ߓߌ߬ ߕߟߋ߬ ߞߎ߬ߣߊ߬ ߖߋ߲ߖߋ߲ ߠߋ߬ ߡߊ߬߸ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߵߊ߬ ߗߎ߲߫ ߛߊ߲ߡߊߘߊ߲߫ ߊߤߑߡߍߘ ߛߋߞߎ߫ ߕߎ߬ߙߋ߬ ߟߊ߫߸ ߕߟߋ߬ ߁߀ ߓߐߒߡߊߟߌ ߞߐߝߍ߬ ߝߏ߲߬ߖߏ߲ ߠߊ߫ ߞߐߞߊ߲߬، ߊ߬ ߣߊ߬ ߘߊ߫߸ ߞߵߊ߬ ߛߐ߬ߘߐ߲߬ ߣߎߞߊ߬ߘߊ߬ߘߋ߲ ߠߎ߬ ߣߴߊ߬ߟߎ߬ ߟߊ߫ ߣߊ߲߱ ߠߎ߬ ߞߍߣߍ߲߫ ߞߊ߬ ߦߙߐ ߓߍ߯ ߡߌ߬ߣߊ߬߸ ߛߊ߲ߖߌ ߕߍ߰ ߘߊ߫ ߟߊ߬ߓߍ߲߬ߠߌ߲߬ߠߊ߫ ߞߎ߲߬ߝߟߐ ߟߎ߬ ߟߊ߫ ߟߋ߬ ߝߊߦߌߘߊ߫. 

ߊߟߎ߫ ߦߴߊ߬ ߟߐ߲߫߸ ߞߊ߬ߦߌ߯ ߘߓߊ߬ߓߌߟߊ ߕߋ߬ߟߋ߫ ߃ ߟߋ߬ ߡߊ߬߸ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߊ߬ ߞߐ߬ߣߐ߫ ߢߊ߬ߡߊ߲߬ߡߊ ߕߊ߬߸ ߞߵߊ߬ ߓߟߏ ߝߌߙߌ߲ߝߌߙߌ߲߫ ߖߌ߬ߣߍ߬ߞߊ ߟߎ߬ ߡߊ߬، ߏ߬ ߟߏ߲ ߠߋ߬߸ ߊ߬ ߣߴߊ߬ ߟߊ߫ ߘߋ߲ߓߦߊ ߞߵߊ߬ߟߎ߬ ߜߊ߲߫ ߞߊ߬ ߥߊ߫ ߖߌ߰ ߜ߭ߑߙߍߛ ߖߡߊ߬ߣߊ ߞߊ߲߬߸ ߕߟߋ߬ ߘߊ߲ߘߐ߫ ߝߏ߲߬ߖߏ߲ ߞߊ߲ߡߊ߬߸ ߡߍ߲ ߞߎ߲߬ߕߊ߯ ߡߊ߫ ߝߐ߫ ߡߐ߰ ߦߋ߫.

ߊ߬ ߟߊ߫ ߕߊ߯ߡߊ ߏ߬ ߟߋ ߞߎߡߊ ߛߌߦߊߦߊ߫ ߘߊ߫߸ ߊ߬ ߟߊ߫ ߖߊ߲߬ߞߊ߬ߙߏ߬ ߞߏ ߕߎ߲߬ ߦߋ߫ ߛߌߦߊߡߊ߲߫ ߘߊ߫، ߝߏ߫ ߊ߬ ߖߍ߬ߘߍ ߞߊ߬ ߟߊ߬ߛߋ߬ߟߌ ߘߏ߫ ߞߍ߫ ߊ߬ ߟߊ߫ ߞߐߜߍ ߞߊ߲߬߸ ߞߵߊ߬ ߦߌ߬ߘߊ߬ ߞߏ߫ ߊ߬ ߞߍ߫ ߘߊ߫ ߝߊ߲߬ ߛߌ߫ ߘߐ߫߸ ߊ߬ ߦߋ߫ ߖߡߊ߬ߣߊ ߟߊ߫ ߓߊ߯ߙߊ ߟߋ߬ ߟߊ߫.

