ߝߏߘߋߞߊߙߌߦߊ߫ ߓߊ߬ߟߌ߬ߡߊ߰ߣߊ߫ ߣߌ߫ ߞߊ߬ߞߊ߲߫ ߓߘߊ߫ ߥߟߌ߬ ߢߐ߲߮ ߠߊ߫ ߛߊߣߌ߲߫ ߓߊ߯ߙߊ߫ ߘߌߦߊ ߞߘߐ ߘߏ߫ ߝߍ߬ ߌߞߐߕߎ߯ߣߌ߲߫߸ ߡߐ߰ ߞߋߟߋ߲߫-ߋ߲-ߞߋߟߋ߲߫ ߝߊ߰ߞߏ ߦߋ߫ ߝߐ߫ ߟߊ߫ ߛߏ߫ ߝߌ߬ߟߊ ߣߌ߲߬ ߓߍ߯ ߞߣߐ߫߸ ߞߊ߬ ߛߌߦߊߡߊ߲߫ ߜߘߍ߫ ߡߊߘߌߡߌ߲߫ ߡߏ߬ߙߌ߬ߝߊ߬ ߞߌߛߍ ߟߊ߫.
ߞߎߣߎ߲߬ ߞߊ߯ߙߌ ߘߓߊ߬ߓߌߟߊ ߕߋ߬ߟߋ߫ ߉ ߂߀߂߆ ߡߊ߬߸ ߘߎ߰ߞߟߏ߬ ߞߏ߬ ߡߊ߲ߞߊ߲ ߘߏ߫ ߟߋ߬ ߥߟߌ߬ߣߍ߲߫ ߛߏ߫ ߝߌ߬ߟߊ߬ ߣߌ߫ ߢߐ߲߯ ߕߍ߫: ߝߏߘߋߞߊߙߌߦߊ߫ ߓߊ߬ߟߌ߬ߡߊ߰ߣߊ߫ ߣߌ߫ ߞߊ߬ߞߊ߲߫ ߞߊ߬ߣߌ߲߬، ߊ߬ߟߎ߫ ߝߌ߬ߟߊ ߓߍ߯ ߦߋ߫ ߢߐ߲߮ ߡߊߝߌ߲߬ ߠߊ߫ ߏ߬ ߡߍ߲ ߘߐ߫߸ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߵߊ߬ ߟߐ߲ߕߊ ߝߐ߫ ߊ߲ ߠߊ߫ ߓߘߎ ߟߊ߫ ߝߐߢߐ߲߯ߞߐ ߣߌ߲߬ ߞߊ߲߬߸ ߊ߬ߟߋ ߦߋ߫ ߝߏߘߋߞߊߙߌߦߊ߫ ߓߊ߬ߟߌ߬ߡߊ߰ߣߊ߬ߞߊ ߟߋ߬ ߘߌ߫߸ ߊ߬ ߡߊߖߌ߰ߣߍ߲߫ ߛߌ߯ߙߌ߲߫ ߠߋ߬، ߊ߬ ߡߍ߲ ߊ߬ ߓߟߏ߫ ߞߏ߫ ߊ߬ ߘߋ߲ ߦߋ߫ ߡߐ߰ ߡߊߘߌߡߌ߲ߣߍ߲ ߠߎ߬ ߘߐ߫߸ ߊ߬ ߝߣߊ߫ ߕߘߍ߬ ߞߊ߲ߞߊ߲߫ ߘߊ߲ߘߊߛߏߓߊ ߕߌ߲߬ߞߎ߬ߘߎ߲߬ߠߊ߬ߞߊ ߟߊ߫ ߞߎߣߎ߲߬ ߥߎ߬ߙߊ ߝߍ߬߸ ߊ߬ ߞߵߊ߬ ߦߌ߬ߘߴߊ߲ ߠߊ߫ ߞߏ߫: <<ߊ߬ߟߎ߫ ߣߐ߬ ߊ߲ ߠߊ߫ ߡߐ߱ ߟߋ߬ ߝߊ߰ ߟߊ߫߸ ߊ߬ ߕߐ߯ ߞߏ߫ ߦߊ߬ߞߎߓߊ߬ ߘߎ߲߬ߓߎߦߊ߬، ߏ߬ ߞߐ߫ ߞߊ߬ ߡߐ߰ ߜߘߍ߫ ߛߌߦߊߡߊ߲߫ ߡߊߘߌߡߌ߲߫߸ ߒߠߋ ߖߍ߬ߘߍ ߘߋ߲ ߦߴߏ߬ ߟߎ߬ ߘߐ߫. ߞߍ߬ߟߍ ߣߌ߲߬ ߡߊ߫ ߞߍ߫ ߛߡߐ߬ ߝߍ߫ ߘߐ߫ ߘߋ߬߸ ߊ߬ ߞߍߣߍ߲߫ ߛߊ߲ߣߌ߲߫ ߛߋ߲ ߝߎߥߊ߫ ߞߘߐ ߟߋ߬ ߘߐ߫،>> ߊ߬ ߞߵߏ߬ ߦߌ߬ߘߊ߫.
