ߞߕߌߖߌ߲ ߛߊ߲ߘߐߕߊ ߞߊ߬ ߡߏߙߌ߬ ߞߊ߬ߓߊ ߟߊ߫ ߡߊ߬ߡߌ߬ߘߊ߬ߟߌ ߟߊߜߎ߬ߝߎ߲߫ ߠߋ߬ ߂߀߂߅ ߞߏߟߌ߲ߞߏߟߌ߲ ߂߈ ߞߊ߲ߕߌ߯ ߢߣߊߕߊߟߌ߫ ߣߊ߬ߕߐ ߘߐ߫، ߓߘߍ߬ߓߘߍ߬ߟߌ߬ ߥߣߊ ߓߘߊ߫ ߡߙߌߘߐ߫ ߞߋߟߋ߲߫ ߕߊ߬߸ ߞߊ߬ ߓߊ߲߫ ߞߵߊ߬ ߞߊ߲ߠߊߘߌ߫ ߊ߬ ߟߊ߫ ߞߙߎߞߊߘߋ߲ ߠߎ߬ ߡߊ߬ ߕߡߌߣߊ߲ߘߌߦߊ ߟߊ߫.

ߓߌ߬ ߞߍ߲ߘߍߟߏ߲ ߣߌ߲߬ ߡߊ߬߸ ߡߏߙߌ߬ ߞߊ߬ߓߊ ߞߊ߬ ߛߙߊ߬ߣߎ߲ ߕߊ߬߸ ߞߵߊ߬ ߓߍ߲߬ ߊ߬ ߟߊ߫ ߡߊ߬ߡߌ߬ߘߊ߬ߟߌ߬ ߛߓߍ ߟߊߛߊ߬ߦߌ߲ ߡߊ߬ ߞߕߌߖߌ߲ ߛߊ߲ߘߐߕߊ ߓߟߏ߫، ߊ߬ ߟߊ߫ ߛߓߍߟߌ ߣߌ߲߬ ߘߐ߫ ߊ߬ ߟߊ߫ ߝߍߛߑߓߎߞ ߖߊ߬ߕߋ߬ߘߊ ߟߊ߫߸ ߊ߬ ߞߵߊ߬ ߟߊߛߋ߫ ߞߏ߫ ߊ߬ ߓߘߊ߫ ߦߟߌߣߐ ߕߊ߬ <<ߞߊ߲ߓߍ߲ ߛߌ߲߬ߝߏ߲߬ߘߊ ߟߎ߫ ߓߏ߲߬ߧߊ ߞߏߛߐ߲߬.>> ߞߊ߬ ߓߊ߲߫ ߞߵߊ߬ ߦߌ߬ߘߊ߬ ߞߏ߫ ߡߙߌߘߏ ߏ߬ ߞߘߐ߫ ߕߍ߫ ߊ߬ ߟߊ߫ ߓߘߍ߬ߓߘߍ߬ߟߌ ߛߍ߬ߘߏ߲ ߓߊ߲ ߘߌ߫ ߘߋ߬߸ ߓߊ߬ߙߵߊ߬ ߦߋ߫ ߞߟߊߓߎ ߣߌ߫ ߥߍ߬ߣߍ ߟߋ߬ ߘߌ߫، ߊ߬ ߡߊ߫ ߕߋߟߋ߲ߓߊߟߌߦߊ߫ ߞߏ߫ ߝߐ߫߸ ߊ߬ ߡߊ߫ ߕߐ߬ߢߍ߰ ߞߏ߫ ߝߐ߫، ߊ߬ ߞߵߊ߬ ߦߌ߬ߘߊ߫ ߟߋ߬ ߞߏ߫ ߊ߬ ߓߍ߲߬ߣߍ߲߫ ߛߊ߬ߙߌ߬ߦߊ߬ ߟߊ߫ ߝߐ߫ ߞߊ߲ ߠߎ߬ ߡߊ߬.

