ߝߘߊ߬ߝߌ߲߬ߠߊ߫ ߂߀߂߅ ߖߌߟߊߝߍ ߟߊ߬ߓߊ߲ ߕߊ߲ߠߌ߲ ߞߍ߫ ߘߊ߫ ߟߊ߬ߡߊ߰ߓߊ߫ ߟߋ߬ ߘߌ߫߸ ߡߍ߲ ߕߊ߲ߛߊ߲߫ ߘߊ߫ ߞߏߛߓߍ߫، ߡߊ߬ߙߐߞߎ߬ ߣߌ߫ ߛߣߍ߬ߜ߭ߊߟߌ߫ ߟߋ߬ ߞߵߊ߬ ߕߊ߲߫، ߒ߬ߓߊ߬߸ ߝߘߊ߬ߝߌ߲߬ߠߊ߫ ߕߏ߬ߟߊ߲߬ߕߊ߲ ߞߙߎߝߊߢߐ߲߯ߦߊ ߓߘߊ߫ ߞߎߡߊ߫ ߓߌ߬ߟߊ߬ߢߐ߲߰ߠߊ ߞߐ ߣߌ߲߬ ߘߐ߫߸ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߓߘߊ߫ ߖߏ߯ߘߏ߲ ߕߊ߯ߡߊ ߘߏ߫ ߟߎ߫ ߘߊߡߌ߬ߣߊ߬.
ߝߘߊ߬ߝߌ߲߬ߠߊ߫ ߕߏ߬ߟߊ߲߬ߕߊ߲ ߞߙߎߝߊߢߐ߲߯ߦߊ (ߝߕߞ) ߓߘߊ߫ ߕߏ߬ߟߊ߲߬ߕߊ߲߬ߠߊ ߘߏ߫ ߟߎ߫ ߣߌ߫ ߡߐ߰ߘߐ߬ߜߍ ߘߏ߫ ߟߎ߫ ߞߏߟߊߕߊ߯ߡߊ߫ ߢߊ ߟߊߜߎ߬ߝߎ߲߬߸ ߊ߬ߟߎ߫ ߞߵߏ߬ ߡߍ߲ ߠߊߞߙߐ߬ߛߌ߫ ߝߘߊ߬ߝߌ߲߬ߠߊ߫ ߡߊ߲߬ߕߏ߲ ߠߎ߬ ߟߊ߫ ߂߀߂߅ ߖߌߟߊߝߍ ߟߊ߬ߓߊ߲ ߕߊ߲ߠߌ߲ ߛߋ߲߭ߝߍ߬ ߞߊ߬ߣߌ߲߬، ߢߐ߲߯ߓߍ߲ ߣߌ߲߬ ߞߍ߫ ߘߊ߫ ߞߊ߯ߙߌ ߥߎ߬ߙߊ ߟߋ߬ ߝߍ߬߸ ߙߓߊ߫ ߘߎ߱ ߞߣߐ߫߸ ߡߊ߬ߙߐߞߎ߬ ߣߌ߫ ߛߣߍ߬ߜ߭ߊߟߌ߫ ߟߋ߬ ߕߘߍ߬ ߢߐ߲߯ ߠߊ߫߸ ߡߍ߲ ߞߏ ߟߎ߬ ߕߊ߲ߛߊ߲߫ ߘߴߊ߬ ߢߊ ߖߍ߬ߘߍ ߡߊ߬.
ߒ߬ߓߊ߬߸ ߟߊ߬ߛߋ߬ߟߌ߬ ߛߓߍ ߘߏ߫ ߟߊߛߐ߬ߘߐ߲߬ ߘߊ߫ ߛߌߟߊߓߐߛߐ߯ߣߊ߫ ߓߟߏ߫߸ ߝߘߊ߬ߝߌ߲߬ߠߊ߫ ߕߏ߬ߟߊ߲ ߡߊߡߙߊ߬ߓߊ߮ ߟߎ߬ ߞߊ߲߫ ߞߏ߫ ߞߏ ߘߏ߫ ߟߎ߫ ߞߍ߫ ߘߊ߫ ߢߐ߲߯ߓߍ߲ ߣߌ߲߬ ߘߐ߫߸ ߊ߬ߟߎ߬ <<ߕߴߛߋ߫ ߛߐ߲߬ ߠߊ߫ ߡߍ߲ ߡߊ߬.>> ߝߕߞ ߞߵߊ߬ ߝߐ߫ ߝߣߊ߫߸ ߞߏ߫ ߞߏ ߘߏ߫ ߟߎ߫ ߟߋ߬ ߞߍ߫ ߘߊ߫ ߢߐ߲߯ߓߍ߲ ߞߎ߲߬ߕߊ߮ ߞߣߐ߫߸ ߡߍ߲ ߡߊ߫ ߘߌߦߴߊ߬ߟߎ߬ ߦߋ߫، ߊ߬ ߕߌ߯ߕߌ߯ ߡߍ߲ ߞߍ߫ ߘߊ߫ ߕߍߟߐ߫ ߞߙߎ ߟߊ߫߸ ߊ߬ ߣߌ߫ ߛߊ߲ߞߊߢߐ߲߯ߦߊ ߛߌ߲߬ߝߏ߲߬ߧߊ߬ߓߊ߮ ߟߎ߬ ߟߊ߫߸ ߏ߬ ߡߊ߫ ߓߍ߲߬ ߠߋ߬ ߝߋߎ߫.
