ߞߊ߲ߞߊ߲߫ ߖߊ߯ߓߘߊ߫ ߗ߭ߎ߳ߟߌߛ ߒߢߙߋߙߋߊ߫ ߞߊ߲ ߟߐ߲ߞߏ ߓߏߟߏ߲ߝߘߊ ߓߘߴߊ߬ ߟߊߛߋ߫ ߥߛߊߞߙߊ߫߸ ߞߏ߫ ߒߞߏ ߕߌߙߌ߲ߘߊ ߓߘߊ߫ ߟߊߞߊ߬ ߖߊ߯ߓߘߊ ߞߣߐ߫ ߦߋ߲߬، ߟߌ߬ߤߟߊ ߣߌ߲߬ ߓߌ߬ߟߊ߬ ߘߊ߫ ߖߊ߬ߡߊ ߛߊ߬ߥߏ߬ ߘߐ߫ ߂߀߂߆ ߘߓߊ߬ߕߊ ߕߋ߬ߟߋ߫ ߉ ߟߋ߬ ߡߊ߬ ߞߊ߬ߙߊ߲߬ߝߊ߫ ߡߊߡߊߘߎ߫ ߘߍ߲ߘߋ߬ ߖߊߟߏ߫ ߓߟߏ߫߸ ߊ߬ߟߋ ߡߍ߲ ߦߋ߫ ߞߌ߬ߣߊ ߛߙߍߞߍ߫ ߘߌ߫ ߡߍ߲ ߘߐ߱ߘߏ߲߬ߣߍ߲߫ ߞߊ߬ߙߊ߲߬ ߞߏ ߟߊ߫߸ ߊ߬ ߣߌ߫ ߞߌ߬ߣߊ߬ ߛߙߍߞߍ߫ ߘߍ߲߬ߞߍ߬ߕߎ߬ߣߍ߲ ߡߍ߲ ߘߐ߱ߘߏ߲߬ߣߍ߲߫ ߖߊ߯ߓߘߊ ߕߌߙߌ߲ߠߌ߲ ߠߊ߫، ߊ߬ ߞߊ߬ ߟߊ߬ߛߋ߬ߟߌ ߏ߬ ߞߍ߫ ߟߊ߬ߖߍ߲߬ߛߍ߲߬ߠߌ߲ ߘߏ߫ ߟߋ߬ ߡߊ߬ߣߊߡߊ߬ ߘߍ߬ߞߙߏߝߏ ߟߎ߬ ߞߊ߲߬.

ߖߊ߯ߓߘߊ ߟߊ߫ ߛߋ߲߬ߕߊ߬ ߞߎߘߊ ߣߌ߲߬ ߘߐ߫߸ ߟߊ߬ߞߐ߰ߟߌ ߟߋ߬ ߦߋ߫ ߞߍ߫ ߟߊ߫߸ ߣߴߌ ߛߋ߫ ߘߊ߫ ߖߎ߬ߟߎ ߕߏ߲ߘߋ߫ ߆߀ ߟߊߞߎ߲߫ ߠߊ߫߸ ߌ ߘߌ߫ ߛߙߋߛߓߍ ߛߐ߬ߘߐ߲߬، ߞߊ߬ߕߎ߲߯߸ ߊ߬ ߦߋ߫ ߝߊ߬ߛߏ߬ ߞߊ߲ ߠߎ߬ ߡߐ߬ߟߐ߲ ߞߘߐߕߊ߭ ߡߙߌߦߊ ߟߋ߬ ߘߌ߫߸ ߏ߬ ߡߍ߲ ߛߌߟߊ ߟߊߞߊ߬ߣߍ߲߫ ߞߎ߲߬ߠߊ߬ߛߌ߮ ߖߍ߬ߘߍ ߓߟߏ߫.

ߟߊ߬ߕߍ߰ߦߊ ߡߍ߲ ߠߊߓߐ߫ ߘߊ߫ ߂߀߂߆ ߞߏ߲ߞߏߘߓߌ ߕߟߋ߬ ߁߇ ߡߊ߬߸ ߡߍ߲ ߞߊ߬ ߒߞߏ ߣߌ߫ ߊߘߑߟߊߡ ߣߌ߫ ߞߏߙߋߛߓߍߟߌ ߓߍ߯ ߕߊ߬ ߓߊ߫ ߘߐ߫߸ ߡߙߌߦߊ ߣߌ߲߬ ߦߴߏ߬ ߟߋ ߛߍ߲ߓߍ߲ߒߕߋߦߊ߫ ߟߊ߫߸ ߣߴߏ߬ ߦߋ߫ ߖߡߊ߬ߣߊ ߛߓߍߟߌ ߟߎ߬ ߘߊ߲ߞߎ߲ ߘߌ߫ ߖߌ߬ߣߍ߫ ߞߎ߲߬ߠߊ߬ߛߌ߮ ߓߟߏ߫، ߝߣߊ߫߸ ߊ߬ߟߋ߬ ߡߙߌߦߊ߫ ߞߋߟߋ߲ ߣߌ߲߬ ߓߐߢߟߊ ߕߎ߬ߙߎ ߘߏ߫ ߟߋ߬ ߝߣߊ߫ ߂߀߂߆ ߕߎߟߊߝߌ߲ ߂߁ ߛߌ߰ߞߊ߲ ߞߣߐߘߐ ߘߌ߫߸ ߏ߬ ߡߍ߲ ߞߊ߬ ߝߊ߬ߛߏ߬ ߞߊ߲ ߠߎ߬ ߣߌ߫ ߝߊ߬ߙߊ߲߬ߛߌ߬ ߞߊ߲ ߓߌ߬ߟߊ߫ ߖߊ߬ ߞߋߟߋ߲߫ ߠߊ߫ ߞߎ߲߬ߠߊ߬ߛߌ߰ ߞߊ߲߬ߧߊ ߡߊ߬ߘߎ߮ ߘߐ߫ ߖߌ߬ߣߍ߬ ߞߊ߲ߓߍ߲  ߞߣߐ߫.

