ߊߟߌߝߊ߫ ߕߟߋ ߥߛߊ߬ߘߋ߲߬ ߞߘߐ ߓߘߊ߫ ߕߏ߰ߝߏ ߘߏ߫ ߟߊߥߟߌ߬ ߞߊ߲ߞߊ߲߫ ߞߣߐ߫߸ ߡߍ߲ ߕߐ߯ߟߊߣߴߊ߬ߟߎ߬ ߓߟߏ߫ ߞߏ߫ ߞߊ߲ߓߍ߲ ߞߎ߲߬ߞߊ߬ ߣߊ߲ߕߌ߮ ߟߎ߬߸ ߏ߬ ߟߊߘߊ߲ߣߍ߲߫ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߡߊ߬ߡߌ߬ߘߊ߬ߟߌ߬ ߞߏ ߟߋ߬ ߞߐߡߊߓߌ߲ߓߌ߲߫ ߞߊ߲ߡߊ߬، ߊ߬ߟߎ߫ ߞߵߊ߬ߟߎ߬ ߖߘߍ߬ ߟߊߓߐ߫ ߣߍߣߍߓߊ ߕߋ߬ߟߋ߫ ߉ ߢߌ߲߬ ߠߋ߬ ߡߊ߬߸ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߓߘߴߊ߬ߟߎ߫ ߡߎ߰ߡߍ ߟߊߕߊ߬ߡߌ߲߫ ߡߊ߬ߡߊ߬ߘߌ߬ ߘߎ߲ߓߎߦߊ߫ ߡߊ߬߸ ߏ߬ ߟߊ߫ ߦߟߍ߬ߡߊ߲ ߓߊ߯ߙߊ߫ ߞߍߣߍ߲ ߠߎ߬ ߞߏߛߐ߲߬߸ ߊ߬ ߣߌ߫ ߛߌߡߊ߲ߘߎ߯ ߂߀߄߀ ߢߍߥߟߊ߫ ߤߏߞߌ.

ߡߊ߬ߓߏ߲߬ߧߊ߬ߕߊ߫ ߛߋߞߎ߬ ߛߋߞߎߓߊ߫ ߞߏ߬ߣߊ߬ߕߍ߫߸ ߊߟߌߝߊ߫ ߞߐ߲ߘߍ߫ ߕߟߋ ߥߛߊ߬ߘߋ߲ ߝߊ߬ߛߏ߬ ߜߙߊ ߟߊ߫ ߛߊ߲߬ ߆ ߢߐ߲߰ ߞߘߐ߫ (ߊ߬ ߖߍ߬ߘߍ ߟߊ߫ ߝߐߟߌ߫ ߘߐ߫) ߊ߬ߟߋ ߟߋ߬ ߣߐ߬ ߕߏ߰ߝߏ ߣߌ߲߬ ߛߌ߰ ߟߊ߫ ߛߋ߲߬ߠߊ߫߸ ߊ߰ ߝߐ߫ ߟߊ߫ ߡߍ߲ ߡߊ߬ ߞߏ߫ ߞߊ߲ߓߍ߲ ߞߎ߲߬ߡߞߊ߬ ߣߊ߲ߕߌ߮ ߟߎ߬، ߊ߬ߟߋ ߟߋ߬ ߕߏ߰ߝߏ ߣߌ߲߬ ߡߊ߬ߡߙߊ߬ߟߌ ߞߏߟߊߕߍ߯ߘߊ ߞߊ߲ߕߌ߮ ߘߌ߫، ߊ߬ ߞߵߊ߬ ߞߊ߲ߠߊߘߌ߫ ߝߐ߰ߓߍ߬ߘߊ߬ ߛߌߦߊߡߊ߲߫ ߠߋ߬ ߡߊ߬ ߓߌ߬߸ ߊ߬ ߣߴߊ߬ ߟߊ߫ ߞߙߎߞߊ߫ ߛߌ߲ߝߏ߲ ߘߏ߫ ߟߎ߫߸ ߞߵߊ߬ߟߎ߬ ߟߊ߫ ߓߘߍ߬ߓߘߍ߬ߟߌ߬ ߡߙߌߦߊ ߟߊߛߋ߫ ߖߊ߬ߡߊ ߡߊ߬߸ ߣߍߣߍߓߊ ߕߋ߬ߟߋ߫ ߉ ߣߌ߲߬ ߡߊ߬߸ ߞߊ߲ߞߊ߲߫ ߝߐ߰ߓߍ߬ߦߊ߬ߟߊ ߟߎ߬ ߟߊ߫ ߓߏ߲ߓߊ ߟߊ߫، ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߕߐ߮ ߟߊߛߐ߲ߞߐ߫ ߘߴߊ߬ߟߎ߬ ߓߟߏ߫ ߦߋ߲߬ ߞߏߛߓߍ߫߸ ߊ߬ ߞߐߡߊߓߌ߲ߓߌ߲߫ ߞߊ߲ߡߊ߬.

