ߛߣߍ߬ߜ߭ߊ߬ߟߌ߬ ߞߏߕߌ߯ ߝߟߐ ߓߘߊ߫ ߝߌߘߊ ߓߐ߫ ߥߎ߬ߣߎ߲߬ߥߎ߬ߣߎ߲߬ ߞߎߡߊ ߘߏ߫ ߢߍߡߊ߬߸ ߞߏ߫ ߊ߬ ߛߐ߬ߘߐ߲߬ߓߊߟߌߦߊ ߞߏߕߌ߯ ߟߊߘߍ߫ ߕߊ߬ߡߌ߲߬ߣߍ߲ ߘߐ߫߸ ߏ߬ ߞߎ߲߭ ߞߍ߫ ߘߴߊ߬ ߝߊ߬ߘߌ߬ ߞߘߐ߬ ߞߏ ߟߋ߬ ߘߌ߫، ߞߊ߬ ߓߊ߲߫ ߞߵߊ߬ ߦߌ߬ߘߊ߬ ߝߣߊ߫ ߞߏ߫ ߊ߬ ߞߊ߫ ߞߊ߲߫ ߞߊ߬ ߓߘߍ߬ߓߘߍ߬ߟߌ ߖߊ߲߬ߖߏ߲߬ߓߊ ߘߏ߫ ߞߍ߫߸ ߡߍ߲ ߓߍߣߊ߬ ߞߍ߫ ߖߡߊ߬ ߟߊ߬ߘߍ߫ ߘߍ߬ߜߍ ߘߌ߫.

ߎߛߑߡߊߣߌ߲߫ ߛߐ߲ߞߏ߫ ߡߍ߲ ߦߋ߫ ߛߣߍ߬ߜ߭ߊߟߌ߫ ߞߎ߲߬ߠߊ߬ߛߌ߮ ߞߎ߲߬ߕߌ߮ ߣߌ߫ ߞߏߕߌ߯ ߝߟߐ ߘߌ߫߸ ߊ߬ ߣߌ߫ ߔߊߛߑߕߍߝ ߝߊ߬ߛߏ߬ ߞߊ߬ߣߌ߲߬ߘߋ߲ ߠߎ߬ ߟߊ߫ ߓߘߍ߬ߓߘߍ߬ߟߌ߬ ߞߙߎߞߊ ߞߊ߲ߕߌ߮߸ ߏ߬ ߞߊ߬ ߘߐ߬ߞߣߍ߬ߟߌ߬ ߞߍ߫ ߖߊ߬ߡߊ ߦߋ߫ ߞߎߣߎ߲߬߸ ߞߵߊ߬ ߓߍ߲߬ ߊ߬ ߟߊ߫ ߞߐߓߊ߯ߦߊ ߡߊ߬ ߞߏߕߌ߯ ߟߊߘߍ߫ ߕߊ߬ߡߌ߲߬ߣߍ߲ ߘߐ߫، ߞߎߣߎ߲߬ ߞߍ߲ߘߍߟߏ߲ ߞߏ߲ߓߌߕߌ߮ ߕߋ߬ߟߋ߫ ߂߅ ߡߊ߬߸ ߊ߬ ߞߊ߬ ߝߘߏ߬ߓߊ߬ ߘߊ߲߬ߕߍ߰ߟߌ ߘߏ߫ ߞߍ߫ ߞߵߊ߬ ߟߊߛߋ߫ ߞߏ߫ ߞߵߊ߬ ߓߍ߲߬ ߊ߬ ߝߊ߬ߘߌ߬ ߞߘߐ߬ ߞߏ ߡߊ߬߸ ߕߎ߬ߡߊ߬ߣߍ߲߬ ߘߌ߫ ߘߴߊ߬ ߡߊ߬߸ ߞߏ߫ ߊ߬ ߦߴߊ߬ ߘߐߝߢߐ߫ ߏ߬ ߞߣߐ߫، ߊ߬ ߟߊ߫ ߘߐ߬ߝߢߐ߬ߟߌ ߏ߬ ߟߋ ߞߏߛߐ߲߬ ߛߊ߫߸ ߊ߬ ߡߊ߫ ߛߋ߫ ߛߐ߬ߘߐ߲߬ ߠߊ߫ ߞߏߕߌ߯ ߟߊߘߍ ߘߐ߫، ߊ߬ ߝߐ ߡߍ߲ ߦߴߌߘߐ߫ ߞߏ߫ ߝߐߢߐ߲߯ߞߐߣߍ߲߫ ߦߴߊ߬ ߣߌ߫ ߞߊ߲ߕߌ߯ ߓߊ߬ߛߌߙߎ߬ ߖߏ߬ߡߊߦߌ߬ ߝߊߦߌ߬ ߕߍ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߕߎ߬ߢߊ߬ ߛߌ߫ ߕߴߏ߬ ߘߐ߫.

