ߓߟߏ߫ ߓߘߊ߫ ߓߐ߫ ߛߣߍ߬ߜ߭ߊߟߌ߫ ߕߏ߬ߟߊ߲ ߞߐߡߊߓߌ߲ߓߌ߲ߠߊ߫ ߡߐ߰ ߛߓߊ߬ ߘߐ߫ ߞߍ߲ߘߍߟߏ߲ ߢߌ߲߬ ߡߊ߬ ߙߓߊ߫ ߞߣߐ߫، ߓߊߏ߬߸ ߊ߬ߟߎ߬ ߓߘߊ߫ ߓߊ߲߫ ߊ߬ߟߎ߬ ߟߊ߫ ߖߊ߲߬ߞߌ߬ߟߌ ߥߛߎ ߞߍ߫ ߟߊ߫߸ ߏ߬ ߡߍ߲ ߦߋ߫ ߞߊߙߏ߫ ߛߓߊ߬ ߘߌ߫، ߞߊ߬ߕߎ߲߯ ߝߘߊ߬ߝߌ߲߬ߠߊ߫ ߂߀߂߅ ߡߊ߲߬ߕߏ߲߬ ߖߌߟߊߝߍ ߟߊ߬ߓߊ߲ ߕߊ߲ߠߌ߲ ߝߍ߬߸ ߡߊ߲߬ߞߊ߲ ߠߋ߬ ߥߟߌ߬ ߘߊ߫ ߦߋ߲߬߸ ߕߍ߮ ߞߍ߫ ߘߴߊ߬ߟߎ ߘߐ߫ ߦߋ߲߬ ߠߋ߬ ߛߊ߫، ߓߊߏ߬߸ ߛߣߍ߬ߜ߭ߊ߬ߟߌ߬ߞߊ߬ ߛߌߦߊߡߊ߲߫ ߠߋ߬ ߘߏ߲߬ ߘߊ߫ ߥߛߎ ߟߊ߫߸ ߡߍ߲ ߠߎ߬ ߦߙߌߞߊ ߘߌ߫ ߡߐ߰ ߁߈ ߓߐ߫߸ ߊ߬ߟߋ߬ ߡߊ߲߬ߞߊ߲ ߞߐߝߟߌ ߓߘߊ߫ ߞߍ߫ ߞߏ߫ ߛߌߦߊߡߊ߲߫ ߘߌ߫ ߞߐ ߢߌ߲߬ ߠߊ߫߸ ߝߏ߫ ߛߣߍ߬ߜ߭ߊߟߌ߫ ߟߊ߫ ߞߟߏߞߕߏߦߊ ߓߍ߯ ߓߘߊ߫ ߓߌ߬ߟߊ߬ ߝߎߥߊ ߣߌ߫ ߝߊ߬ߙߊ ߕߍ߫ ߡߎߣߎ߲߬.

ߛߣߍ߬ߜ߭ߊ߬ߟߌ߬ߞߊ߬ ߞߐߡߊߓߌ߲ߓߌ߲ߠߌ߲ߠߊ߫ ߛߊ߬ߓߊ߫ ߟߋ߬ ߓߌ߬ߟߊ߬ ߘߊ߫ ߞߎߣߎ߲߬ ߞߍ߲ߘߍߟߏ߲ ߡߊ߬ ߡߊ߬ߙߐߞߎ߬߸ ߊ߬ߟߎ߬ ߓߊ߲ ߞߐ ߊ߬ߟߎ߬ ߟߊ߫ ߥߛߎ ߡߎ߰ߡߍ ߞߍ߫ ߟߊ߫߸ ߏ߬ ߡߍ߲ ߕߘߍ߬ ߞߊߙߏ߫ ߛߓߊ߬ ߘߌ߫ ߞߵߏ߬ ߞߎ߲߭ ߝߘߊ߬ߝߌ߲߬ߠߊ߬ ߂߀߂߅ ߡߊ߲߬ߕߏ߲߬ ߖߌߟߊߝߍ ߟߊ߬ߓߊ߲ ߕߊ߲ߠߌ߲ ߡߊ߲߬ߞߊ߲ ߘߏ߫ ߘߌ߫ ߙߓߊ߫ ߞߣߐ߫، ߊ߬ߟߎ߫ ߕߘߍ߬ ߥߛߎ ߟߊ߫ ߊ߬ߟ ߊߙߑߖ߭ߊ߬ ߂߲ ߥߛߎ ߟߋ߬ ߞߣߐ߫߸ ߏ߬ ߡߍ߲ ߦߋ߫ ߞߎߓߋߘߊ ߞߐ߰ߘߎ߯ ߕߟߋ߬ߓߐ ߘߐ߫ ߞߊ߬ߣߌ߲߬، ߊ߬ߟߎ߬ ߟߊߓߐ߫ ߘߊ߫ ߕߐ߲ߓߟߏߡߊ߫ ߕߐ߲ߕߐ߲ ߠߋ߬ ߓߟߏ߫ ߞߊ߬ ߥߴߊߊ߬ߟߎ߬ ߡߊߟߐ߬ ߕߐ߲ߓߟߏߡߊߛߏ ߟߊ߫߸ ߊ߬ߟߎ߫ ߞߵߊ߬ߟߎ߬ ߟߊ߫ ߞߊ߲ߠߊߓߌߟߊ ߡߊߛߐ߬ߘߐ߲߫ ߦߋ߲߬ ߠߋ߬ ߛߊ߫.

