ߛߊ߲ߖߌ߫ ߥߎ߬ߣߊ߲߬ߞߏߙߏ߲ ߓߘߊ߫ ߣߊ߬ ߊߓߌߖߊ߲߬ ߓߌ߬ߟߊ߫ ߛߎ߬ߣߎ߲ ߘߐ߫߸ ߊ߬ߟߋ ߡߍ߲ ߦߋ߫ ߜߋ߲ߞߐ߰ߖߌ߬ߘߊ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲߬ ߞߎߓߋߘߊ ߘߌ߫߸ ߊ߬ ߞߏߢߊ ߘߊߡߌ߬ߣߊ߬ ߘߊ߫ ߞߊ߬ߦߌ߯ ߞߍ߲ߘߍߟߏ߲ ߠߋ߬ ߡߊ߬، ߜߋ߲ߞߐ߰ߖߌ߬ߘߊ ߞߏߕߌ߮ ߡߍ߲ ߘߐ߱ߘߏ߲߬ߣߍ߲߫ ߝߊ߬ߛߏ ߞߍߢߐ߲߯ߝߍ ߣߌ߫ ߓߟߏߞߏߟߏ߲ߧߊ ߞߍ߬ߟߍ ߟߊ߫߸ ߡߌߛ ߓߍߟߑߡߐ߲ߘ ߘߏ߬ߜ߭ߏ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߡߐ߰ ߕߊ߲߫ ߢߐ߲߰ ߠߋ߬ ߓߣߐ߬ߣߴߊ߬ ߣߌ ߘߐ߫ ߖߌߓߐ ߣߌ߲߬ ߞߏߛߐ߲߬߸ ߏ߬ ߡߍ߲ ߣߐ߬ ߓߐ߰ ߔߕߐߔߕߐ ߛߌ߰ ߟߊ߫ ߛߊ߲ߖߌ߫ ߓߟߏߕߍ߰ߓߊߟߌ ߞߘߐ߫.


ߡߊ߬ߛߎߓߊ ߣߌ߲߬ ߘߐ߫߸ ߡߊ߲߬ߕߙߐ ߛߋ߫ ߘߊ߫ ߞߊ߬ߝߏ߬ߙߋ߲ ߡߍ߲ ߠߎ߬ ߡߊ߬ ߓߊߞߍ߬߸ ߏ߬ ߟߎ߫ ߟߋ߬ ߊߕߋߞߎߓߋ߫ ߣߌ߫ ߦߋ߬ߔߎߜ߭ߐ߲߬ ߘߌ߫، ߊߕߋߞߎߓߋ߫ ߞߣߐ߫߸ ߊ߬ ߕߌ߯ߕߌ߯ ߊ߬ߟߎ߬ ߟߊ߫ ߞߌ߲߬ߘߊ ߡߍ߲ ߕߐ߯ ߞߏ߫ ߡߏߛߌߞߙߐ߫߸ ߡߐ߰ ߞߐ߬ߣߐ߲߬ߘߐ߫ ߟߋ߬ ߝߊ߰ ߘߊ߫ ߟߎ߫ ߞߋߟߋ߲ ߞߣߐ߫ ߦߋ߲߬߸ ߞߊ߬ ߓߍ߲߬ ߞߏߕߌ߯ߘߊ ߟߊ߫ ߟߌ߬ߤߟߊ߬ ߟߊߛߋߣߍ߲ ߡߊ߬ ߞߊ߬ߣߌ߲߬، <<ߡߐ߰ ߕߊ߲߫ ߖߊ߬ߕߋ߫ ߟߋ߬ ߝߊ߰ߣߍ߲߫߸ ߉ ߦߴߏ߬ ߘߐ߫߸ ߡߍ߲ ߠߎ߬ ߓߍ߯ ߦߋ߫ ߟߎ߫ ߞߋߟߋ߲ ߞߣߐ߫ ߡߐ߯ ߘߌ߫.>> ߊ߬ ߞߵߏ߬ ߝߐ߫ ߟߊ߬ߛߋ߬ߟߌ ߘߏ߫ ߟߋ߬ ߘߐ߫ ߝߍߛߑߓߎߞ ߞߊ߲߬.

