ߞߍ߲ߘߍߟߏ߲߫ ߞߋߟߋ߲߫ ߢߌ߲߬ ߠߋ߬ ߡߊ߬߸ ߕߎ߬ߡߊ ߡߍ߲ ߠߊ߫ ߓߋ߬ߒ߬ߞߊ߲߬ߠߌ߲ ߘߏ߫ ߞߍ߫ ߘߊ߫ ߡߊ߬ߟߌ ߟߊ߫߸ ߘߏ߫ ߟߋ߬ ߝߣߊ߫ ߟߐ߬ ߘߊ߫ ߓߙߎߞߌߣߊ߫ ߝߊ߬ߛߏ߫ ߡߊ߬، ߓߊ߰ߓߊ߰ߟߌ߬ߟߊ ߟߎ߫ ߞߊ߬ ߡߏ߬ߙߌ߬ߝߊ ߥߊ߬ߟߏ߲߫ ߠߋ߬ ߣߊ߲߬ߕߌ߮ ߟߎ߬ ߣߴߊ߬ߟߎ߫ ߘߍ߬ߡߍ߲߬ߓߊ߮ ߟߎ߫ <<ߝߝߞ>> ߟߊ߫ ߘߊ߯ ߟߏ߯ߟߎ߫ ߞߊ߲߬߸ ߖߡߊ߬ߣߊ ߣߌ߲߬ ߥߙߏ߬ߘߎ߮߸ ߞߐߘߐ߲߸ ߊ߬ ߣߌ߫ ߕߟߋ߬ߓߐ ߘߐ߫، ߞߎ߲߬ߠߊ߬ߛߌ߮ ߟߎ߫ ߞߏ߬ߣߌ߲ ߡߊ߫ ߜߟߋ߬ߞߋ ߓߌ߬ߟߊ߬ ߊ߬ߟߎ߬ ߢߌ߲ߥߏ ߝߍ߬ ߣߌ߲߬ ߞߏ ߘߐ߫ ߝߟߐ߫߸ ߓߊ߬ߙߌ߫߸ ߞߊ߬ ߓߍ߲߬ ߊ߲ ߠߊ߫ ߟߌ߬ߤߟߊ ߛߐ߬ߘߐ߲߬ ߠߎ߫ ߡߊ߬߸ ߡߐ߰ ߅߀ ߟߋ߬ ߓߐ߬ߣߐ߫ ߘߴߊ߬ ߣߌ ߘߐ߫.

ߕߌߢߍߟߌ߫ ߛߌߦߊߡߊ߲߫ ߠߋ߬ ߞߍ߫ ߘߊ߫߸ ߣߌ߲߬ ߞߏ ߘߊߡߌ߬ߣߊ߬ ߘߊ߫ ߞߍ߲ߘߍߟߏ߲ ߕߊ߬ߡߌ߲߬ߣߍ߲ ߛߎߓߊ߯ߘߊ ߟߋ߬ ߝߍ߬߸ ߡߙߊ߬ߒ߬ߡߊ߬ߝߋ߲߬ߕߌ߮ ߟߎ߬ ߞߊ߬ ߓߋ߬ߒ߬ߞߊ߲߬ߠߌ߲ ߘߏ߫ ߟߋ߬ ߞߍ߫ ߘߌ߯ ߘߎ߱ ߣߊ߲߬ߕߌ߰ ߘߊ߮ ߞߊ߲߬߸ ߓߙߎߞߌߣߊ߫ ߕߟߋ߬ߓߋ ߣߴߊ߬ ߕߟߋ߬ߓߐ ߕߍߟߊ ߘߐ߫، ߛߙߋ ߘߏ߫ ߦߴߊ߬ ߦߌ߬ߘߊ߬ ߟߊ߫߸ ߞߏ߫ <<ߡߊ߬ߙߌ߬ߝߊ߬ ߡߊ߲ߞߊ߲>> ߠߎ߬ ߖߎ߯ߦߊ߫ ߘߊ߫ ߟߋ߬ ߞߏߛߓߍ߫، ߏ߬ ߘߏ߲߬ ߞߍ߫ ߘߊ߫ ߕߎ߬ߡߊ߫ ߞߎ߲߬ߘߐ߬ߖߊ߲ ߠߋ߬ ߞߘߐ߫.

ߓߊ߰ߓߊ߰ߟߌ߬ߟߊ ߡߍ߲߬ ߠߎ߫ ߘߏ߲߬ ߘߊ߫ ߟߋ߬ ߣߊ߲߬ߕߌ߰ ߘߊ߮ ߣߌ߲߬ ߞߣߐ߫߸ ߞߊ߬ ߕߎ߬ߡߊ߬ ߥߊ߯ߕߌ߫ ߘߊ߲ߘߐ߫ ߞߍ߫ ߦߋ߲߬߸ ߏ߬ ߞߐ߫ ߞߣߊ߬ߕߏ߫ ߕߊ߯ ߟߊ߫߸ ߛߙߋ߫ ߜߘߍ߫ ߦߴߊ߬ ߦߌ߬ߘߊ߬ ߟߊ߫ ߞߏ߫ ߝߊ߬ߛߏ ߡߞߊߘߊ߲߫ ߞߊ߬ߣߌ߲߬ߦߋ ߟߎ߬ <<ߝߝߞ>> ߡߐ߰ ߃߀ ߢߐ߲߰ ߠߋ߬ ߝߊ߰ ߘߊ߫، ߓߋ߬ߒ߬ߞߊ߲߬ߠߌ߲ ߣߌ߲߬ ߛߋ߲߭ߝߍ߬.

