ߖߌ߬ߣߍ߬ ߜߍߞߊ߲ߠߊ ߘߐ߫߸ ߝߘߊ߬ߝߌ߲߬ ߘߊ߲ߘߊߟߌ ߓߘߊ߫ ߛߋ߫ ߡߐ߱ ߟߎ߫ ߡߊ߬ߞߏߢߊ߬ ߟߊ߫ ߦߋ߲߬ ߞߏߛߓߍ߫، ߣߴߌ ߞߊ߬ ߛߌ߯ߙߌ߲߫ ߡߊߝߟߍ߫߸ ߟߐ߲ߠߌ߲ߦߊ߫ ߝߊ߬ߛߏ߬ߟߊ߬ߞߊ ߟߎ߫ ߖߌ߱ ߦߋ߫ ߘߊ߲ߘߊߟߌ ߥߊߟߌߘߊ߫ ߓߟߋߓߟߋ߫ ߟߋ߬ ߘߌ߫ ߦߋ߬߸ߡߍ߲ ߓߘߊ߫ ߦߙߐ߫ ߛߌߦߊߡߊ߲߫ ߠߊߝߏ߬߸ ߞߊ߬ ߘߊ߲ߘߊߟߌ ߞߍ߫ ߛߎ߲ߞߎ߲ ߦߙߌ ߟߎ߬ ߣߌ߫ ߝߘߊ߬ߝߌ߲߬ ߓߊߛߌ߫ ߛߎ߲ߞߎ߲ߡߊ ߟߎ߬ ߟߊ߫، ߊ߬ߟߎ߫ ߛߌ߲߬ߝߏ߲߬ߧߊ߬ߣߍ߲߫ ߦߋ߲߬ ߞߏߛߓߍ߫߸ ߟߊ߬ߛߣߍ߬ߟߌ ߟߎ߬ ߣߌ߫ ߞߏ߫ ߛߌߦߊߡߊ߲߫ ߘߐ߫، ߊ߬ߟߎ߬ ߟߊ߫ ߛߌ߲߬ߝߏ߲߬ߧߊ߬ߟߌ ߣߴߊ߬ߟߎ߬ ߟߊ߫ ߞߍߞߌߦߊ߫ ߓߘߍ ߟߎ߬ ߞߏߛߐ߲߬߸ ߊ߬ߟߎ߬ ߟߊ߫ ߕߊ߲ߓߊ߲ ߘߊ߲߬ߣߍ߲߬ ߕߍ߫ ߛߌ߯ߙߌ߲߫ ߘߐߙߐ߲߫ ߘߐ߫ ߡߎ߬ߕߎ߲߫ ߘߋ߬߸ ߊ߬ߟߎ߬ ߓߘߊ߫ ߛߋ߫ ߞߊ߲ߞߊ߲߫߸ ߞߊ߬ߟߌ߲߬ߞߐ߬، ߊ߬ߟߎ߬ ߦߋ߫ ߘߊ߲ߘߊߟߌ ߞߍ߫ ߟߊ߫߸ ߞߊ߬ ߡߊ߬ߝߟߍ߬ߟߌ ߞߍ߫߸ ߞߊ߬ ߖߊ߲߬ߞߊ߬ߙߏ߬ߕߐ ߟߎ߬ ߡߊߘߍ߬ߡߍ߲߬ ߓߊߛߌ߫ ߞߏ ߟߎ߬ ߣߌ߫ ߟߊ߬ߟߌ߬ߟߌ߬ ߓߘߍ ߟߎ߬ ߟߊ߫ ߞߍ߲ߘߍߦߊ ߡߊ߬ߘߎ߮ ߘߐ߫.

ߣߌ߫ ߖߊ߬ߞߊ߬ߙߏ߬ߕߐ ߛߋ߫ ߘߴߊ߬ߟߎ߫ ߝߍ߬߸ ߊ߬ߟߎ߬ ߦߴߊ߬ߟߎ߫ ߘߐ߱ߘߏ߲߬ ߠߴߏ߬ ߟߊ߫ ߟߋ߬ ߞߏߛߓߍ߫߸ ߞߵߊ߬ߟߎ߬ ߟߊߡߍ߲߫ ߦߟߌߡߊߟߐ ߘߌ߫، ߊ߬ߟߎ߬ ߟߊ߫ ߗߋߕߌ߮ ߌߓߙߊߤߌߡߊ߬ ߞߡߊ߬ߙߊ߬ ߟߊ߫ ߝߐߟߌ߫ ߘߐ߫߸ ߞߏ߫ ߊ߬ߟߎ߬ ߦߋ߫ ߡߐ߱ ߟߎ߬ ߟߊߛߣߍ߫ ߟߊ߫ ߕߊ߲߬ ߠߋ߬:

