ߥߛߊ߬ߘߋ߲߬ߧߊ߬ ߢߣߊߕߊߟߌ ߡߊ߬ߛߎߘߎ߲ߧߊ ߣߌ߲߬ ߘߐ߫ ߖߌ߬ߣߍ߬ ߞߣߐ߫߸ ߢߊߞߎߘߦߊߟߌ ߣߌ߫ ߢߍߕߊ߮ ߢߌ߲߬ߧߊ (ߢ߃) ߕߌ߲߬ߞߎߘߎ߲ ߘߏ߲߬ߖߟߎ߬ߡߊ߬ߟߌ߬ߟߊ ߡߊ߬ߡߊ߬ߘߌ߬ ߞߋߕߊ߬ ߣߐ߬ ߛߙߊ߬ߣߎ߲ ߠߋ߬ ߕߊ߬ ߟߊ߫ ߓߌߟߏ߲ ߣߌ߲߬ ߡߊ߬߸ ߞߵߊ߬ߟߎ߬ ߟߊ߫ ߞߙߎߞߊ ߟߊ߫ ߓߘߍ߬ߓߘߍ߬ߟߌ ߢߌߣߌ߲ߞߏ ߟߎ߬ ߢߊߝߐ߫߸ ߊ߬ ߣߌ߫ ߢߊߞߎߘߦߊߟߌ ߡߍ߲ ߠߎ߬ ߦߴߊ߬ߟߎ߬ ߟߊ߫ ߢߍߥߟߊ ߘߐ߫߸ ߣߴߊ߬ ߓߍ߲߬ ߘߴߊ߬ߟߎ߬ ߟߊ߫ ߛߌߟߊ߫ ߛߐߘߐ߲ ߡߊ߬ ߝߊ߬ߛߏ߬ ߜߙߊ ߟߊ߫.

ߊ߬ ߦߋ߫ ߢ߃ ߟߊ߫ ߡߊ߬ߡߌ߬ߘߊ߬ߟߌ߬ߟߊ ߟߋ߬ ߝߣߊ߫ ߘߌ߫ ߛߙߍߘߍ߫ ߝߊ߬ߛߏ߬ߟߊ߬ߞߊ ߞߊ߲߬߸ ߡߊ߬ߡߊ߬ߘߌ߬ ߞߋߕߊ߬ ߞߵߊ߬ ߦߌ߬ߘߊ߬ ߞߏ߫ ߓߘߍ߬ߓߘߍ߬ߟߌ ߛߌߟߊ߫ ߞߍ߲ߘߍ ߡߍ߲ ߠߎ߬ ߦߴߊ߬ߟߎ߬ ߓߟߏ߫߸ ߤߊ߲ߞߟߌ ߡߍ߲ ߦߴߊ߬ߟߎ߬ ߢߍߡߌ߬ߣߊ߬ߓߊ߯ ߡߏ߬ߤߊ߬ߡߍߘ ߣߊ߬ߓߋ ߟߊ߫߸ ߏ߬ ߦߋ߫ ߓߟߋ߬ߓߟߋ ߟߋ߬ ߘߌ߫، ߣߴߏ߬ ߕߍ߫߸ ߞߏ߫ ߊ߬ߟߎ߬ ߟߊ߫ ߞߙߎߞߊ ߛߌ߲ߘߌ߫ ߛߊ߲ ߠߋ߬ ߖߌ߬ߣߍ߬ ߞߣߐ߫ ߣߌ߲߬، ߊ߬ߟߋ ߟߊ߫ ߝߐߟߌ߫ ߘߐ߫߸ ߊ߬ߟߎ߬ ߟߊ߫ ߟߊ߬ߢߌߣߌ߲ ߦߋ߫ ߡߍ߲ ߘߌ߫߸ ߏ߬ ߘߐ߫ ߓߏ߲߬ߓߊ ߟߋ߬ ߖߘߍ߬ߦߋ߬ߓߊ߯ߙߊ ߝߊ߲߬ߞߊߘߏ߲߭ ߘߌ߫߸ ߊ߬ ߣߌ߫ ߥߊߟߌߝߦߊ.

<<ߟߊ߬ߢߌߣߌ߲߫ ߡߍ߲ ߦߴߊ߲ ߠߊ߫߸ ߏ߬ ߟߋ߫ ߦߋ߫߸ ߞߊ߬ ߖߘߍ߬ߞߊ߬ߣߌ߲߬ ߓߊ߯ߙߊ ߟߊߛߓߊ߬ߕߌ߫ ߖߡߊ߬ߣߊ ߞߣߐ߫߸ ߞߵߊ߬ ߓߐ߫ ߝߐ ߘߐ߫߸ ߞߵߊ߬ ߓߌ߬ߟߊ߬ ߞߍ ߘߐ߫.>> ߊ߬ ߞߵߏ߬ ߦߌ߬ߘߊ߬، ߞߵߊ߬ ߟߴߊ߬ ߞߊ߲߬߸ ߞߏ߫ ߞߙߎߞߊ ߓߘߊ߫ ߛߋ߫ ߥߊߟߌߘߊ ߘߏ߫ ߟߎ߫ ߛߌ߰ ߟߊ߫ ߛߋ߲߬ߠߊ߫ ߖߡߊ߬ߣߊ ߡߙߊ߬ߘߓߊ߬ ߃߃ ߞߣߐ߫߸ ߞߵߏ߬ ߟߊ߫ ߡߙߊ߬ߘߋ߲߬ ߛߌߦߊߡߊ߲߫ ߞߊ߲߬.

