ߞߎߣߎ߲߬ ߞߊ߯ߙߌ ߡߊ߬ ߂߀߂߅ ߞߏ߲ߓߌߕߌ߮ ߕߋ߬ߟߋ߫ ߂߆߸ ߞߊ߲ߞߊ߲߫ ߛߏ ߞߣߐߟߊ ߞߊ߬ ߖߊ߬ߡߊ߫ ߘߍ߬ߜߍ ߟߋ߬ ߟߊߓߐ߫߸ ߘߋ߲ߡߌߛߍ߲ ߠߎ߬ ߓߊ߬߸ ߡߏ߬ߛߏ ߟߎ߬߸ ߡߊ߬ߡߙߊ߬ߟߌ߬ߟߊ ߟߎߎ߬߸ ߊ߬ ߣߌ߫ ߟߊ߬ߞߊ߲߬ߘߊ߬ߟߌ ߣߌ߫ ߡߊ߬ߞߊ߲߬ߞߊ߲߬ߠߌ߲ ߞߎ߲߬ߕߌ߰ߟߊ߬ߞߊ ߟߎ߬߸ ߞߵߏ߬ ߟߊ߫ ߖߌ߬ߣߍ߬ ߛߊߣߌ߲߫ ߖߎߟߊ ߟߎ߬ ߟߊ߫ ߘߍ߭ ߞߐߦߌߘߊߓߊ߮ ߞߊ߲߬߸ ߞߵߊ߬ߟߎ߬ ߡߙߌߦߊ ߦߌ߬ߘߊ߬ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߐߡߊߓߌ߲ߓߌ߲ ߘߐ߫.
ߘߋ߲ߡߌߛߍ߲ ߠߎ߬ ߓߐ߫ ߘߊ߫ ߕߟߋ߬ߜߍ ߟߋ߬ ߞߘߐ߫߸ ߞߊ߬ ߝߘߊ߫ ߞߊ߲ߞߊ߲߫ ߞߌ߲߬ߘߊ ߟߎ߬ ߟߊ߫߸ ߞߵߊ߬ߟߎ߫ ߞߎ߲߬ߛߌ߲߫ ߞߊ߲ߞߊ߲߫ ߘߋ߲ߡߌߛߍ߲߫ ߓߏ߲ߓߊ ߓߋߟߋ߲ߘߊ ߟߊ߫߸ ߊ߬ߟߎ߬ ߣߌ߫ ߖߌ߬ߣߍ߬ ߕߊߡߊ߲ ߥߟߎ߬ߡߊ߬ ߞߋߟߋ߲߫ ߜߍߛߓߍ، ߥߊߘߌ ߏ߬ ߡߍ߲ ߠߊߘߍ߬ߣߍ߲߫ ߞߊ߲ߞߊ߲߫ ߘߋ߲ߡߌߛߍ߲ ߠߎ ߓߟߏ߫߸ ߞߵߊ߬ ߕߊ߬ ߞߵߊ߬ ߘߌ߫ ߞߊ߬ߝߏ߬ߙߋ߲߬ߕߌ߮ ߡߊ߬߸ ߊ߬ߙߊ߬ߝߊ߲߬ ߡߎߛߊ߫ ߞߎ߬ߟߌߓߊ߬ߟߌ߬، ߟߊ߬ߢߌ߬ߣߌ߲߬ ߞߋߟߋ߲߫ ߔߋ߫ ߞߊ߲߬: ߞߵߊ߬ߟߎ߫ ߥߊ߬ߣߌ߲߬ߞߋ ߦߌ߬ߘߊ߬ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫߸ ߞߏ߫ ߊ߬ ߦߋ߫ ߞߍ߫ ߡߊ߬ߡߌ߬ߘߊ߬ߟߌ߬ߟߊ ߘߌ߫ ߞߊ߲ߕߌ߯ ߢߣߊߕߊߟߌ߫ ߣߊ߬ߕߐ ߘߐ߫߸ ߏ߬ ߡߍ߲ ߟߐ߯ߟߊߣߍ߲߫ ߞߵߊ߬ ߕߏ߫ ߞߏߟߌ߲ߞߏߟߌ߲ ߕߋ߬ߟߋ߫ ߂߈ ߠߊ߫.
