ߛߎ߭ ߘߏ߫ ߟߋ߬ ߦߋߣߍ߲߫ ߓߎߙߋ߲ߝߍ ߘߐ߫ ߓߌ߬ ߛߐ߱ ߣߌ߲߬ ߡߊ߬߸ ߦߋ߲߬ ߦߋ߫ ߘߞߏ߫ ߡߙߊ߬ߘߊ߬ߙߋ߲ ߠߋ߬ ߘߐ߫ ߛߌ߯ߙߌ߲߫ ߡߙߊ߬ߓߊ߰ߘߊ، ߊ߬ߟߎ߬ ߕߊ߯ ߘߊ߫ ߓߋ߬ ߞߊ߲ ߠߋ߬ ߡߊ߬ ߛߊߣߌ߲߫ ߓߊ߯ߙߟߊ ߘߏ߫ ߟߎ߫ ߞߊ߲߬ ߦߋ߲߬߸ ߖߊ߬ߡߊ ߘߍ߬ ߢߊ ߟߵߊ߬ߟߋ߬ ߟߊ߫ ߏ߬ ߘߌ߫ ߞߵߊ߬ ߜߊ߬ߛߌ߬ ߝߏ߫ ߞߵߊ߬ ߓߐ߬ߣߐ߫ ߊ߬ ߣߌ ߘߐ߫߸ ߕߐ߭ ߟߎ߬ ߕߟߊ߫ ߘߊ߫ ߞߊ߬ ߥߊ߫، ߊ߬ߟߋ ߛߎ߭ ߟߋ߬ ߦߋߣߍ߲߫ ߏ߬ ߘߐ߫ ߓߌ߬ ߣߊ߲߬ߕߌ߰ ߝߊ߯ߣߌ߲ ߦߴߊ߬ ߞߊ߲ߠߊ߫߸ ߝߏ߫ ߢߊߢߌߣߌ߲ߠߌ߲߫ ߓߘߊ߫ ߛߌ߰ ߛߋ߲߬ߠߊ߫ ߛߌ߯ߙߌ߲߫ ߞߕߌߘߊ ߦߌߟߡߊ߫ ߝߟߐ ߞߕߌߞߊ߲ߘߊ ߓߟߏ߫ ߞߵߊ߬ ߞߏ ߢߊߘߐߜߍ ߟߐ߲߫߸ ߊ߬ ߣߌ߫ ߛߊ߫ ߛߎ߭ ߖߍ߬ߘߍ ߝߣߊ߫ ߘߌ߫ ߛߋ߫ ߡߊߟߐ߲߫ ߠߊ߫.

ߛߎ߭ ߘߏ߫ ߟߋ߬ ߦߋߣߍ߲߫ ߓߎߙߋ߲ߝߍ ߘߐ߫ ߓߌ߬ ߛߐ߱ ߣߌ߲߬ ߡߊ߬߸ ߦߋ߲߬ ߦߋ߫ ߘߞߏ߫ ߡߊ߬ߙߊ߬ߘߊ߬ߙߋ߲ ߠߋ߬ ߘߐ߫߸ ߛߌ߯ߙߌ߲߫ ߡߙߊ߬ߓߊ߰ߘߊ ߞߣߐ߫، ߦߋ߲߬ߞߊ ߟߎ߫ ߖߍ߬ߘߍ ߟߋ߬ ߞߊ߬ ߝߊ߰ߡߊ ߟߎ߬ ߟߊߟߐ߲ߠߌ߲߫߸ ߞߏ߫ ߡߐ߱ ߘߏ߫ ߓߘߊ߫ ߦߋ߫߸ ߊ߬ ߞߍߣߍ߲߫ ߦߏ߫ ߊ߬ ߛߊ߬ߣߍ߲߫ ߠߋ߬.

