ߝߊߙߌ߲ ߡߎߛߊ߫ ߞߐ߲ߘߍ߫ ߡߍ߲ ߕߘߍ߬ ߞߊ߲ߞߊ߲߫ ߞߎ߲߬ߠߊ߬ߛߌ߰ߟߊ ߘߌ߫߸ ߏ߬ ߓߘߴߊ߬ ߟߐ߬ߘߎ߮ ߟߊߕߊ߬ߡߌ߲߬ ߝߊߙߌ߲ ߊ߬ߟߌ ߓߊߘߊ߬ߙߊ ߞߡߊ߬ߙߊ߫ ߡߊ߬߸ ߏ߬ ߡߍ߲ ߦߋ߫ ߞߊ߲ߞߊ߲߫ ߞߎ߲߬ߠߊ߬ߛߌ߰ߟߊ߬ ߞߎߘߊ ߘߌ߫ ߕߋ߲߬، ߏ߬ ߞߍ߫ ߘߊ߫ ߗߋߢߊ߫ ߟߕߊߡߌ߲߫ ߖߊ߲ߖߏ߲ ߘߏ߫ ߟߋ߬ ߘߐ߫ ߞߎ߲߬ߠߊ߬ߛߌ߰ߟߊ߫ ߓߌ߬߸ ߡߍ߲ ߞߍ߫ ߘߊ߫ ߕߙߎ߬ ߘߌ߫ ߞߊ߬ ߞߊ߲ߞߊ߲߫ ߘߎ߰ߞߣߍ ߡߊ߬ߡߙߊ߬ߟߌ ߦߋߝߊߘߌ ߡߊߝߊ߬ߟߋ߲߬.

ߟߊ߬ߘߍ߬ ߞߟߊߒߞߋ߫ ߟߋ߬ ߡߊߞߟߌ߫ ߘߊ߫ ߞߊ߲ߞߊ߲߫ ߞߎ߲߬ߠߊ߬ߛߌ߰ߟߊ ߟߊ߬ߘߍ߬ ߝߏ߮ ߞߣߐ߫ ߓߌ߬߸ ߛߏ ߡߐ߰ߓߊ ߟߎ߬߸ ߊ߬ ߣߌ߫ ߡߙߊ߬ߦߊ߬ߞߊ߲ߞߋ ߟߎ߬ ߣߌ߫ ߡߊ߲߬ߕߏ߲߬ߕߍ߬ ߛߌ߲߬ߝߏ߲߬ߘߊ ߛߌߦߊߡߊ߲߫ ߕߘߍ߬ ߞߣߍ ߡߍ߲ ߞߊ߲߬߸ ߞߊ߬ ߛߐ߬ߘߐ߲߬ ߞߎ߲߬ߠߊ߬ߛߌ߰ߟߊ߬ ߓߐߕߊ ߣߌ߫ ߞߎߘߊ ߟߊ߫ ߗߋߢߊ߫ ߟߕߊߡߌ߲ ߖߊ߲߬ߖߏ߲ ߘߐ߫߸ ߏ߬ ߡߍ߲ ߞߍ߫ ߘߊ߫ ߓߌ߬ ߞߐ߬ߓߊ߬ߟߏ߲ ߣߌ߲߬ ߡߊ߬ ߞߊ߬ߣߌ߲߬.

