ߞߊ߬ ߓߍ߲߬ ߖߌ߬ߣߍ߫ ߥߟߊ߬ߟߊ߬ߓߐ ߘߐ߬ߝߐ ߡߊ߬߸ ߛߊ߲߬-ߊ߲߬-ߛߊ߲߬ ߛߎߘߊ߲ߠߌ߲߫ ߠߊߞߊ߬ߟߌ߬ߕߊ ߘߏ߫ ߟߋ߬ ߞߍ߫ ߟߊ߫، ߡߍ߲ ߘߌ߫ ߞߍ߫ ߊ߬ ߕߊ߫ ߥߟߊ߬ߘߊ߬ ߘߌ߫ ߢߣߊߡߦߊ ߘߐ߫.
ߡߎߛߊ߫ ߞߐ߲ߘߍ߫ ߞߊ߬ ߓߊߘߎ߲ ߞߍߞߏ߫ ߝߟߐ ߞߍ߫ ߂߀߁߂ ߟߋ߬ ߟߊ߫߸ ߊ߬ ߦߋ߫ ߊ߬ ߡߊ߫ ߛߎߘߊ߲߫߸ ߊ߬ ߓߐ߫ ߘߊ߫ ߖߡߊ߬ߣߊ ߞߣߐ߫ ߞߊ߬ ߕߊ߯ ߞߐߞߊ߲ ߞߊ߬ ߛߊ߲߬ ߛߓߊ߬ ߞߴߦߋ߲߬߸ ߊ߬ ߞߐߛߊ߬ߦߌ߲߫ ߡߎ߬ߕߎ߲߬߸ ߊ߬ ߕߊ߯ ߘߊ߫ ߓߟߏߟߊߓߊ߯ߙߊ ߘߏ߫ ߡߊߞߊ߬ߙߊ߲߬ ߣߴߊ߬ ߦߋ߫ ߟߋ߬ߞߎ߬ߦߊ߬ߟߌ(ߔߑߟߐ߲ߓߋߙߌ) ߘߌ߫߸ ߛߊ߲߬ ߂ ߞߎ߲߬ߕߊ߰ ߞߘߐ߫. ߓߊ߬ߙߌ߬߸ ߊ߬ ߕߎ߲߬ ߦߴߏ߬ ߓߍ߯ ߞߊ߲߬߸ ߖߐ߲ߓߐ߲߫ ߛߐߘߐ߲߫ ߞߏ ߕߎ߲߬ ߦߴߊ߬ ߟߊ߫ ߟߊ߬ߢߌ߬ߣߌ߲߬ߓߊ߫ ߟߋ߬ ߘߌ߫߸ ߏ߬ ߡߍ߲ ߞߍ߫ ߘߴߊ߬ ߓߟߏ߫ ߛߋ߲߬ߧߊ߬ ߛߌߦߊߡߊ߲߫ :
<<ߒ ߕߎ߲߬ ߦߋ߫ ߞߊ߬ߙߊ߲߬ ߠߊ߫ ߡߏ߬ߙߌ߬ߝߌ߲߬ߖߊ߲߫ ߖߓߊ߬ߕߍ߫ ߟߋ߬߸ ߒ ߞߊ߬ ߛߊ߲߬ ߝߌ߬ߟߊ߫ ߞߴߦߋ߲߬ ߒ ߡߊ߫ ߛߎߘߊ߲߫ ߓߊߘߎ߲ ߞߘߐߓߐߟߌ ߘߐ߫߸ ߒ ߞߵߊ߬ ߞߍ߫ ߛߋ߲߬ߢߊ߬ ߞߋߟߋ߲߫ ߞߐߛߑߣߊߞ ߒ ߡߴߊ߬ ߛߐ߬ߘߐ߲߬߸ ߞߊ߬ ߞߋߟߋ߲߫ ߞߍ߫ ߡߊߙߌߦߊߡߎ߲߬ ߜ߭ߎ߬ߥߊ߬ߓߌ߫ ߒ ߡߴߊ߬ ߛߐ߬ߘߐ߲߬߸ ߞߊ߬ ߞߋߟߋ߲߫ ߞߍ߫ ߓߊ߲߬ߖߎ߬ ߞߋߕߊ߬߸ ߒ ߡߴߊ߬ ߛߐ߬ߘߐ߲߬ ߝߣߊ߫ ، ߝߐ߫ ߊ߬ ߛߋ߲߬ߢߊ߬ ߥߐ߯ߙߐߣߊ߲߸ ߒ ߕߊ߯ ߘߴߏ߬ ߞߍ߫ ߘߙߊ߬ߡߍ ߎߡߊߙ ߟߋ߬߸ ߞߊ߲ߕߌ߯ ߡߊ߬ߡߊ߬ߘߌ߫ ߘߎ߲߬ߓߎߦߊ߬ ߞߊ߬ߙߊ߲߬ ߘߊ߫ ߦߙߐ ߡߍ߲߸ ߒ ߞߵߊ߬ ߛߐ߬ߘߐ߲߫ ߦߋ߲߬ ߠߋ߬ >>، ߊ߬ ߞߵߏ߬ ߢߊߝߐ߫.
