ߝߊߙߌ߲ ߡߏ߬ߤߊ߬ߡߍߘ ߢߊ߲ߜ߭ ߞߍ߫ ߘߊ߫ ߞߊ߲ߞߊ߲߫ ߡߙߊ߬ߓߊ߮ ߘߌ߫ ߞߏߟߌ߲ߞߏߟߌ߲ ߕߋ߬ߟߋ߫ ߃ ߟߋ߬ ߡߊ߬߸ ߂߀߂߅ ߢߌ߲߬ ߠߊ߫، ߒ߬ߓߊ߬߸ ߊ߬ ߞߵߊ߬ ߟߊ߫ ߓߊ߯ߙߊ ߘߊߡߌ߬ߣߊ߬ ߞߐ߬ߓߊ߬ߟߏ߲ ߣߌ߲߬ ߡߊ߬ ߞߏߟߌ߲ߞߏߟߌ߲ ߕߟߋ߬ ߈߸ ߊ߬ ߓߌ߬ߟߊ߬ ߘߊ߫ ߝߘߏ߬ߓߊ߬ ߜߋ߬ߟߎ߲߬ߠߌ߲߬ߠߊ ߞߊ߲ߖߊ߬ ߡߊ߰ߙߊ ߟߋ߬ ߣߐ߭ ߘߐ߫، ߖߊ߲߬ߖߏ߲ ߞߍ߫ ߘߊ߫ ߢߊ߰ߢߊ߮ ߟߋ߬ ߘߐ߫߸ ߞߏߢߌߡߊߟߐ߲ ߓߋߟߋ߲ߠߊ ߟߎ߬ ߣߌ߫ ߟߕߊ߬ߡߌ߲߬ߡߊ߬ߟߌ߬ ߛߌ߲ߞߐ߲ߡߌߘߕߊ ߟߎ߬ ߣߌ߫ ߖߘߍ߬ߘߏ߲߬ ߞߊ߲߬ߡߊ ߟߎ߬.
ߖߊ߲߬ߖߏ߲߬ ߘߊߞߎ߲ ߣߌ߲߬ ߘߐ߫߸ ߝߊ߰ߡߊ߬ ߛߌߦߊߡߊ߲߫ ߕߍ߬ߘߍ߫ ߦߋ߲߬ ߞߊ߬ ߝߘߊ߫ ߞߊ߲ߞߊ߲߫ ߣߴߊ߬ ߟߊߡߌߣߌ߲ ߠߊ߫߸ ߘߌ߯ߣߊ߫ ߘߏ߲ߞߏ ߟߎ߬ ߣߌ߫ ߟߊ߬ߡߌߣߌ߲ ߡߙߊ߬ߓߊ߮ ߟߎ߬߸ ߞߵߏ߬ ߟߊ߫ ߞߎ߲߬ߠߊ߬ߛߌ߰ߟߊ߬ ߞߘߐ ߣߌ߫ ߞߎߘߊ ߞߊ߲߬߸ ߗߋߢߊ߫ ߟߕߊߡߌ߲ ߞߍ߫ ߘߊ߫ ߘߎ߰ߞߣߍ ߡߊ߬ߡߙߊ߬ߟߌ ߣߌ߫ ߕߊ߲ߓߊ߲ߓߐߟߌ ߝߘߏ߬ߓߊ߬ ߜߋ߬ߟߎ߲߬ߠߌ߲߬ߠߊ ߟߊ߫ ߓߏ߲߬ߧߊ ߟߋ߬ ߞߣߐ߫، ߝߘߏ߬ߓߊ߬ ߜߋ߬ߟߎ߲߬ߠߌ߲߬ߠߊ߫ ߞߊ߲ߖߊ߬ ߡߊ߰ߙߊ߸ ߊ߬ߟߋ ߡߍ߲ ߦߋ߫ ߡߙߊ߬ߓߊ߰ ߓߐߕߊ ߘߌ߫߸ ߣߴߊ߬ ߓߘߊ߫ ߞߙߍߞߙߍ߫ ߞߵߊ߬ ߞߍ߫ ߖߞߋߘߎ߯ ߡߙߊ߬ߓߊ߮ ߘߌ߫߸ ߏ߬ ߞߵߊ߬ ߟߊ߫ ߞߎ߲߬ߠߊ߬ߦߋߙߋ߲ ߠߋ߬ ߦߌ߬ߘߊ߬ ߘߊߞߎ߲ ߣߌ߲߬ ߘߐ߫߸ ߊ߬ ߞߊ߬ ߥߊ߯ߕߌ ߡߍ߲ ߞߍ߫ ߣߊ߬ߓߊ߰ߦߊ߬ ߞߣߐ߫.