ߝߊߙߌ߲ ߡߎߛߊ߫ ߞߐ߲ߘߍ߫߸ ߊ߬ߟߋ ߡߍ߲ ߞߍ߫ ߘߊ߫ ߞߊ߲ߞߊ߲߫ ߞߎ߲߬ߠߊ߬ߛߌ߰ߟߊ ߘߌ߫ ߂߀߂߃ ߘߓߊ߬ߓߌߟߊ ߕߟߋ߬ ߁߈ ߡߊ߬߸ ߊ߬ ߞߊ߬ ߓߋߟߋ߲ߠߊ߫ ߞߟߊߒߞߋ߫ ߞߍ߫ ߓߌ߬߸ ߡߍ߲ ߞߍ߫ ߘߴߊ߬ ߟߊ߫ ߛߙߊ߬ߒ߬ߞߊ߲߬ߠߊ ߘߌ߫ ߢߊߖߌ ߘߐ߫ ߝߊߦߌߘߊ߫، <<ߒ ߧߋ߫ ߞߎߡߊ ߕߊ߬ ߟߊ߫ ߢߏߘߏ߲ ߠߋ߬ ߘߐ߫ ߓߌ߬߸ ߖߊ߲߬ߖߏ߲ ߣߌ߲߬ ߡߍ߲ ߞߍߕߐ߫ ߒ ߠߊ߫ ߗߋߦߊߟߌ ߞߎ߲߬ߝߊ߮ ߘߌ߫ ߕߌ߲߬ߞߎߘߎ߲ ߣߌ߲߬ ߘߐ߫ ߦߊ߲߬، ߒ ߓߊ߯ߙߊ ߞߊ߲ߞߊ߲߫ ߦߊ߲߬߸ ߏ߫߬ ߞߍ߫ ߘߊ߫ ߒ ߡߊ߬ ߞߎ߲߬ߠߊ߬ߦߋ߬ߙߋ߲߬ߓߊ߫ ߟߋ߬ ߘߌ߫.>> ߊ߬ ߟߊ߫ ߞߎߡߊ ߘߏ߫ ߟߵߏ߬ ߘߌ߫، ߊ߬ ߞߊ߬ ߞߊ߲ߞߊ߲߫ ߗߋߘߊߕߌ߮ ߟߎ߬ ߝߏ߬ ߊ߬ߟߎ߬ ߟߊ߫ ߘߐ߬ߖߊ߬ ߞߍߣߍ߲ ߠߊ߫߸ ߞߵߊ߬ ߣߊ߲߬ߕߌ߮ ߟߎ߬ ߝߏ߬߸ ߊ߬ ߣߌ߫ ߖߡߊ߬ߣߊ߬ߘߋ߲ ߠߎ߬ ߣߌ߫ ߡߙߊ߬ߦߊ߬ߞߊ߲ߞߋ ߕߐ߬ߡߊ ߟߎ߬ ߓߍ߯ ߟߊߘߍ߬ߣߍ߲ ߞߐߘߍ߫.

<<ߊ߲ ߛߋ߫ ߘߊ߫ ߜߟߍ߬ߦߊ ߟߎ߬ ߟߊߕߊ߬ߡߌ߲߬ ߠߊ߫ ߢߐ߲߯ ߝߍ߬߸ ߞߊ߬ ߓߍ߲߬ߒ߬ߛߋ߲߬ߡߊ ߟߎ߫ ߕߣߐ߬ߓߐ߬߸ ߞߊ߬ ߛߋ߫ ߓߊ߯ߙߊ߫ ߘߐ߬ߖߊ߬ߣߍ߲ ߠߎ߬ ߞߍ߫ ߟߊ߫، ߒ ߧߋ߫ ߒ ߠߊ߫ ߛߍߥߊ ߦߌ߬ߘߊ߬ ߟߊ߫ ߞߊ߲ߞߊ߲߫ ߠߊ߫߸ ߞߊ߬ ߘߎߓߴߊ߬ ߦߋ߫ ߥߙߎߞߌ ߛߌߟߊ ߕߊ߯ߡߊ ߘߐ߫߸ ߊ߬ ߣߌ߫ ߞߍߞߋߟߋ߲ߘߌ ߟߊߛߓߊ߬ߕߌ ߟߴߊ߬ ߞߣߐ߫߸ ߞߵߏ߬ ߟߊ߫ ߖߐ߫ ߓߟߏߕߍ߰ߓߊߟߌ ߞߊ߲߬.>> ߊ߬ ߞߵߊ߬ ߟߊ߫ ߞߎߡߊ ߘߊߓߊ߲߫ ߞߊ߬ ߝߏ߬ߟߌ ߟߊߛߴߊ߬ ߘߍ߬ߒ߬ߞߏ߬ߡߊ߬ߢߐ߲߮ ߠߎ߬ ߡߊ߬߸ ߊ߬ ߣߌ߫ ߞߊ߲ߞߊ߲߫ ߣߊ߬ߓߊ߰ߦߊ߫ ߡߌ߬ߙߌ߲߬ߘߌ، ߞߣߊ߬ߕߏ߫ <<ߞߟߊߓߎ ߣߌ߫ ߛߌߡߊ ߣߌ߫ ߛߎߘߊ߲>> ߣߕߊ߬ ߟߴߊ߬ ߣߘߐ߬ߓߌߟߊ ߦߋ߫.