ߕߐ߲ߛߋ߲ ߅ ߞߵߊ߬ ߝߐ߫ ߟߋ߬ ߞߏ߫: <<ߝߊ߬ߛߏ߬ ߞߊ߲ ߠߎ߬ ߣߌ߫ ߝߊ߬ߙߊ߲߬ߛߌ߬ ߞߊ߲ ߠߋ߬ ߖߌ߬ߣߍ߬ ߞߊ߲ߓߍ߲ ߞߎ߲߬ߠߊ߬ߛߌ߰ ߞߊ߲ ߘߌ߫، ߝߊ߬ߙߊ߲߬ߛߌ߬ߞߊ߲ ߦߋ߫ ߓߊ߯ߙߊ߫ ߞߊ߲ ߘߌ߫. ߞߊ߬ߝߏ ߝߊ߬ߛߏ߬ߞߊ߲ ߠߎ߬ ߟߞߊ߬ߙߊ߲߬ߠߌ߲ ߛߘߊߟߊ߫، ߊ߬ ߘߌ߫ ߞߎ߬ߙߎ߲߬ߘߎ ߟߎ߬ ߣߌ߫ ߞߊ߲ߓߍ߲ ߝߘߏ߬ߓߊ߬ ߛߙߋߘߐ ߟߎ߬ ߘߟߊߡߌߘߊ ߓߟߏߡߦߊ߫ ߝߊ߬ߛߏ߬ߞߊ߲ ߠߎ߬ ߘߐ߫...>>

ߖߊ߯ߓߘߊ ߞߏߟߊߕߍ߮ ߢߌ߲߬ ߠߎ߬ ߟߊ߫ ߝߐߟߌ߫ ߘߐ߫߸ ߣߌ߲߬ ߦߋ߫ ߛߊ߲߬ ߦߙߌߞߊ߫ ߛߍ߬ߘߏ߲ ߠߋ߬ ߞߐߝߟߌ ߘߌ߫، ߓߊߏ߬߸ ߊ߬ ߖߊ߬ߕߋ߬ߘߐ߬ߛߌ߮ ߛߌ߰ ߘߊ߫ ߛߋ߲߬ߠߊ߫ ߞߊ߬ߦߌ߯ ߂߀߁߂ ߟߋ߬ ߟߊ߫߸ ߒߞߏ ߟߊߘߏ߲߬ ߞߏ߲߬ ߝߟߐ ߞߍ߫ ߘߊ߫ ߞߊ߲ߞߊ߲߫ ߖߊ߯ߓߘߊ ߟߊ߫ ߛߋ߲߬ߢߊ ߏ߬ ߡߍ߲ ߝߍ߬ ߞߊ߬ߣߌ߲߬.

ߊߟߎ߫ ߦߴߊ߬ ߟߐ߲߫߸ ߒߞߏ ߦߋ߫ ߛߓߍߟߌ߫ ߟߋ߬ ߘߌ߫ ߡߍ߲ ߛߌ߲ߘߌ߫ ߘߊ߫ ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߓߟߏ߫ ߁߉߄߉ ߟߊ߫߸ ߊ߬ ߛߐ߰ ߘߊ߫ ߟߊߘߏ߲߭ ߡߊ߬ ߓߏߟߏ߲ߝߘߊ߫ ߛߌߦߊߡߊ߲߫ ߠߋ߬ ߟߊ߫ ߖߊ߯ߓߘߊ ߟߊ߫ ߡߎߣߎ߲߬߸ ߞߊ߲ ߣߌ߫ ߞߊ߬ߞߎߘߊ ߡߟߋߞߎߦߊ ߟߐ߲ߘߊ߸ ߡߟߋߞߎߦߊ߸ ߞߊ߲ ߟߐ߲ߞߏ߸ ߊ߬ ߣߌ߫ ߊ߲߬ߜ߭ߌߟߋ ߣߌ߫ ߊߙߊߓߎ߸ ߊ߬ ߓߘߊ߫ ߘߏ߫ ߞߍ߫ ߓߏߟߏ߲ߝߘߊ ߢߌ߲߬ ߠߎ߬ ߓߍ߯ ߟߊ߫.