ߊߓߘߎߟߊߦߌ߫ ߓߊߛߌߙߎ߬ ߞߐ߲ߘߍ߫ ߛߋ߫ ߘߊ߫ ߡߊߛߐ߬ߘߐ߲߬ ߠߴߊ߲ ߠߊ߫ ߛߍߝߍ߲ߘߊ ߓߟߏ߫߸ ߊ߬ߟߋ ߡߍ߲ ߦߋ߫ ߘߊ߯ߕߌ߯ ߘߊ߲߲ߘߊߟߌߟߊ߫ ߘߌ߫߸ ߞߊ߬ ߝߘߊ߫ ߝߊ߬ߛߏ ߞߟߍ߬ߡߐ߰ߘߊ ߡߊ߬ߡߙߊ߬ߟߌ߬ߘߊ߬ ߛߊ߲ߘߐ ߟߊ߫߸ ߊ߬ ߣߌ߫ ߣߊ߲߬ߕߌ߰ ߞߕߌߘߊ ߗߋߕߌ߯ߘߊ߸ ߞߵߊ߬ ߟߴߊ߬ ߞߊ߲߬߸ ߊ߬ ߦߋ߫ ߘߊ߲ߘߊߟߌߟߊ߫ ߡߊ߬ߘߍ߬ߡߍ߲߬ߠߌ߲߬ߠߊ ߟߋ߬ ߘߌ߫ ߞߏ߫ ߘߐߜߊ߬ߣߍ߲ ߠߎ߬ ߘߐ߫ ߛߌ߯ߙߌ߲߫ ߘߊ߲ߘߊߛߏߓߊ ߘߊ߲ߘߊߟߌ ߘߐ߬ߓߛߏ߬ߟߌ ߓߏ߲ߘߊ ߟߊ߫، ߊ߬ߟߋ ߟߊ߫ ߝߐߟߌ߫ ߘߐ߫߸ ߞߏ߫ ߊ߬ ߟߊߟߐ߲ߠߌ߲߫ ߘߊ߫ ߓߎߙߋ߲ߝߍ ߡߐ߱ ߟߎ߫ ߟߋ߬ ߓߟߏ߫߸ ߞߵߊ߬ ߓߍ߲߬ ߛߎ߭ ߘߏ߫ ߦߋߟߌ ߡߊ߬ ߡߍ߲ ߜߊ߬ߛߌ߬ߣߍ߲߫ ߖߊ߬ߡߊ ߓߟߏ߫ ߝߏ߫ ߞߵߊ߬ ߛߎߡߊ߫.

ߛߌ߯ߙߌ߲߫ ߞߕߌߘߊ ߦߌߟߡߊ߫ ߝߟߐ ߞߊ߲ߓߍ߲ ߞߕߌߞߊ߲ߘߊ߸ ߞߊ߬ߙߊ߲߬ߡߐ߰ ߘߏߡߣߌߞ ߟߎ߬ߥߊ߬ ߟߊߟߐ߲ߠߌ߲߫ ߘߊ߫߸ ߏ߬ ߞߊ߬ ߢߊߢߌߣߌ߲ߠߌ߲ ߓߙߌ߬ߝߐߝߐ ߖߊ߬ߡߊߙߌ߫ ߣߌ߲߬ ߞߏ ߢߊߢߌߣߌ߲߫ ߠߊ߫߸ ߞߵߊ߬ ߢߊߘߐߜߍ ߓߍ߯ ߟߊߘߍ߬ߣߍ߲ ߟߐ߲߫߸ ߞߊ߬ ߛߊ߬ߦߊ ߞߍߢߊ߫ ߖߐ߲ߖߐ߲ ߟߐ߲߫.