ߕߏ߰ߝߏ ߡߍ߲ ߦߋ߫ ߣߌ߲߬߸ ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ ߦߋ߫ ߘߍ߬ߞߙߎ ߟߋ߬ ߘߌ߫߸ ߡߍ߲ ߞߎ߲߬ ߕߍ߫ ߥߊߘߌ߫ ߢߌߣߌ߲߫ ߘߌ߫߸ ߓߊ߬ߙߵߊ߬ ߓߎ߲ߓߎ߲ߣߍ߲߫ ߡߍ߲ ߞߊ߲ߡߊ߬߸ ߊ߬ ߣߴߊ߬ ߟߊߘߊ߲߫ ߞߎ߲ ߡߎ߰ߡߍ ߦߋ߫ ߡߍ߲ ߘߌ߫߸ ߏ߬ ߟߋ <<ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߐߡߊߓߌ߲ߓߌ߲ ߘߌ߫߸ ߊ߬ ߟߊ߫ ߓߘߍ߬ߓߘߍ߬ߟߌ ߢߍߥߟߊ ߟߎ߬ ߘߐ߫߸ ߊ߬ ߣߌ߫ ߛߐ߬ߘߐ߲ ߞߏߢߊ ߟߎ߬ ߣߌ߫ ߡߊ߬ߡߙߊ߬ߟߌ ߞߏߢߊ ߓߍ߯ ߘߐ߫.>> ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ <<ߞߊ߲߫ ߡߊߦߟߍ߬ߣߍ߲ ߘߴߏ߬ ߝߐ߫ ߜߋ߲ߜߋߟߋ߲߫>>.

ߊ߬ߟߎ߬ ߟߊ߫ ߘߐ߬ߛߙߋ ߣߌ߲߬ ߞߣߐ߫߸ ߡߍ߲ ߘߐߞߊ߬ߙߊ߲߬ ߘߊ߫ ߝߐ߰ߓߍ߬ߦߊ߬ߟߊ ߟߎ߬ ߢߊߞߘߐ߫߸ ߞߏ߫ ߊ߬ߟߎ߬ ߦߋ߫ ߞߊ߲ߕߌ߮ ߞߐߡߊߓߌ߲ߓߌ߲߫ ߠߊ߫ ߟߋ߬ ߣߌ߫ ߞߐߝߍߣߍ߲ߠߌ߲߫ ߕߍ߫߸ ߊ߬ߟߎ߫ ߡߊ߬ߞߏ߬ ߕߍ߫ ߝߌ߬ߟߊ߬ ߣߌ߫ ߛߓߊ߬ ߟߊ߫߸ ߊ߬ߟߎ߬ ߟߊ߫ ߕߏ߰ߝߏ ߘߌ߫ ߓߐ߫ ߝߍ߬ߙߍ ߓߍ߯ ߘߌ߫ ߝߏ߫ ߡߊ߬ߡߊ߬ߘߌ߬ ߘߎ߲ߓߎߦߊ߫ ߦߋ߫ ߛߎߘߊ߲߫ <<ߢߣߊߕߊߟߌ ߖߊ߰ߟߋ߬ ߝߟߐ ߘߐ߫>> ߏ߬ ߘߐ߫߸ ߞߏ߫ ߕߏ߰ߝߏ߬ ߞߘߐ ߡߍ߲ ߠߎ߬ ߦߋ߫ ߦߋ߲߬ ߞߊ߬ ߓߊ߲߫߸ ߊ߬ߟߎ߫ ߣߊ߬ߕߐ߫ ߏ߬ ߟߎ߫ ߟߋ߬ ߝߊ߲߬ߞߊߘߏ߲߬ ߠߊ߫.