<<ߖߊ߲߬ߞߊ߬ߙߏ߬ߕߐ߬ ߛߌ߫ ߓߊ߯ ߣߵߊ߬ ߡߊ߬ߞߏ ߟߊ߫߸ ߊ߬ߟߎ߬ ߓߍ߯ ߦߋ߫ ߟߊߛߌ߲߫ ߠߊ߫ ߞߵߊ߬ ߓߍ߲߬ ߊ߬ߟߎ߫ ߟߌ߬ߤߟߊ ߟߋ߬ ߡߊ߬، ߌ ߦߋ߫ ߛߐ߰ ߟߊ߫ ߖߎ߯ߓߍߘߊ ߟߋ߬ ߡߊ߬ ߡߎߣߎ߲߬ ߞߵߌ ߟߊ߫ ߖߊ߲߬ߞߊߙߏ ߛߎ߮ ߟߐ߲߫߸ ߞߣߊ߬ߕߏ߫ ߓߊߛߌ ߛߓߍ߫ ߟߴߌ ߞߎ߲߬، ߣߴߌߟߋ ߘߏ߲߬ ߕߎ߲߬ ߓߘߊ߫ ߓߊߛߌ߫ ߕߊ ߘߊߡߌ߬ߣߊ߬߸ ߌ ߓߊ߯ ߣߊ߬ ߞߘߐ߬ߡߊ߲ ߏ߬ ߞߐ߫߸ ߏ߬ ߘߌ߫ ߝߙߋ߬ ߌ ߡߊ߬، ߣߴߏ߬ ߕߍ߫߸ ߓߊߛߌ ߕߍ߫ ߝߙߋ߬ ߟߊ߫ ߦߋ߲߬ ߕߋ߲߬ ߣߴߌ ߟߊ߫ ߝߊ߬ߘߌ߬ ߞߘߐ߬ ߞߏ ߡߊ߫ ߡߊߝߟߍ߫ ߡߎߣߎ߲߬.>>

ߌߓߙߊߤߌߡߊ߬ ߞߡߊ߬ߙߊ߫ ߟߋ߬ ߘߐ߱ߘߏ߲߬ߣߍ߲߫ ߓߊߛߌ߫ ߝߙߋ ߟߊ߫ ߥߊߟߌߘߊ ߣߌ߲߬ ߞߣߐ߫߸ ߊ߬ ߣߌ߫ ߖߊ߲߬ߞߊ߬ߙߏ߬ߕߐ ߟߎ߬ ߟߊ߫ ߞߏ ߡߊߡߊ߬ߙߊ ߟߊ߫߸ ߞߵߊ߬ ߖߊ߲߬ߕߏ߫ ߊ߬ߟߎ߬ ߘߐ߫߸ ߊ߬ ߣߌ߫ ߞߊ߬ ߕߏ߫ ߊ߬ߟߎ߫ ߛߊ߬ߥߏ߬ ߘߐ߫ ߕߎ߬ߡߊ ߓߍ߯ ߟߊ߫، ߝߣߊ߫߸ ߊ߬ߟߋ ߟߋ߬ ߞߐߦߌߘߊߓߊ߮ ߟߎ߬ ߡߊߛߐ߫ ߞߏ ߞߎ߲߬ߠߊ߬ ߦߙߐ߫ ߓߍߣߍ߲߫ ߢߐ߲߰ ߡߊ ߟߎ߬ ߘߐ߫.

ߊ߬ߟߎ߬ ߟߊ߫ ߟߊ߬ߥߟߏ߬ߟߌ ߓߍ߯ ߜߋ߬ߟߎ߲߬ߣߍ߲߫ ߠߋ߬ ߕߍߕߍߕߍ߫߸ ߊ߬ߟߎ߬ ߟߊ߫ ߗߋߕߌ߯ߓߊ ߖߘߍ߬ߞߏ߬ߟߊ߲߬ߘߌ߫ ߕߎ߲߬ߞߙߊ߬ ߟߊ߫ ߝߐߟߌ߫ ߘߐ߫߸ ߊ߬ߟߋ ߡߍ߲ ߘߐ߱ߘߏ߲߬ߣߍ߲߫ ߟߊ߬ߥߟߏ߬ߟߌ ߟߊ߫ ߞߊ߬ߣߌ߲߬.

