ߒߞߏ ߦߋ߫ ߛߓߍߛߎ߲߫ ߞߊ߲ߡߊߛߙߋߡߊ߫ ߟߋ߬ ߘߌ߫߸ ߡߍ߲ ߛߌ߲ߘߌߣߍ߲߫ ߝߘߊ߬ߝߌ߲߬ ߞߊ߲ ߠߎ߬ ߛߓߍ߫ ߞߊ߲ߡߊ߬߸ ߊ߬ ߕߌ߯ߕߌ߯ ߡߊ߲߬ߘߋ߲߬ ߞߊ߲߫ ߞߊ߲ߡߊߛߙߋߡߊ ߟߎ߬، ߏ߬ ߟߎ߬ ߡߍ߲ ߠߎ߬ ߟߊߘߍ߬ߣߍ߲ ߦߋ߫ ߞߟߌ߫ ߟߊ߫ ߞߏ߫ ߒߞߏ߸ ߞߵߊ߬ ߞߣߐߞߍ߫ ߞߊ߲ߓߏߟߏ߲߫ ߞߎ߲ߓߊ߫ ߣߊ߯ߣߌ߲߫ ߠߊ߫ ߕߊ߲߬: ߡߊ߬ߣߋ߲߬ߞߊ߸ ߓߡߊߣߊ߲߸ ߡߊ߲߬ߘߋ߲߬ߞߏ߸ ߊ߬ ߣߌ߫ ߖߎ߬ߟߊ، ߛߓߍߟߌ ߣߌ߲߬ ߛߌ߲ߘߌ߫ ߘߊ߫ ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߟߋ߬ ߓߟߏ߫߸ ߁߉߄߉ ߞߏ߲ߞߏߘߓߌ ߕߟߋ߬ ߁߄ ߡߊ߬߸ ߓߍ߲߬ߗ߭ߍ߬ߘߎ߯߸ ߕߟߋ߬ߓߋ߬ ߊߝߙߌߞߌ߬ ߞߣߐ߫ ߦߊ߲߬߸ ߏ߬ ߦߋ߫ ߜߋ߲ߞߐ߰ߖߌ߬ߘߊ ߟߋ߬ ߘߐ߫ ߕߋ߲߭ߕߋ߲߭ ߣߌ߲߬ ߘߐ߫، ߊ߬ ߛߌ߲ߘߌ ߣߌ߫ ߓߌ߬ ߕߍ߫߸ ߖߡߊ߬ߣߊ߬ ߛߌߦߊߡߊ߲߫ ߘߎ߰ߘߋ߲ ߠߎ߬ ߓߘߴߊ߬ ߕߊ߬߸ ߞߵߊ߬ ߞߍ߫ ߊ߬ߟߎ߬ ߟߊ߫ ߓߊ߯ߙߊ߫ ߡߎߙߊ߲ ߘߌ߫߸ ߊ߬ ߣߴߊ߬ߟߎ߬ ߟߊ߫ ߟߐ߲ߠߌ߲ ߠߎ߬ ߟߊߕߊ߬ߡߌ߲߬ ߡߎߙߊ߲ ߣߴߊ߬ ߟߊߡߊ߲߬ߘߌ߬ ߡߎߙߊ߲ ߘߌ߫߸ ߝߏ߫ ߊ߬ ߦߋ߫ ߥߙߎߞߌ ߞߊ߲߬ ߊ߬ ߓߌ߬ ߝߐߟߌ߫ ߘߐ߫߸ ߢߊ ߓߍ߯ ߟߊߘߍ߬ߣߍ߲ ߡߊ߬، ߓߊߏ߬߸ ߊ߬ ߦߋ߫ ߞߊ߲ ߝߐߓߊ߮ ߟߎ߫ ߡߊ߬ߞߏߢߊ߬ ߟߊ߫ ߛߓߍߟߌ߫ ߞߏ ߡߊ߬ߘߎ߮ ߘߐ߫ ߝߛߊߦߌ߫.

ߞߊ߬ ߞߐ߲߰ ߒߞߏ ߛߓߍߟߌ ߛߌ߲ߘߌ ߢߍ߫߸ ߡߊ߲߬ߘߋ߲߬ ߞߊ߲ ߠߎ߬ ߕߎ߲߬ ߕߍ߫ ߛߓߍ߫ ߟߊ߫ ߡߎ߰ߡߍ߫߸ ߛߌ߰ ߞߍߣߍ߲߫ ߕߘߍ߬ ߘߊߘߐߛߙߋ ߟߋ߬ ߡߊ߬߸ ߏ߬ ߟߋ ߕߘߍ߬ ߛߓߍߟߌߢߍߟߊ ߟߊ߬ߡߊ߲߬ߘߟߌ߬ ߡߎߙߊ߲ ߘߌ߫، ߝߏ߫ ߞߐ ߟߊ߫߸ ߣߌ߫ ߢߊ߫ ߛߐ߬ߘߐ߲߬ ߘߊ߫ ߘߐ߬ߛߙߋ ߘߏ߫ ߟߎ߫ ߟߊߡߊ߲߬ߘߌ ߡߊ߬ ߊߙߊߓߎ߫ ߛߓߍߟߌ߫ ߞߘߊߡߊߣߍ߲ ߣߌ߫ ߟߊ߬ߕߍ߲߬ ߛߓߍ߬ߟߌ߬ ߞߘߊߡߊߣߍ߲ ߘߐ߫߸ ߡߍ߲ ߕߎ߲߬ ߕߍ߫ ߢߊߦߋ߫ ߟߊ߫ ߓߍ߯ ߓߟߏ߫.