<<ߒ ߛߋ߫ ߘߊ߫ ߞߙߍߞߙߍ߫ ߟߊ߫ ߞߊ߬ ߖߡߊ߬ߣߊ߬ ߞߎ߲ߕߎߙߎ߲ ߞߐߦߌ߬ߘߊ߬ ߘߊߞߎ߲ ߓߍ߯ ߘߏ߫ ߘߐ߫، ߞߊ߬ ߛߋ߫ ߖߊ߬ߡߊ ߟߊ߫ ߖߛߎ߬ߛߎߡߊ ߕߏ߫ ߟߴߊ߬ ߡߊ߬߸ ߞߊ߬ ߕߊ߲ߓߊ߲ߓߐߟߌ ߓߊ߯ߙߊ ߟߎ߬ ߞߍ߫ ߊ߬ ߢߊ ߡߊ߬߸ ߞߊ߬ ߛߋ߫ ߓߘߍ߬ߓߘߍ߬ߟߌ ߛߌ߲߬ߝߏ߲߬ߘߊ ߟߎ߬ ߡߊߘߍ߬ߡߍ߲߬ ߠߊ߫߸ ߞߊ߬ ߛߋ߫ ߖߊ߲߬ߕߏ߬ ߞߍ߫ ߟߊ߫ ߓߊ߯ߙߊ߫ ߘߊߞߎ߲߫ ߕߋ߬ߣߍ߲ ߠߎ߬ ߘߐ߫߸ ߞߵߏ߬ ߟߎ߬ ߞߍ߫ ߊ߬ ߢߊ ߡߊ߬߸ ߓߏ߲߬ߧߊ ߣߌ߫ ߞߎ߬ߙߎ߲߬ߘߎ߬ ߓߏ߲ߧߊ ߞߣߐ߫.>> ߞߊ߲ߖߊ߬ ߟߋ߬ ߞߊ߲߫ ߕߋ߲߬.
ߊ߬ ߞߊ߬ ߓߊ߯ߙߊ߫ ߞߍߣߍ߲ ߘߏ߫ ߟߎ߫ ߝߐ߫ <<ߊ߲ ߛߋ߫ ߘߊ߫ ߝߘߏ߬ߓߊ߬ ߓߊ߯ߙߊ ߟߎ߬ ߞߍߟߌ ߘߊߓߊ߲߫ ߠߊ߫߸ ߓߟߏ߫ ߞߏ ߟߊ߫ ߘߛߍ ߣߴߊ߬ ߕߊ߫߸ ߊ߲ ߛߋ߫ ߘߊ߫ ߟߊ߬ߞߊ߲߬ߘߊ߬ߟߌ ߣߌ߫ ߘߍ߭ ߞߏ߫ ߞߟߊߡߊ߲ ߠߎ߬ ߢߊߓߐ߫ ߟߊ߫߸ ߞߊ߬ ߛߋ߫ ߟߊ߬ߛߋ߬ߟߌ߬ ߘߊߞߎ߲ ߠߎ߬ ߝߣߊ߫ ߟߊߢߊ߬ ߟߊ߫߸ ߞߊ߬ ߡߊ߬ߡߙߊ߬ߟߌ ߡߊߘߏ߲߬ ߘߎ߰ߘߋ߲ ߠߎ߬ ߟߊ߫.>>
ߊ߬ ߞߊ߬ ߝߏ߬ߟߌ ߟߊߛߴߊ߬ ߞߏߟߊߘߍߢߐ߲߮ ߠߎ߬ ߡߊ߬: <<ߒ ߧߋ߫ ߡߊ߬ߓߏ߲߬ߧߊ߬ߕߊ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߎߟߎ߲ߖߋ߫ ߟߊ߫߸ ߞߊ߬ ߞߎߟߎ߲ߖߋߟߌ ߏ߬ ߢߐ߲߰ ߠߊߛߋ߫ ߕߊ߲ߓߊ߲ߓߐߟߌ ߞߏߕߌ߯ߘߊ ߡߊ߬߸ ߊ߬ ߣߌ߫ ߞߎ߲߬ߠߊ߬ߛߌ߰ߟߊ ߡߎߛߊ߫ ߞߐ߲ߘߍ߫߸ ߞߎߡߊߕߍ߫ ߡߊ߬ߞߊ߲߬ߞߊ߲߬ߠߌ߲߬ߠߊ ߟߎ߬ ߣߌ߫ ߣߊ߲߬ߒ߬ߕߊ߲߬ ߘߍ ߟߎ߬ ߡߊ߬߸ ߊ߬ߟߎ߬ ߟߊ߫ ߘߍ߬ߡߍ߲߬ߠߌ߲ ߞߏߛߐ߲߬.>>