ߘߋ߲ߡߌߛߍ߲ ߠߎ߬ ߞߊ߬ ߥߊߘߌ ߣߌ߲߬ ߟߊ߫ ߞߊ߬ߝߏ߬ߙߋ߲߬ߕߌ߮ ߟߋ߬ ߕߍ߯ ߘߐ߫؛ ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫: <<ߞߊ߬ ߥߊߘߌ ߢߌ߲߬ ߠߊߛߋ߫ ߞߊ߲ߕߌ߮ ߟߊ߫ ߞߐߙߍ ߡߊ߬߸ ߛߴߊ߬ ߘߌ߫ ߡߊ߬ߓߏ߲߬ߧߊ߬ߕߊ߫ ߡߊ߬ߡߊ߬ߘߌ߬ ߘߎ߲ߓߎߦߊ߫ ߡߊߛߐ߬ߘߐ߲߬߸ ߞߏ߫ ߞߊ߲ߞߊ߲߫ ߘߋ߲ߡߌߛߍ߲ ߠߎ߬ ߟߊ߫ ߡߊ߬ߜߍ߲ ߠߵߏ߬ ߘߌ߫߸ ߞߵߊ߬ ߟߊ߫ ߞߎ߲߬ߞߘߐ߬ߛߌ߮ ߛߙߊ߬، ߞߵߊ߬ ߛߊߓߎ ߞߍ߫߸ ߥߙߎߞߌ ߣߌ߫ ߛߓߊ߬ߕߌ ߓߊ߯ߙߓߊ ߡߍ߲ ߠߎ߬ ߓߘߊ߫ ߘߊߡߌ߬ߣߊ߬߸ ߏ߬ ߓߘߴߊ߲ ߢߊߥߏ ߝߊ߫.>>
ߞߊ߬ߝߏ߬ߙߋ߲߬ߕߌ߮ ߊ߬ߙߊ߬ߝߊ߲߬ ߡߎߛߊ߫ ߞߎ߬ߟߌߓߊ߬ߟߌ߬߸ ߏ߬ ߛߍߥߊ߫ ߘߊ߫ ߞߊ߬ ߢߊ߯ߟߋ߲߫ ߖߊ߬ߡߊ ߟߊ߫ ߞߍߣߍ߲ ߣߌ߲߬ ߓߟߏ߫߸ ߞߵߊ߬ ߦߌ߬ߘߊ߬ ߞߏ߫ ߞߊ߲ߕߌ߮ ߡߊ߬ ߝߋ߲߫ ߝߐ߫ ߊ߬ ߟߊ߫ ߡߊ߬ߡߌ߬ߘߊ߬ߟߌ߬ ߞߏ ߞߊ߲߬ ߡߎߣߎ߲߬ ߘߋ߬، <<ߞߊ߲ߕߌ߮ ߡߊ߫ ߝߏߦߌ߬ ߝߐ߫ ߡߎߣߎ߲߬، ߓߊ߬ߙߌ߬ ߞߊ߲ߞߊ߲߫ ߦߊ߲߬߸ ߞߊ߲ߞߊ߲ߞߊ ߟߎ߬ ߓߘߴߊ߬ߟߎ߬ ߕߊ߫ ߞߍߕߊ ߟߐ߲߫ ߤߊ߲߫، ߞߏߟߌ߲ߞߏߟߌ߲ ߕߋ߬ߟߋ߫ ߂߈ ߡߍ߲ ߣߊ߬ߕߐ߫ ߣߌ߲߬߸ ߊ߲ ߡߊ߫ ߗߍ߬ ߟߐ߲߫߸ ߊ߲ ߡߊ߫ ߡߛߏ߬ ߟߐ߲߫߸ ߊ߲ ߞߊ߬ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߋ߬ ߟߐ߲߫، ߊ߬ ߞߵߊ߬ ߛߐ߲߬߸ ߊ߬ ߞߵߊ߬ ߓߊ߲߬.