ߒ߬ߓߊ߬߸ ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߣߊ߬ ߘߊ߫ ߛߓߍߟߌ ߘߏ߫ ߛߌ߲ߘߌ߫߸ ߊ߬ ߛߌ߲ߡߌ߲߫ ߞߊ߲ ߠߎ߬ ߛߓߍ߫ ߞߊ߲ߡߊ߬ ߏ߬ ߟߋ ߘߐ߫߸ ߛߊ߫ ߡߊ߲߬ߘߋ߲߬ ߞߊ߲ ߠߎ߬ ߘߌ߫ ߞߛߌ߫ ߟߐ߲ߠߌ߲ߦߊ߫ ߟߊߝߘߏ ߣߌ߫ ߘߎߢߊ߫ ߞߘߐ߫ ߡߐ߯ߦߊ ߡߊ߬، ߊ߬ ߟߊ߫ ߛߓߍߛߎ߲߫ ߛߌ߲ߘߌߣߍ߲ ߏ߬ ߟߋ ߕߐ߯ߟߊ߫ ߘߴߊ߬ ߓߟߏ߫߸ ߞߏ߫ ߒߞߏ ߛߓߍߛߎ߲، ߞߵߏ߬ ߞߍ߫ ߟߐ߲ߠߌ߲ߦߊ ߢߊߝߐ߫ ߡߎߙߊ߲ ߣߴߊ߬ ߟߊߡߊ߲߬ߘߌ߬ ߡߎ߬ߙߊ߲߬ ߞߟߏߡߊ ߘߌ߫.

ߒߞߏ ߛߌ߲ߘߌߣߍ߲߸ ߡߊ߲߬ߘߋ߲߬ ߡߌߙߌ߲ߘߌ ߞߊߟߌߦߊ߫ ߘߴߊ߬ ߞߊ߬ߙߊ߲߬ ߠߊ߫ ߞߵߊ߬ߟߎ߬ ߟߊ߫ ߞߏ ߘߏ߫ ߟߎ߫ ߞߍ ߘߊߡߌ߬ߣߴߊ߬ ߘߐ߫߸ ߝߏ߫ ߊ߬ ߖߍ߲ߛߍ߲߫ ߘߊ߫ ߖߌ߬ߣߍ߬ ߞߣߐ߫߸ ߡߊ߬ߟߌ ߞߣߐ߫߸ ߛߣߍ߬ߜ߭ߊߟߌ߫ ߞߣߐ߫߸ ߊ߬ ߣߌ߫ ߡߏߙߌߕߊߣߌ߫ ߟߎ߫ ߘߐ߫߸ ߞߵߏ߬ ߟߊ߫ ߊ߲ߜ߭ߏߟߊ߫ ߞߊ߲߬، ߏ߬ ߟߎ߬ ߓߍ߯ ߞߊ߬ ߒߞߏ ߟߊߓߊ߯ߙߊ߫߸ ߞߵߊ߬ߟߎ߫ ߡߊ߬ߞߏ ߟߊߢߊ߬ ߛߓߍߛߎ߲߫ ߞߎߘߊ ߟߊ߫߸ ߏ߬ ߡߍ߲ ߦߋ߫ ߛߋ߫ ߟߴߊ߬ߟߎ߬ ߞߊ߲ ߛߓߍ߫ ߟߊ߫ ߞߵߊ߬ ߡߍ߲ߞߊ߲ ߣߴߊ߬ ߞߊ߲ߡߊߛߙߋ ߟߎ߬ ߕߏ߫ ߊ߬ ߢߊ ߡߊ߬، ߞߊ߲ߜߍ ߣߌ߫ ߞߊ߲ ߞߎ߬ߙߎ߲߬ߘߎ ߟߎ߬ ߓߍ߯ ߢߊߝߐߣߴߊ߬ ߞߣߐ߫ ߞߐߘߍ߫.

ߒߞߏ ߛߓߍߛߎ߲ ߦߋ߫ ߛߓߍߟߌ߫ ߣߐ߲߯ߓߊ߫ ߟߋ߬ ߘߌ߫߸ ߡߍ߲ ߡߊ߲߬ߘߌ߬ߦߊ߬ ߞߎ߲ ߦߴߊ߬ ߟߐ߲߫ ߘߌߦߊ ߘߌ߫߸ ߊ߬ ߛߌ߲ߘߌߓߊ߮ ߟߊ߫ ߞߎߘߍߞߎߘߍߦߊ ߞߏߛߐ߲߬߸ ߊ߬ ߞߊ߬ߙߊ߲ ߣߴߊ߬ ߛߓߍ ߣߐ߲߰ߡߊ߲߬ ߓߍ߯ ߟߊߘߍ߬ߣߍ߲ ߡߊ߬، ߊ߬ ߘߏ߲߬ ߛߌ߲ߘߌ ߞߍ߫ ߘߊ߫ ߕߙߎ߬ ߘߌ߫߸ ߞߊ߬ ߡߊ߲߬ߘߋ߲߬ ߟߐ߲ߠߌ߲ߦߊ ߣߴߊ߬ ߡߟߋߞߎߦߊ ߟߎ߫ ߘߏ߲߬ ߓߊ߫ ߘߐ߫ ߓߍ߯ ߟߊߘߍ߬ߣߍ߲ ߓߟߏ߫.

