ߞߍ߲ߘߍߟߏ߲ ߂߀߂߆ ߘߓߊ߬ߕߊ ߕߋ߬ߟߋ߫ ߂߉ ߡߊ߬߸ ߖߌ߬ߓߙߌ߬ߟߊ߲߬ ߞߐ߲ߘߍ߫ ߡߊ߲߬ߘߋ߲߫ ߡߟߍ߬ߞߊ ߞߊ߬ ߓߐߒߝߘߎߘߐ߫ ߓߟߋߓߟߋ߫ ߞߍ߫ ߊ߬ߟߎ߬ ߟߊ߫ ߛߏ ߦߋ߫߸ ߓߊ߯ߙߏ߫، ߓߊ߯ߙߏ߫ ߣߌ߲߬ ߦߋ߫ ߡߙߊ߬ߘߊ߬ߙߋ߲ ߠߋ߬ ߘߌ߫ ߞߙߎ߬ߛߊ߫ ߡߙߊ߬ߘߊ߬ߓߊ ߘߐ߫، ߊ߬ ߣߐ߬ ߝߟߊ ߟߋ߬ ߕߘߎ߫ ߟߊ߫ ߛߏ ߘߏ߲߬ߘߊ ߟߊ߫߸ ߡߍ߲ ߡߎ߰ߡߍ ߞߍߣߍ߲߫ ߒߞߏ ߛߓߍߟߌ ߘߌ߫߸ ߞߊ߬ ߡߊ߲߬ߘߋ߲߫ ߡߐ߬ߟߐ߲ ߟߊ߫ ߞߣߍ ߞߊ߲߬߸ ߊ߬ ߣߌ߫ ߒߞߏ ߛߊ߲ߞߘߐߕߊ߬.

ߝߟߊ߫ ߕߘߎ ߣߌ߲߬ ߛߊߓߎ߫ ߟߊ߫߸ ߡߐ߰ ߛߌ߫ ߓߊ߯ ߞߍ߫ ߘߏ߲߬ ߠߊ߫ ߓߊ߯ߙߏ߫ ߞߣߐ߫ ߡߎ߬ߕߎ߲߬߸ ߌ ߘߴߊ߬ ߟߐ߲߫ ߌ ߘߏ߲߬ߕߐ߫ ߛߏ ߡߍ߲ ߞߣߐ߫، ߊ߬ߟߋ߫ ߝߍ߬߸ ߒߞߏ ߛߓߍ ߝߟߊ ߣߌ߲߬ ߞߊ߲߬ ߕߋ߲߬߸ ߏ߬ ߡߊ߫ ߞߍ߫ ߝߎ߯، ߊ߬ ߞߍߣߍ߲߫ ߘߐ߬ߝߐ ߟߊ߫ ߟߊ߲߬ߘߊ ߟߋ߬ ߞߣߐ߫߸ ߏ߬ ߡߍ߲ ߦߴߊ߬ ߦߌ߬ߘߊ߬ ߟߊ߫ ߞߏ߫ ߡߊ߲߬ߘߋ߲߫ ߘߎ߱ ߓߍ߯ ߡߊߟߐ߲߫ ߕߙߎ ߟߋ߬ ߞߊ߲ ߣߌ߫ ߟߐ߲ߠߌ߲ߦߊ ߘߌ߫.

<<ߊ߲ ߞߊ߬ ߝߟߊ߫ ߕߘߎ ߟߋ߬ ߞߍ߫ ߊ߲ ߝߊ߬ߛߏ ߘߏ߲߬ߘߊ ߟߊ߫߸ ߊ߬ ߕߘߎߣߴߊ߲ ߓߟߏ߫ ߞߎ߲߭ ߡߍ߲ ߠߊ߫߸ ߏ߬ ߟߋ ߦߋ߫ ߛߏ ߡߊߟߐ߲ ߘߌ߫ ߓߐߓߊ߯ߕߐ ߟߎ߬ ߣߌ߫ ߘߏ߲߬ߓߊ߰ߕߐ ߟߎ߬ ߓߟߏ߫.>> ߊ߬ ߞߵߏ߬ ߢߊߝߐ߫.