ߒ߬ߓߊ߬߸ ߞߊ߲ߕߌ߮ ߞߵߊ߬ ߟߊ߫ ߝߏ߲߬ߖߏ߲ ߏ߬ ߟߋ ߞߍ߫߸ ߖߡߊ߬ߣߊ ߣߊ߲߬ߕߌ߮ ߟߎ߫ ߞߊ߬ ߕߡߊ߬ߖߌ ߓߐ߫ ߊ߬ ߘߐ߫߸ ߞߏ߫ ߊ߬ߟߎ߬ ߦߴߊ߬ߟߎ߬ ߞߊ߲ ߞߊ߲߬ ߝߊ߬ߛߏ ߞߏߛߐ߲߬.

ߊ߬ ߟߊ߫ ߣߊ߬ߟߌ ߘߐ߫߸ ߞߊ߲ߕߌ߮ ߟߊߓߍ߲߬ ߘߊ߫ ߖߡߊ߬ߣߊ ߡߐ߰ߘߐ߬ߜߍ ߣߴߊ߬ ߡߊ߬ߞߟߐ߬ ߛߊ߲ߘߐ ߛߌߦߊߡߊ߲߫ ߠߋ߬ ߓߟߏ߫߸ ߕߍߓߊ߯ߦߟߊ ߟߎ߬ ߣߌ߫ ߣߊ߲߬ߕߌ߰ ߞߏߟߊߕߍ߮ ߟߎ߬ ߛߌߦߊߡߊ߲߫ ߕߘߍ߬ ߞߣߍ ߞߊ߲߬.

ߖߡߊ߬ߣߊ߬ߘߋ߲ ߠߎ߬ ߓߐ߫ ߘߊ߫ ߞߊ߲ߕߌ߮ ߟߊߓߍ߲߬ ߞߊ߲ߡߊ߬߸ ߘߐ߲߭ ߣߌ߫ ߘߐ߲߬ߞߟߌ ߟߎ߬ ߘߌ߫߸ ߞߵߊ߬ ߦߌ߬ߘߊ߬ ߞߏ߫ ߊ߬ ߟߐ߮ ߕߎ߲߬ ߓߘߊ߫ ߜߊ߬ ߊ߬ߟߎ߬ ߟߊ߫.

ߞߊ߲ߕߌ߮ ߟߊ߫ ߣߊ߬ߟߌ ߢߌ߲߬ ߘߐ߫߸ ߞߏ߫ ߝߌ߬ߟߊ߬ ߞߍ߫ ߘߊ߫߸ ߡߍ߲ ߠߎ߬ ߦߋ߫ ߞߙߐ߬ߛߌ߬ߕߊ߫ ߘߌ߫߸ ߏ߬ ߝߟߐ ߟߋ߬ ߞߍ߫ ߘߊ߫ ߞߊ߲ߕߌ߮ ߟߊ߫ ߘߎ߰ߞߎ߬ߟߎ߲߬ ߡߊ߬ߝߊߟߋ߲ ߘߌ߫، ߊ߬ ߘߋ߬ߙߌ߬ߣߍ߲߬ ߟߊߓߍ߲߬ ߠߴߊ߬ ߟߊ߫ ߡߊ߬ߡߙߊ߬ߟߌ߬ ߘߎ߰ߞߎ߬ߟߎ߲߬ ߝߌ߲ ߡߍ߲ ߞߣߐ߫ ߛߐ߲߬߸ ߊ߬ ߓߐ߫ ߘߊ߫ ߏ߬ ߞߣߐ߫ ߞߊ߬ ߦߟߍ߬ ߥߊߜߏߡߊ ߘߏ߫ ߞߐߞߊ߲߬߸ ߊ߬ ߟߊߡߌߣߌ߲ߣߍ߲߫ ߞߣߐ߬ߜߍ߲߬ߘߋ߲ ߠߎ߬ ߟߊ߫.