ߌ ߓߊ߯ ߒߞߏ ߛߓߍߛߎ߲ ߣߌ߲߬ ߕߊ߬߸ ߡߍ߲ ߛߌ߲ߘߌߣߍ߲߫ ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߓߟߏ߫߸ ߊ߬ ߛߓߍߘߋ߲ ߞߋ߬ߟߋ߲߬ߞߋ߬ߟߋ߲߬ߠߊ ߓߍ߯ ߣߴߊ߬ ߕߊ߫ ߡߍ߲ߞߊ߲߫ ߓߟߏߡߊߞߊ߬ߣߍ߲߫ ߠߋ߬߸ ߘߏ߫ ߕߍ߫ ߘߍ߬ ߟߊ߫ ߘߏ߫ ߡߊ߲߬ߞߊ߲߬ ߠߊ߫، ߏ߬ ߟߋ ߜߎ ߞߵߊ߬ ߞߊ߬ߙߊ߲ ߣߴߊ߬ ߛߓߍ ߣߐ߰ߦߊ߬.

ߒߞߏ ߛߓߍߛߎ߲ ߦߋ߫ ߛߓߍߘߋ߲߫ ߂߇ ߟߋ߬ ߘߌ߫߸ ߊ߬ ߓߍ߯ ߣߴߊ߬ ߕߐ߰ߡߊ߬ߛߙߋ߫ ߟߋ߬߸ ߡߍ߲ ߠߎ߬ ߓߐߣߍ߲߫ ߢߐ߲߮ ߡߊ߬، ߏ߬ ߟߎ߬ ߦߋ߫ ߟߊߞߎߡߊ߫ ߟߊ߫ ߟߊ߬ߞߎ߬ߡߊ߬ߟߊ߲ ߠߎ߬ ߟߋ߬ ߓߟߏ߫߸ ߏ߬ ߟߎ߬ ߡߍ߲ ߠߎ߬ ߟߊߘߊ߲ߣߍ߲߫ ߒߞߏߝߐߟߊ ߟߎ߬ ߘߊ ߞߍߢߊ ߦߌ߬ߘߊ߬ ߞߊ߲ߡߊ߬߸ ߏ߬ ߟߎ߫ ߟߋ߬ ߦߋ߫ ߝߙߊ߬ ߟߊ߫ ߟߊ߬ߞߎ߬ߡߊ߬ߕߊ ߟߎ߬ ߞߊ߲߬ ߛߊ߫ ߞߵߊ߬ߟߎ߬ ߟߊߞߎߡߊ߫.

ߕߐ߰ߡߊ߬ߛߙߋ߬ ߜߘߍ߫ ߟߎ߫ ߟߊߘߊ߲ߣߍ߲߫ ߟߊ߬ߞߎ߬ߡߊ߬ߟߊ߲ ߏ߬ ߟߎ߫ ߟߋ߬ ߝߊ߲߬ߞߊߘߏ߲߬ ߞߊ߲ߡߊ߬ ߛߊ߫߸ ߣߊߟߌ߬ߡߎ߲߬ ߞߊ߲ߡߊߛߙߋ ߟߎ߬ ߘߌ߫߸ ߞߵߏ߬ ߞߍ߫ ߡߙߌߦߊ ߟߎ߬ ߘߐߞߣߍߟߊ߲ ߘߌ߫ ߛߓߍߟߌ ߘߐ߫، ߞߊ߬ ߛߋ߫ ߞߎߡߊߘߋ߲߫ ߥߙߍߓߊ ߟߎ߬ ߓߐ߫ ߟߊ߫ ߢߐ߲߮ ߘߐ߫߸ ߞߵߊ߬ߟߎ߬ ߡߎߣߎ߲ߧߊߣߍ߲ ߕߏ߫ ߞߊߡߊ߲ ߘߏ߫ ߟߎ߫ ߞߣߐ߫، ߦߏ߫ ߛߟߊ ߣߌ߫ ߛߊ߬ߟߊ، ߘߋ߲ߓߊ߫ ߛߓߍߟߌߟߊ ߣߌ߫ ߘߋ߲߬ߓߊ߬ ߛߓߍߟߌߟߊ، ߡߏ߬ߛߏ ߖߎ߮ ߣߌ߫ ߡߛߏ߬ ߖߎ߮، ߊ߬ ߣߴߏ߬ ߢߐ߲߰ߘߐ ߟߎ߬...

