ߗߋߦߊߟߌ ߡߍ߲ ߠߊߥߟߌ߬ ߘߊ߫ ߞߊ߬ ߕߊ߯ ߞߊߙߏ ߞߊ߲߬߸ ߣߴߊ߬ ߝߐ߫ ߘߴߊ߬ߟߎ߫ ߡߊ߬ ߞߏ߫ ߊߙߑߕߋߡߌߛ ߂߲߸ ߏ߬ ߟߎ߬ ߓߘߊ߫ ߛߊ߬ߦߌ߲߫ ߘߎ߱ ߞߊ߲߬ ߛߌ߬ߣߌ߲߬ߟߏ߲ ߣߌ߲߬ ߡߊ߬، ߊ߬ߟߎ߬ ߟߊߖߌ߰ ߘߊ߫ ߣߊ߯ߖ߭ߊ ߟߊ߫ ߝߏ߬ߟߏ߲߬ߝߊ߬ߟߊ߲߬ߕߍ߬ ߞߎߟߎ߲ ߏߙߌߦߐ߲ ߠߋ߬ ߓߟߏ߫ ߞߊߟߌߝߎߙߑߣߌ߫ ߖߌ߫ ߡߍߣߍ߲ ߞߊ߲߬ (ߖߐ ߟߌ߲ߓߊ߲)، ߞߊ߬ ߓߐ߫ ߊߔߟߏ ߢߍߥߟߊ ߞߐ߫ ߁߉߇߀ ߝߊ߲߬ߝߍ߬ߟߊ ߘߐ߫߸ ߊ߬ ߛߊ߲߬ ߅߀ ߟߋ߬ ߕߍ߬ߘߍ߫ ߕߋ߲߬߸ ߡߐ߱ ߕߎ߲߬ ߡߊ߫ ߥߊ߫ ߝߏ߬ߟߏ߲߬ߝߊߟߊ߲ ߘߐ߫ ߥߎߟߊ߫ ߖߊ߲߫ ߛߎ߮ ߣߌ߲߬ ߢߐ߲߰ ߠߊ߫، ߡߐ߰ ߣߊ߯ߣߌ߲߫ ߕߘߍ߬ ߕߊ߯ߡߊ߫ ߛߌߟߊ ߢߌ߲߬ ߠߊ߫ ߞߊ߬ ߥߊ߫ ߞߊߙߏ ߞߊ߲߬߸ ߏ߬ ߟߎ߫ ߟߋ߬ ߊߡߙߌߞߌߞߊ߫ ߙߌߘ ߥߊߦߖ߭ߑߡߊ߲߫߸ ߞߙߌߛߑߕߌߣߊ ߞߐߗ߸ ߝ߭ߌߞߑߕߐߙ ߜ߭ߑߟߏߝ߭ߍߙ߸ ߊ߬ ߣߌ߫ ߞߣߊߘߞߊ߫ ߖ߭ߙߋߡߌ ߤߊ߲ߛߋ߲߫، ߏ߬ ߟߎ߫ ߟߋ߬ ߥߊߣߍ߲߫ ߕߍ߬ߘߍ߫ ߝߏ߬ߟߏ߲߬ߝߊߟߊ߲ ߘߐ߫߸ ߊ߬ߟߎ߫ ߕߟߋ߬ ߁߀ ߠߋ߬ ߕߎ߲߬ ߦߋ߫ ߦߋ߲߬ ߕߋ߲߬، ߊ߬ߟߎ߬ ߓߍ߯ ߞߍ߲ߘߍ߫ ߛߋ߫ ߘߊ߫ ߘߎ߱ ߞߊ߲߬ ߜߋߙߋ߲ߜߋߙߋ߲ߧߊ ߘߝߊߣߍ߲ ߘߐ߫.