ߟߌ߬ߤߟߊ߬ ߝߟߐ ߡߍ߲ ߠߎ߬ ߛߐ߬ߘߐ߲߬ ߘߴߊ߲ ߓߟߏ߫ ߜߍ ߘߐ ߦߋ߲߬߸ ߊ߬ ߦߌ߬ߘߊ߬ ߘߊ߫ ߞߏ߫ ߓߋ߬ߒ߬ߞߊ߲߬ߠߌ߲߬ߠߊ߬ ߞߙߎ ߘߏ߫ ߟߎ߫ ߟߋ߬ ߕߊ߯ ߘߊ߫ ߓߋ߬ ߞߊ߲ߡߊ߬ ߛߊߣߌ߲߫ ߓߊ߯ߙߟߊ ߟߎ߫ ߞߊ߲߬، ߊ߬ ߦߌ߬ߘߊ߬ ߘߴߊ߲ ߠߊ߫ ߝߣߊ߫ ߞߏ߫ ߊ߬ߟߎ߬ ߛߋ߫ ߘߊ߫ ߥߊ߫ ߟߊ߫ ߝߋ߲ ߘߏ߫ ߟߎ߫ ߘߴߊ߬ߟߎ߬ ߓߟߏ߫، ߒ߬ߓߊ߬߸ ߊ߬ߟߋ ߣߴߊ߬ ߘߍ߬ߢߐ߲߮ ߡߍ߲ ߠߎ߬ ߕߘߍ߬߸ ߏ߬ ߟߎ߬ ߛߋ߫ ߘߊ߫ ߕߟߊ߫ ߟߊ߫߸ ߖߊ߬ߡߊ ߞߵߊ߬ ߕߍ߯ ߞߍ߫ ߊ߬ߟߋ ߟߋ߬ ߘߐ߫ ߡߎ߬ߕߎ߲߬ ߛߊ߫߸ ߞߵߊ߬ ߡߊߓߏ߲߫ ߜߊ߲ߜߘߊ߫ ߞߎߘߎ߲ ߠߎ߬ ߟߊ߫ ߞߵߊ߬ ߡߊߜߊ߬ߛߌ߬ ߝߏ߫ ߞߵߊ߬ ߛߎߡߴߊ߬ ߣߐ߭ ߘߐ߫ ߦߋ߲߬߸ ߕߐ߭ ߟߎ߬ ߞߏ߬ߣߌ߲ ߦߋ߫ ߓߏ߬ߙߌ߬ ߥߊ ߟߊ߫ ߡߎߣߎ߲߬.

ߦߙߐ߫ ߞߋߟߋ߲߫ ߠߋ߬ ߣߌ߲߬ ߞߏ ߘߐ߫ ߛߊ߫߸ ߡߍ߲ ߓߘߊ߫ ߣߊ߬ ߛߌߞߊ ߘߌ߫: ߡߍ߲ ߝߊ߰ߣߍ߲߫ ߖߊ߬ߡߊ ߓߟߏ߫ ߣߌ߲߬߸ ߣߊ߲߬ߕߌ߰ ߕߏ߲ߕߊߟߊ߲ ߠߋ߬ ߕߎ߲߬ ߦߴߊ߬ ߡߊ߬، ߏ߬ ߟߋ ߞߊ߬ ߡߐ߱ ߟߎ߫ ߓߌ߬ߟߊ߫ ߞߣߐ߬ߘߐ߬ߝߟߌ ߘߐ߫ ߛߊ߫، ߓߊ߬ߙߌ߬߸ ߘߊ߬ߟߎ߬ ߖߐ߲ߖߐ߲߫ ߛߌ߫ ߕߴߦߋ߲߬߸ ߡߍ߲ ߘߴߊ߬ ߦߌ߬ߘߊ߬ ߞߏ߫ ߣߊ߲߬ߕߌ߮ ߟߋ߬ ߦߴߊ߬ ߘߌ߫، ߞߊ߬ߕߎ߲߯߸ ߞߏ߲߬ߓߏ ߊߓߋߛߋ߬ ߟߊ߫ ߝߐߟߌ߫ ߘߐ߫߸ ߞߏ߫ ߣߊ߲߬ߕߌ߰ ߞߎ߲ߕߌ߮ ߘߏ߫ ߟߎ߫ ߞߏߟߊ߲ߞߘߐߢߐ߲߯ߦߊ߫ ߘߴߊ߬ ߞߏ ߟߊ߫߸ ߘߊ߬ߟߎ߬ ߛߌ߫ ߡߊ߫ ߛߋ߫ ߛߐ߬ߘߐ߲߬ ߠߊ߫ ߡߍ߲ ߦߴߊ߬ ߦߌ߬ߘߊ߬ ߟߊ߫ ߞߏ߫ ߛߎ߭ ߣߌ߲߬ ߦߋ߫ ߣߊ߲߬ߕߌ߮ ߟߋ߬ ߘߌ߫، <<ߣߊ߲߬ߕߌ߰ߦߊ ߞߣߐ߫߸ ߓߐߒߘߣߐ ߓߍ߯ ߟߐ߲ߣߍ߲߫ ߠߋ߬߸ ߌ ߓߊ߯ ߓߐ߫ ߌߞߘߐ߫߸ ߊ߬ ߦߋ߫ ߟߐ߲߫ ߠߊ߫ ߟߋ߬߸ ߓߊߏ߬ ߓߐߟߌ߫ ߛߌ߫ ߕߴߞߍ߫ ߟߊ߫ ߣߌ߫ ߛߙߊ߬ߒ߬ߞߊ߲߬ߠߊ ߡߊ߫ ߞߍ߫.>> ߊ߬ ߞߵߏ߬ ߟߋ ߝߐ߫، ߞߵߊ߬ ߦߌ߬ߘߊ߬ ߞߏ߫ ߊ߬ ߛߌߦߊߡߊ߲ ߘߐ߫߸ ߕߌߢߍߟߌߟߊ ߟߎ߬ ߦߋ߫ ߣߊ߲߬ߕߌ߰ ߝߊ߯ߣߌ߲ ߠߋ߬ ߘߏ߲߬ ߠߊ߫ ߛߐ߲߬߸ ߞߊ߬ ߖߡߊ߬ߣߊ߬ߘߋ߲ ߤߊ߲ߞߟߌ ߛߏ߲߬ߧߊ߫ ߛߴߊ߬ߟߎ߬ ߞߊߣߊ߬ ߛߋ߫ ߡߊߟߐ߲߫ ߠߊ߫ ߛߎ߲ߞߎ߲ ߘߐ߫.