ߒߞߏ ߛߓߍߛߎ߲ ߛߌ߲ߘߌ ߓߍ߲߬ ߘߊ߫ ߓߊߟߋ߬߸ ߞߵߏ߬ ߞߎ߲߭ ߞߍ߫ ߘߌ߯ߣߊ ߘߐߞߣߍ ߘߴߊ߬ ߘߐ߫ ߡߊ߲߬ߘߋ߲߬ ߡߌߙߌ߲ߘߌ ߦߋ߫߸ ߝߏ߫ ߢߍߓߊ߯ ߛߌߦߊߡߊ߲߫ ߠߊ߫ ߢߍߓߊ߯ߦߊ ߞߊ߬ߥߊ߲߬ߘߌ߬ߟߌ ߛߋ߫ ߘߊ߫ ߣߐ߰ߦߊ߬ ߟߴߊ߬ߟߎ߫ ߡߊ߬ ߒߞߏ ߛߓߍߛߎ߲ ߡߊ߬ߣߊߡߊ߬، ߊ߬ ߕߌ߯ߕߌ߯ ߡߊ߲߬ߘߋ߲߬ ߡߌߙߌ߲ߘߌ ߡߍ߲ ߠߎ߬ ߝߊ߲߬ߓߊ ߦߋ߫ ߛߌ߬ߟߡߊ߬ߦߊ ߞߊ߲߬߸ ߊ߬ ߞߵߏ߬ ߘߐߞߣߍ߫ ߟߋ߬ ߥߙߊߕߊߕߊ߫.

ߒߞߏ ߞߍ߫ ߘߊ߫ ߕߙߎ߬ ߘߌ߫߸ ߞߊ߬ ߞߊ߬ߙߊ߲ ߝߊ߲߬ߞߊߘߏ߲߬ ߝߘߊ߬ߝߌ߲߬ߠߊ߫ ߕߟߋ߬ߓߋ߬ ߝߊ߲ ߠߎ߬ ߘߐ߫ ߦߊ߲߬، ߞߵߏ߬ ߞߎ߲߭ ߞߍ߫ ߛߓߍߟߐ߲ߓߊߟߌ ߛߌߦߊߡߊ߲߫ ߘߏ߲߭ ߘߴߊ߬ ߘߐ߫߸ ߊ߬ ߞߊ߬ ߡߍ߲ ߠߎ߬ ߓߍ߯ ߞߍ߫ ߘߏ߫ ߟߐ߲ߠߊ ߘߌ߫߸ ߞߊ߬ ߞߎ߲߬ߝߌ߲߬ߧߊ ߞߍ߬ߟߍ ߘߊߡߌ߬ߣߊ߬߸ ߞߊ߬ ߡߊ߲߬ߘߋ߲߬ ߟߐ߲ߠߌ߲ߦߊ ߟߎ߬ ߕߏ߫ ߓߊߟߏ߫ ߘߐ߫.

ߒߞߏ ߘߏ߲߬ ߞߍ߫ ߘߊ߫ ߕߙߎ߬ ߘߌ߫߸ ߞߊ߬ ߡߊ߲߬ߘߋ߲߬ߞߊ ߟߎ߬ ߟߊ߫ ߓߌ߬ߟߊ߬ߢߐ߲߰ߡߊ ߟߊߛߎ߬ߘߎ߲߬ߧߊ߫߸ ߞߊ߬ ߟߐ߲ߠߌ߲ߦߊ ߟߎ߬ ߟߊߕߊ߬ߡߌ߲ ߣߐ߰ߦߊ߬ ߢߐ߲߮ ߡߊ߬ ߢߊ ߓߍ߯ ߡߊ߬.

ߏ߬ ߟߋ ߖߊ߯ߕߋ ߞߏߛߐ߲߬߸ ߝߐ߰ߓߍ߬ߝߐ߯ߓߍ ߟߎ߬ ߛߓߍ ߘߊߡߌ߬ߣߊ߬ ߘߴߊ߬ ߘߐ߫ ߛߌ߲ߘߌߓߊ߮ ߟߊ߫ ߛߊ߬ߦߊ ߣߐ߬ ߞߟߊߡߊ߲ ߘߐ߫߸ ߒߞߏ ߓߊߓߋ߬ߓߊ߰ ߛߌߦߊߡߊ߲߫ ߞߊ߬ ߞߊ߬ߝߊ ߟߎ߬ ߛߓߍ ߘߊߡߌ߬ߣߊ߬ ߛߌ߲ߘߌߓߊ߮ ߞߍ߲ߘߍ ߢߣߊ߫ ߡߎߣߎ߲߬߸ ߊ߬ ߣߌ߫ ߝߐ߰ߓߍ ߟߎ߬ ߣߌ߫ ߛߊ߲߬ߞߝߊ ߟߎ߬ ߣߌ߫ ߛߊ߲߬ߥߟߊ ߟߎ߬߸ ߞߵߏ߬ ߞߍ߫ ߓߌ߬ߟߊ߬ߢߐ߲߰ߡߊ ߞߣߐ ߘߐߥߙߊ߬ߟߊ߲ ߘߌ߫߸ ߞߊ߬ ߡߙߌ ߟߎ߬ ߟߛߊߣߌ߲ߧߊ߫߸ ߞߊ߬ ߟߐ߲ߠߌ߲ ߠߊߖߘߌߥߊ߫.