ߊ߬ߟߎ߫ ߞߊ߬ ߟߊ߬ߞߙߐ߬ߛߌ߬ߟߌ߫ ߕߎ߬ߢߊ߬ߡߊ ߟߎ߬ ߞߍ߫ ߝߏ߬ߟߏ߲߬ߝߊߟߊ߲ ߘߐ߫ ߦߋ߲߬ ߢߊ ߣߌ߫ ߢߊ ߟߊ߫، ߊ߬ߟߎ߬ ߛߋ ߦߋ߲߬߸ ߓߊ߯ߙߊ߫ ߛߊ߬ߓߊ߫ ߟߋ߬ ߕߍ߬ߘߍ߫ ߊ߬ߟߎ߬ ߓߟߏ߫: ߞߊ߬ ߞߎߟߎ߲ ߓߏ߬ߙߌ߫߸ ߞߵߊ߬ ߟߐ߲߫ ߣߌ߫ ߡߐ߱ ߘߌ߫ ߛߋ߫ ߏ߬ ߞߍ߫ ߟߊ߫ ߞߊߙߏ ߞߊ߲߬ ߦߋ߲߬، ߓߊߏ߬߸ ߞߍߟߊ߲ ߡߍ߲ ߠߎ߬ ߦߋ߫ ߟߊߕߊ߯ ߟߊ߫ ߦߋ߲߬߸ ߏ߬ ߝߊ߲߬ߓߊ ߦߋ߫ ߞߍߒߖߘߍߡߊ ߟߎ߫ ߟߋ߬ ߘߌ߫، ߓߊ߬ߙߌ߸ ߊ߬ߟߎ ߖߍ߬ߘߍ ߟߋ߬ ߞߵߊ߬ߟߎ߬ ߕߊ ߣߌ߲߬ ߓߏ߬ߙߌ߫ ߦߋ߲߬. ߊ߬ߟߎ߬ ߓߊ߲߫ ߘߊ߫ ߞߵߊ߬ ߟߊߞߙߐ߬ߛߌ߬ ߝߣߊ߫߸ ߣߌ߫ ߡߐ߱ ߘߌ߫ ߛߋ߫ ߝߢߐ ߛߊ߬ߡߊ߲߬ ߠߊ߫ ߦߋ߲߬ ߞߊ߬ ߢߊ߬߸ ߞߊ߬ ߛߋ߫ ߘߊߥߎ߲ߠߌ߲ ߣߌ߫ ߡߌ߲߬ߠߌ߲ ߠߎ߬ ߞߍ߫ ߟߊ߫ ߦߋ߲߬، ߞߊ߬ ߓߊ߲߫߸ ߊ߬ߟߎ߬ ߟߊ߫ ߓߊ߯ߙߊ ߟߋ߬ ߝߣߊ߫ ߕߘߍ߬߸ ߞߊ߬ ߖߌ߬ߦߊ߬ߓߍ ߟߎ߫ ߕߊ߬߸ ߡߍ߲ ߠߎ߬ ߢߊ ߛߊߣߌ߲ߡߊ߲߫ ߝߋߝߋ߫، ߊ߬ߟߎ߫ ߞߵߏ߬ ߓߍ߯ ߞߍ߫ ߞߵߊ߬ߟߎ߬ ߕߏ߫ ߞߎߟߎ߲ ߏ߬ ߟߋ ߞߣߐ߫߸ ߊ߬ߟߎ߬ ߡߴߊ߬ߟߎ߫ ߛߋ߲߭ ߛߎ߫ ߝߏ߬ߟߏ߲߬ߝߊߟߊ߲ ߞߊ߲߬، ߏ߬ ߟߊߥߟߌ߬ ߘߴߊ߬ߟߎ߬ ߓߟߏ߫ ߟߋ߬ ߞߵߊ߬ ߟߐ߲߫߸ ߣߌ߫ ߞߎߟߎ߲ ߏ߬ ߘߌ߫ ߛߋ߫ ߡߐ߱ ߟߎ߫ ߕߊ߬ ߟߊ߫ ߦߋ߲߬߸ ߞߵߊ߬ߟߎ߬ ߟߓߊߟߏ߫ ߦߋ߲߬߸ ߊ߬ ߣߌ߫ ߞߵߊ߬ߟߎ߬ ߟߊߕߊ߲߬ߞߊ߬.

