ߗߍ߬ ߛߊ߲߬ ߃߃ ߘߏ߫ ߟߋ߬ ߖߐߞߌ߫ ߞߏߖߎ߯ߦߊ ߞߍߣߍ߲߫ ߡߊ߬ߙߌ߬ߝߊ ߟߊ߫ ߞߎߣߎ߲߬ ߞߐ߬ߓߊ߬ߟߏ߲ ߛߎ ߘߐ߫ ߡߕߋߏ ߞߌ߲߬ߘߊ ߟߊ߫߸ ߞߊ߲ߞߊ߲߫ ߞߣߐ߫߸ ߞߵߊ߬ ߥߊߕߐߟߊ ߕߏ߫ ߓߊߛߌ߫ ߛߊ߲߫ ߦߙߐ ߞߊ߬ ߣߵߊ߬ ߘߴߊ߬ ߘߋ߲ ߖߊ߲߬ߞߊ߬ߙߏ߬ߕߐ ߡߊ߬، ߡߊ߲߬ߕߙߐ ߛߋߣߴߊ߬ ߛߏ߬ߙߏ ߟߋ߬ ߡߊ߬߸ ߊ߬ ߟߊߟߊߣߍ߲߫ ߞߊ߲ߞߊ߲߫ ߘߊ߲ߘߊߛߏߓߊ ߟߊ߫ ߕߋ߲߬߸ ߊ߬ ߓߍߣߊ߬ ߟߊߕߊ߯ ߞߐߣߊߞߙߌ߫߸ ߞߵߏ߬ ߞߎ߲߭ ߞߍ߫ ߘߌ߲߬ߞߌߙߊ ߏ߬ ߓߊ߯ߙߊ߫ ߡߎߙߊ߲ ߠߎ߬ ߛߐ߬ߘߐ߲߬ߓߊߟߌߦߊ ߘߌ߫ ߞߊ߲ߞߊ߲߫ ߘߊ߲ߘߊߛߏߓߊ ߟߊ߫، ߊ߬ ߟߊ߫ ߓߏ߲ߠߌ߲ ߣߌ߲߬ ߞߏ߬ߣߌ߲ ߓߘߊ߫ ߣߊ߬ ߞߎ߲߬ߠߊ߬ߛߘߌ ߞߎߡߊ ߘߌ߫ ߛߏ ߞߣߐ߫ ߞߏߞߎߘߊ߫.

ߞߐ߬ߓߊ߬ߟߏ߲ ߛߎ ߟߋ߬ ߘߐ߫߸ ߂߁ߙߋ߲ ߡߊ߬ ߂߀߂߆ ߓߌ߲ߠߊߥߎߟߋ߲ ߕߟߋ߬ ߁߉߸ ߡߙߊ߬ߒ߬ߡߊ߬ߟߌ ߟߋ߬ ߞߍ߫ ߘߊ߫ ߞߊ߲ߞߊ߲߫ ߡߕߋߏ ߞߌ߲߬ߘߊ ߟߊ߫߸ ߡߏ߬ߙߌ߬ߝߌ߲߬ߖߊ߲߫ ߕߏ߬ߟߊ߲߬ߕߊ߲߬ ߓߙߊߞߣߍ ߘߊߝߍ߬߸ ߞߊ߲ߡߋߙߋ߲ ߘߏ߫ ߟߋ߬ ߓߏ߲߫ ߘߊ߫ ߡߊ߬ߙߌ߬ߝߊ ߟߊ߫ ߦߋ߲߬، ߊ߬ ߕߐ߯ ߞߏ߫ ߓߙߋߡߊ߬ ߛߊ߬ߞߐ߫߸ ߘߋ߲߫ ߣߊ߯ߣߌ߲߫ ߠߋ߬ ߦߴߊ߬ ߓߟߏ߫߸ ߕߋ߰ߙߋ߫ ߡߐ߰ ߛߊ߬ߓߊ߫ ߟߋ߬ ߡߙߊ߬ ߘߴߊ߬ ߡߊ߬.

