ߕߎ߬ߡߊ ߡߍ߲ ߠߊ߫ ߖߋ߬ߟߌ߬ߓߊ߬ߟߊ߫ ߖߡߊ߬ߣߊ ߦߋ߫ ߟߊ߬ߞߊ߲߬ߘߊ߬ߟߌ ߖߐ߬ߘߐ ߘߐ߫߸ ߖߊ߬ߛߏ߲߬ߠߌ߲߬ ߓߊ߲ߓߊߟߌ ߟߎ߬ ߦߋ߫ ߛߋ߲߬ߠߊ߫߸ ߖߡߊ߬ߣߊ ߝߊ߲߬ ߛߌߦߊߡߊ߲߫ ߦߋ߫ ߖߐ߬ߘߐ ߘߐ߫ ߓߊ߰ߓߊ߰ߟߌ߬ߟߊ ߟߎ߬ ߣߌ߫ ߕߋ߰ߙߋ ߟߎ߬ ߓߟߏ߫߸ ߊ߬ߟߎ߬ ߟߊ߫ ߡߊ߬ߞߊ߲߬ߞߊ߲߬ߠߌ߲ ߞߏߕߌ߮ ߡߏ߬ߤߊ߲ߡߍߘ ߓߘߊߙߎ ߊߓߎߓߞߊߙ ߓߘߊ߫ ߓߙߐߕߐ߫ ߘߏߦߌ߲߫߸ ߊ߬ߟߋ ߡߍ߲ ߓߌ߬ߟߊ߬ ߛߊ߲ ߦߋ߫ ߟߐ߬ߘߎ߮ ߣߌ߲߬ ߘߐ߫ ߕߋ߲߬ ߞߊ߬ߣߌ߲߬، ߊ߬ߟߎ߫ ߞߊ߬ ߞߎ߲߭ ߡߍ߲ ߝߐ߫ ߊ߬ ߟߊ߫ ߓߙߐߐߕߟߌ ߢߌ߲߬ ߠߊ߫ ߜߍ ߘߐ߫߸ ߏ߬ ߟߋ ߝߊ߬ߘߌ߬ ߞߘߐ߬ߟߊ߬ ߗߏ߯ߦߊ ߘߌ߫߸ ߓߊ߬ߙߵߊ߬ ߕߎ߬ߡߊ ߟߋ߬ ߡߊ߫ ߓߊ߲߫ ߢߊߦߋ߫ ߟߊ߫ ߓߍ߯ ߓߟߏ߫ ߖߡߊ߬ߣߊ ߥߊ߫ ߢߊ ߞߏߛߐ߲߬.
ߡߏ߬ߤߊ߲ߡߍߘ ߓߘߊߙߎ ߊߓߎߓߞߊߙ߸ ߊ߬ߟߋ ߡߍ߲ ߛߊ߲߬ ߆߃ ߦߋ߫ ߕߋ߲߬߸ ߏ߬ ߕߍ߫ ߖߋ߬ߟߌ߬ߓߊ߬ߟߊ߫ ߡߊ߬ߞߊ߲߬ߞߊ߲߬ߠߌ߲ ߞߏߕߌ߯ ߘߌ߫ ߡߎ߬ߕߎ߲߬ ߤߊ߲߫، ߞߊ߲ߕߌ߯ߘߊ ߞߊ߲߫ ߞߏ߫ <<ߞߍ߲ߘߍߦߊ ߝߙߋߞߋ>> ߟߋ߬ ߞߍߣߍ߲߫ ߊ߬ ߟߊ߫ ߓߙߐߕߐߟߌ ߞߎ߲߭ ߘߌ߫߸ ߊ߬ߟߎ߬ ߡߊ߫ ߢߊߝߐߟߌ߫ ߜߘߍ߫ ߛߌ߫ ߟߴߏ߬ ߞߊ߲߬ ߡߎ߬ߕߎ߲߬، ߓߊ߬ߙߌ߬߸ ߓߙߐߕߐߟߌ ߢߌ߲߬ ߞߍߣߍ߲߫ ߕߎ߬ߡߊ߫ ߟߋ߬ ߟߊ߫ ߣߌ߲߬߸ ߡߍ߲ ߜߍ߬ߟߍ߲߬ߡߊ߲߫ ߖߡߊ߬ߣߊ ߞߣߐ߫، ߓߊߏ߬߸ ߊ߬ ߞߎ߲߬ߢߐ߲߮ ߞߋߟߋ߲ ߠߋ߬ ߕߋ߲߬߸ ߊ߬ߟߎ߫ ߞߊ߬ <<ߞߟߊߡߊ߲ߝߊߘߌ>> ߛߌ߰ ߛߋ߲߬ߠߊ߫ <<ߖߡߊ߬ߣߊ ߟߊ߫ ߟߊ߬ߞߊ߲߬ߘߊ߬ߟߌ>> ߞߏߛߐ߲߬߸ ߏ߬ ߡߍ߲ ߞߍ߫ ߘߊ߫ ߓߏ߬ߟߊ ߕߌ߬ߣߓߎ߬ ߓߟߏ߫߸ ߊ߬ߟߎ߬ ߟߊ߫ ߞߊ߲ߕߌ߮.