>> ߊ߬ ߞߵߏ߬ ߟߋ ߝߐ߫ ߞߣߊ߬ߕߏ߫ ߘߋ߲ߡߌߛߍ߲ ߠߎ߬ ߝߏ߬ ߟߊ߫߸ ߞߏ߫: <<ߓߊ߯ߚߊ ߓߘߊ߫ ߘߊߡߌ߬ߣߊ߫ ߡߎ߬ߕߎ߲߫ ߘߋ߬، ߓߊߏ߬߸ ߝߏ߫ ߡߊ߬ߡߊ߬ߘߌ߬ ߘߎ߲ߓߎߦߊ߫ ߦߋ߫ ߕߊ߬ߞߏ߬ ߞߋߟߋ߲ ߠߋ߬ ߞߍ߫.>>
ߊ߬ߟߋ߬ ߖߊ߲߬ߖߏ߲߬ ߞߋߟߋ߲ ߣߌ߲߬ ߘߐ߫߸ ߟߊ߬ߡߊ߰ ߛߌߦߊߡߊ߲߫ ߕߍ߬ߘߍ߫ ߣߌ߲߬ ߞߏ ߘߐ߫߸ ߡߍ߲ ߠߎ߬ ߞߵߊ߬ߟߎ߬ ߞߊ߲ߠߊߓߐ߫، ߓߊߏ߬߸ ߛߋ߱ߘߎ߬ ߞߡߊ߬ߙߊ߬ ߡߍ߲ ߦߋ߫ ߖߌ߬ߣߍ߬ ߛߊߣߌ߲߫ ߓߊ߯ߙߟߊ ߟߎ߬ ߟߊ߫ ߘߍ߭ ߘߏ߲߬ߖߟߎ߬ߡߊ߬ߟߌ߬ߟߊ ߘߌ߫ ߞߊ߲ߞߊ߲߫߸ ߏ߬ ߞߊ߬ ߞߎߡߊ ߕߊ߬ ߞߵߊ߬ ߦߌ߬ߘߊ߬ ߞߏ߫: <<ߊ߲ ߧߴߊ߬ ߝߍ߬ ߟߋ߬ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߦߋ߫ ߓߐ߫ ߞߊ߲ߕߌ߯ߦߊ ߞߐ߫، ߞߊ߬ߦߌ߯ ߂߀߂߁ ߕߎߟߊߝߌ߲ ߝߍ߬߸ ߛߊߣߌ߲߫ ߖߎߟߊ ߟߎ߫ ߞߵߊ߬ߟߎ߫ ߖߘߍ߬ ߦߋ߫، ߊ߲ߠߎ߬ ߝߍ߬߸ ߊ߬ ߟߊ߫ ߡߊ߬ߡߌ߬ߘߊ߬ߟߌ ߦߋ߫ ߘߌߦߊߜߏߦߊ ߟߋ߬ ߘߌ߫.>>
ߞߊ߲ߓߍ߲ ߓߊ߯ߙߊ߫ ߞߍߣߍ߲ ߠߎ߬ ߡߊߞߊ߲ߞߊ߲ ߕߏ߰ߝߏ߫ ߝߊ߬ߛߏ߬ߟߊ߬ߞߊ ߣߴߊ߬ ߡߊ߲߬ߕߏ߲߬ߕߍ߬ߟߊ߬ (ߡߏߣߌߘߊߙ) ߝߣߊ߫ ߕߘߍ߬ ߞߣߍ ߞߊ߲߬߸ ߏ߬ ߟߎ߬ ߡߍ߲ ߠߎ߬ ߓߐ߫ ߘߊ߫ ߞߐߣߊߞߙߌ ߞߊ߬ ߣߊ߬ ߞߊ߲ߞߊ߲߫߸ ߏ߬ ߟߎ߫ ߞߵߊ߬ ߦߌ߬ߘߊ߬ ߞߏ߫: <<ߊ߲ ߓߐߣߍ߲߫ ߞߎߓߋߘߊ ߟߋ߬ ߟߊ߫ ߞߊ߬ ߣߊ߬߸ ߞߵߊ߬ ߝߐ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߦߋ߫ ߞߏ߫ ߘߋ߲ߡߌߛߍ߲ ߠߎ߬߸ ߡߏ߬ߛߏ ߟߎ߬߸ ߓߍ߯ ߦߴߊ߬ ߝߍ߬ ߞߏ߫ ߊ߬ ߦߋ߫ ߞߎߡߊ߫، ߛߌߟߊ ߞߊ߫ ߢߌ߲߬߸ ߊ߲ ߘߏ߲߬ ߦߋ߫ ߦߊ߲߬ ߏ߬ ߟߋ ߦߌ߬ߘߊ߬ ߞߊ߲ߡߊ߬.>> ߒߝߊ߬ߡߏߙߌ߬ ߛߊߜ߭ߊߙߋ߫ ߟߋ߬ ߞߵߏ߬ ߝߐ߫.
ߤߊߟߌ߬ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߘߐ߯ߡߛߏ߫ ߊߦߌߛ߭ߊ߬ ߘߎ߲ߓߎߦߊ߫߸ ߏ߬ ߕߘߍ߬ ߞߣߍ ߞߊ߲߬ ߖߊ߬ߡߊ ߣߌ߲߬ ߕߍߡߊ߬.
ߊߟߎ߫ ߦߴߊ߬ ߟߐ߲߫߸ ߊ߬ ߛߋ߲߬ߢߊ߬ ߝߟߐ߫ ߕߍ߫ ߣߌ߲߬ ߖߌ߬ߣߍ߬ ߞߣߐ߫، ߊ߬ ߡߊ߫ ߡߍ߲߫ ߡߎߣߎ߲߬߸ ߒߛߙߍߜߍ߬ߘߍ߫ ߡߏ߬ߛߏ ߟߎ߫ ߞߊ߬ ߖߌ߬ߣߍ߬ ߕߊߡߊ߲ ߞߋ߲߬ߥߟߎ߫ ߉߀߀ ߟߊߘߍ߬ ߞߵߊ߬ ߘߌ߫ ߣߌ߲߬ ߞߏ߫ ߛߎ߮ ߞߎ߲߬ߞߘߐ߫߸ ߛߊߣߌ߲߫ ߖߎߟߊ ߟߎ߬ ߝߣߊ߫ ߕߎ߲߬ ߓߘߊ߫ ߛߊߣߌ߲ ߞߌߘߊ߫ ߞߋߟߋ߲߫ ߘߌ߫ ߞߘߐ߬ߡߊ߲߬، ߥߊߘߌߓߊ߫ ߓߐ ߣߌ߲߬ ߓߍ߯ ߣߴߊ߬ ߕߊ߫߸ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߡߊ߫ ߝߏߦߌ߬ ߝߐ߫ ߡߎߣߎ߲߬߸ ߣߴߊ߬ ߘߌ߫ ߞߍ߫ ߡߊ߬ߡߌ߬ߘߊ߬ߟߌ߬ߟߊ ߘߌ߫ ߥߟߴߊ߬ ߕߍ߫ ߞߍ߫ ߊ߬ ߘߌ߫.
ߛߎ߯ߟߊ߲ߘߌ߫ ߛߊ߬ߞߐ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
Aucun commentaire pour le moment.