ߝߏߘߋߞߊߙߌߦߊ߫ ߓߊߟߌߡߣߊߞߊ ߟߎ߬ ߟߊ߫ ߝߐߟߌ߫ ߘߐ߫، ߞߏ߫ ߞߊ߬ߞߊ߲߬ߞߊ ߟߎ߬ ߞߊ߲߫ ߠߋ߬ ߞߏ߫ ߓߊ ߟߋ߬ ߛߏ߫ ߝߌ߬ߟߊ ߏ߬ ߟߎ߫ ߘߊ߲߭ ߘߌ߫߸ ߡߐ߰ ߝߌ߬ߟߊ߬ ߓߘߊ߫ ߓߐ߬ߣߐ߫ ߊ߬ ߣߌ ߘߐ߫ ߏ߬ ߡߍ߲ ߝߐߢߐ߲߯ߞߐ ߘߐ߫ ߞߘߐ߬ߡߊ߲߫ ߝߏߘߋߞߊߙߌߦߊ߫ ߓߊ߬ߟߌ߬ߡߊ߰ߣߊ߫߸ ߝߊ߰ߡߊ ߟߎ߬ ߡߊ߫ ߞߟߊ߬ ߛߌ߫ ߓߌ߬ߟߴߊ߬ߟߎ߬ ߢߌ߲ ߝߍ߬ ߞߵߊ߬ ߓߍ߲߬ ߏ߬ ߞߏߢߊ ߡߊ߬، ߏ߬ ߟߋ ߞߏߛߐ߲߬߸ ߊ߬ߟߎ߫ ߞߵߊ߬ߟߎ߬ ߞߊ߲ߠߊߓߐ߫ ߝߊ߰ߡߊ ߟߎ߬ ߡߊ߬ ߦߙߐߣߍ߲߫ ߢߌ߲߬ ߘߐ߫߸ ߛߊ߫ ߞߕߌ ߘߌ߫ ߟߴߊ߬ߟߎ߬ ߣߌ߫ ߢߐ߲߮ ߕߍ߫ ߢߊ ߡߍ߲.