ߕߏ߰ߝߏ ߢߌ߲߬ ߠߎ߬ ߟߊ߫ ߝߐߟߌ߫ ߘߐ߫߸ ߞߏ߫ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߣߐ߬ ߥߙߎߞߌ ߢߍߥߟߊ ߡߍ߲ ߠߎ߬ ߕߊ߬ ߟߊ߫߸ ߞߵߏ߬ ߟߊ߫ ߛߌߡߊ߲ߘߎ߯ ߂߀߄߀ ߖߊ߬ߕߋ߬ߘߐ߬ߛߌ߯ ߢߐ߲߰ߦߋ߬ߓߊߟߌ ߞߊ߲߬߸ ߏ߬ ߟߎ߬ ߦߋ߫ <<ߛߌߟߊ߫ ߟߋ߬ ߘߌ߫ ߞߊ߬ ߖߡߊ߬ߣߊ ߟߊ߫ ߛߐ߬ߘߐ߲ ߓߐ߫ ߓߐ߱ ߘߐ߫.>>

ߥߛߊ߬ߘߋ߲߬ ߞߘߐ ߛߋߞߎߓߊ߫ ߞߏ߬ߣߊ߬ߕߍ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߦߴߊ߬ߟߎ߬ <<ߞߊ߲ߠߊߘߌ߫ ߟߊ߫ ߖߌ߬ߣߍ߬ ߜߍߞߊ߲ߠߊ ߘߏ߲߬ߞߏ ߓߍ߯ ߟߊߘߍ߬ߣߍ߲ ߡߊ߬߸ ߞߵߊ߬ ߕߊ߬ ߛߊ߲ߞߊߙߊ߲߫ ߡߊ߬ ߞߵߊ߬ ߛߌ߰ ߥߊߛߏߟߏ߲߫ ߠߊ߫߸ ߞߎߡߊߕߍ߫ ߓߊߛߊ߲ߘߐ߫ ߣߌ߫ ߕߐ߬ߙߐ߲߬ ߣߌ߫ ߡߍ߰ߢߍ߬ ߣߌ߫ ߓߊ߬ߟߌ߬ߦߊ߫ ߡߊ߬߸..>> ߊ߬ ߣߌ߫ ߛߌߦߊߡߊ߲߫ ߜߘߍ߫ ߟߎ߫ ߖߌ߬ߣߍ߬ ߜߍߞߊ߲ߠߊ ߡߎ߰ߡߍ ߘߐ߫߸ߓߍ߯ ߦߋ߫ ߘߍ߬ ߞߊ߬ <<ߞߊ߬ ߣߊ߬ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߘߊߝߍ߬߸ ߞߵߊ߬ ߘߍ߬ߡߍ߲߬߸ ߛߴߊ߬ ߟߊ߫ ߓߊ߯ߙߊ߫ ߘߊߡߌ߬ߣߊ߬ߣߍ߲ ߠߎ߬ ߘߌ߫ ߛߋ߫ ߟߊߓߊ߲߫ ߠߊ߫߸ ߦߏ߫ ߛߌߡߊ߲ߘߎ߯ ߖߊ߬ߕߋ߬ߘߐ߬ߛߌ߮، ߊ߬ ߣߌ߫ ߞߵߊ߬ ߟߴߊ߬ ߞߊ߲߬߸ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߊ߫ ߞߊ߲߫ ߞߊ߬ ߡߊߘߍ߬ߡߍ߲߫ ߖߌ߬ߣߍ߬ߞߊ ߟߎ߫ ߖߍ߬ߘߍ ߡߊ߬ߤߌߣߊ ߟߋ߬ ߡߊ߬.>>