ߒߞߏ ߛߓߍߛߎ߲ ߣߊ߭ ߌߞߘߐ߫߸ ߊ߬ ߞߵߊ߬ ߝߏ߲߬ߝߏ߲߬ߠߊ ߟߊ߫ ߛߓߍߛߎ߲߫ ߟߏ߲ߟߊ߲ ߠߎ߬ ߞߊ߲߬ ߝߘߊ߬ߝߌ߲߬ߠߊ߫ ߕߟߋ߬ߓߋ ߘߐ߫ ߦߊ߲߬، ߓߊߏ߬߸ ߖߌ߬ߣߍ߬ ߣߌ߫ ߡߊ߬ߟߌ ߣߌ߫ ߓߙߎߞߌߣߊ߫ ߝߊ߬ߛߏ߬ ߟߎ߫ ߕߎ߲߬ ߓߘߴߊ߬ߟߎ߫ ߕߎ߬ߙߎ߲߫ ߟߊ߬ߕߍ߲߬ ߢߊߞߎߘߦߊߣߍ߲ ߡߍ߲ ߞߊ߲߬ ߞߊ߲ ߠߎ߬ ߛߓߍ߫ ߞߏ ߘߐ߫߸ ߏ߬ ߛߍ߱ ߓߏ߲߬ߓߊ߫ ߕߘߍ߬ ߢߊ ߓߍ߯ ߡߊ߬، ߓߊ߬ߙߌ߬߸ ߒߞߏ ߣߊ߬ߣߍ߲߸ ߊ߬ ߦߋ߫ ߘߊ߫ ߞߏ߫ ߕߐ߬ߣߐ ߡߍ߲ ߦߋ߫ ߒߞߏ ߟߊ߫߸ ߊ߬ ߢߊߦߋ ߟߊ߫ ߣߐ߰ߦߊ ߣߴߊ߬ ߟߊ߫ ߘߐ߬ߞߣߍ ߞߏߛߐ߲߬߸ ߘߐ߰ߘߏ߲߬ ߞߍ߫ ߘߴߊ߬ߟߋ߬ ߟߊ߫ ߡߌ߬ߙߌ߲߬ߘߌ ߓߟߏ߫ ߖߡߊ߬ߣߊ ߏ߬ ߟߎ߬ ߞߣߐ߫߸ ߞߊ߬ ߘߐ ߏ߬ ߡߊߓߌ߬ߟߊ߬، ߝߏ߫ ߛߓߍߛߎ߲ ߏ߬ ߖߍ߬ߘߍ ߓߍ߫ ߢߌߣߌ߲߫ ߞߊ߬ ߞߍ߫ ߦߋ߫ ߜߏߡߊ߲ ߘߌ߫ ߖߌ߬ߣߍ߬ ߞߣߐ߫ ߕߋ߲߬.

ߒߞߏ ߟߊߘߊ߲ߣߍ߲߫ ߡߊ߲߬ߘߋ߲߬ ߞߊ߲ ߓߍ߯ ߟߋ߬ ߛߓߍ߫ ߞߊ߲ߡߊ߬ ߕߟߋ߬ߓߋ߬ ߊߝߙߌߞߌ߬ ߞߣߐ߫ ߦߊ߲߬߸ ߦߏ߫ ߡߊ߬ߣߋ߲߬ߞߊ߬ ߞߊ߲߸ ߛߏ߬ߣߌ߲߬ߞߋ߬ ߞߊ߲߸ ߝߎߟߊ߫ ߞߊ߲߸ ߓߡߊߣߊ߲߫ ߞߊ߲߸ ߊ߬ ߣߌ߫ ߖߎ߬ߟߊ߬ ߞߊ߲ ߣߴߏ߬ ߢߐ߲߱ ߠߎ߬...

ߊߟߎ߫ ߦߴߊ߬ ߟߐ߲߫߸ ߒߞߏ ߛߓߍߛߎ߲ ߜߘߌ ߛߌ߰ߣߍ߲߫ ߞߊ߲ߡߊߛߙߋ߫ ߞߏ ߟߋ߬ ߞߊ߲߬ ߡߊ߲߬ߘߋ߲߬ ߞߊ߲ ߠߎ߬ ߛߓߍ ߘߐ߫، ߏ߬ ߟߋ ߘߐ߫߸ ߊ߬ ߟߊ߬ߞߎ߬ߡߕߊ߬ ߁߉߸ ߊ߬ ߣߴߊ߬ ߟߊ߬ߞߎ߬ߡߊ߬ߟߊ߲߬ ߇ ߣߴߊ߬ ߕߍߘߐ߫ ߁ ߣߴߊ߬ ߞߊ߲ߡߊߛߙߋ߫ ߄ ߠߎ߬ ߘߏ߫ ߕߍ߫ ߥߊ߫ ߟߊ߫ ߘߏ߫ ߞߐ߫߸ ߏ߬ ߟߎ߬ ߟߊߘߍ߬ߣߍ߲ ߠߋ߬ ߒߞߏ ߟߊ߫ ߥߣߊ߬ߦߊ ߘߝߊ߫ ߟߊ߫.