ߒ߬ߓߊ߬߸ ߞߎ߲߬ߠߊ߬ߛߌ߰ߟߊ߬ ߞߎߘߊ ߛߍߣߍ߲߬߸ ߝߊߙߌ߲ ߊ߬ߟߌ ߓߊߘߊ߬ߙߊ ߞߡߊ߬ߙߊ߬߸ ߏ߬ ߡߍ߲ ߕߘߍ߬ ߒ ߛߙߍߜߍ߬ߘߍ߫ ߞߎ߲߬ߠߊ߬ߛߌ߰ߟߊ ߘߌ߫߸ ߏ߬ ߞߵߊ߬ ߟߊ߫ ߟߐ߬ߘߎ߰ ߞߎ߬ߘߊ߬ߕߌ߰ߦߊ ߣߌ߲߬ ߦߋ߫ ߞߊ߬ ߓߐ߫ ߓߏ߲߫ ߞߣߐ߫ ߞߊ߬ ߣߊ߬ ߓߏ߲߫ ߞߣߐ߫ ߟߋ߬ ߘߌ߫، ߓߊߏ߬߸ ߊ߬ <<ߛߐ߬ߘߐ߲߬ ߘߊ߫ ߕߌ߲߬ߞߎߘߎ߲ ߢߌ߲߬ ߠߋ߬ ߞߣߐ߫، ߒ ߣߊ߭ ߏ߬ ߞߣߐ߫ ߓߌ߬ ߝߣߊ߫߸ ߞߊ߬ ߒ ߞߍ߫ ߞߎ߲߬ߠߊ߬ߛߌ߰ߟߊ ߘߌ߫߸ ߏ߬ ߦߋ߫ ߞߏ߫ ߕߐ߰ߡߊ߬ߛߙߋ߬ߡߊ߬ߓߊ߫ ߟߋ߬ ߘߌ߫߸ ߡߍ߲ ߦߋ߫ ߘߐ߬ߝߐ ߟߊ߫ ߞߕߐߡߛߊߦߌ߲ ߝߐ߫ ߟߊ߫.>>

ߊ߬ ߞߵߊ߬ ߟߊ߫ ߞߎߟߎ߲ߖߋߟߌ ߟߊߛߋ߫ ߞߊ߲ߓߍ߲ ߞߊ߲ߕߌ߮ ߡߊ߬߸ ߊ߬ ߞߍ ߘߐ߫ ߞߊ߬ ߟߊߒߠߦߊ ߟߴߊ߬ ߘߐ߫߸ ߞߊ߬ ߓߊ߲߫ ߞߊ߬ ߞߊ߲ߞߊ߲ߞߊ ߟߎ߬ ߝߣߊ߫ ߝߏ߬߸ ߊ߬ ߟߊߛߣߍ߫ ߢߊ ߘߐ߫ ߊ߬ߟߎ߬ ߓߟߏ߫߸ ߊ߬ ߣߌ߫ ߞߊ߬ ߝߊߙߌ߲ ߡߎߛߊ߫ ߞߐ߲ߘߍ߫ ߟߊ߫ ߓߊ߯ߙߊ߫ ߞߍߣߍ߲ ߠߎ߬ ߕߊ߲߬ߘߏ߬߸ ߊ߬ ߣߊ߬ߣߍ߲߫ ߏ߬ ߡߍ߲ ߣߐ߭ ߘߐ߫ ߞߊ߬ߣߌ߲߬: <<ߒ ߓߘߊ߫ ߟߊ߬ߤߘߌ ߕߊ߬ ߞߏ߫ ߒ ߘߌ߫ ߓߊ߯ߙߊ߫ ߘߊߡߌ߬ߣߊ߬ߣߍ߲ ߠߎ߬ ߘߊߓߊ߲߫߸ ߡߍ߲ ߠߎ߬ ߦߋ߫ ߛߏ ߟߊߥߙߎߞߌ߫ ߞߏ ߟߎ߬ ߘߌ߫߸ ߊ߬ ߣߌ߫ ߡߍ߲ ߘߌߡߊ߲߫ ߡߌ߬ߙߌ߲߬ߘߌ ߟߊ߫.>>