ߡߊ߬ߓߏ߲߬ߧߊ߬ߕߊ ߛߋߞߎߓߊ߫ ߞߏ߬ߣߊ߬ߕߍ߫ ߞߵߊ߬ ߦߌ߬ߘߊ߬ ߞߏ߫ <<ߖߌ߰ߕߍ߮ ߡߍ߲ ߕߍ߬ߘߍ߫ ߖߌ߬ߣߍ߫ ߞߊ߲߬ ߛߊ߲߬ ߦߙߌߞߊ߫ ߞߘߐ߫>> ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߣߊ߭ ߡߍ߲ ߞߍ߫ ߘߊ߫ ߂߀߂߁ ߕߎߟߊߝߌ߲ ߕߟߋ߬ ߅ ߡߊ߬߸ <<ߊ߬ߟߎ߫ ߣߊ߬ ߘߊ߫ ߖߌ߰ߡߊ߬ߝߊ ߏ߬ ߟߋ ߘߌ߫>> ߖߌ߬ߣߍ߫ ߖߡߊ߬ߣߊ ߡߊ߬، ߓߊߏ߬߸ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߓߊ߯ߙߊ ߓߎ߲ߓߎ߲ߣߍ߲߫ <<ߞߟߊߓߎ ߣߌ߫ ߝߊ߬ߛߏ߬ ߞߊߣߌ߲ ߣߌ߫ ߟߐ߲ߠߌ߲ ߠߋ߬ ߡߊ߬.>>

ߡߊ߬ߓߏ߲߬ߧߊ߬ߕߊ ߛߋߞߎߓߊ߫ ߞߏ߬ߣߊ߬ߕߍ߬ ߡߊ߫ ߓߎ߬ ߕߏ߫ ߞߟߏ߫ ߡߊ߬߸ ߊ߬ ߞߵߊ߬ ߦߌ߬ߘߊ߬ ߞߏ߫: <<ߊ߲ ߧߋ߫ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߐߡߊߓߌ߲ߓߌ߲߫ ߠߊ߫ ߟߋ߬ ߣߌ߫ ߕߎ߲߬ߞߎ߬ߙߎ߲߬ ߕߍ߫߸ ߢߣߊߢߌ߲ߧߊ߫ ߕߍ߫߸ ߞߐߝߟߍߟߌ߫ ߕߍ߫، ߊ߬ ߦߋ߫ ߖߡߊ߬ߣߊ߬ ߡߙߊ߬ ߡߊ߲ߛߊ ߟߋ߬ ߘߌ߫߸ ߘߏߞߍߟߊ ߟߋ߬߸ ߖߡߊ߬ߣߊ߬ߘߋ߲ ߠߎ߬ ߞߊ߫ ߞߊ߲߫ ߞߊ߬ ߡߍ߲ ߞߏߢߌߡߊߟߐ߲߫.>>

ߊ߬ߟߎ߫ ߞߵߊ߬ ߦߌ߬ߘߊ߫ ߟߊ߬ߓߊ߲ ߘߐ߫ ߛߊ߫߸ ߞߏ߫: <<ߡߊ߬ߡߊ߬ߘߌ߬ ߘߎ߲ߓߎߦߊ߫ ߓߊߟߏ߫߸ ߞߊ߲ߓߍ߲ ߞߊ߲ߕߌ߮߹ ߛߌߡߊ߲ߘߎ߯ ߂߀߄߀ ߖߊ߬ߕߋ߬ߘߐ߬ߛߌ߮ ߦߋ߫ ߓߊߟߏ߫߹ ߖߌ߬ߣߍ߬ ߓߊߟߏ߫߸ ߥߙߎߞߌ ߣߌ߫ ߛߓߊ߬ߕߌ ߖߡߊ߬ߣߊ߹>>

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.