ߒߞߏ ߦߋ߫ ߟߊߓߊ߯ߙߊ߫ ߟߊ߫ ߟߊ߬ߞߟߏ߬ߞߟߏ߬ߟߌ ߡߊ߬ߘߎ߮ ߟߋ߬ ߘߐ߫ ߓߊߞߍ߭߸ ߞߊ߬ ߘߋ߲ߣߍ߲ ߠߎ߬ ߣߌ߫ ߡߐ߰ߓߊ ߟߎ߫ ߞߊ߬ߙߊ߲߫ ߡߊ߲߬ߘߋ߲߬ ߞߊ߲ ߠߊ߫، ߊ߬ ߓߘߊ߫ ߕߊ߬ ߓߊ߫ ߘߐ߫ ߝߘߊ߬ߝߌ߲߬ߠߊ߫ ߕߟߋ߬ߓߋ߬ ߖߡߊߣߊ ߢߌ߲߬ ߠߎ߬ ߘߐ߫ ߟߊ߬ߞߟߏ߬ߞߟߏ߬ߟߌ ߡߊ߬ߘߎ߮ ߘߐ߫ ߡߌ߬ߙߌ߲߬ߘߌ ߝߣߍ߬ߝߣߍ ߓߟߏ߫ ߖߌ߬ߣߍ߬ ߣߌ߫ ߡߊ߬ߟߌ ߣߌ߫ ߜߋ߲ߞߐ߰ߖߌ߬ߘߊ ߣߌ߫ ߓߙߎߞߌߣߊ߫ ߝߊ߬ߛߏ߬ ߟߎ߬ ߘߐ߫߸ ߊ߬ ߞߊ߬ߙߊ߲߬ߕߊ߬ ߓߊߖߎߟߞߊ ߦߋ߫ ߢߌ߲߬ ߠߎ߬ ߛߌߦߊߡߊ߲߫ ߞߣߐ߫، ߝߘߊ߬ߝߌ߲߬ߠߊ߫ ߞߐߞߊ߲߫ ߜߙߋ ߘߏ߫ ߟߎ߫ ߖߡߊ߬ߣߊ߬ ߛߌߦߊߡߊ߲߫ ߝߣߊ߫ ߓߘߴߊ߬ ߘߊ߲ߞߎ߲߫، ߓߊߏ߬߸ ߊ߬ ߦߋ߫ ߞߊ߬ߙߊ߲߬ ߠߊ߫ ߍߛߑߔߊߢߌ߲߬ ߞߣߐ߫߸ ߊ߬ ߣߌ߫ ߊߡߙߌߞߌ߬ ߣߌ߫ ߌߕߊߟߌ߫ ߟߎ߫ ߘߐ߫.

ߒߞߏ ߛߓߍߛߎ߲ ߦߋ߫ ߟߊߓߊ߯ߙߊ߫ ߟߊ߫ ߞߟߊ߬ߘߏ߲߬ߛߏ߬ ߛߌߦߊߡߊ߲߫ ߓߟߏ߫߸ ߛߞߎ߬ߦߟߊ߬ ߛߌߦߊߡߊ߲߫ ߓߟߏ߫߸ ߝߐ߰ߓߍ߬ߦߟߊ߬ ߛߌߦߊߡߊ߲߫ ߓߟߏ߫ ߖߌ߬ߣߍ߬ ߣߌ߫ ߡߊ߬ߟߌ ߞߣߐ߫.

ߒߞߏ ߛߓߍߛߎ߲ ߘߏ߲߬ ߣߊ߭ ߓߍ߲߬ ߘߊ߫ ߟߋ߬ ߞߟߋ߫؛ ߓߊߏ߬߸ ߊ߬ ߛߋ߫ ߘߊ߫ ߡߊ߲߬ߘߋ߲߬ ߟߐ߲ߠߌ߲ߦߊ ߟߊߕߊ߲߬ߞߊ߬ ߟߊ߫ ߞߵߊ߬ ߞߛߌ߫ ߜߟߍ߬ߦߊ߬ ߛߌߦߊߡߊ߲߫ ߡߊ߬ ߕߎߣߎ߲ ߣߌ߫ ߢߊߞߍ ߘߊߞߎ߲ ߘߐ߫، ߡߊ߲߬ߘߋ߲߬ߞߊ ߟߎ߬ ߛߋ߫ ߘߴߊ߬ߟߎ߬ ߟߊ߫ ߘߐ߬ߝߐ ߜߍߣߍ߲ ߣߴߊ߬ ߛߊߣߌ߲ߡߊ߲ ߛߐ߬ߘߐ߲߬ ߠߊ߫ ߒߞߏ ߟߋ߬ ߞߣߐ߫߸ ߞߵߏ߬ ߟߴߊ߬ߟߎ߬ ߟߊ߫ ߟߐ߲ߠߌ߲ߦߊ ߢߊߝߐߟߌ ߞߊ߲߬߸ ߊ߬ ߣߌ߫ ߡߟߋߞߎߦߊ ߓߏߟߏ߲ ߠߎ߬.