ߞߊ߬ߞߊ߲߬ߞߊ ߟߎ߬ ߟߊ߫ ߝߐߟߌ߫ ߘߐ߫߸ ߡߊ߲߬ߞߊ߲ ߣߌ߲߬ ߘߊߡߌ߬ߣߊ ߣߌ߫ ߓߌ߬ ߕߍ߫، ߏ߬ ߘߌ߫ ߛߊ߲߬ ߉ ߓߐ߫߸ ߡߎߛߊ߫ ߘߎ߲ߓߎߦߊ߫ ߟߊ߫ ߢߊߝߐߟߌ߫ ߘߐ߫، ߞߏ߫ ߞߍ߬ߟߍ ߣߌ߲߬ ߕߍ߰ߣߍ߲߫ ߛߊߣߌ߲߫ ߓߊ߯ߙߊ߫ ߘߌߦߊ ߞߘߐ ߘߏ߫ ߟߋ߬ ߝߍ߬߸ ߊ߬ ߣߴߊ߬ߟߎ߬ ߟߊ߫ ߛߡߐ߬ߖߎ ߟߎ߬ ߡߊߓߐ߭ : <<ߕߎ߬ߡߊ ߓߍ߯߸ ߝߏߘߋߞߊߙߌߦߞߊ ߟߎ߬ ߦߋ߫ ߓߊ ߕߍ߰ ߟߊ߫ ߟߋ߬ ߞߊ߬ ߣߵߊ߬ߟߎ߬ ߞߍ߫ ߊ߲ ߞߊ߲߬ ߞߵߊ߲ ߠߊ߫ ߛߡߐ߬ߖߎ ߟߎ߬ ߡߊߓߐ߬، ߞߏ߫ ߣߴߊ߬ߟߎ߬ ߡߴߊ߲ ߜߍ߲߫ ߦߌߟߊ ߏ߬ ߘߐ߫߸ ߊ߬ߟߎ߬ ߟߊ߫ ߛߣߍ߬ߞߍ߬ ߦߙߐ߬ ߞߏ ߓߘߊ߫ ߜߟߍ߬ߦߊ߫، ߊ߲ߠߎ߬ ߞߊ߲߫ ߊ߬ߟߎ߬ ߦߋ߫߸ ߊ߬ߟߎ߬ ߓߊ߯ ߣߵߊ߲ ߡߊ߬ ߓߏ߲߬ߧߊ ߘߌ߫߸ ߊ߲ ߘߴߊ߬ߟߎ߬ ߛߐ߫ ߘߎ߱ ߘߐ߫߸ ߞߊ߬ߡߊߛߐ߬ߘߐ߲߬ ߊ߲ ߧߋ߫ ߓߊߘߋ߲ߡߊ ߟߎ߬ ߟߋ߬ ߘߌ߫.>> ߊ߬ ߞߵߏ߬ ߟߊߛߙߋߦߊ߫.
ߡߊ߲߬ߞߊ߬ ߠߊ߬ߓߊ߲ ߡߍ߲ ߞߍ߫ ߘߊ߫ ߞߎߣߎ߲߬ ߞߊ߯ߙߌ ߂߀߂߆ ߘߓߊ߬ߓߌߟߊ ߕߋ߬ߟߋ߫ ߉ ߡߊ߬߸ ߏ߬ ߞߍ߫ ߘߊ߫ ߞߊ߬ ߕߘߍ߬ ߞߊ߬ߞߊ߲߬ߞߊ ߟߎ߬ ߟߊ߫ ߛߡߐ߬ ߛߣߍ߬ ߘߍߞߙߎ ߟߎ߬ ߓߘߊ߫ ߕߊ߯ ߛߡߐ߬ ߕߘߎ߫ ߦߌߟߊ، ߊ߬ߟߎ߬ ߕߏߣߍ߲߫ ߓߊ߯ߙߊ߫ ߘߊߞߎ߲ ߘߐ߫ ߦߋ߲߬ ߠߋ߬߸ ߊ߬ߟߎ߫ ߞߵߊ߬ ߦߋ߫ ߖߊ߬ߡߊ ߓߘߊ߫ ߡߌߣߌ߲߫ ߊ߬ߟߎ߫ ߡߊ߬ ߡߏ߬ߙߌ߬ߝߊ ߦߴߊ߬ߟߎ߬ ߓߟߏ߫، ߏ߬ ߟߋ ߟߊߓߊ߲߫ ߘߊ߫ ߡߎ߯ ߕߋ ߣߌ߫ ߢߐ߲߯ ߜߊߛߌ ߡߊ߬ ߤߊ߲߯ ߞߊ߬ ߡߐ߰ ߜߎ߲ߕߎߙߎ߲ ߓߐ߬ߣߐ߫ ߊ߬ ߣߌ ߘߐ߫:>> ߞߙߏ߬ߡߊ߬ߘߎ߰ߖߊ߲ ߓߏ߲߫ ߘߴߊ߬ߟߎ߬ ߓߟߏ߫ ߦߙߐ ߡߍ߲ ߒߞߘߐ߫߸ ߊ߬ ߜߊߟߏ߲߫ ߘߊ߫ ߞߊ߬ ߓߋ߬߸ ߏ߬ ߞߐ߫ ߞߊ߬ ߡߐ߰ ߛߌߦߊߡߊ߲߫ ߡߊߘߌߡߌ߲߫ ߡߏ߬ߙߌ߬ߝߊ߬ ߞߌߛߍ ߟߴߊ߬ߟߎ߬ ߓߟߏ߫>>، ߊ߬ ߞߵߏ߬ ߟߴߊ߬ ߞߊ߲߬.