<<ߞߊ߬ߕߎ߲߯߸ ߡߙߌߘߐ ߡߍ߲ ߦߋ߫ ߣߌ߲߬߸ ߊ߬ ߞߍߣߍ߲߫ ߝߊ߬ߛߏ߬ߘߋ߲߬ߢߐ߲߮ ߞߋ߲߬ߥߟߎ߬ ߦߙߌߞߊ߫ ߟߋ߬ ߖߌ߰ߟߊ߬ߝߐ߬ߦߊ߬ ߞߏ ߘߌ߫߸ ߓߊ߬ߙߌ߬ ߏ߬ ߞߘߐ߫ ߕߍ߫ ߞߏ߫ ߊ߲ ߠߊ߫ ߛߍ߬ߘߏ߲ ߓߊ߲ߣߍ߲߫، ߘߊߞߎ߲ ߘߏ߫ ߟߋ߬ ߞߎ߲߭ߝߊ߰ߣߍ߲߫ ߘߐߙߐ߲߫.>> ߊ߬ ߞߵߏ߬ ߟߋ ߛߓߍ߫ ߛߊ߲ߡߊ߬، ߡߏߙߌ߬ ߞߊ߬ߓߊ ߞߊ߲߫ ߞߏ߫ ߗߍ߬ߞߌ߬ߛߍ߬ߦߊ ߣߴߌ ߘߌ߫ ߒ ߟߐ߲߫ ߓߌ߬߸ ߏ߬ ߕߴߊ߬ ߣߌ߫ ߡߐ߰ ߕߍ߫߸ ߓߊ߬ߙߌ߬ ߒ ߕߍ߫ ߛߍ߰ ߟߊ߸ ߊ߬ ߣߌ߫ ߒ ߡߴߊ߬ ߓߟߏߞߊ߬ ߢߊ߫ ߟߐ߲߸ ߏ߬ ߟߋ ߘߊߡߌ߬ߣߊ߬ߣߍ߲، ߏ߬ ߘߏ߲߬ ߡߊ߬ߞߏ ߦߋ߫ ߡߎ߬ߢߎ߲ ߠߋ߬ ߟߊ߫߸ ߞߵߊ߬ ߛߐ߬ߘߐ߲߬ ߓߘߍ߬ߓߘߍ߬ߟߌ ߖߊ߬ߕߋ߬ߘߐ߬ߛߌ߰ ߓߊ߲ߓߊ߲ߣߍ߲߫ ߓߘߍ߬ߓߘߍ ߦߴߌ ߓߟߏ߫ <<ߞߊ߬ ߛߋ߫ ߛߎߘߊ߲߫ ߠߊ߫ ߢߊߣߊߕߊߟߌ߫ ߖߛߊ ߞߣߐ߫.>>