ߛߐ߲ߞߏ߫ ߞߵߊ߬ ߦߌ߬ߘߊ߬߸ ߞߏ߫ ߤߊߟߌ߬ ߞߏߕߌ߯ ߟߊߘߍ ߓߊ߲ ߡߍ߲ ߞߍ߫ ߘߊ߫߸ ߖߏ߬ߡߊߦߌ߬ ߝߊߦߌ߬ ߥߊ߫ ߘߊ߫ ߓߐ߫ ߊ߬ ߡߊ߬ ߟߎ ߡߊ߬، ߊ߬ ߞߵߊ߬ ߦߌ߬ߘߊ߬ ߞߏ߫ ߘߎ߲߬ߘߎ߬ߡߊ߬ ߢߐ߲߯ߦߋ ߟߵߏ߬ ߘߌ߫ ߡߎߣߎ߲߬، ߓߊߏ߬߸ ߡߐ߰ ߛߌߦߊߡߊ߲߫ ߕߊ߫ ߖߊ߬ߕߋ߬ ߘߐ߫߸ ߊ߬ߟߎ߬ ߡߙߌߦߊ ߟߎ߬ ߓߘߊ߫ ߝߐ ߘߊߡߌ߬ߣߊ߬ ߢߐ߲߮ ߞߐ߫߸ ߓߊ߬ߙߌ߬ ߛߐ߲ߞߏ߫ ߡߴߏ߬ ߟߊߟߐ߬ ߡߎ߰ߡߍ߫.

ߣߍߣߍߓߊ ߕߟߋ߬ ߈ ߡߍ߲ ߣߊ߬ߕߐ߫ ߣߌ߲߬߸ ߛߐ߲ߞߏ߫ ߞߊ߫ ߞߊ߲߫ ߞߊ߬ <<ߕߋߙߊ ߡߋ߯ߕߌ߲ߜ߭>> ߟߋ߬ ߞߍ߫ ߟߋߏߔߏߟ ߛߋߘߊߙ ߛߍ߲ߜ߭ߐߙ ߓߙߊߞߣߍ ߘߐ߫، ߊ߬ ߞߊ߲߫ ߞߏ߫ ߊ߬ ߟߊ߫ ߞߙߎߞߊߘߋ߲ ߓߍ߯ ߦߴߊ߬ ߘߐߖߊ߬ ߞߊ߬ ߓߐ߫ ߣߌ߲߬ ߟߏ߲߸ ߞߊ߬ ߛߐ߬ߘߐ߲߬ ߟߊ߬ߘߍ߬ߓߊ ߣߌ߲߬ ߘߐ߫، ߓߊߏ߬ <<ߊ߬ ߞߍߕߐ߫ ߥߊ߯ߕߌ߫ ߟߋ߬ ߘߌ߫߸ ߡߍ߲ ߢߐ߲߰ ߕߎ߲߬ ߡߊ߫ ߞߍ߫ ߛߣߍ߬ߜ߭ߊߟߌ߫ ߞߣߐ߫ ߡߎߣߎ߲߬.>>

ߊ߬ ߟߊ߫ ߢߍߥߟߊ ߘߐ߫߸ ߊ߬ ߞߊ߫ ߞߊ߲߫ ߞߊ߬ ߞߎߡߊ߫ ߖߡߊ߬ߣߊ ߡߙߊ߬ ߢߊ ߞߊ߲߬߸ ߞߵߊ߬ ߕߵߊ߬ߟߎ߫ ߣߊ߬ ߘߊ߫ ߖߡߊ߬ߣߊ ߞߎ߲߬ߠߊ߬߸ ߏ߬ ߡߍ߲ ߛߊ߲߬ ߞߋߟߋ߲߫ ߣߌ߫ ߕߟߊ ߦߋ߫ ߕߋ߲߬ ߞߊ߬ߣߌ߲߬، ߞߏߕߌ߯ ߝߟߐ ߞߊ߲߫ ߝߣߊ߫߸ ߞߏ߫ ߊ߬ ߓߍߣߊ߬ ߕߎ߬ߢߊ ߥߐߘߐ߲߫ ߣߌ߲߬ ߟߏ߲߸ ߞߵߊ߬ ߞߍ߫ ߖߊ߬ߡߊ ߕߍ߯߸ ߜߟߍ߬ߦߊ ߡߍ߲ ߦߴߊ߬ߟߎ߫ ߞߊ߲߬߸ ߊ߬ߟߎ߬ ߢߊߙߊ߲ߣߍ߲߫ ߦߙߐ ߡߍ߲ ߠߎ߬ ߘߐ߫߸ ߊ߬ ߣߌ߫ ߟߊ߬ߢߌߣߌ߲ ߡߍ߲ ߠߎ߬ ߦߴߊ߬ߟߎ߬ ߟߊ߫ ߥߊ߯ߕߌ߫ ߣߊ߬ߕߐ ߟߎ߬ ߘߐ߫، <<ߒ ߘߌߣߊ߬ ߞߎߡߊ߫ ߞߏ߫ ߛߌߦߊߡߊ߲߫ ߞߊ߲߬ ߖߡߊ߬ߣߊ ߟߊ߫ ߞߏ ߘߐ߫، ߡߍ߲ ߓߍ߲߬ߣߍ߲߬߸ ߡߍ߲ ߓߍ߲߬ߣߍ߲߬ ߕߍ߫߸ ߊ߲ ߓߘߊ߫ ߡߍ߲ ߞߍ߫߸ ߊ߬ ߣߴߊ߲ ߞߊ߫ ߞߊ߲߫ ߞߊ߬ ߡߍ߲ ߞߍ߫.>>

ߏ߬ ߘߐ߫߸ ߣߍߣߍߓߊ ߕߟߋ߬ ߈ ߞߍߕߐ߫ ߟߏ߲ߓߊ߫ ߟߋ߬ ߘߌ߫߸ ߛߐ߲ߞߏ߫ ߓߍߣߊ߬ ߞߎߡߊ߫ ߟߏ߲ ߡߍ߲߸ ߞߊ߬ ߕߎ߬ߢߊ ߞߍ߫ ߖߊ߬ߡߊ ߕߍ߯.

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.