ߊ߬ ߖߍ߬ߘߍ ߟߊ߫ ߝߐߟߌ߫ ߘߐ߫ ߞߊ߲ߞߊ߲߫ ߘߊ߲ߘߊߛߏߓߊ ߟߊ߫߸ ߞߏߢߊ ߣߌ߲߬ ߞߍ߫ ߘߊ߫ ߞߵߊ߬ ߥߊߕߐߟߊ ߕߏ߫ ߓߊߛߌ߫ ߛߊ߲߫ ߦߙߐ ߟߋ߬ ߘߐ߫، ߓߊߏ߬߸ <<ߒ ߡߏ߬ߛߏ ߟߋ߬ ߞߊ߬ ߒ ߞߟߌ߫ ߞߊ߬ ߒ ߕߏ߫ ߓߊ߯ߙߊ߫ ߦߌߟߊ ߘߐ߫ ߛߍ߲߬ߞߍ߬ߝߙߊ߫߸ ߞߏ߫ ߒ ߘߋ߲ ߡߊ߲ߞߍ߲ߘߍ߫߸ ߊ߬ ߝߊ߬ߘߌ ߦߋ߫ ߞߟߊߦߊ߫ ߟߊ߫.>> ߊ߬ ߞߵߏ߬ ߟߋ ߝߐ߫، ߏ߬ ߟߋ ߞߍ߫ ߘߴߊ߬ ߥߟߌ߬ ߢߊ ߘߌ߫ ߞߵߊ߬ ߟߊ߫ ߔߏߔߏ ߕߊ߬ ߞߏ߫ ߊ߬ ߕߊ߯ߕߐ߫ ߓߊߛߌ߫ ߛߊ߲߫ ߦߙߐ ߘߐ߫ ߛߌ߯ߙߌ߲߫ ߛߌߟߊ߫ ߓߍ߲ߕߍ ߘߐ߫߸ ߓߊߛߌߓߏ߲ ߘߏ߫ ߦߋ߫ ߦߋ߲߬ ߡߍ߲ ߘߐ߫ ߞߊ߬ߣߌ߲߬.

ߊ߬ ߛߋ ߡߍ߲ ߞߍ߫ ߘߊ߫ ߡߏ߬ߙߌ߬ߝߌ߲߬ߖߊ߲߫ ߞߊ߬ߙߊ߲߬ߘߊ߬ߓߊ ߘߊߝߍ߬߸ ߔߏߔߏ߫ ߞߏ߫ ߦߌߟߊ ߘߏ߫ ߓߍ߫ ߦߋ߲߬߸ ߡߍ߲ ߣߌ߫ ߕߏ߬ߟߊ߲߬ߕߊ߲߬ ߓߙߊ ߕߍߟߊ ߡߊ߲߫ ߖߊ߲߬ ߏ߬ ߘߌ߫ ߖߐ߫߸ ߡߐ߰ ߛߊ߬ߓߊ߫ ߣߊ߬ ߘߊ߫ ߕߋߝ߭ߍߛߌ߫ ߙߐߞߎ ߞߊ߲߬. <<ߊ߬ߟߎ߫ ߞߵߊ߬ ߝߐ߫ ߒ ߡߊ߬ ߞߏ߫ ߒ ߧߋ߫ ߒ ߠߊ߫ ߔߏߔߏ ߘߴߊ߬ߟߎ߫ ߡߊ߬، ߣߊ߲߬ߕߌ߮ ߟߎ߬ ߟߊ߫ ߡߊ߬ߙߌ߬ߝߊ ߟߋ߬ ߕߎ߲߬ ߦߴߊ߬ߟߎ߬ ߓߟߏ߫߸ ߝߘߊ߬ߝߌ߲߬ ߡߊߙߌߝߊ߫ ߕߎ߲߬ ߕߍ߫ ߝߋߎ߫.>> ߓߙߋߡߊ߬ ߛߊ߬ߞߐ߫ ߟߋ߬ ߞߊ߲߫ ߕߋ߲߬، ߊ߬ ߖߌ߰ߣߍ߲߫ ߔߏߔߏ ߞߊ߲߬ ߏ߬ ߟߋ ߘߐ߫ ߞߏ߫ ߊ߬ ߦߋ߫ ߞߏ߲ߢߌ߲ ߘߌ߫ ߟߴߊ߬ߟߎ߫ ߡߊ߬߸ ߊ߬ߟߎ߫ ߞߊ߬ ߡߊ߬ߙߌ߬ߝߊ ߕߋ߬ ߡߎߣߎ߲߬، ߏ߬ ߞߊ߬ ߓߙߋߡߊ߬ ߘߐߛߌߟߊ߲߫߸ ߝߏ߫ ߊ߬ ߞߵߊ߬ ߝߐ߫ ߞߏ߫ ߊ߬ ߦߋ߫ ߛߊ߬ߦߌ߲߬ ߠߴߊ߬ ߞߕߐߡߊ߬، ߒ߬ߓߊ߬߸ ߊ߬ ߞߐߛߊ߬ߦߌ߲߬ ߕߎߡߊ ߏ߬ ߟߋ ߟߊ߫ <<ߊ߬ߟߎ߫ ߞߊ߬ ߡߊ߬ߙߌ߬ߝߊ߬ ߕߋ߬ ߒߠߋ ߖߍ߬ߘߍ ߟߊ߫، ߞߌ߬ߛߍ ߘߏ߲߬ ߘߊ߫ ߒ ߛߏ߬ߙߏ ߝߍ߬ ߦߊ߲߬ ߠߋ߬ ߞߊ߬ ߓߐ߫.>> ߊ߬ ߞߵߏ߬ ߟߋ ߝߐ߫ ߞߵߊ߬ ߛߐ߬ߘߐ߲߬ ߊ߬ ߓߟߏ ߦߋ߫ ߞߌ߬ߛߍ ߘߏ߲߬ ߦߙߐ ߏ߬ ߕߐ߰ߡߊ߬ߛߙߋ ߞߊ߲߬.