ߊ߬ ߞߎߡߊ߫ ߘߴߊ߬ ߣߘߐ߬ߓߌߟߊ ߝߣߊ߫ ߝߍ߬: <<ߒ ߕߋߙߌ߫߸ ߒ ߧߋ߫ ߡߙߊ߬ߓߊ߰ߘߊ ߓߊ߯ߙߊ ߟߎ߬ ߟߊߕߊ߬ߡߌ߲߬ ߠߴߌ ߡߊ߬ ߓߌ߬، ߒ ߧߋ߫ ߘߎߓߊ߫ ߟߴߌ ߦߋ߫ ߤߙߊ߫ ߛߐߘߐ߲ ߠߊ߫، ߟߊߒߠߦߊ ߘߐߖߊ߬ ߖߡߊ߬ߣߊ ߣߌ߫ ߡߌ߬ߙߌ߲߬ߘߌ ߕߍ߫ ߛߊ߬ߙߌ߬ߦߊ ߞߊ߲߬߸ ߛߋߓߊ߯ߦߊ ߞߊ߲߬߸ ߊ߬ ߣߌ߫ ߡߊ߬ߘߏ߲߬ߢߐ߲߰ߠߊ߬ ߜߐߞߎ ߞߊ߲߬.>>
ߏ߬ ߟߋ ߞߐ߫߸ ߡߙߊ߬ߓߊ߰ ߞߎߘߊ ߝߊߙߌ߲ ߡߏ߬ߤߊ߬ߡߍ߬ߘ ߢߊ߲ߜ߭ ߞߊ߬ ߛߙߊ߬ߣߎ߲ ߕߊ߬߸ ߞߵߊ߬ ߟߊ߫ ߛߍߥߊ ߦߌ߬ߘߊ߬، <<ߣߌ߲߬ ߦߋ߫ ߞߎߎ߲߬ߠߊ߬ߦߋ߬ߙߋ߲߬ ߞߏ߬ߓߊ߫ ߟߋ߬ ߘߌ߫ ߒߠߋ ߓߟߏ߫ ߕߋ߲߬، ߒ ߓߟߏ߫ ߝߌ߬ߟߊ ߦߴߊ߬ ߞߘߐ߫ ߟߋ߬ ߜߌߜߌ߫߸ ߓߊߏ߬ ߊ߬ ߦߋ߫ ߒ ߞߊ߲߬ ߛߋ߲ߛߋߘߋ߲ ߠߋ߬ ߘߌ߫ ߡߎ߬ߕߎ߲߬.>>
ߊ߬ ߞߵߊ߬ ߦߌ߬ߘߊ߬ ߞߏ߫: <<ߞߊ߲ߞߊ߲߫ ߦߋ߫ ߞߋ߬ߟߋ߲߬ߧߊ ߣߌ߫ ߖߛߎ߬ߛߎߡߊ ߛߏ ߟߋ߬ ߘߌ߫.>>ߊ߬ ߞߊ߬ ߟߊ߬ߤߘߌ ߕߊ߬ ߞߏ߫ ߊ߬ ߘߌ߫ ߡߊ߬ߙߊ ߞߍ߫ ߢߐ߲߯ ߞߊߣߌ߲ ߓߊ߲ߓߊ߲ ߞߊ߲߬ <<ߒ ߣߊ߬ߣߍ߲߫ ߦߊ߬ ߓߊ߯ߙߊ߫ ߞߊ߲ ߠߋ߬ ߡߊ߬߸ ߞߊ߬ ߡߐ߱ ߟߎ߬ ߓߟߏ ߟߊ߫ ߢߐ߲߮ ߞߊ߲߬߸ ߞߊ߬ ߓߍ߯ ߟߊߡߍ߲߫߸ ߞߊ߬ ߓߍ߯ ߘߍ߬ߡߍ߲߬ ߦߏ߫ ߞߊ߲ߕߌ߮ ߢߌߣߌ߲ߣߴߊ߬ ߡߊ߬ ߢߊ ߡߍ߲ ߡߊ߬.>> ߊ߬ ߞߵߏ߬ ߟߋ ߝߐ߫.