ߖߋ߬ߟߌ߬ߓߊ߬ߟߊ߫ ߦߋ߫ ߜߟߍ߬ߦߊ߬ ߛߌߦߊߡߊ߲߫ ߠߋ߬ ߕߍߡߊ߬ ߕߋ߲߬، ߞߎ߲߬ߢߐ߲߰ ߟߊ߬ߓߊ߲ ߢߌ߲߬ ߠߎ߬ ߞߣߐ߫߸ ߡߐ߰ ߦߙߌߞߊ߫ ߟߋ߬ ߖߊ߬ߛߏ߲߬ ߘߊ߫ ߡߙߊ߬ߒ߬ߡߊ߬ߝߋ߲߬ߕߌ߮ ߟߎ߬ ߓߟߏ߫߸ ߘߏ߫ ߟߎ߫ ߞߍ߫ ߘߊ߫ ߞߊ߬ߙߊ߲߬ߕߊ ߟߎ߬ ߟߊ߫، ߘߋ߲ߣߍ߲߫ ߗߡߍ߬ ߦߙߌߞߊ߫ ߣߌ߫ ߘߋ߲ߡߌߛߍ߲߫ ߓߌ߫ ߦߙߌߞߊ߫ ߟߋ߬ ߓߘߊ߫ ߖߊ߬ߛߏ߲߫ ߖߡߊ߬ߣߊ ߕߟߋ߬ߓߋ߬ ߞߐ߯ߘߎ߮ ߘߐ߫، ߡߐ߰ߖߎ߮ ߛߎ߯ߦߊ߫ ߛߌߦߊߡߊ߲߫ ߠߋ߬ ߖߡߊ߬ߣߊ ߝߊ߲߬ߞߣߐ ߏ߬ ߘߐ߫ ߦߋ߲߬߸ ߡߍ߲ ߦߋ߫ ߞߟߌ߫ ߟߴߊ߬ߟߎ߬ ߓߏ߫ ߞߏ߫: <<ߕߋ߰ߙߋ ߟߎ߬>>.
ߣߴߌ ߘߏ߲߬ ߞߊ߬ ߖߡߊ߬ߣߊ ߕߟߋ߬ߓߐ߬ ߞߐ߯ߘߎ߮ ߕߊ߬߸ ߓߊ߰ߓߊ߰ߟߌ߬ߟߊ߫ ߜߘߋߜߘߋߦߟߊ ߟߎ߫ ߟߋ߬ ߦߋ߲߬ ߓߊߞߍ߭߸ ߛߌ߬ߟߡߊ߬ ߝߊߕߐ ߟߎ߬ ߞߊ߫ ߛߌߦߊ߫ ߦߋ߲߬ ߞߏߛߓߍ߫߸ ߡߍ߲ ߠߎ߬ ߓߘߊ߫ ߛߊ߲߬ ߕߊ߲߫ ߣߌ߫ ߞߐ߫ ߞߍ߫ ߦߋ߲߬، ߖߡߊ߬ߣߊ ߕߍߡߊ߫ ߝߊ߲ ߝߣߊ߫ ߝߍ߬߸ ߛߣߍ߬ߞߍ߬ߟߊ ߟߎ߬ ߣߌ߫ ߓߌߦߊ߲߫ ߓߌߟߊߟߊ ߟߎ߫ ߟߋ߬ ߢߐ߲߮ ߠߊ߫ ߦߋ߲߬، ߣߴߌ ߘߏ߲߬ ߥߊ߫ ߘߊ߫ ߥߙߏ߬ߘߎ߮ ߕߟߋ߬ߓߐ ߘߐ߫߸ ߏ߬ ߝߣߊ߫ ߦߋ߫ ߟߊߡߊ߰ ߟߊ߫ ߕߍߝߘߊߟߊ߲ߘߌ ߟߎ߫ ߟߋ߬ ߓߟߏ߫ ߦߋ߲߬߸ ߡߍ߲ ߠߎ߬ ߦߋ߫ ߞߍ߬ߟߍ ߞߊ߲߬ ߞߵߊ߬ ߕߊ߬ ߖߘߍ߬ߕߌ߰ߦߊ ߕߊ߭ ߡߊ߬ ߤߊ߲߯ ߕߋ߲߬߸ ߓߌߦߊߝߙߊ߫ ߕߌ߲߬ߞߎߘߎ߲ ߘߐ߫.