ߢ߃ ߞߏߟߊߕߍ߮ ߣߌ߲߬ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߣߴߊ߬ߟߎ߫ ߞߊ߬ ߥߊ߰ߣߍ߲ ߛߐ߬ߘߐ߲߬ ߞߎߡߊߞߍߓߏ߲ ߠߊ߫߸ ߊ߬ ߟߊ߫ ߞߙߎߞߊ ߘߌ߫ ߓߏ߲߬ߓߊ߬ ߞߍ߫ ߖߡߊ߬ߣߊ ߟߊ߫ ߞߊ߬ߙߊ߲߬ ߞߏ ߟߊߢߊ߭ ߘߐ߫߸ ߏ߬ ߡߍ߲ ߦߴߊ߬ߟߎ߬ ߝߟߐߦߊ ߟߊ߫، ߞߊ߬ߕߎ߲߯߸ ߊ߬ߟߋ ߦߴߊ߬ ߖߊ߬ߕߋ߬ ߟߊ߫ ߟߋ߬߸ ߖߌ߬ߣߍ߫ ߞߊ߬ߙߊ߲ ߞߊ߫ ߞߊ߲߫ ߞߊ߬ ߞߍ߫ ߢߊ߫ ߟߋ߬ ߡߊ߬߸ ߡߍ߲ ߓߍ߲߬ߣߍ߲߫ ߖߡߊ߬ߣߊ ߛߌ߰ߝߊߘߌ ߡߊ߬߸ ߊ߬ ߣߌ߫ ߖߡߊ߬ߣߊ߬ߘߋ߲ ߠߎ߬ ߖߍ߬ߘߍ ߝߣߊ߫ ߡߊ߬.

ߊ߬ ߟߊ߫ ߝߐߟߌ߫ ߘߐ߫߸ ߟߞߊ߬ߙߊ߲߬ߠߌ߲ ߞߊ߲ߞߋߦߊ ߡߊ߲߫ ߞߊ߲߫ ߞߊ߬ ߓߎ߲ߓߎ߲߫ ߝߊ߬ߙߊ߲߬ߛߌ߬ ߞߊ߲ ߘߐߙߐ߲߫ ߡߊ߬، ߊ߬ ߞߵߊ߬ ߦߌ߬ߘߊ߬ ߞߏ߫ ߝߏ߫ ߞߊ߬ ߝߊ߬ߛߏ߬ ߞߊ߲ ߠߎ߬ ߘߏ߲߬ ߠߋ߬ ߓߊ߫ ߘߐ߫߸ ߊ߬ ߣߌ߫ ߝߘߊ߬ߝߌ߲߬ߠߊ߬ ߛߓߍߛߎ߲ ߠߎ߬߸ ߦߏ߫ ߒߞߏ ߣߌ߫ ߊߘߑߟߊߡ.

<<ߣߌ߫ ߖߡߊ߬ߣߊ ߛߌ߰ߞߊ߲ ߣߴߊ߬ ߛߊ߬ߙߌ߬ߦߊ ߟߎ߬ ߡߊ߫ ߘߟߊߡߌ߬ߣߊ߬߸ ߖߡߊ߬ߣߊ߬ߘߋ߲ ߠߎ߬ ߕߍߣߵߊ߬ ߢߊߦߋ߫ ߟߊ߫ ߡߎ߰ߡߍ߫.>> ߡߊ߬ߡߊ߬ߘߌ߬ ߞߋߕߊ߬ ߞߊ߬ ߦߙߐ ߣߌ߲߬ ߡߊߜߟߍ߬ߦߊ߬߸ ߞߵߊ߬ ߞߊ߲߫ ߘߌ߫ ߞߏ߫ ߊ߬ ߟߊ߫ ߞߙߎߞߊ ߘߴߊ߬ ߛߋߞߏ ߞߍ߫ ߖߡߊ߬ߣߊ ߛߊ߬ߙߌ߬ߦߊ߬ ߛߓߍ ߟߎ߬ ߘߟߊߡߌ߬ߣߊ ߟߊ߫ ߖߡߊ߬ߣߊ ߞߊ߲߫ ߛߌߦߊߡߊ߲߫ ߘߐ߫߸ ߖߐ߲߰ߛߊ߫ ߖߡߊ߬ߣߊ߬ߘߋ߲ ߓߍ߯ ߘߌ߫ ߞߍ߫ ߊ߬ߟߎ߬ ߞߣߐߞߏ ߞߊ߬ߟߊߡߊ߬߸ ߞߊ߬ ߛߋ߫ ߛߊ߬ߙߌ߬ߦߊ ߟߊߕߊ߯ߡߊ߫ ߟߊ߫ ߞߵߊ߬ ߓߐ߫ ߊ߬ ߛߌߟߊ ߝߍ߬ ߣߌ߫ ߞߣߐ߬ߘߐ߬ߝߟߌ߬ ߕߍ߫.