ߞߵߊ߬ ߓߍ߲߬ ߞߏ߫ ߞߍߣߍ߲ ߏ߬ ߟߎ߬ ߟߊ߫ ߖߎ߯ߦߊ ߡߊ߬ ߏ߬ ߘߐ߫߸ ߜߐ߬ߛߐ߲߬ߞߐ߬ ߛߌߦߊߡߊ߲߫ ߠߋ߬ ߞߍ߫ ߘߊ߫ ߟߊ߬ߓߊ߲ ߕߊ߲ߠߌ߲ ߣߌ߲߬ ߘߐ߫߸ ߞߙߎߝߊߢߐ߲߯ߦߊ ߞߊ߲߫ ߏ߬ ߘߐ߫ ߞߏ߫ ߊ߬ߟߎ߬ ߓߍߣߊ߬ ߕߊ߯ߡߊ ߘߏ߫ ߛߌ߰ ߛߋ߲߬ߠߊ߫ ߞߊ߬ ߢߊ ߡߊߖߌ߰ ߣߌ߲߬ ߞߏ ߝߍ߬߸ ߞߵߊ߬ ߢߊߢߌߣߌ߲߫ ߊ߬ ߢߊ ߡߊ߬، ߏ߬ ߟߋ ߘߐ߫߸ ߖߌ߬ߦߊ ߡߍ߲ ߺ ߍ ߺ ߡߍ߲߫ ߕߊ߬ ߘߊ߫ ߦߋ߲߬߸ ߊ߬ߟߎ߬ ߘߴߏ߬ ߟߎ߬ ߓߍ߯ ߘߐߜߍ߫ ߞߋߟߋ߲ߞߋߟߋ߲߫ ߞߊ߬ ߕߌߢߍߟߌ ߞߍߓߊ߮ ߟߎ߬ ߟߐ߲߫، ߊ߬ߟߎ߬ ߘߌ߫ ߓߊ߲߫ ߞߵߊ߬ ߞߏ ߞߍ߫ ߘߐ߬ߛߙߋ߬ ߞߋߟߋ߲߫ ߘߌ߫ ߞߵߊ߬ ߟߊߕߊ߬ߡߌ߲߫ ߝߕߞ ߓߏߟߏ߲ߝߘߊ߫ ߡߊ߬߸ ߡߍ߲ ߘߐ߱ߘߏ߲߬ߣߍ߲߫ ߏ߬ ߞߏ ߟߊ߫߸ ߏ߬ ߘߌ߫ ߞߏߟߊߕߐ߲߫ ߊ߬ ߛߐ߲߬ߡߊ ߟߎ߬ ߟߊ߫ ߖߏ߯ߘߏ߲ ߡߙߌߘߐ ߟߊ߫.
ߛߌ߲߬ߝߏ߲߬ߘߊ ߞߊ߲߫ ߞߏ߫ ߛߌߞߊ߫ ߕߍ߫ ߓߌ߲߬ߓߊߥߏ ߕߊ߬ ߞߏ ߘߐ߫ ߛߐ߲߬ߡߊ ߟߎ߬ ߞߊ߲ߡߊ߬ ߝߋߎ߫߸ ߞߵߊ߬ ߓߍ߲߬ ߊ߬ߟߎ߬ ߟߊ߫ ߕߐ߲߫ ߠߊߛߌ߰ߣߍ߲ ߝߐ߫ ߞߊ߲ ߠߎ߬ ߡߊ߬، ߣߌ߲߬ ߘߏ߲߬ ߞߎ߲߭ ߠߵߊ߬ߟߎ߬ ߓߟߏ߫ ߝߘߊ߬ߝߌ߲߬ߠߊ߫ ߛߊ߲ߞߊߢߐ߲߯ߦߊ ߡߐ߬ߟߐ߲ ߕߏ ߘߌ߫ ߊ߬ ߟߊ߫߸ ߛߊ߫ ߢߐ߲߯ߓߍ߲ ߠߎ߬ ߘߌ߫ ߕߊ߬ߡߌ߲߫ ߊ߬ ߢߌ߬ߡߊ ߟߊ߫، ߓߊߏ߬߸ ߝߘߊ߬ߝߌ߲߬ߠߊ߫ ߡߊ߲߬ߕߏ߲ ߠߎ߬ ߟߊ߫ ߖߌߟߊߝߍ ߣߌ߲߬ ߕߍ߫ ߛߊ߲ߞߊߢߐ߲߯ߦߊ߫ ߘߋ߲ߣߍ߲߫ ߘߌ߫߸ ߏ߬ ߟߋ ߦߋ߫ ߝߘߊ߬ߝߌ߲߬ߠߊ߫ ߕߐ߰ߡߊ߬ߛߙߋ ߘߌ߫ ߘߎߢߊ߫ ߢߊߞߘߐ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
Aucun commentaire pour le moment.