 ߓߘߍ߬ߓߘߟߌ߬ ߥߣߊ ߣߌ߲߬ ߞߵߊ߬ ߦߌ߬ߘߊ߬߸ ߞߏ߫ ߊ߬ ߕߍ߫ ߛߐ߲߬ ߞߎ߲߬ߡߊ߬ߕߎ߬ߟߌ߫ ߡߊ߬߸ ߊ߬ ߕߍ߫ ߛߐ߲߬ ߞߎ߲߬ߡߊ߬ߘߐ߲߬ߧߊ߫ ߡߊ߬، <<ߡߊ߬ߡߌ߬ߘߊ߬ߟߌ ߘߌ߫ ߛߋ߫ ߟߊߛߊ߬ߦߌ߲߬ ߠߊ߫ ߞߍ߰߸ ߓߊ߬ߙߌ߬ ߘߍ߲߬ߞߣߍ߬ߦߊ (ߡߍ߲ ߞߊ߬ ߡߊ߬ߡߌ߬ߘߊ߬ߟߌ߬ ߞߏ ߟߊߣߊ߬) ߘߏ߲߬؟ (ߞߊ߯ߙߌ߫߸ ߏ߬ ߕߍ߫ ߟߊߟߐ߬ ߟߊ߫).>> ߊ߬ ߞߊ߬ ߖߌ߬ߣߍ߬ߞߊ ߟߎ߫ ߝߏ߬߸ ߞߏ߫ ߊ߬ ߓߘߴߊ߬ ߟߐ߲߫ ߛߋ߲߬ߢߊ ߣߌ߲߬ ߝߍ߬߸ ߊ߬ ߟߊ߫ ߞߏ ߦߋ߫ ߡߐ߱ ߟߎ߬ ߓߟߏ߫ ߢߊ ߡߍ߲ ߡߊ߬، <<ߊߟߎ߫ ߓߘߴߊ߬ ߦߌ߬ߘߊ߬ ߞߏ߫ ߊ߲ ߠߊ߫ ߥߣߍ߬ߡߊ߬ߦߊ ߕߍ߫ ߕߌ߫ ߞߌߛߍ߫ ߕߡߊ߫ ߘߌ߫߸ ߘߊߝߢߐ ߦߋ߫ ߡߍ߲ ߠߊߛߊ߬ ߟߊ߫، ߓߊ߬ߙߌ߬ (ߊߟߎ߫ ߓߘߴߊ߬ ߦߌ߬ߘߊ߬ ߞߏ߫ ߊ߬ ߦߋ߫) ߕߊߝߙߍߢߍ߫ ߟߋ߬ ߘߌ߫߸ ߡߍ߲ ߕߍ߫ ߛߊ߬ ߟߊ߫ ߡߎ߰ߡߍ߫.>>

ߡߏߙߌ߬ ߞߊ߬ߓߊ ߞߵߊ߬ ߞߊ߲ߠߊߘߌ߫ ߊ߬ ߟߊ߫ ߞߙߎߞߊߘߋ߲ ߠߎ߬ ߡߊ߬߸ ߞߏ߫ ߣߌ߲߬ ߓߘߊ߫ ߞߍ߫ ߖߌ߫ ߓߐ߲߬ߣߍ߲ ߘߌ߫، ߓߊ߬ߙߌ߬߸ ߛߌߣߌ߲߫ ߣߊ߬ߕߐ ߢߍߛߌ߱ ߟߋ߬ ߓߘߊ߫ ߘߊߡߌ߬ߣߊ߫ ߣߌ߲߬ ߒߞߘߐ߫، <<ߊ߲ ߡߊ߫ ߛߋ߫ ߡߍ߲ ߣߐ߬ ߟߊ߫ ߓߌ߬߸ ߊߟߊ߫ ߟߊ߫ ߘߌ߬ߢߍ ߟߊ߫߸ ߏ߬ ߘߴߏ߬ ߛߐ߬ߘߐ߲߬ ߛߌߣߌ߲߫߸ ߓߊ߯ߙߊ ߣߌ߫ ߞߍߞߋߟߋ߲ߘߌ ߣߌ߫ ߕߡߌߣߊ߲ߘߌߦߊ ߟߊ߫ ߞߊ߬ߣߌ߲߬.>>

ߞߎߡߊ߫ ߛߌߦߊߡߊ߲ ߓߍ߯ ߣߴߊ߬ ߕߊ߫߸ ߡߏߙߌ߬ ߞߊ߬ߓߊ ߣߐ߬ ߞߟߌߟߌ ߞߍ߫ ߟߊ߫ ߡߍ߲ ߡߊ߬߸ ߏ߬ ߟߋ ߡߊ߬ߝߊ ߘߌ߫ <<ߊ߲ ߕߴߛߋ߫ ߝߏߦߌ߬ ߞߍ߫ ߟߊ߫ ߓߊ߲߭ ߞߣߐ߫߸ ߞߏ ߓߍ߯ ߛߋ߫ ߟߊ߫ ߞߍ߫ ߟߊ߫ ߕߡߌߣߊ߲ߘߌߦߊ ߟߋ߬ ߞߣߐ߫.>> ߊ߬ ߞߵߏ߬ ߟߋ ߞߍ߫ ߊ߬ ߟߊ߫ ߞߎߡߊ ߞߎ߲߬ߘߏ߲ ߘߌ߫.

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.