ߞߙߐ߬ߛߌ߬ߕߊ ߝߌߟߊߣߊ߲ ߘߐ߫߸ ߞߊ߲ߕߌ߮ ߝߊ߬ߘߌ߬ߞߣߐ߬ߜߍ߲߬ߘߋ߲߫ ߡߏ߬ߙߌ߬ߓߊ߬ ߞߋߕߊ߬ ߡߍ߲ ߞߊ߲߬ߕߐ߮ ߦߋ߫ ߞߌߟߏ߬ ߘߌ߫߸ ߏ߬ ߡߌ߬ߣߊ߬ ߞߏ ߝߌߙߌ߲ߝߌߙߌ߲߫ ߘߊ߫ ߞߊ߬ߦߌ߯ ߞߊ߲ߕߌ߮ ߥߊ߫ ߟߏ߲ ߝߏ߲߬ߖߏ߲ ߠߊ߫، ߒ߬ߓߊ߬߸ ߘߊ߲߬ߕߟߌ߬ ߞߋߕߊ߬ ߏ߬ ߟߋ ߦߋ߫ ߘߊ߫ ߓߌ߬߸ ߝߏ߫ ߊ߬ ߦߟߍ߬ ߘߊ߫ ߥߊߜߏߡߊ ߞߊ߲߬ ߞߊ߬ ߞߌ߬ߛߍ߬ߝߙߎ߬ߟߊ߲ ߘߏ߫ ߓߘߎ ߟߊߕߙߎߕߙߎ߫، ߘߎ߰ߞߎߟߎ߲ ߡߍ߲ ߕߎ߲߰ߣߍ߲߫ ߕߘߍ߬ ߞߊ߲ߕߌ߮ ߟߊ߫ ߘߎ߰ߞߎߟߎ߲ ߠߊ߫ ߜߐߞߎ߫߸ ߞߌߟߏ߬ ߟߋ߬ ߕߍ߬ߘߍ߫ ߏ߬ ߞߣߐ߫߸ ߊ߬ߟߋ ߟߋ߬ ߞߊ߬ ߘߊ ߡߌ߬ߣߊ߬ ߞߊ߲ߕߌ߮ ߦߋ߫ ߊ߬ ߖߌ߰ ߕߎߡߊ ߟߊ߫ ߞߊ߬ ߥߊ߫ ߦߟߍ߬ ߥߊߜߏߡߊ ߞߣߐ߫، ߏ߬ ߓߍ߯ ߞߊ߬ ߛߌߞߊ ߓߐ߫ ߡߐ߱ ߟߎ߬ ߘߐ߫߸ ߞߊ߬ ߝߐ߫ ߞߏ߫ ߊ߬ ߡߌ߬ߣߊ߬ ߞߏ ߣߌ߫ ߡߊ߲߬ߞߊ߲߬ ߞߏ ߕߍ߫ ߞߌ߬ߛߍ߫ ߞߊ߲߬. 

ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߕߊ߯ߡߊ ߞߐ ߢߌ߲߬ ߘߐ߫߸ ߊ߬ ߝߊ߬ߘߌ ߓߘߊ߫ ߣߊ߬߸ ߊ߬ ߦߋߝߊߘߌ ߞߊ߬ ߖߡߊ߬ߣߊ߬ߘߋ߲ ߛߌߦߊߡߊ߲߫ ߤߣߍ߫ ߛߋ߲߬ߢߊ ߣߌ߲߬ ߝߍ߬، ߏ߬ ߡߍ߲ ߞߎߡߊ ߕߎ߲߬ ߓߘߊ߫ ߘߙߎ߬ ߦߙߐ߫ ߛߌߦߊߡߊ߲߫ ߘߐ߫ ߊ߬ ߟߊ߫ ߕߊ߯ߟߌ ߛߋ߲߭ߝߍ߬.

ߒ߬ߓߊ߬߸ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߓߘߊ߫ ߛߣߍ߫ ߞߎ߲߬ߢߐ߲߰ ߟߊ߬ߖߌ߮ ߣߌ߲߬ ߡߊ߬߸ ߖߡߊ߬ߣߊ ߞߎ߲߬ߘߏߣߌ߲ ߘߏ߲߬ ߞߊ߫ ߛߌߦߊ߫ ߕߋ߲߬ ߘߊߞߎ߲߫ ߛߌߦߊߡߊ߲߫ ߘߐ߫.