ߊ߬ ߟߊ߫ ߗߌߙߏ߲ߠߌ߲ ߏ߬ ߓߍ߯ ߣߴߊ߬ ߕߊ߫߸ ߊ߬ ߡߊ߫ ߕߐ߰ߘߐߝߊ߰ ߟߏ߲߫ ߞߋߟߋ߲߫ ߟߏ߲߫ ߕߟߊ߫ :<< ߞߐߝߟߌ ߕߎ߲߬ ߓߊ߯ ߓߐ߫ ߞߏߕߊ߲߫߸ ߣߌ߫ ߒ ߡߊ߫ ߕߐ߮ ߦߋ߫߸ ߒ ߘߌ߫ ߕߊ߬ߡߌ߲߬ ߞߟߊߓߎ߫ ߞߎߘߊ ߟߴߊ߬ ߡߊߛߊ߬ߦߌ߬ ߞߊ߲ߡߊ߬>>، ߊ߬ ߛߍߥߊߣߍ߲ ߞߵߏ߬ ߦߌ߬ߘߊ߫.
ߡߎߛߊ߫ ߞߐ߲ߘߍ߫ ߦߋ߫ ߘߋ߲ߓߦߊ߫ ߕߌ߮ ߟߋ߬ ߘߌ߫߸ ߡߛߏ߬ ߞߋߟߋ߲߫ ߦߋ߫ ߡߍ߲ ߞߎ߲߬ ߊ߬ ߣߌ߫ ߘߋ߲߫ ߝߌ߬ߟߊ߬ ߦߴߊ߬ ߓߟߏ߫߸ ߊ߬ ߓߘߊ߫ ߦߌ߬ߘߊ߫ ߞߏ߫ ߛߌ߭ ߟߊߖߊ߲߬ߝߊ߰ߦߊ ߣߌ߫ ߕߎ߬ߡߊ߬ ߟߊߕߍ߰ߣߍ߲߫ ߕߍ߫ ߞߊ߬ߙߊ߲ ߡߊ߬:
<<ߌߞߏߡߌ߲߬ ߞߎ߲߬ߕߋߟߋ߲ ߠߎ߬ ߡߊ߫ ߓߐ߫ ߡߎߣߎ߲߬߸ ߊ߬ ߘߎߡߊ߲߫ ߒ ߧߋ߫ ߞߏ߬ߣߌ߲ ߞߊ߬ ߞߍ߫ ߞߊ߬ ߕߊ߯ ߓߘߍ߬ߓߘߍ߬ߟߌ ߟߐ߲ߞߏ ߟߋ߬ ߟߊ߫، ߞߊ߬ ߞߍ߫ ߓߘߍ߬ߓߘߍ߬ߟߌ߬ߟߊ ߘߌ߫ >>، ߊ߬ ߞߵߏ߬ ߟߊߢߌߣߌ߲߫.
ߟߊ߬ߢߌߣߌ߲ ߡߍ߲ ߦߋ߫ ߡߎߛߊ߫ ߟߊ߫ ߓߌ߬߸ ߏ߬ ߟߋ ߞߊ߬ ߞߍ߫ ߓߘߍ߬ߓߘߍ߬ߟߌ߬ߟߊ ߘߌ߫ ߖߌ߬ߣߍ߬ ߞߣߐ߫ ߞߵߊ߬ ߝߊ߬ߛߏ ߡߞߊߘߊ߲߫ ߓߘߍ߬ߓߘߍ߬ߟߌ߬ ߞߎ߲ߘߊ߫، ߊ߬ ߞߊ߬ ߢߌ߬ߣߊ߲߬ ߗߌߙߏ߲ߓߊ߯ߕߐ ߟߎ߬ ߞߟߊߓߎߘߏ߲߬ ߛߍ߬ߓߍ ߕߊ߭ ߟߊ߫:<< ߟߊ߬ߟߌ߬ߟߌ߬ ߞߊ߲ ߡߍ߲ ߦߋ߫ ߒ ߓߟߏ߫ ߓߌ߬ ߞߵߊ߬ ߘߌ߫ ߒ ߘߍ߬ߢߐ߲߰ ߗߌߙߏ߲ߓߊ߯ߕߐ ߟߎ߫ ߡߊ߬߸ ߏ߬ ߟߋ ߛߊ߬ߦߌ߲߬ ߘߌ߫ ߓߊߘߎ߲ ߞߍߟߌ ߡߊ߬ ߝߣߊ߫،ߓߊ߸ ߞߊ߬ ߝߐ߫ ߞߏ߫ ߊ߬ ߕߍ߫ ߓߍ߲߬߸ ߏ߬ ߕߍ߫ ߘߎߢߊ߫ ߣߌ߲߬ ߘߐ߫، ߊߟߎ߫ ߦߋ߫ ߞߟߊߓߎ ߕߊ߬ ߘߐߙߐ߲߫߸ ߓߊߏ߬ ߘߐ߬ߖߊ ߞߐ ߦߋ߫ ߤߙߍ ߟߋ߬ ߘߌ߫ >> ߊ߬ ߞߵߏ߬ ߘߐ߬ߛߎ߬ߟߌ ߞߍ߫.
ߣߌ߲߬ ߦߴߊ߬ ߦߌ߬ߘߊ߬ ߟߊ߫ ߒ߬ ߠߊ߫ ߟߋ߬߸ ߞߏ߫ ߡߎ߬ߢߎ߲ ߠߊߓߊ߲ ߦߋ߫ ߟߊ߬ߥߛߊ ߟߋ߬ ߘߌ߫߸ ߊ߬ ߣߌ߫ ߞߏ߫ ߕߡߌߣߊ߲ߘߌߦߊ ߞߐ ߦߋ߫ ߞߎ߲߬ߠߊ߬ߦߋߙߋ߲ ߠߋ߬ ߘߌ߫ ߘߎߢߊ߫ ߓߍ߯ ߢߊߞߘߐ߫.
Aucun commentaire pour le moment.