ߊ߬ߟߎ߬ ߟߊ߫ ߡߊ߬ߝߟߍ߬ߟߌ߬ ߕߊ߯ߡߊ ߣߌ߲߬ ߞߍ߫ ߘߊ߫ ߕߙߎ߬ ߘߌ߫߸ ߊ߬ ߟߐ߲߫ ߘߊ߫ ߞߏ߫ ߥߎߟߋ߲ߕߊ߲ߞߊߟߊ߲ ߡߍ߲ ߦߋ߫ ߝߏ߬ߟߏ߲߲߬ߝߊ߬ߟߊ߲߬ߕߍ߬ ߞߎߟߎ߲ ߠߊ߫߸ ߏ߬ ߦߋ߫ ߓߊ߯ߙߊ߫ ߟߴߊ߬ ߢߌ߬ߡߊ ߟߊ߫، ߣߊ߯ߖ߭ߊ ߡߊ߬ߡߙߊ߬ߟߌ߬ߟߊ ߖ߭ߊߙߋߘ ߌߖ߭ߊߞߑߡߊߣ ߞߊ߬ ߗߋߘߋ߲ ߠߎ߬ ߝߏ߬ ߟߋ߬߸ ߞߏ߫ ߊ߬ߟߎ߬ ߟߊ߫ <<ߗߋߦߊߟߌ ߓߍ߲߬ ߘߊ߫>> ߟߋ߬ ߝߋߎ߫، ߊ߬ ߓߊ߲߫ ߘߊ߫ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߞߏ߫ ߘߊߡߌߣߊ ߟߋ߬ ߕߋ߲߬߸ ߊ߬ߟߎ߬ ߓߍߣߊ߬ ߢߍߥߟߊ߫ ߜߘߍ߫ ߟߎ߫ ߝߣߊ߫ ߕߊ߬߸ ߞߊ߬ ߓߍ߲߬ ߞߊߙߏ߫ ߞߊ߲ߠߊ ߘߐߞߏ߬ߙߏ߲߬ߞߊ߬ߙߊ߲߬ ߞߏ ߡߊ߬، ߊ߬ߟߎ߬ ߟߊ߫ ߕߊ߯ߡߊ ߣߌ߲߬ ߘߐ߫߸ ߊ߬ߟߎ߫ ߞߊ߬ ߥߎߟߊ߫ ߖߊ߲ߓߊ߫ ߟߋ߬ ߕߊ߯ߡߊ߫߸ ߞߎߘߍ߫ ߄߀߆ ߇߇߁ ߠߋ߬ ߘߏ߲߬ ߘߴߊ߬ߟߎ߬ ߣߌ߫ ߘߎ߱ ߕߍ߫.

ߊߡߙߌߞߌ߬ ߞߊ߲ߕߌ߮ ߘߏߣߊߟ ߕߑߙߐ߲ߔ ߞߵߊ߬ ߟߊ߫ ߛߍߥߊ ߦߌ߬ߘߊ߫ ߘߍ߬ߞߙߏߝߏ ߞߊ߲߬߸ ߞߵߊ߬ ߦߌ߬ߘߊ߬ ߞߏ߫ <<ߡߍ߲ ߞߍߕߐ߫ ߏ߬ ߞߐ߫߸ ߟߐ߬ ߕߍ߫ ߞߍ߫ ߟߊ߫ ߝߏ߫ ߤߐߞߎ ߞߊ߲߬>> ߢߍߥߟߊ߫ ߜߘߍ߫ ߘߏ߲߬ ߦߴߊ߬ߟߎ߬ ߓߟߏ߫߸ ߞߏ߫ ߂߀߂߈ ߘߊߡߌߣߊ ߟߊ߫߸ ߊ߬ߟߎ߬ ߦߴߊ߬ ߝߍ߬ ߡߐ߱ ߦߴߊ߬ ߛߋ߲߭ ߛߎ߫ ߞߊߙߏ ߘߎ߰ߞߟߏ ߞߊ߲߬، ߊ߬ ߖߍ߬ߘߍ߸ ߛߊ߲ߡߊߛߓߍߟߐ߲ߠߊ߫ ߘߋ߬ߙߋߞ ߓߎߖ߭ߊߖ߭ߌ߫ ߞߵߊ߬ ߦߌ߬ߘߊ߬ ߞߏ߫ ߡߐ߱ ߟߎ߬ ߦߴߊ߬ߟߎ߬ ߟߊ߫ ߟߊߒߠߦߊ ߟߴߊ߬ߟߎ߬ ߘߐ߫߸ ߊ߬ߟߎ߬ ߓߍߣߊ߬ ߢߊ߫ ߢߌߣߌ߲߫ ߊ߬ ߡߊ߬߸ ߡߐ߱ ߘߌ߫ ߛߴߊ߬ ߛߌ߰ ߟߊ߫ ߞߊߙߏ ߞߊ߲߬ ߢߊ ߡߍ߲ ߡߊ߬߸ ߞߏ߫ ߦߋ߲߬ ߝߛߊߦߌ߫.