ߊ߬ߟߎ߬ ߟߊ߫ ߓߐߟߌ ߝߍ߬߸ ߗߐ߬ ߡߐ߰ ߛߊ߬ߓߊ ߢߌ߲߬ ߠߎ߬ ߟߊߓߍ߲߬ ߘߊ߫ ߛߣߍ߬ߜ߭ߊߟߌ߫ ߟߊ߬ߛߌ߰ߘߊ ߞߐߦߌߘߊߓߊ߮ ߟߎ߫ ߟߋ߬ ߓߟߏ߫، ߊ߬ߟߎ߬ ߦߋ߫ ߡߎߢߍ ߟߊ߫߸ ߊ߬ߟߎ߬ ߘߏ߫ ߘߐ߫ ߞߋߟߋ߲߫ ߞߵߊ߬ ߝߐ߫ ߝߐ߰ߓߍ߬ߦߊ߬ߟߊ ߟߎ߬ ߢߊߞߘߐ߫߸ ߞߏ߫: <<ߘߌߡߊ ߡߊ߬ߙߐߞ߸ ߘߌߡߊ ߡߊߜ߭ߙߍߓ>> ߏ߬ ߦߋ߫ ߛߍߥߊ ߣߌ߫ ߞߎߟߎ߲ߖߋߟߌ ߞߎߡߊ ߟߋ߬ ߘߌ߫ ߞߵߊ߬ ߟߐ߬ ߡߊ߬ߙߐߞߎ߬ ߡߊ߬. ߊ߬ߟߎ߬ ߟߊ߫ ߟߊ߬ߝߛߊ߬ߟߌ߬ߟߊ߫ ߛߣߍ߬ߜ߭ߊ߬ߟߌ߬ߞߊ߫ ߔߊ߬ߕߙߌߞ ߞߊߓߎ߫ ߞߊ߬ ߛߣߍ߬ߜ߭ߊߟߌ߫ ߟߊ߬ߛߌ߰ߘߊ ߝߏ߬ ߞߵߊ߬ ߞߎߟߎ߲ߖߋ߫߸ ߊ߬ߟߎ߬ ߟߊ߫ ߕߍߓߊ߯ߦߊ߫ ߞߏߢߌߡߊ ߟߊ߫، ߞߊ߬ ߓߊ߲߫ ߞߵߊ߬ ߦߌ߬ߘߊ߬ ߞߏ߫ ߞߊ߬ ߘߍ߬ߡߍ߲߬ ߞߍ߫ ߊ߬ߟߎ߬ ߟߊ߫ ߓߐߓߊ߯ߕߐ ߢߌ߲߬ ߠߎ߫ ߞߊ߲߬߸ ߞߵߊ߬ߟߎ߬ ߣߌ߫ ߡߐ߱ ߟߎ߬ ߟߊߘߏ߲߬ ߢߐ߲߮ ߘߐ߫ ߊ߬ ߢߌ߬ߡߊ ߟߊ߫ ߥߛߎ ߞߐ ߣߌ߲߬ ߘߐ߫.

