ߡߊ߬ߛߎ߬ߓߊ߬ ߞߏ ߘߏ߫ ߟߋ߬ ߕߍ߰ߣߍ߲߫ ߖߌ߬ߣߍ߬ߞߊ߬ ߕߎ߲ߞߊߙߊ߲ߞߋ߫ ߡߐ߰ ߃߀߀ ߢߐ߲߰ ߞߊ߲߬ ߣߎߥߊߘߌߓߎ߫ ߖߌ߫ ߡߍߣߍ߲ ߞߊ߲߬، ߞߵߊ߬ ߛߐ߬ߘߐ߲߬ ߥߎ߬ߣߎ߲߬ߥߎ߬ߣߎ߲߬ ߞߎߡߊ ߟߎ߬ ߦߋ߫ ߛߋ߲߬ߠߊ߫߸ ߞߏ߫ ߊ߬ߟߎ߬ ߦߋ߫ ߓߐ߫ ߟߊ ߞߐߣߊߞߙߌ߫ ߟߋ߬ ߝߍ߬ ߞߊ߬ ߥߊ߫ ߖߌ ߞߊ߲߬، ߓߊ߬ߙߌ߬ ߢߊߢߌߣߌ߲ߠߌ߲ ߡߍ߲ ߠߎ߬ ߞߍߣߍ߲߫ ߓߏ߲ߝߌ߲߫ ߘߊ߲ߞߊ߲ ߠߊ߫߸ ߏ߬ ߣߐ߬ ߞߎߡߊ ߏ߬ ߝߊ߬ߣߌ߲߬ߢߊ߬ ߟߊ߫ ߟߋ߬.

ߞߊ߬ߦߌ߯ ߞߎߣߎ߲߬ ߛߌ߬ߣߌ߲߬ߟߏ߲ ߡߊ߬ ߂߀߂߅ ߣߍߣߍߓߊ ߕߟߋ߬ ߁߄߸ ߖߌ߲ߘߊ߯ ߖߎ߫ ߞߘߐ߫ ߞߎߡߊ ߟߎ߬ ߛߊߙߌ߫ ߘߊ߫ ߘߍ߬ߞߙߏߝߏ ߟߎ߫ ߞߊ߲߬ ߖߌ߬ߣߍ߬ ߞߣߐ߫߸ ߞߊ߬ ߞߐ߲߰ ߞߎߟߎ߲߫ ߝߘߌ ߢߍ߫ ߡߏߙߌߕߊߣߌ߫߸ ߞߏ߫ ߕߊߞߎߟߎ߲ ߘߏ߫ ߓߘߊ߫ ߥߟߌ߬ ߖߌ ߞߊ߲߬ ߖߌ߬ߣߍ߬ߞߊ߫ ߃߀߀ ߘߌ߫ ߕߎ߲ߞߊ߲߫ ߠߊ߫ ߕߊ߯ߟߊ߫ ߘߌ߫߸ ߞߊ߬ ߓߐ߫ ߞߐߣߊߞߙߌ߫ ߞߵߊ߬ߟߎ߫ ߞߎ߲߬ߛߌ߲߬ ߋߙߐߔߎ߬ ߟߊ߫، ߒ߬ߓߊ߬߸ ߌߞߏߡߌ߲߬ ߊ߬ ߞߏ ߡߊ߲߬ߞߊ߲ ߓߘߊ߫ ߥߙߊ߬߸ ߓߟߐߟߐ߫ ߞߍߦߙߐ ߡߍ߲ ߕߐ߯ ߞߏ߫ ߊߝߙߌߞߊߖߌߣߋ߸ ߏ߬ ߞߊ߬ ߢߊߢߌߣߌ߲ߠߌ߲߫ ߠߋ߬ ߛߌ߰ ߛߋ߲߬ߠߊ߫ ߘߌ߲߬ߞߌߙߊ ߏ߬ ߟߎ߬ ߘߐ߫ ߦߋ߲߬߸ ߓߏ߲ߝߌ߲߫ ߘߊ߲ߞߊ߲ ߠߊ߫߸ ߏ߬ ߡߍ߲ ߦߋ߫ ߖߌ߬ߣߍ߬ ߞߎߓߋߘߊ ߘߊ߲ߞߊ߲ߓߊ ߘߏ߫ ߘߌ߫ ߞߊ߬ߣߌ߲߬.