<<ߊ߲ ߧߋ߫ ߛߐ߰ ߟߊ߫ ߘߊ߲ߘߊߟߌ߫ ߛߓߍ ߟߋ߬ ߘߐߞߍ ߡߊ߬ ߡߎߣߎ߲߬߸ ߞߵߊ߬ ߓߍ߲߬ ߖߊ߲߬ߞߊߙߏ ߖߊ߲ߓߊ߲߫ ߢߊ ߡߊ߬ ߖߊ߲߬ߞߊ߬ߙߏ߬ߕߐ ߝߊ߬ߘߌ ߘߐ߫، ߓߊߛߌ ߟߎ߬ ߦߋ߫ ߛߎߥߊ߲ߘߌ߫ ߟߊ߫ ߞߵߊ߬ ߓߍ߲߬ ߏ߬ ߟߋ ߡߊ߬ ߛߊ߫، ߓߊߛߌ ߏ߬ ߟߎ߫ ߘߏ߲߬ ߦߋ߫ ߟߊߘߊ߲߫ ߠߊ߫ ߛߊߣߌ߲ߧߊ ߣߌ߫ ߓߛߍ߬ߦߊ ߟߋ߬ ߞߣߐ߫߸ ߞߵߊ߬ߟߎ߬ ߟߊߡߊ߲߬ߘߌ߬ ߢߊ߫ ߡߊ߬߸ ߡߍ߲ ߘߌߡߴߊ߬ߟߎ߬ ߟߊ߫ ߝߣߊ߫.>>

ߓߊߛߌ ߟߎ߬ ߦߋ߫ ߟߊߞߊ߲ߘߊ߫ ߟߴߊ߬ߟߎ߬ ߓߟߏ߫ ߞߵߊ߬ ߡߊߛߘߌ߬ ߊ߬ߟߎ߬ ߓߟߏ߫ ߞߊ߬ߞߎ߬ߘߊ߬ ߝߊߘߌ ߘߝߊߣߍ߲ ߠߋ߬ ߘߐ߫.

ߛߌ߯ߙߌ߲߫ ߓߊ߯ ߓߐ߫ ߊ߬ ߟߊ߫߸ ߟߐ߲ߠߌ߲ߦߊ߫ ߝߊ߬ߛߏ߬ߟߊ߬ߞߊ ߟߎ߫ ߖߌ߱ ߦߋ߫ ߞߊ߲ߞߊ߲߫߸ ߊ߬ߟߎ߬ ߦߋ߫ ߞߊ߬ߟߌ߲߬ߞߐ߬߸ ߛߴߊ߬ߟߎ߬ ߟߊ߫ ߓߊߛߌ ߣߴߊ߬ߟߎ߬ ߟߊ߫ ߘߊ߲ߘߊߟߌ ߘߌ߫ ߡߊߘߏ߲߬ ߖߊ߲߬ߞߊ߬ߙߏ߬ߕߐ ߟߎ߬ ߟߊ߫ ߓߘߍߞߍ߭، ߊ߬ߟߎ߫ ߘߏ߲߬ ߣߕߊ߬ߣߍ߲߫ ߝߣߊ߫߸ ߞߐߦߌߘߊ ߟߊߘߊ߲ ߠߊ߫ ߦߙߐ߫ ߜߘߍ߫ ߟߎ߫ ߘߐ߫. ߝߘߊ߬ߝߌ߲߬ ߓߊߛߌ ߟߊߛߐ߬ߘߐ߲ ߓߘߊ߫ ߞߍ߫ ߣߐ߰ߦߊ ߘߌ߫ ߥߊߟߌߘߊ ߣߌ߲߬ ߓߟߏ߫߸ ߞߊ߬ ߜߍߞߊ߲ߠߊ ߡߌ߬ߙߌ߲߬ߘߌ ߟߎ߫ ߖߎ߬ߛߎ ߛߎߡߊ߫ ߓߊߛߌ߫ ߛߎ߲ߞߎ߲ߡߊ߫ ߞߏ ߘߐ߫.

ߊ߬ߟߎ߬ ߟߊ߫ ߟߊ߬ߢߌߣߌ߲ ߠߋ߬ ߦߴߊ߬ ߦߌ߬ߘߊ ߘߌ߫ ߘߎߢߊ߫ ߟߊ߫߸ ߞߏ߫ ߡߐ߱ ߦߋ߫ ߛߐ߬ߘߐ߲߬ ߠߊ߫ ߛߎ߲ߞߎ߲ ߡߍ߲ ߞߣߐ߫߸  ߌ ߓߊߛߌ ߏ߬ ߦߙߌ ߟߎ߬ ߟߊ߫߸ ߏ߬ ߟߋ ߌ ߟߊ߫ ߞߍ߲ߘߍߦߊ ߕߏ߫ ߟߴߊ߬ ߡߊ߬߸ ߞߵߊ߬ ߟߊߕߊ߲߬ߞߊ߬.

ߟߏ߲ߞߊߛߌߦߊ߫ ߞߡߊ߬ߙߊ߬ ߣߌ߫ ߛߌߕߊ߲߬ ߞߊ߬ߓߊ ߓߟߏ߫.

Lonkassia CAMARA