ߊߟߎ߫ ߦߴߊ߬ ߟߐ߲߫߸ ߂߀߂߆ ߓߌ߲ߠߊߥߎߟߋ߲ ߕߟߋ߬ ߁߈ ߡߊ߬߸ ߡߊ߲߬ߞߊ߲ ߠߋ߬ ߞߍ߫ ߘߊ߫ ߡߊ߬ߙߐߞߎ߬ ߣߌ߫ ߛߣߍ߬ߜ߭ߊߟߌ߫ ߟߊ߫ ߓߌ߬ߟߊ߬ߢߐ߲߰ߠߊ ߘߐ߫ ߟߊ߬ߓߊ߲ ߕߊ߲ߠߌ߲ ߝߍ߬، ߛߣߍ߬ߜ߭ߊߟߌ߫ ߟߋ߬ ߛߎߘߊ߲߫ ߘߊ߫ ߞߊ߬ ߖߌߟߊߝߍ ߕߊ߬ ߝߛߊߦߌ߫߸ ߡߊ߬ߙߐߞߎ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߡߊ߫ ߓߍ߲߬ ߞߐߝߟߌ߫ ߟߊߓߐߣߍ߲ ߡߊ߬߸ ߊ߬ߟߋ ߡߍ߲ ߞߊ߬ ߛߌ߲߬ߝߏ߲߬ߧߊ߬ߟߌ ߞߍ߫، ߒ߬ߓߊ߬߸ ߡߊ߲߬ߞߊ߲ ߡߍ߲ ߞߍ߫ ߘߴߊ߬ ߟߏ߲ ߠߊ߫߸ ߕߍ߮ ߞߍ߫ ߘߊ߫ ߛߣߍ߬ߜ߭ߊ߬ߟߌ߬ߞߊ ߘߏ߫ ߟߎ߫ ߟߋ߬ ߘߐ߫ ߞߵߊ߬ߟߎ߫ ߘߏ߲߬ ߥߛߎ ߟߊ߫߸ ߞߏ߫ ߊ߬ߟߎ߬ ߓߘߴߊ߬ߟߎ߬ ߞߍ߫ ߕߐ߲ߓߟߏߡߊ ߟߎ߫ ߞߊ߲߬߸ ߞߊ߬ ߓߙߊ ߦߙߐ ߘߏ߫ ߟߎ߫ ߘߐߕߌߢߍ߫߸ ߞߊ߬ ߘߏ߲߬ ߓߙߊ ߞߣߐ߫ ߞߊ߬ ߝߋ߲߫ ߠߊߝߟߌ ߞߍ߫.

ߒ߬ߓߊ߬߸ ߡߐ߰ ߁߈ ߡߍ߲ ߡߌ߬ߣߊ߬ ߘߊ߫߸ ߛߊ߬ߓߊ߫ ߟߋ߬ ߓߐߣߍ߲߫ ߕߋ߲߬߸ ߊ߬ ߕߐ߬ ߡߐ߰ ߁߅ ߦߋ߫ ߥߛߎ ߟߊ߫ ߤߊ߲߯ ߕߋ߲߬، ߘߏ߫ ߟߎ߫ ߦߋ߫ ߞߊߙߏ߫ ߥߐ߯ߙߐ߫߸ ߘߏ߫ ߟߎ߫ ߕߊ ߦߋ߫ ߛߊ߲߬ ߞߋߟߋ߲߫، ߊ߬ߟߎ߫ ߞߊ߬ ߞߕߌ߫ ߡߛߊߦߌ߲ ߞߍ߫߸ ߓߊ߬ߙߌ߬ ߓߍ߲߬ ߞߍ߫ ߘߊ߫ ߖߏߣߡߊ߫ ߞߕߌߘߊ ߕߊ ߟߋ߬ ߡߊ߬ ߦߋ߲߬ ߝߣߊ߫ ߘߐ߫، ߡߍ߲ ߠߎ߬ ߦߋ߫ ߥߛߎ ߟߊ߫߸ ߏ߬ ߟߎ߬ ߟߊ߫ ߡߐ߱ ߟߎ߬ ߕߊ߬ߣߍ߲ ߞߵߊ߬ ߟߊ߫ ߛߣߍ߬ߜ߭ߊߟߌ߬ߞߊ ߘߏ߫ ߟߎ߫ ߞߊ߲߬߸ ߊ߬ ߞߎߡߊ ߓߘߊ߫ ߛߌߦߊߦߊ߫ ߏ߬ ߟߎ߬ ߓߟߏ߫ ߞߏߛߓߍ߫߸ ߞߵߊ߬ߟߎ߬ ߟߊ߫ ߣߌߛߐߜߏߦߊ ߦߌ߬ߘߊ߬.

ߝߊ߬ߙߊ߲߬ߛߌ߫ ߝߊ߬ߛߏ߬ߦߊ߬ ߕߌ߮ ߘߏ߫ ߝߣߊ߫ ߕߎ߲߬ ߦߋ߫ ߥߛߎ ߟߊ߫߸ ߏ߬ ߓߐߛߎ߲ ߦߋ߫ ߊߟߌߖ߭ߋߙߌ߫ ߟߋ߬ ߘߌ߫، ߏ߬ ߝߣߊ߫ ߓߌ߬ߟߊ߬ ߘߊ߫ ߞߊߙߏ߫ ߛߊ߬ߓߊ߫ ߟߋ߬ ߥߛߎ ߟߊ߫߸ ߞߏ߫ ߊ߬ ߞߊ߬ ߖߌ߫ ߘߎ߲ ߠߊߝߟߌ߬ ߕߐ߲ߓߟߏߡߊ ߟߎ߫ ߞߊ߲߬ ߊ߬ߟߋ߬ ߢߐ߲߯ߓߍ߲߫ ߞߋߟߋ߲ ߝߍ߬، ߏ߬ ߝߣߊ߫ ߓߘߊ߫ ߓߊ߲߫ ߊ߬ ߟߊ߫ ߞߊߙߏ߫ ߛߓߊ߬ ߥߛߎ ߟߊ߫߸ ߊ߬ ߓߘߊ߫ ߓߌ߬ߟߊ߬.