ߦߙߐ ߣߌ߲߬ ߦߋ߫ ߜߞߋߘߎ߯ ߘߏ߲߬ߘߊ ߟߋ߬ ߟߊ߫ ߞߎߘߍ߫ ߝߌ߬ߟߊ߫ ߖߊ߬ߕߋ߬ ߟߊ߫߸ ߜߞߋߘߎ߯ ߟߋߟߋ߫ ߞߌ߲߬ߘߊ ߟߊ߫، ߕߍߟߊߞߎߘߎ߲ ߏ߬ ߛߌߟߊ ߓߘߊ߫ ߕߌߢߍ߫߸ ߊ߬ ߕߌ߯ߕߌ߯ ߛߊ߲߫ ߣߊ߫ ߕߎߡߊ ߡߍ߲ ߦߋ߫ ߣߌ߲߬߸ ߦߋ߲߬ ߓߏ߬ߙߌ ߜߍ߬ߟߍ߲߬ߡߊ߲߫ ߠߋ߬ ߕߋ߲߬ ߊ߬ ߢߊ ߖߍ߬ߘߍߖߍ߬ߘߍ ߡߊ߬.

ߓߏ߬ߙߌ߬ߝߋ߲߬ߕߌ߮ ߡߍ߲ ߠߎ߬ ߦߋ߫ ߛߌߟߊ ߣߌ߲߬ ߞߊ߲߬߸ ߊ߬ ߕߌ߯ߕߌ߯ ߘߎ߰ߞߎ߬ߟߎ߲߬ ߓߏ߬ߙߌ߬ߟߊ ߟߎ߬߸ ߊ߬ߟߎ߬ ߓߘߴߊ߬ߟߎ߬ ߡߊߞߊ߬ߛߌ߫ ߝߊ߰ߡߊ ߟߎ߬ ߦߋ߫߸ ߞߏ߫ ߞߊ߬ ߢߊ ߟߐ߬ ߦߙߐ ߣߌ߲߬ ߘߐ߫߸ ߖߐ߲߰ߛߴߊ߬ ߘߌ߫ ߘߐߓߍ߲߬.

ߟߊ߱ߦߌ߬ ߞߙߎ߬ߡߊ߬ ߡߍ߲ ߦߋ߫ ߟߊ߬ߓߏ߬ߙߟߌ߬ߟߊ߫ ߘߌ߫߸ ߏ߬ ߞߵߊ߬ ߡߙߌߦߊ ߘߌ߫ ߣߌ߲߬ ߞߏ ߞߊ߲߬: <<ߛߌߟߊߕߍߟߊ ߣߌ߲߬ ߓߏ߬ߙߌ ߜߍ߬ߟߍ߲߬ߡߊ߲߫ ߠߋ߬ ߕߋ߲߬߸ ߞߊ߬ ߛߋ߫ ߜߟߍ߬ߦߊ ߘߊ߲߭ ߠߊ߫، ߌ ߓߊ߯ ߛߋ߫ ߦߋ߲߬߸ ߝߏ߫ ߌ ߦߴߌ ߛߎߡߦߊ߫ ߟߋ߬ ߓߘߍߞߍ߭، ߊ߬ ߓߘߊ߫ ߞߍ߫ ߕߙߎ߬ ߘߌ߫ ߞߊ߬ ߓߐߒߣߘߐ ߜߟߍ߬ߦߊ߬ ߞߏߛߓߍ߫.

ߊ߲ ߧߴߊ߲ ߞߊ߲ߠߊߘߌ߫ ߟߊ߫ ߞߎ߲߬ߠߊ߬ߛߌ߮ ߟߎ߫ ߡߊ߬߸ ߡߍ߲ ߠߎ߬ ߘߐ߱ߘߏ߲߬ߣߍ߲߫ ߛߌߟߊ߫ ߓߊ߯ߙߊ ߟߊ߫߸ ߊ߬ߟߎ߬ ߦߴߊ߬ߟߎ߬ ߢߊ ߟߐ߬ ߦߙߐ ߣߌ߲߬ ߘߐ߫߸ ߖߐ߲߰ߛߴߊ߬ ߓߏ߬ߙߌ ߘߌ߫ ߣߐ߰ߦߊ߬߸ ߞߊ߬ ߡߐ߱ ߟߎ߬ ߓߐ߫ ߖߊ߬ߤߣߊߡߊ ߏ߬ ߘߐ߫ ߦߋ߲߬߸ ߛߡߊ߬ ߛߊ߲ߖߌ ߡߍ߲ ߓߘߊ߫ ߕߊ߬ߡߌ߲߫ ߊ߬ ߓߏ߬ߙߌ ߕߐ߭ ߜߟߍ߬ߦߊ߬ ߟߊ߫ ߞߊ߬ߣߌ߲߬.>>

ߜߞߋߘߎ߯ߞߊ ߟߎ߬ ߞߏ߬ߣߌ߲ ߢߌߣߌ߲ߣߍ߲߫ ߞߎ߲߬ߠߊ߬ߛߌ߮ ߟߊ߫ ߘߍ߬ߡߍ߲߬ߠߌ߲ ߡߊ߬ ߕߋ߲߬ ߞߏߛߓߍ߫، ߛߊ߫ ߓߏ߬ߙߌ߬ߝߋ߲߬ߕߌ߮ ߟߎ߬ ߘߌ߫ ߟߊߞߊ߲ߘߊ߫ ߛߌߟߊ ߣߌ߲߬ ߞߊ߲߬߸ ߞߊ߬ ߞߎߟߎ߲ߞߎߟߎ߲ߠߌ߲ ߣߐ߰ߦߊ߬ ߓߍ߯ ߟߊߘߍ߬ߣߍ߲ ߡߊ߬، ߞߊ߬ߕߎ߲߯߸ ߦߙߐ ߣߌ߲߬ ߦߋ߫ ߜߞߋߘߎ߯ ߛߏߞߣߐߟߊ ߦߙߐߓߊ߫ ߟߋ߬ ߘߌ߫.