ߊ߬ ߖߐߞߌߣߍ߲ߓߊ ߏ߬ ߟߋ ߕߊ߬ߣߍ߲߫ ߡߎ߬ߕߎ߲߬ ߞߊ߬ ߥߴߊ߬ ߘߌ߫ ߦߋ߲߬ ߘߊߝߍ߫ ߜߋߙߋ߲ߜߋߙߋ߲ߧߊ߫ ߕߊ߲ߓߊ߲ ߘߏ߫ ߟߊ߫߸ ߏ߬ ߟߎ߫ ߞߊ߬ ߘߊ߲ߘߊߟߌ߫ ߞߎ߲߬ߝߟߐ ߟߎ߬ ߞߍ߫ ߊ߬ ߟߊ߫߸ ߞߣߊ߬ߕߏ߫ ߊ߬ ߟߊߕߊ߯ ߟߊ߫ ߞߊ߲ߞߊ߲߫ ߕߌ߲߬ߞߎߘߎ߲ ߘߊ߲ߘߊߛߏ ߟߊ߫߸ ߞߎ߲߬ߡߊ߬ߦߟߍ߬ߡߊ߲߬ߟߐ߲߬ߘߐ߬ߦߊ ߓߏ߲ߘߊ ߟߊ߫، ߞߏ߲߬ߓߏ߫ ߡߏ߬ߤߊ߬ߡߍ߬ߘ ߞߋߕߊ߬ ߡߍ߲ ߦߋ߫ ߓߟߏߦߟߊ߫ ߘߌ߫ ߛߌ߲߬ߝߏ߲߬ߡߐ߬ߟߐ߲߬ߦߊ ߣߌ߫ ߞߎ߲߬ߡߊ߬ߦߟߍ߬ߡߊ߲߬ߟߐ߲߬ߘߐ߬ߦߊ ߟߊ߫߸ ߏ߬ ߞߊ߬ ߖߐߞߟߌ ߟߊ߫ ߖߎ߯ߦߊ ߢߊߝߐ߫، <<ߖߊ߲߬ߞߊ߬ߙߏ߬ߕߐ ߡߍ߲ ߣߊ߬ ߘߊ߫߸ ߗߍ߭ ߟߋ߬، ߣߴߊ߬ ߛߌ߬ߞߛߊߓߌ ߦߋ߫ ߛߊ߲߬ ߃߃ ߢߐ߲߰ ߘߐ߫߸ ߏ߬ ߟߋ ߛߋ߫ ߘߴߊ߲ ߝߍ߬ ߞߎ߲߬ߡߊ߬ߦߟߍ߬ߡߊ߲߬ߟߐ߲߬ߘߐ߬ߦߊ ߟߊ߫ ߦߊ߲߬، ߥߎߦߊ߲ߟߐ߲ߘߐߦߊ ߡߍ߲ ߠߎ߬ ߞߍ߫ ߘߊ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߕߐ߰ߢߐ߬ߞߟߏ ߞߊߘߌߣߍ߲߫ ߠߋ߬߸ ߊ߬ ߣߌ߫ ߘߊ ߝߣߊ߫ ߦߴߊ߬ ߥߘߏߖߎ ߘߐ߫، ߊ߬ ߞߏ߬ߣߌ߲߸ ߊ߬ ߝߊ߬ߘߌ ߞߊ߫ ߝߌ߬ߛߊ߬߸ ߊ߬ ߟߊ߫ ߢߣߊߡߦߊ ߕߍ߫ ߖߘߐ߬ ߘߐ߫.>> ߘߊ߲ߘߊߟߌߟߊ ߞߵߏ߬ ߝߐ߫ ߞߵߊ߬ ߟߊߕߍ߰.