<<ߞߊ߲ߞߊ߲߫ ߦߋ߫ ߖߛߎ߬ߛߎߡߊ ߛߏ ߟߋ߬ ߘߌ߫߸ ߓߏ߲߬ߧߊ ߛߏ ߟߋ߬߸ ߟߐ߲ߠߌ߲ߦߊ ߛߏ ߟߋ߬، ߒ ߓߘߊ߫ ߟߊ߬ߤߘߌ ߕߊ߬߸ ߒ ߘߌ߫ ߓߊ߯ߙߊ߫ ߞߊ߬ ߓߍ߯ ߓߟߏ ߘߏ߲߬ ߢߐ߲߮ ߓߟߏ߫. ߒ ߘߌ߫ ߞߍ߫ ߡߙߊ߬ߓߊ߰ ߘߌ߫߸ ߡߍ߲ ߘߴߊ߬ ߡߊߘߏ߲߬ ߘߎ߰ߘߋ߲ ߠߎ߬ ߟߊ߫߸ ߞߵߊ߬ߟߎ߬ ߟߊߡߍ߲߫߸ ߞߊ߬ ߒ ߓߌ߬ߟߴߊ߬ߟߎ߫ ߛߊ߬ߥߏ ߘߐ߫߸ ߞߊ߬ ߢߌߣߌ߲߫ ߛߊ߫ ߓߍ߯ ߘߌ߫ ߒ ߢߊߦߋ߫ ߞߊ߬ ߕߊ߬ߡߌ߲߬ ߞߏ߫ ߒ ߧߋ߫ ߘߌߦߊ߫ ߓߍ߯ ߦߋ߫.>>
ߡߙߊ߬ߓߊ߰ ߞߎߘߊ ߞߎߡߊ߫ ߘߊ߫ ߘߋ߲ߡߌߛߍ߲ ߠߎ߬ ߝߣߊ߫ ߟߊ߫ ߞߏ ߞߊ߲߬: <<<ߒ ߧߋ߫ ߞߊ߲ߠߊߘߌ߫ ߟߊ߫ ߞߊ߲ߞߊ߲߫ ߘߋ߲ߡߌߛߍ߲ ߠߎ߬ ߡߊ߬߸ ߊ߬ߟߎ߬ ߦߋ߫ ߞߎߣߎ߲߫ ߞߊ߬ ߞߏ ߟߎ߬ ߥߊ߫ ߢߊ ߢߊߦߋ߫، ߊߟߎ ߟߋ߬ ߊ߲ ߠߊ߫ ߖߡߊ߬ߣߊ ߖߌ߱ ߘߌ߫߸ ߊߟߎ ߟߋ߬ ߜߎ ߦߴߊ߬ ߜߟߐߡߌ߲ ߘߌ߫.>>
ߊ߬ ߞߵߊ߬ ߟߊ߫ ߛߙߊ߬ߣߎ߲ ߞߎ߲߬ߘߏ߲ ߞߍ߫ ߝߏ߬ߟߌ ߟߋ߬ ߘߌ߫ <<ߓߊ߯ߙߊߢߐ߲߯ߦߊ߫ ߞߏߢߌߡߊ ߟߊ߫ ߡߙߊ߬ߓߊ߰ߘߎ߯ߟߊ ߟߎ߬ ߕߍ߫߸ ߓߊ߯ߙߊ߫ ߞߎ߲ߕߌ߮ ߟߎ߬ ߕߍ߫߸ ߗߋߘߋ߲߫ ߓߟߏߡߊߞߊ߬ߣߍ߲ ߠߎ߬ ߕߍ߫߸ ߣߊ߲߬ߒ߬ߕߊ߲߬ ߘߍ ߟߎ߬ ߣߌ߫ ߘߎ߰ߘߋ߲ ߠߎ߬ ߕߍ߫.>> ߊ߬ ߞߵߊ߬ ߦߌ߬ߘߊ߬ ߝߣߊ߫ ߞߏ߫ <<ߣߴߊ߲ ߕߏ߫ ߘߊ߫ ߢߐ߲߮ ߝߍ߬߸ ߊ߲ ߘߌ߫ ߞߊ߲ߞߊ߲߫ ߞߍ߫ ߢߊ߫ ߡߊ߬߸ ߊ߬ ߣߌ߫ ߡߍ߲ ߦߊ߫ ߞߊ߲߫.>>
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫
߆߂߀ ߉߁ ߇߁ ߀߄
Aucun commentaire pour le moment.