ߒߞߏ ߟߋ߬ ߛߓߍߣߍ߲߫ ߝߟߊ ߣߌ߲߬ ߞߊ߲߬߸ ߏ߬ ߛߎߥߊ߲ߘߌߣߍ߲߫ ߓߊ߯ߙߊ ߣߌ߲߬ ߞߍߓߊ߮ ߓߟߏ߫ ߛߏ ߟߊ߲߬ߓߋ ߟߊߘߊ߬ߙߏ ߟߋ߬ ߡߊ߬، ߞߊ߬ߕߎ߲߯߸ ߊ߬ߟߋ ߕߊ߫ ߢߊߦߋߟߌ߫ ߘߐ߫߸ ߡߊ߲߬ߘߋ߲߬ߞߊ߬ߦߊ ߦߋ߫ ߦߋ߫ ߟߊ߫ ߛߓߍߟߌ߫ ߞߋߟߋ߲ ߡߍ߲ ߘߐ߫߸ ߏ߬ ߟߋ ߒߞߏ ߘߌ߫.

<<ߣߴߌ ߞߵߊ߬ ߦߋ߫ ߊ߲ ߡߊ߫ ߝߟߊ ߣߌ߲߬ ߛߓߍߟߌ ߞߍ߫ ߝߊ߬ߙߊ߲߬ߛߌ ߘߌ߫߸ ߊ߲ ߡߴߊ߬ ߞߍ߫ ߊߙߊߓߎ ߘߌ߫߸ ߝߏ߫ ߒߞߏ، ߊ߲ ߧߴߊ߬ ߝߍ߬ ߞߊ߬ ߞߎߡߊ ߡߍ߲ ߠߎ߬ ߛߓߍ߫ ߝߟߊ ߣߌ߲߬ ߞߊ߲߬߸ ߡߍ߲ ߠߎ߬ ߘߌ߫ ߞߍ߫ ߊ߲ ߤߊ߲ߞߟߌߣߊ߲ ߠߎ߬ ߘߌ߫߸ ߕߐ߭ ߏ߬ ߟߎ߬ ߘߛߍߣߍ߲߫ ߏ߬ ߟߋ ߛߓߍ߫ ߟߊ߫ ߓߏ߲߬.>> ߖߌ߬ߓߙߌ߬ߟߊ߲߫ ߡߊ߲߬ߘߋ߲߫ ߡߟߍ߬ߞߊ ߞߐ߲ߘߍ߫ ߟߋ߬ ߞߊ߲߫ ߕߋ߲߬.

ߘߋ߲ߡߌ߬ߛߍ߲ ߢߌ߲߬ ߠߊ߫ ߝߐߟߌ߫ ߘߐ߫߸ ߝߟߊ ߣߌ߲߬ ߕߘߎߣߴߊ߬ߟߎ߬ ߓߟߏ߫ ߦߙߐ ߡߍ߲ ߘߐ߫߸ <<ߊߙߊߓߎߘߎ߯ ߕߍ߫߸ ߝߊ߬ߙߊ߲߬ߛߌ߬ ߘߎ߯ ߕߍ߫߸ ߏ߬ ߦߋ߫ ߡߊ߲߬ߘߋ߲߫ ߠߋ߬.>> ߊ߬ ߞߵߏ߬ ߦߌ߬ߘߊ߬߸ ߞߏ߫ ߒߞߏ ߛߓߍߟߌ ߟߊߓߊ߯ߙߊߣߴߊ߬ߟߎ߬ ߓߟߏ߫ ߏ߬ ߟߋ ߞߏߛߐ߲߬.

ߊ߬ ߞߵߊ߬ ߞߊ߲ߠߊߘߌ߫ ߊ߬ ߕߐ߬ߢߐ߲߰ ߒߞߏ ߘߋ߲ߡߌߛߍ߲ ߠߎ߫ ߡߊ߬߸ ߞߏ߫ ߓߍ߯ ߦߴߊ߬ ߖߞߊ߫ ߊ߬ߟߋ ߟߊ߫ ߓߊ߯ߙߊ߫ ߛߎ߮ ߣߌ߲߬ ߡߊ߬߸ ߞߵߊ߬ߟߎ߬ ߛߋߞߏ ߞߍ߫ ߒߞߏ ߟߊߥߊ߲߬ߞߊ߲ ߘߐ߫ ߝߊ߲߭ ߓߍ߯ ߘߐ߫߸ ߊ߬ ߕߌ߯ߕߌ߯ ߊ߬ߟߎ߬ ߦߋ߫ ߦߙߐ߫ ߞߋߟߋ߲ ߡߍ߲ ߘߐ߫.

<<ߣߌ߫ ߓߍ߯ ߞߵߊ߬ ߕߊ߫ ߞߍߕߊ߫ ߞߍ߫ ߒߞߏ ߟߊߥߙߎߞߌ ߘߐ߫߸ ߊ߲ ߘߌ߫ ߢߝߍߟߊ ߟߊߛߐ߬ߘߐ߲߬.>> ߊ߬ ߞߵߏ߬ ߟߊ߬ߛߋ߬ߟߌ ߞߍ߫.