Un homme assis sur un canapé, répondant à des questions des journalistes avec plusieurs microphones devant lui.
ߞߏ߲߬ߓߏ߫ ߡߏ߬ߤߊ߬ߡߍߘ ߞߋߕߊ߬: ߓߟߏߦߟߊ ߛߌ߲߬ߝߏ߲߬ߡߐ߬ߟߐ߲߬ߦߊ ߣߌ߫ ߞߎ߲߬ߡߊ߬ߦߟߍ߬ߡߊ߲߬ߟߐ߲߬ߘߐ߬ߦߊ ߟߊ߫

ߞߵߊ߬ ߓߍ߲߬ ߘߊ߲ߘߊߛߏߓߊ ߟߊ߫ ߓߊ߯ߙߊ߫ ߡߎߙߊ߲ ߘߏ߫ ߟߎ߫ ߞߏߖߊ ߡߊ߬ ߛߊ߫߸ ߘߊ߲ߘߊߟߌ߫ ߞߙߎ ߞߵߊ߬ ߡߙߌߘߐߕߊ߬ ߏ߬ ߟߋ ߘߐ߫ ߞߏ߫ ߞߵߊ߬ ߟߊߕߊ߯ ߞߐߣߊߞߙߌ߫߸ ߛߴߊ߬ ߟߊ߫ ߞߏ ߘߌ߫ ߘߏ߲߬ ߗߋߢߘߊ߫ ߓߟߏߡߊߞߊ߬ߣߍ߲߬ ߓߟߏ߫ ߦߋ߲߬، ߏ߬ ߞߏ߬ߣߌ߲ ߦߋ߫ ߞߏ߫ ߟߋ߬ ߘߌ߫߸ ߡߍ߲ ߜߍ߬ߟߍ߲߬ߡߊ߲߫ ߞߏߕߐ ߖߍ߬ߘߍ ߡߊ߬ ߞߏߛߓߍ߫، ߞߊ߬ߕߎ߲߯߸ ߊ߬ ߞߵߊ߬ ߦߌ߬ߘߊ߬ ߞߏ߫ ߛߋ߫ ߝߏߦߌ߬ ߕߴߊ߬ ߦߋ߫ ߞߵߊ߬ ߓߍ߲߬ ߏ߬ ߞߏߢߊ ߡߊ߬. <<ߒ ߧߋ߫ ߖߐ߲ߓߐ߲ߕߌ߮ ߟߋ߬ ߘߌ߫߸ ߓߊ߯ߙߊ߫ ߖߐ߲ߖߐ߲߫ ߓߊߛߌ߰ߣߍ߲߬ ߕߍ߫ ߒ ߓߟߏ߫، ߒ ߧߋ߫ ߓߊ߯ߙߊ߫ ߡߌߛߍ߲ߣߍ߲ ߠߎ߬ ߟߋ߬ ߞߍ߫ ߟߊ߫ ߞߊ߬ ߒ ߠߊ߫ ߘߋ߲ߓߦߊ ߓߊߟߏ߫.>> ߊ߬ ߞߵߏ߬ ߟߋ ߝߐ߫߸ ߞߊ߬ ߞߣߐ߬ߘߐ߬ߝߟߌ ߣߌ߫ ߓߊ߬ߟߌ߸ ߊ߬ ߣߌ߫ ߢߏߘߏ߲ ߕߏ߫ ߊ߬ ߢߊߘߎ߮ ߘߐ߫.

ߊߟߎ߫ ߞߏ߬ߣߌ߲ ߦߴߊ߬ ߟߐ߲߫߸ ߡߙߊ߬ߒ߬ߡߊ߬ߟߌ ߣߌ߲߬ ߞߍ߫ ߘߊ߫ ߛߎ ߥߊ߯ߕߌ ߡߍ߲ ߠߊ߫ ߕߋ߲߬߸ ߏ߬ ߞߵߊ߬ ߛߐ߬ߘߐ߲߫ ߠߋ߬ ߡߐ߱ ߟߎ߬ ߦߋ߫ ߛߏ ߢߊߝߍ߬߸ ߦߙߐ ߟߎ߬ ߟߊߕߍ߰ߣߍ߲߬ ߕߍ߫ ߝߋߎ߫، ߏ߬ ߓߘߴߊ߬ ߦߌ߬ߘߊ߬ ߞߏ߫ ߢߊ ߡߊߖߌ߰ ߕߎߡߊ ߓߘߊ߫ ߛߋ߫ ߟߊ߬ߞߊ߲߬ߘߊ߬ߟߌ ߝߍ߬߸ ߞߊ߬ ߞߎ߲߬ߠߊ߬ߛߘߌ ߞߟߍ߬.

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.