ߡߐ߰ ߘߴߊ߬ ߝߐ߫ ߣߌ߲߬ ߘߐ߫ ߞߏ߫ ߖߡߊ߬ߣߊ ߝߊ߲߭ ߓߍ߯ ߟߋ߬ ߟߊ߬ߡߊ߮ ߘߐ߫ ߕߋ߲߬.
ߒ߬ߓߊ߬߸ ߡߊ߬ߞߊ߲߬ߞߊ߲߬ߠߌ߲ ߞߏߕߌ߮ ߟߊ߫ ߕߊ߯ߟߌ ߣߌ߲߬ ߞߍߣߍ߲߫ ߏ߬ ߕߎ߬ߡߊ߬ ߜߍߟߍ߲ ߠߋ߬ ߟߊ߫߸ ߖߡߊ߬ߣߊ߬ߘߋ߲ ߠߎ߬ ߦߋ߫ ߞߣߐ߬ߜߊ ߘߐ߫߸ ߡߊ߬ߞߏ ߦߋ߫ ߞߍߟߌ߫ ߕߎ߬ߢߊ߬ߡߊ ߘߏ߫ ߟߊ߫߸ ߞߵߊ߬ߟߎ߫ ߖߌ߰ߡߝߊ߬، ߏ߬ ߟߋ ߘߐ߫߸ ߘߐ߬ߞߕߌ߬ߟߌ߬ߟߊ ߘߏ߫ ߟߎ߫ ߞߊ߲߫ ߞߏ߫ ߗߍ߭ ߜߍ߲ߣߍ߲߫ ߠߋ߬߸ ߏ߬ ߟߋ ߟߊߗߋ߲߰ߧߊ߬ߣߍ߲߫ ߊ߬ߟߎ߬ ߓߟߏ߫ ߓߙߐߕߐߟߌ ߞߎߡߊߘߋ߲ ߠߊ߫.
ߖߡߊ߬ߣߊ ߟߊ߫ ߓߊߛߌ߯ߓߊߟߌߦߊ ߞߏߛߐ߲߬ ߞߏߖߎ߯ߦߊ߫߸ ߝߏ߫ ߞߐߞߊ߲߫ ߖߡߊߣߊ ߟߎ߬ ߓߘߴߊ߬ߟߎ߫ ߛߋ߲߭ߓߌ߬ߟߴߊ߬ ߘߐ߫: ߊߡߙߌߞߌ߬ ߞߊ߲ߕߌ߮ ߘߏߣߊߟ ߕߑߙߐ߲ߔ ߞߵߊ߬ ߦߌ߬ߘߊ߬ ߞߏ߫ ߖߋ߬ߟߌ߬ߓߊ߬ߟߊ߫ߕߴߊ߬ ߝߍ߬ ߞߊ߬ ߌߛߊ ߣߊߡߎ߲ ߘߏ߲߬ߞߏ ߟߎ߫ ߟߋ߬ ߦߋ߫ ߊ߬ߟߎ߬ ߢߊ ߟߊ߫.
ߣߌ߲߬ ߞߘߐ ߕߍ߫ ߘߏ߫ ߜߘߍ߫ ߘߌ߫߸ ߡߐ߱ ߡߍ߲ ߓߊ߯ ߞߍ߫ ߣߊ߬ ߟߊ߫ ߡߏ߬ߤߊ߲ߡߍߘ ߓߘߊߙߎ ߊߓߎߓߞߊߙ ߣߐ߭ ߘߐ߫߸ ߏ߬ ߣߌ߫ ߞߏ߫ ߛߌߦߊߡߊ߲߫ ߠߋ߬ ߞߍߟߌ ߞߢߊߡߊ߲߫ ߞߊߟߌߦߊ߫ ߓߟߏ ߡߊ߬ ߕߋ߲߬ ߘߋ߬߸ ߝߏ߫ ߊ߬ ߦߋ߫ ߞߊߘߊ߲߫ ߠߋ߬ ߞߊ߬ ߖߡߊ߬ߣߊ ߣߊ߲߬ߕߌ߮ ߟߎ߬ ߟߊ߫ ߟߊߒߠߦߊ ߢߌߣߌ߲߫߸ ߞߊ߬ ߓߊ߲߫ ߞߊ߬ ߖߡߊ߬ߣߊ߬ߘߋ߲ ߠߎ߬ ߝߣߊ߫ ߟߊ߫ ߟߊߒߠߦߊ ߛߐ߬ߘߐ߲߫ ߏ߬ ߢߊ߫ ߞߋߟߋ߲ ߡߊ߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
Aucun commentaire pour le moment.