ߦߙߐ ߏ߬ ߘߐ߫ ߦߋ߲߬ ߌߞߘߐ߫߸ ߘߊ߲ߞߊ߲ ߏ߬ ߦߋ߫ ߡߍ߲ ߠߎ߬ ߕߊ߫ ߓߟߏ߫ ߡߊ߬߸ ߏ߬ ߟߎ߬ ߡߊ߫ ߛߐ߲߬ ߞߎߡߊ ߢߌ߲߬ ߠߋ߬ ߟߊߟߐ߬ ߟߊ߫ ߢߊ߫ ߛߌ߫ ߡߊ߬، ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ ߟߊ߫ ߘߊ߲ߞߊ߲ ߕߍ߫ ߞߎ߲߬ߝߍ߬ߕߊ߰ߟߊ ߟߎ߬ ߔߏߦߌ߫ ߦߙߐ߫ ߘߌ߫ ߡߎ߰ߡߍ߫، ߘߌ߲߬ߞߌߙߊ ߏ߬ ߞߏߟߊߕߍ߮ ߘߏ߫ ߖߍ߬ߘߍ ߞߵߊ߬ ߦߌ߬ߘߊ߬ ߞߏ߫: <<ߦߊ߲߬ ߓߊ߬߸ ߘߊ߲ߞߊ߲ ߣߌ߲߬ ߦߋ߫ ߛߡߐ߬ߣߐ߬ߦߊ߬ ߦߙߐ ߟߋ߬ ߘߌ߫߸ ߓߊ߬ߙߌ߬ ߘߓߌ߬ߘߓߌ߬ ߕߊ߯ߡߊ ߞߍ߫ ߦߙߐ߫ ߕߍ߫ ߦߊ߲߬ ߘߌ߫ ߘߋ߬.>> ߓߏ߲ߝߌ߲߫ ߘߊ߲ߞߊ߲ ߘߏ߲߬ ߡߊߝߌ߲߬ߣߍ߲߫ ߣߌ߲߬ ߞߏ߫ ߛߎ߮ ߟߎ߬ ߘߐ߫ ߓߊߟߋ߬߸ ߞߏ߫ ߞߎ߲߬ߝߍ߬ߕߊ߰ߟߊ ߟߎ߬ ߦߋ߫ ߕߊ߬ߡߌ߲߬ ߠߊ߫ ߦߋ߲߬ ߠߋ߬ ߝߍ߬ ߛߐ߲߬، ߓߊ߬ߙߌ߬ ߤߎ߲߫߸ ߊ߬ ߞߏߟߊߕߍ߮ ߟߎ߬ ߡߊ߫ ߞߎߡߊ ߢߌ߲߬ ߠߊߟߐ߬ ߡߎ߰ߡߍ߫.

ߣߌ߲߬ ߞߏ ߞߟߊ߬ߡߊ߬ߓߊ߮ ߘߏ߫ ߟߊ߫ ߝߐߟߌ߫ ߘߐ߫߸ ߏ߬ ߡߍ߲ ߛߐ߲߬ ߘߊ߫ ߞߎߡߊ߫ ߟߊ߫߸ ߓߊ߬ߙߌ߬ ߞߎ߫ ߞߵߊ߬ ߕߐ߮ ߜߎ߬ߕߙߎ߬߸ ߊ߬ ߟߊ߫ ߞߎߡߊ ߟߎ߫ ߘߏ߲߬ ߠߊߛߙߋߦߊ ߘߴߊ߬ ߓߟߏ߫߸ ߘߊ߬ߟߎ߬ ߦߴߊ߬ ߟߊ߫ ߝߣߊ߫، ߏ߬ ߞߵߊ߬ ߦߌ߬ߘߊ߬ ߞߏ߫ <<ߒ ߕߎ߲߬ ߞߵߊ߬ ߝߐ߫ ߟߋ߬ ߞߏ߫ ߒ ߕߍ߫ ߞߎߡߊ߫ ߟߊ߫ ߣߌ߲߬ ߞߏ ߞߊ߲߬ ߡߎ߬ߕߎ߲߬…. ߓߊߏ߬߸ ߝߐ߰ߓߍ߬ߦߊ߬ߟߊ ߘߏ߫ ߟߎ߫ ߕߍ߫ ߣߊ߬ ߟߊ߫ ߞߊ߬ ߣߊ߬ ߞߏ ߓߊ ߕߵߊ߬ ߘߐ߫ ߘߋ߬߸ ߝߏ߫ ߞߵߊ߬ߟߎ߬ ߕߏ߫ ߥߎߟߊ ߟߊ߫ ߘߊ߫ ߛߊߥߏ߫ ߝߐ ߟߊ߫ ߦߋ߲߬ ߕߋ߲߬، ߡߍ߲ ߞߏ߬ߣߌ߲ ߦߋ߫ ߕߎ߬ߢߊ ߘߌ߫߸ ߖߌ߬ߣߍ߬ߞߊ߫ ߡߐ߰ ߂߉߀ ߞߊ߬ ߞߎ߲߬ߝߊ߬ߕߊ߰ߟߌ߬ ߛߌߟߊ ߕߊ߬ ߖߌ ߞߊ߲߬ ߝߋߎ߫߸ ߓߊ߬ߙߵߊ߬ߟߎ߫ ߥߟߌ߬ ߘߊ߫ ߜ߭ߊ߲ߓߌ߫ ߟߋ߬߸ ߞߊ߬ ߕߟߋ߬ߖߌ߬ߟߊ߬ ߡߊߜߍ߲߫.>>

ߟߊ߲߬ߓߏ߲ ߥߙߊ߬ ߞߏ߬ߖߎ߮ ߣߌ߫ ߓߊ߲ߘߊ ߟߌ߬ߤߟߊ ߟߋ߬ ߞߊ߬ ߞߎߟߎ߲ ߡߊߛߐ߬ߘߐ߲߬ ߡߏߙߌߕߊߣߌ߫ ߟߊߛߐ߬ߘߐ߲߬ ߕߎߡߊ ߟߊ߫، ߡߐ߰ ߛߊ߬ߓߊ߫ ߟߋ߬ ߝߊ߰ ߞߏ ߟߐ߲ߣߍ߲߫߸ ߘߏ߫ ߟߎ߫ ߦߋ߫ ߘߊ߲ߘߊߛߏ ߟߊ߫ ߕߋ߲߬، <<ߕߎ߲ߞߊߙߊ߲ߞߋ߫ ߕߟߊߓߊ߯ߕߐ ߟߎ߬ ߘߌ߫ ߘߏ߲߬ ߦߊ߲߬ ߞߎ߲߬ߢߐ߲߯ ߣߊ߬ߕߐ ߡߊ߬>> ߛߍ߮ ߣߐ߬ ߡߍ߲ ߠߎ߬ ߝߘߏ߬ ߟߊ߫ ߞߊ߬ߣߌ߲߬.

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.