ߖߌ ߝߊ߲߬ߞߊ ߟߊ߫ ߥߊ߬ߙߊ ߝߣߊ߫ ߞߍ߫ ߘߊ߫ ߕߙߎ߬ ߘߌ߫ ߞߊ߬ ߕߌߢߍߟߌ߫ ߛߌߦߊߡߊ߲߫ ߞߍ߫ ߓߟߏߝߋ߲߫ ߞߎ߲ߘߊ߫߸ ߞߊ߬ ߖߌ ߓߐ߫ ߛߌߟߊ ߟߎ߫ ߞߊ߲߬߸ ߡߊ߬ߞߍ߬ߦߙߐ ߟߎ߬߸ ߘߋ߲ߓߦߊ߫ ߛߌߦߊߡߊ߲߫ ߓߘߊ߫ ߓߐ߫ ߊ߬ߟߎ߫ ߓߘߊ ߡߎߣߎ߲߬، ߕߊߟߛߊߟߊ ߟߎ߬ ߞߏ߬ߣߌ߲ ߓߌߣߍ߲߫ ߞߊ߬ ߛߏ߰ߟߊ߬ߓߊ߰ߕߐ ߟߎ߬ ߡߊߘߍ߬ߡߍ߲߬߸ ߞߵߊ߬ߟߎ߬ ߡߞߊߘߊ߲߫߸ ߞߊ߬ ߢߌߣߌ߲ߠߌ߲ ߠߎ߬ ߞߍ߫.


ߛߊ߬ߡߊ ߓߊ߯ ߘߏ߲߬ ߊߓߌߖߊ߲߬ ߞߣߐ߫߸ ߞߵߊ߬ ߕߊ߬ ߘߓߊ߬ߕߊ ߟߊߓߊ߲ ߡߊ߬ ߞߵߊ߬ ߛߌ߰ ߞߊ߬ߙߌ߬ߝߐ ߟߊߓߊ߲ ߠߊ߫߸ ߏ߬ ߦߋ߫ ߞߍ߫ ߟߊ߫ ߛߊ߲ߖߌߓߊ߫ ߣߊ߫ ߕߎߡߊ ߟߋ߬ ߘߌ߫߸ ߡߊ߬ߛߎߓߊ ߦߋ߫ ߕߍ߰ ߟߴߊ߬ ߛߌߦߊߡߊ߲߫ ߘߐ߫߸ ߊ߬ ߕߌ߯ߕߌ߯ ߖߌߓߐ ߛߎ߬ߘߎ߲߬ߡߊ߲߬ ߦߙߐ ߡߍ߲ ߠߎ߬ ߟߊ߫، ߤߊߟߌ߬ ߂߀߂߅ ߘߓߊ߬ߕߊ ߟߊ߫߸ ߡߐ߰ ߥߐ߯ߙߐ߫ ߝߊ߰ ߘߊ߫ ߖߌߓߐ ߘߐ߫ ߊߕߋߞߎߓߋ߫، ߓߊߏ߬߸ ߛߊ߲ߖߌߓߊ ߟߋ߬ ߞߍ߫ ߘߊ߫ ߕߙߎ߬ ߘߌ߫ ߥߊ߯ߕߌ ߏ߬ ߟߊ߫ ߞߊ߬ ߦߙߐ ߘߏ߫ ߟߊߥߎ߬ߦߊ߫ ߡߐ߱ ߟߎ߫ ߞߊ߲߬، ߂߀߂߄ ߥߊ߬ߛߌ߬ߥߙߊ ߟߊ߫߸ ߡߐ߰ ߂߄ ߝߣߊ߫ ߝߊ߰ ߘߊ߫ ߕߟߋ߬ ߕߊ߲߫ ߖߌߓߐ ߞߘߐ߫، ߞߊ߬ ߓߍ߲߬ ߖߐ߬ߘߐ ߡߊ߬ ߏ߬ ߘߐ߫ ߛߊ߫߸ ߝߊ߰ߡߊ ߟߎ߬ ߓߘߴߊ߬ߟߎ߬ ߞߊ߲ߠߊߘߌ߫ ߖߡߊ߬ߣߊ߬ߘߋ߲ ߠߎ߬ ߡߊ߬߸ ߞߏ߫ ߓߍ߯ ߦߋ߫ ߖߘߐ߬ߡߊ߬ ߦߙߐ ߟߎ߬ ߡߊߕߊ߲߬ߞߊ߫ ߞߊ߬ ߟߊ߬ߞߊ߲߬ߘߊ߬ߟߌ ߛߙߊߕߌ ߟߎ߬ ߡߊߓߏ߲߬ߧߊ߬.