ߣߝߊ߬ߖߌ߫ ߛߏ߬ߙߌ߬ ߞߐ߲ߘߍ߫ ߡߍ߲ ߦߋ߫ ߞߊ߲ߞߊ߲߫ ߖߊ߯ߓߘߊ ߞߏߟߊߒߞߘߐߢߐ߲߯ ߞߐߞߊ߲߫ ߡߐ߮ ߘߏ߫ ߘߌ߫ ߂߀߁߂ ߣߌ߫ ߂߀߁߄ ߕߍߟߊ ߘߐ߫ ߒߞߏ ߞߊߙߊ߲ ߢߍߥߟߊ߫ ߝߟߐ ߟߊߘߊ߲ ߛߋ߲߭ߝߍ߬߸ ߏ߬ ߞߵߊ߬ ߦߌ߬ߘߊ߬ ߞߏ߫: <<ߢߍߥߟߊ ߘߊߡߌ߬ߣߊ߬ ߘߴߊ߬ ߢߌ߬ߡߊ ߟߊ߫ ߝߋߎ߫߸ ߓߊ߬ߙߵߊ߬ ߣߊ߬ ߘߊ߫ ߕߏ߫ ߘߐ߲߬ߘߐ߲߰ߣߍ߲߬ ߖߌ߯ ߟߊ߫ ߞߵߊ߬ ߞߏ ߟߴߊ߬ ߘߐ߫ ߟߋߎ߫.>>

ߒ߬ߓߊ߬߸ ߛߊ߬ߙߌ߬ ߞߎߘߊ ߡߍ߲ ߠߎ߬ ߓߘߊ߫ ߕߊ߬ ߣߌ߲߬ ߛߍߣߍ߲߬߸ ߂߀߂߅ ߛߌ߰ߞߊ߲ ߕߊ߬ߣߍ߲ ߞߵߊ߬ ߟߊ߫ ߂߀߂߆ ߞߏ߲ߞߏߘߓߌ ߟߊ߬ߕߍ߰ߦߊ ߞߊ߲߬߸ ߏ߬ ߓߘߊ߫ ߞߍ߫ ߕߙߎ߬ ߘߌ߫ ߞߊ߬ ߢߍߥߟߊ ߣߌ߲߬ ߠߊߞߎߘߦߊ߫، ߟߊ߬ߘߍ ߟߋ߬ ߞߍ߫ ߘߊ߫ ߖߊ߯ߓߘߊ ߟߋ߬ ߂߀߂߆ ߘߓߊ߬ߕߊ ߕߋ߬ߟߋ߫ ߉ ߡߊ߬߸ ߖߊ߯ߓߘߊ߫ ߗ߭ߎ߳ߟߌߛ ߒߢߙߋߙߋ߫ ߞߏߟߊߕߍ߮ ߟߎ߫ ߞߊ߬ ߒߞߏ ߕߌߙߌ߲ߘߊ ߟߊߘߊ߲߫ ߞߏ ߟߊߘߌ߬ߢߍ߬ ߝߛߊߦߌ߫.

ߕߌߙߌ߲ߘߊ ߢߌ߲߬ ߠߊ߫ ߓߊ߯ߙߊ ߞߍߕߐ߫ ߡߍ߲ ߘߌ߫߸ ߏ߬ ߟߋ ߒߞߏ ߞߊߙߊ߲ ߞߍ ߘߌ߫߸ ߛߙߋߛߓߍ ߦߋ߫ ߛߐ߬ߘߐ߲߬ ߠߊ߫ ߡߍ߲ ߞߎ߲߬ߝߊ߮ ߟߊ߫، ߝߣߊ߫߸ ߞߊ߬ ߟߐ߲ߞߏ߫ ߕߌߙߌ߲ߠߌ߲ ߓߊ߯ߙߊ ߟߎ߬ ߟߊߦߙߌߥߴߊ߬ ߘߐ߫، ߓߊߏ߬߸ ߒߞߏ ߦߋ߫ ߛߓߍߟߌ߫ ߟߋ߬ ߘߌ߫߸ ߡߍ߲ ߦߋ߫ ߛߋ߫ ߟߊ߫ ߡߊ߲߬ߘߋ߲߫ ߝߘߏ߬ߓߊ߬ ߞߊ߲ ߝߊߙߊ߲ߝߊ߯ߛߌ߫ ߟߊ߫߸ ߏ߬ ߡߍ߲ ߦߋ߫ ߝߐ߫ ߟߊ߫ ߖߌ߬ߣߍ߬ ߞߣߐ߫߸ ߊ߬ ߣߌ߫ ߕߟߋ߬ߓߋ߬ ߊߝߙߌߞߌ߬ ߖߡߊ߬ߣߊ߬ ߛߌߦߊߡߊ߲߫ ߝߣߊ߫.