬ ߘߎ߲ߓߎߦߊ߫ ߘߌ߫߸ ߞߏ߫ ߊ߬ߟߋ ߦߴߏ߬ ߝߣߊ߫ ߞߘߐ ߞߍ߫ ߟߊ߫ ߡߍ߲ ߘߌ߫߸ ߏ߬ ߟߋ ߟߌߛߊ߲ߛ߸ ߡߊߛߑߕߍߙ߸ ߘߐߞߑߕߏߙߊ߸ ߏ߬ ߡߍ߲ ߞߘߐ ߦߋ߫ ߞߏ߫ ߝߏߘߋߦߊ߸ ߛߟߊߕߌ߯ߓߦߊ߸ ߊ߬ ߣߌ߫ ߞߏ߲߬ߓߏ߬ߦߊ. ߓߊߏ߬߸ ߊ߬ߟߋ ߝߍ߬߸ ߝߏߘߋߦߊ ߟߋ߬ ߕߍ߬ߘߍ߫ ߘߐ߬ߕߊߡߌ߲ ߘߌ߫߸ ߊ߬ ߕߐ߭ ߦߋ߫ ߟߐ߬ߒ߬ߞߋ߬ߟߊ߫ ߣߊ߬ߕߐ ߟߎ߬ ߘߌ߫ ߛߊ߫.

ߖߊ߲߬ߖߏ߲ ߣߌ߲߬ ߕߣߐ߬ߡߊ߬ ߝߊ߲ ߘߏ߫ ߞߍ߫ ߘߊ߫ ߡߎ߲߬ ߘߌ߫߸ ߏ߬ ߟߋ ߞߍ߫ ߘߊ߫ ߖߊ߲߬ߞߊ߬ߙߏ߬ߕߐ ߟߎ߬ ߟߊ߫ ߟߊ߬ߛߙߋ߬ߦߊ߬ߟߌ ߣߴߊ߬ߟߎ߬ ߟߊ߫ ߛߍߥߊ߫ ߞߊ߲ ߠߎ߬ ߘߌ߫، ߊ߲ ߛߋ߫ ߘߊ߫ ߡߍ߲ ߠߎ߬ ߡߊߢߌߣߌ߲߬ߞߊ߬ ߟߊ߫߸ ߏ߬ ߓߍ߯ ߞߵߊ߬ ߟߊ߫ ߛߍߥߊ ߟߋ߬ ߦߌ߬ߘߊ߬߸ ߊ߬ ߣߌ߫ ߞߊ߬ ߘߎ߬ߥߊ߬ߥߎ߬ ߞߙߍߞߙߍߣߍ߲߫ ߞߍ߫ ߝߋߙߋ߲ߓߊ߫ ߣߌ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߦߋ߫، ߊ߬ߟߎ߬ ߓߍ߯ ߟߊ߫ ߣߙߊ ߟߊߥߟߌ߬ ߘߊ߫ ߟߋ߬ ߓߌ߬ ߞߵߊ߬ ߓߐ߫ ߊ߬ߟߎ߬ ߢߊ ߟߊ߫߸ ߞߊ߬ ߢߟߊ ߘߴߊ߬ߟߎ߫ ߡߊ߬߸ ߞߊ߬ ߘߎߢߊ߫ ߦߌ߬ߘߴߊ߬ߟߎ߬ ߟߊ߫߸ ߞߵߊ߬ߟߎ߬ ߓߐ߫ ߘߌ߬ߓߌ ߘߐ߫.

ߖߊ߲߬ߖߏ߲ ߞߎ߲߭ߘߏ߲߬ ߘߊ߫ ߘߊ߲ߘߊߟߌߟߊ ߟߎ߬ ߟߊ߫ ߟߊ߬ߟߌ߬ߟߌ ߟߎ߫ ߟߋ߬ ߡߊ߬߸ ߞߵߊ߬ ߘߌ߫ ߖߊ߲߬ߞߊ߬ߙߏ߬ߕߐ ߟߎ߬ ߡߊ߬، ߞߵߊ߬ߟߎ߬ ߟߊ߫ ߞߏ ߡߌ߬ߣߊ߬ ߢߊ ߢߊߝߐ߫ ߊ߬ߟߎ߬ ߦߋ߫ ߕߟߋ߬ ߄߀ ߣߊ߬ߕߐ ߣߌ߲߬ ߞߣߐ߫، ߣߌ߲߬ ߞߍ߫ ߘߊ߫ ߞߏ߫ ߟߋ߬ ߘߌ߫ ߓߌ߬߸ ߡߐ߰ ߛߌߦߊߡߊ߲߫ ߟߊߣߍ߲߫ ߕߎ߲߬ ߕߍ߫ ߡߍ߲ ߠߊ߫، ߓߊ߬ߙߌ߬߸ ߛߌ߬ߓߏ ߏ߬ ߓߘߊ߫ ߞߍ߫ ߕߎ߬ߢߊ߬ ߘߌ߫.

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߫ߣߊ߫ ߝߐ߰ߓߍ߬ߘߊ ߦߋ߫.