ߒ߬ߞߊ߬߸ ߒߞߏ ߟߊ߫ ߥߣߊ߬ߦߊ ߣߌ߲߬ ߓߍ߯ ߣߴߊ߬ ߕߊ߫߸ ߜߟߍ߬ߦߊ߬ ߛߌߦߊߡߊ߲߫ ߠߋ߬ ߦߴߊ߬ ߞߊ߲߬ ߝߘߊ߬ߝߌ߲߬ߠߊ߫ ߕߟߋ߬ߓߋ ߘߐ߫ ߦߊ߲߬، ߊ߬ ߞߊ߬ߙߊ߲߬ߓߊ߮ ߟߎ߬ ߓߘߊ߫ ߛߴߊ߬ߟߎ߬ ߘߐߖߊ߬ ߟߊ߫ ߞߊ߬ ߖߡߊ߬ߣߊ߬ ߛߌߦߊߡߊ߲߫ ߞߊ߬ߙߊ߲ ߢߍߥߟߊ ߣߴߊ߬ ߞߊ߬ߙߊ߲߬ ߞߝߊ ߟߎ߬ ߟߊߦߌ߬ߙߌ߲߬ߘߌ߬ ߒߞߏ ߘߐ߫، ߓߊ߬ߙߌ߬߸ ߏ߬ ߟߎ߫ ߞߎ߲߬ߠߊ߬ߛߌ߮ ߟߎ߬ ߟߊ߫ ߖߊ߬ߕߋ߬ ߛߌ߫ ߕߴߊ߬ߟߎ߫ ߞߊ߲߬، ߒߞߏ ߦߋ߫ ߘߊߞߎ߲ ߡߍ߲ ߘߐ߫ ߣߌ߲߬ ߥߙߎߞߌ ߡߊ߬ߘߎ߮ ߘߐ߫߸ ߞߎ߲߬ߠߊ߬ߛߌ߮ ߕߊ ߦߴߊ߬ ߘߐ߫ ߟߋ߬ ߝߐߍ߲߫، ߊ߬ ߞߊ߬ߙߊ߲߬ߓߊ߮ ߟߎ߬ ߟߊ߫ ߞߟߊߓߎ ߣߴߊ߬ߟߎ߬ ߟߊ߫ ߓߟߏߟߊߘߍ ߟߎ߫ ߟߋ߬ ߛߋ߫ ߘߴߊ߬ ߟߊߛߋ߫ ߟߊ߫ ߘߊߞߎ߲ ߣߌ߲߬ ߘߐ߫.

ߖߡߊ߬ߣߊ ߏ߬ ߟߎ߫ ߞߢߊ߬ߣߍ߲߬ ߒߞߏ ߞߍ߫ ߟߴߊ߬ߟߎ߬ ߟߊ߫ ߝߘߏ߬ߓߊ߬ ߛߓߍߟߌ ߘߌ߫، ߓߊ߬ߙߌ߬ ߊߜߊ߫߸ ߕߌ߲߬ߞߎߘߎ߲ ߘߏ߫ ߟߎ߫ ߓߘߊ߫ ߒߞߏ ߞߍ߫ ߊ߬ߟߎ߬ ߟߊ߫ ߝߘߏ߬ߓߊ߬ ߛߓߍߛߎ߲ ߘߴߊ߬ߟߎ߫ ߖߘߍ߬ ߦߋ߫߸ ߞߵߊ߬ ߓߌ߬ߟߴߊ߬ߟߎ߬ ߟߊ߫ ߓߊ߯ߙߊ߫ ߦߙߐ ߟߎ߬ ߘߐ߫߸ ߊ߬ ߣߌ߫ ߕߌ߲ߓߌߘߌ߲ߘߊ ߟߎ߬ ߣߌ߫ ߟߐ߲ߠߌ߲ߦߊ߫ ߦߙߐ߫ ߛߌߦߊߡߊ߲߫ ߠߎ߫ ߘߐ߫߸ ߊ߬ ߣߌ߫ ߘߎ߲߬ߘߎ߬ߡߊ߬ ߞߊߙߊ߲ߕߊ ߘߏ߫ ߟߎ߫ ߓߘߴߊ߬ ߕߊ߬ ߊ߬ߟߎ߫ ߖߘߍ߬ ߦߋ߫߸ ߣߌ߫ ߞߎ߲߬ߠߊ߬ߛߌ߮ ߟߊ߫ ߖߡߊ߬ߙߌ߬ ߛߌ߫ ߕߍ߫، ߏ߬ ߟߵߊ߬ ߦߌ߬ߘߊ߬ ߟߊ߫ ߞߏ߫ ߒߞߏ ߦߋ߫ ߝߘߏ߬ߓߊ߬ ߞߊ߲߬ߧߊ ߡߊߜߍ߲ ߞߊ߲߬ ߘߐߣߍ߲ߘߐߣߍ߲߫ ߖߐ߫.

ߟߊ߬ߓߊ߲ ߘߐ߫߸ ߊ߲ ߘߌ߫ ߡߍ߲ ߦߌ߬ߘߴߊߟߎ߫ ߟߊ߫ ߓߌ߬ ߢߐ߲߰ ߟߏ߲߫߸ ߞߏ߲ߞߏߘߓߌ ߕߟߋ߬ ߁߄ ߣߌ߲߬ ߡߊ߬߸ ߒߞߏ ߛߓߍߛߎ߲ ߦߋ߫ ߛߓߍߟߌ߫ ߕߣߐ߬ߡߊ߬ߓߊ߫ ߟߋ߬ ߘߌ߫߸ ߞߎ߲߬ ߛߌߦߊߡߊ߲߫ ߞߏߛߐ߲߬:

ߊ ߺ ߛߓߍߛߎ߲߫ ߓߍ߯ߦߊߟߞߊ ߟߋ߬: ߞߊ߬ ߞߐ߲߰ ߊ߬ ߣߊ߭ ߢߍ߫߸ ߟߐ߲ߠߌ߲ ߛߐ߬ߘߐ߲߬ ߜߏߡߊ߲߫ ߕߍ߬ߘߍ߫ ߕߟߋ߬ߓߋ߬ ߞߊ߲ ߠߎ߬ ߘߐ߫ ߡߊ߲߬ߘߋ߲߫ ߦߊ߲߬߸ ߞߵߏ߬ ߞߎ߲߭ ߞߍ߫ ߟߐ߲ߠߌ߲ ߠߊߕߊ߬ߡߌ߲߬ ߡߎ߬ߙߊ߲߬ ߞߏ߬ߖߊ ߘߌ߫، ߒ߬ߓߊ߬߸ ߒߞߏ ߟߋ߬ ߞߵߏ߬ ߓߊ߲߫ ߔߋߎ߫.