ߊ߬ ߟߊ߫ ߛߙߊ߬ߣߎ߲ ߘߐ߫߸ ߡߊ߬ߡߌ߬ߣߊ߬ߟߌ߬ߟߊ ߣߌ߲߬ ߞߵߊ߬ ߦߌ߬ߘߊ߬ ߞߏ߫ ߕߣߐ߬ߓߊ߫ ߟߋ߬ ߛߍ߬ߣߍ ߟߊߥߙߎߞߌ ߟߊ߫߸ ߊ߬ ߦߴߏ߬ ߡߍ߲ ߖߊ߬ߕߋ߬ ߟߊ߫ ߢߊ߬ߒ߬ߞߐ߬ߓߊߟߌ ߘߌ߫ ߓߊߟߞߏ ߟߊߣߐ߰ߦߊ ߘߊߞߎ߲ ߘߐ߫߸ ߊ߬ ߣߌ߫ ߖߡߊ߬ߣߊ ߟߊ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߓߊߛߌ߱ ߛߌߟߊ ߝߍ߬.

ߡߍ߲ ߓߍ߲߬ ߘߊ߫ ߞߎ߲߬ߠߊ߬ߛߌ߰ߟߌ ߕߊ߫ ߝߊ߲߭ ߡߊ߬߸ ߡߊ߬ߡߊ߬ߘߌ߬ ߞߋߕߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߘߌ߫ ߛߊ߬ߙߌ߬ߦߊ߬ ߖߐ߲ߖߐ߲ ߠߎ߬ ߕߊ߬ ߜߘߋߜߘߋ߫߸ ߞߊ߬ ߦߙߎ߬ߞߎ߬ߦߙߎߞߎ ߣߴߊ߬ ߟߊߣߐ߰ߦߊ߬ ߛߌߟߊ ߓߍ߯ ߜߋߘߋ߲߫߸ ߞߊ߬ ߥߊߟߌߝߦߊ ߝߊ߲߬ߞߊߘߏ߲߬ ߝߊ߲߭ ߓߍ߯ ߘߐ߫، ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߟߊ߫ ߡߙߌߦߊ ߏ߬ ߘߌ߫ ߞߍ߫ ߕߙߎ߬ ߘߌ߫ ߞߊ߬ ߘߏ߫ ߓߐ߫ ߘߋ߲ߡߌߛߍ߲ ߠߎ߬ ߟߊ߫ ߖߘߍ߬ߝߊ߰ ߕߎ߲ߞߊ߲߫ ߠߊ߫ ߕߊ߮ ߟߊ߫ ߞߐ߬ߖߌ ߞߊ߲߬߸ ߞߊ߬ ߓߍ߬ߒ߬ߛߋ߲߬ߡߊ߬ ߘߴߊ߬ߟߎ߫ ߡߊ߬ ߖߡߊ߬ߣߊ ߞߣߐ߫߸ ߡߍ߲ ߘߌ߫ ߛߌߦߊߡߊ߲߫ ߢߊ߬ ߛߐ߬ߘߐ߲ ߘߊߞߎ߲ ߘߐ߫.

ߞߎ߲߬ߝߊ߮ ߘߐ߫߸ ߢ߃ ߞߊ߲ߞߊ߲߫ ߕߌ߲߬ߞߎߘߎ߲ ߘߏ߲߬ߖߟߎ߬ߡߊ߬ߟߌ߬ߟߊ ߞߵߊ߬ ߞߊ߲ߠߊߘߌ߫ ߛߎߥߊ߲ߘߟߌߟߊ ߟߎ߫ ߡߊ߬߸ ߞߏ߫ ߓߍ߯ ߦߋ߫ ߡߏ߬ߤߊ߬ߡߍߘ ߣߊ߬ߓߋ ߞߐߡߊߓߌ߲ߓߌ߲߫߸ ߖߌ߬ߣߍ߬ ߟߊ߫ ߥߙߎߞߌ ߣߎ߲ߖߟߎ ߦߴߊ߬ ߓߟߏߞߘߐ߫ ߝߋߎ߫.