ߝߣߊ߫ ߛߌ߬ߟߊ߬ߡߊ ߟߎ߬ ߣߌ߫ ߛߌ߬ߟߡߊ߬ߦߊ ߞߐߡߊߓߌ߲ߓߌ߲߫ <<ߛߛߞߞ>> ߞߊ߬ ߖߌ߬ߦߊ ߘߏ߫ ߟߊߖߍ߲ߛߍ߲߫ ߓߟߐߟߐ߫ ߞߊ߲߬߸ ߊ߬ߟߎ߬ ߟߊ߫ ߟߊ߬ߖߍ߲߬ߠߌ߲ ߏ߬ ߘߐ߫߸ ߊ߬ߟߎ ߞߊ߬ ߛߎ߭ ߂߂ ߟߋ߬ ߖߊ߬ߕߋ߫، ߊ߬ߟ߫ߎ ߞߊ߬ ߞߟߍ߬ߝߋ߲߬ ߛߌߦߊߡߊ߲߫ ߦߌߘߊߞߊ߬߸ ߞߴߏ߬ ߟߎ߬ ߓߐߣߍ߲߫ <<ߘߌ߯>> ߣߊ߲߬ߕߌ߰ ߘߊ߮ ߟߋ߬ ߞߣߐ߫.

ߞߍ߲ߘߍߟߏ߲߫ ߞߋߟߋ߲߫ ߣߌ߲߬ ߠߋ߬ ߘߐ߰ߡߘߊ߬ ߖߏߣߊ ߟߊ߫߸ ߓߋ߬ߒ߬ߞߊ߲߬ߠߌ߲ ߠߋ߬ ߞߍ߫ ߘߊ߫ ߘߊߟߊ߲߫ ߊ߬ ߣߌ߫ ߕߌߦߑߙߋ߫ ߣߊ߲߬ߕߌ߰ ߘߊ߮ ߞߊ߲߬߸ ߓߙߎߞߌߣߊ߫ ߥߙߏ߬ߘߎ߮ ߣߴߊ߬ ߞߐߘߐ߲ ߕߍߟߊ ߘߐ߫، ߛߌ߬ߟߊ߬ߡߊ ߟߎ߬ ߣߌ߫ ߛߌ߬ߟߡߊ߬ߦߊ ߞߐߡߊߓߌߓߌ߲߫ ߞߙߎ <<ߛߛߞߞ>> ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߫ ߞߊ߬ ߡߐ߰ ߁߈ ߠߋ߬ ߝߊ߰ ߦߋ߲߬.

ߥߊ߯ߕߌ߫ ߞߋߟߋ߲߫ ߣߌ߲߬ ߠߋ߬ ߟߊ߫ ߌߞߐ߫߸ ߓߋ߬ߒ߬ߞߊ߲߬ߠߌ߲߬ ߜߘߍ߫ ߟߋ߬ ߞߍ߫ ߕߌߥߎ߫ ߊ߬ ߣߌ߫ ߛߋߖ߭ߎߣߋߜ߭ߊ߫، ߓߙߎߞߌߣߊ߫ ߕߟߋ߬ߓߐ ߘߐ߫߸ ߓߊ߬ߙߌ߫߸ ߟߌ߬ߤߟߊ߬ ߖߐ߲ߖߐ߲߫ ߡߊ߫ ߛߐ߬ߘߐ߲߫ ߦߋ߲߬ ߝߊ߰ߓߊ߰ߕߐ ߟߎ߬ ߓߙߍ߬ߦߊ߫ ߞߊ߲߬߸ ߖߌ߬ߦߊ߫ ߛߌߦߊߡߊ߲߫ ߘߐ߫߸ ߕߌߢߍߟߌ ߛߋ߫ ߘߊ߫ ߣߊ߲߬ߝߟߏ߬ߡߊ߬ ߝߋ߲ ߠߎ߬ ߟߋ߬ ߡߊ߬߸ ߞߐ߲ߛߏ߸ ߔߏߔߏ߸ ߊ߬ ߣߌ߫ ߝߙߋ߬ߟߌ߬ ߦߙߐ ߟߎ߬.

ߓߊ߬ߙߌ߫߸ ߣߌ߲߬ ߓߍ߯ ߘߐ߫߸ ߓߙߎߞߌߣߊ߫ ߞߎ߲߬ߠߊ߬ߛߌ߮ ߟߎ߬ ߡߊ߫ ߝߋ߲߫ ߝߐ߫ ߓߋ߬ߒ߬ߞߊ߲߬ߠߌ߲ ߡߍ߲߬ ߠߎ߫ ߞߊ߲߬ ߝߟߐ߫.