ߋ ߺ ߟߐ߲ߠߌ߲ߦߊ ߟߎ߬ ߟߊߡߊ߲߬ߘߌ߬ ߛߓߍߛߎ߲ ߠߋ߬: ߒߞߏ ߣߊ߬ߣߍ߲߸ ߊ߬ ߛߋ߫ ߘߊ߫ ߡߊ߲߬ߘߋ߲߬ ߟߐ߲ߠߌ߲ߦߊ ߟߎ߬ ߟߊߘߍ߬ ߟߊ߫߸ ߞߵߊ߬ߟߎ߬ ߞߍ߫ ߘߐ߬ߛߙߋ ߘߌ߫߸ ߞߊ߬ ߘߐ߬ߝߐ ߟߎ߬ ߜߊ߲ߜߊ߲߫ ߛߓߍߝߌߘߊ ߟߎ߫ ߞߊ߲߬߸ ߞߵߊ߬ߟߎ߬ ߞߛߌ߫ ߕߎߣߎ߲ ߡߊ߬.

ߌ ߺ ߟߊ߬ߞߟߏ߬ߞߟߏ߬ߟߌ ߣߌ߫ ߥߙߎߞߌ ߛߌߟߊ ߝߍ߬: ߊ߬ ߞߍ߫ ߘߊ߫ ߛߓߊ߫ ߟߊߘߍ߲߰ߕߊ ߟߋ߬ ߘߌ߫ ߞߊ߬ߙߊ߲ ߠߊߣߐ߰ߦߊ ߘߐ߫، ߓߊߏ߬߸ ߊ߬ ߛߋ߫ ߘߊ߫ ߞߊ߬ߙߊ߲ ߣߌ߫ ߛߓߍߟߌ ߟߊߣߐ߰ߦߊ߬ ߟߊ߫ ߘߋ߲ߣߍ߲ ߠߎ߬ ߡߵߊ߬ߟߎ߬ ߛߌ߲ߡߌ߲߫ ߞߊ߲ ߘߐ߫.

ߍ ߺ ߞߍߞߋߟߋ߲ߘߌ ߛߓߍߛߎ߲ ߠߋ߬: ߒߞߏ ߞߊߙߊ߲ ߡߙߌߦߊ ߕߍ߫ ߡߐ߰ ߛߌ߫ ߟߊߝߟߌ߬ ߟߴߊ߬ ߛߎ߮ ߡߊ߬߸ ߊ߬ ߘߏ߲߬ ߕߍ߫ ߣߊ߬ ߟߊ߫ ߝߘߊߝߘߊߟߌ߫ ߘߌ߫ ߡߐ߱ ߟߎ߬ ߣߌ߫ ߢߐ߲߯ ߕߍ߫، ߝߊ߬ߣߌ߫ ߡߍ߲ ߠߎ߬ ߟߊ߫ ߞߏ߫ ߢߊߦߋߢߊ ߞߵߏ߬ ߟߊߘߏ߲߬ ߊ߬ ߘߐ߫ ߘߋ߬.

ߎ ߺ ߛߏߡߐ߯ߦߊ ߛߓߍߛߎ߲ ߠߋ߬: ߒߞߏ ߓߘߊ߫ ߕߊ߬ ߓߊ߯ߙߊ߫ ߦߌߟߓߊ ߟߎ߬ ߘߐ߫ ߓߌ߬߸ ߞߊ߬ ߛߓߍߘߟߊ߫ ߡߐ߮ ߛߌߦߊߦߊ߫ ߒߞߏ ߘߐ߫߸ ߞߊ߬ ߓߊߛߌߦߊ ߘߐߦߙߌߥߊ߫ ߞߵߊ߬ ߓߐ߫ ߞߏ߲ߞߏߘߐߦߊ ߘߐ߫߸ ߞߵߊ߬ ߟߊߘߊ߲߫ ߛߏߡߐ߯ߦߊ ߣߌ߫ ߞߎߣߎ߲ ߘߝߊߣߍ߲ ߘߐ߫، ߊ߬ ߘߏ߲߬ ߓߘߊ߫ ߣߊ߬ ߡߐ߰ ߞߎߣߎ߲ߣߍ߲ ߠߎ߬ ߘߌ߫߸ ߞߊ߬ ߟߐ߲ߠߌ߲ߠߊ ߛߌߦߊߦߊ߫߸ ߞߊ߬ ߢߊߦߋߟߌ ߥߙߊ߬.

ߊ߲ ߘߴߊ߬ ߝߐ߫ ߒߞߏ ߛߓߍߛߎ߲ ߠߊߓߊ߯ߙߊߓߊ߮ ߟߎ߫ ߡߊ߬߸ ߞߏ߫ ߊ߬ߟߎ߬ ߣߌ߫ ߛߎ߲߬ߞߎ߲߬ߢߐ߲߰ ߢߊ߯ߢߊ߯߸ ߊ߬ߟߎ߬ ߣߌ߫ ߕߍߛߘߌ߫.