ߞߎ߲߬ߠߊ߬ߛߌ߮ ߞߎߘߊ ߞߵߊ߬ ߟߊ߫ ߓߊ߯ߙߊ߫ ߞߍߕߊ ߟߎ߬ ߝߐ߫: <<<ߡߍ߲ ߟߐ߯ ߦߋ߫ ߒ ߠߊ߫ ߞߊ߲ߞߊ߲߫߸ ߏ߬ ߣߐ߰ߡߊ߲߬ ߓߊߟߋ߬: ߞߊ߬ ߓߍ߯ ߟߊߘߍ߬߸ ߞߊ߬ ߓߍ߯ ߞߍ߫ ߞߋߟߋ߲߫ ߘߌ߫߸ ߞߊ߬ ߛߋ߫ ߝߊ߲߬ߞߊ ߟߎ߬ ߞߍ߫ ߟߊ߫ ߢߐ߲߮ ߞߊ߲߬߸ ߖߐ ߟߊߛߓߊ߬ߕߌ ߡߙߌߦߊ ߞߊ߲߬߸ ߊ߬ ߣߌ߫ ߓߟߏ߫ ߘߌ߫ ߢߐ߲߰ ߡߊ ߞߊ߲߬߸ ߡߍ߲ ߘߌ߫ ߞߍ߫ ߥߙߎߞߌ߫ ߞߏ ߘߌ߫. ߞߊ߲ߞߊ߲߫ ߕߌ߲߬ߞߎߘߎ߲߫ ߕߣߐ߬ߡߊ߬ߓߊ߫ ߟߋ߬ ߘߌ߫߸ ߊ߲ ߞߊ߫ ߞߊ߲߫ ߞߊ߬ ߛߋ߫ ߡߍ߲ ߦߟߍ߬ߡߊ߲߬ ߠߊ߫ ߢߊ߫ ߡߊ߬߸ ߡߍ߲ ߕߐ߬ߣߐ ߘߌ߫ ߛߴߊ߲ ߡߊ߬.>>

ߖߊ߲߬ߖߏ߲ ߣߌ߲߬ ߟߊ߬ߛߣߍ߬ߟߌ߬ ߓߋߟߋ߲ߠߊ ߞߊ߬ߙߊ߲߬ ߘߊ߫ ߞߎߓߋߘߐ ߞߎ߲߬ߕߌ߮ ߟߋ߬ ߓߟߏ߫߸ ߓߐ߬ߟߐ߲߬ߞߊ߬ ߛߣߊߛߊ߬ ߕߎ߬ߙߋ߸ ߏ߬ ߞߊ߬ ߞߎ߲߬ߠߊ߬ߛߌ߰ߟߊ߬ ߓߐߕߊ ߟߊ߫ ߓߊ߯ߙߊ ߟߎߎ߫ ߕߊ߲߬ߘߏ߬: <<ߌ ߟߊ߫ ߞߎ߲߬ߕߌ߰ ߓߘߍ߬ߦߊ ߞߣߐ߫߸ ߓߊ߯ߙߓߊ߫ ߛߌߦߊߡߊ߲߫ ߛߋ߫ ߘߊ߫ ߞߍ߫ ߟߊ߫ ߘߊߞߎ߲߫ ߛߌߦߊߡߊ߲߫ ߘߐ߫: ߟߊ߬ߞߊ߲߬ߘߊ߬ߟߌ߸ ߘߎ߰ߞߣߍ ߡߊ߬ߡߙߊ߬ߟߌ߸ ߞߍߢߐ߲߯ߝߍ߸ ߘߌ߲߬ߞߌߙߊ ߟߊߥߙߎߞߌ.>> ߊ߬ ߞߵߊ߬ ߦߌ߬ߘߊ߬ ߝߣߊ߫ ߞߏ߫: <<ߕߌ߲߬ߞߎߘߎ߲ ߡߊ߬ߡߙߊ߬ߟߌ߬ߟߊ ߓߍ߯ ߦߋ߫ ߞߎ߲߬ߠߊ߬ߛߌ߰ߟߊ߬ ߞߎߘߊ ߟߊ߫ ߓߌ߬ߟߊ ߘߐ߫.>>

ߖߊ߲߬ߖߏ߲ ߞߎ߲߭ߝߊ߰ ߘߊ߫ ߞߊ߲ߞߊ߲߫ ߕߌ߲ߓߌߘߌ߲ߘߓߊ ߢߍߓߊ߯ ߛߙߍߞߍ ߟߋ߬ ߓߟߏ߫߸ ߞߊ߬ ߘߎߓߊ߫ ߞߎ߲߬ߕߌ߰ ߞߘߐ ߦߋ߫߸ ߞߊ߬ ߘߎߓߊ߫ ߞߎߘߊ ߦߋ߫߸ ߊ߬ ߣߌ߫ ߛߏ ߦߋ߫߸ ߏ߬ ߟߋ ߞߍ߫ ߘߊ߫ ߖߊ߲߬ߖߏ߲ ߞߎ߲߬ߘߏ߲ ߘߌ߫.

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫߸ ߆߂߀ ߉߁ ߇߁ ߀߄