ߞߕߌߓߋߟߋ߲ ߠߊ߫ ߖߊ߬ߡߊߙߌ ߞߣߐ߫߸ ߛߎ߭ ߕߊ߬ ߘߊ߫ ߞߊ߬ ߥߴߊ߬ ߘߌ߫ ߛߌ߯ߙߌ߲߫ ߘߊ߲ߘߊߛߏߓߊ ߟߊ߫ ߢߊߢߌߣߌ߲ߠߌ߲ ߕߐ߭ ߞߍ߫ ߞߊ߲ߡߊ߬߸ ߊ߬ ߣߌ߫ ߞߊ߬ ߛߎ߭ ߖߍ߬ߘߍ ߝߣߊ߫ ߡߊߟߐ߲߫، ߟߊ߬ߞߙߐ߬ߛߟߌ߬ ߝߟߐ ߡߍ߲ ߞߏ߬ߣߌ߲ ߞߍߣߍ߲߫ ߘߊ߲ߘߊߟߌߟߊ ߟߎ߬ ߓߟߏ߫߸ ߏ߬ ߦߴߊ߬ ߦߌ߬ߘߊ߬ ߟߊ߫ ߟߋ߬ ߞߏ߫ ߊ߬ ߟߊ߫ ߛߊ߬ߦߊ ߕߎ߬ߙߎ ߞߍߣߍ߲߫ ߞߓߊ߫ ߟߊ߫ ߓߏ߲ߠߌ߲ ߠߋ߬ ߘߌ߫ ߢߐ߲߮ ߞߐ߫، ߢߊߢߌߣߌ߲ߠߌ߲ ߠߎ߬ ߞߏ߬ߣߌ߲ ߦߴߌߘߐ߫߸ ߞߵߊ߬ ߟߐ߲߫ ߖߐ߲߫ ߦߋ߫ ߛߎ߭ ߣߌ߲߬ ߘߌ߫߸ ߊ߬ ߣߴߊ߬ ߞߏ ߕߊ߬ߡߌ߲߬ߣߍ߲߫ ߘߌ߬.

ߌߓߙߊߤߌߡߊ߬ ߝߙߊ߬ߓߊ߫ ߞߡߊ߬ߙߊ߬ ߓߟߏ߫߸ ߞߵߊ߬ ߘߌ߫ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߡߊ߬