ߞߍ߬ߟߍ ߣߌ߲߬ ߢߊߝߐߟߌ ߘߊߞߎ߲ ߘߐ߫߸ ߡߐ߰ ߝߌ߬ߟߊ ߣߌ߲߬ ߓߍ߯ ߦߋ߫ ߛߊ߬ߙߌ߬ߦߊ߬ ߡߐ߮ ߟߎ߬ ߟߊ߫ ߞߏ߫ ߡߊߓߌߟߊ ߦߌ߬ߘߊ߬ ߟߴߊ߬ߟߎ߬ ߟߊ߫ ߞߎߡߊ ߘߐ߫߸ ߡߎߛߊ߫ ߘߎ߲ߓߎߦߊ߫ ߖߍ߬ߘߍ ߞߵߊ߬ ߦߌ߬ߘߊ߫ ߞߏ߫: <<ߓߊߟߊ߲ߘߎ߯ ߡߙߊ߬ߘߊ߬ߘߎ߯ߟߊ ߡߙߊ߬ߓߊ߮ ߕߊ߯ ߘߊ߫ ߞߊ߲ߞߊ߲߫ ߝߊ߰ߡߊ ߟߎ߬ ߟߊߟߐ߲ߠߌ߲߫߸ ߊ߬ߟߎ߫ ߞߵߊ߲ ߟߐ߬ ߜߋ߬ߕߋߜߋ߭ ߝߌ߬ߟߊ߫ ߖߐ߬ߣߍ߲ ߛߙߊ߬ ߟߊ߫، ߛߴߊ߬ߟߎ߬ ߘߌ߫ ߕߊ߯ ߢߊ ߡߍ߲ ߞߊ߬ ߛߌߞߊߒߡߊߓߊ߯ߕߐ ߟߎ߫ ߡߌ߬ߣߊ߬߸ ߞߏ߬ߣߌ߲߬ ߊ߲ ߞߊ߬ ߜߋ߬ߕߋߜߋ߭ ߞߋߟߋ߲߫ ߠߋ߬ ߦߋ߫، ߊ߬ߟߎ߫ ߘߏ߲߬ ߞߊ߬ ߡߐ߱ ߡߍ߲ ߠߎ߬ ߡߌ߬ߣߊ߬߸ ߊ߬ߟߎ߫ ߞߵߊ߬ߟߎ߬ ߓߍ߯ ߓߌ߬ߟߊ߫ ߟߋ߬ ߞߐߟߊ>> ߊ߬ ߞߵߏ߬ ߦߌ߬ߘߊ߫.
ߞߊ߬ߦߌ߯ ߣߌ߲߬ ߞߏ ߡߊ߲߬ߞߊ߲ ߥߟߌ߬ ߘߊ߫߸ ߞߕߌ ߡߊ߫ ߟߴߊ߬ߟߎ߬ ߕߍ߫ ߞߘߐ߬ߡߊ߲߫ ߞߎߘߊ߫ ߘߏ߲߬ ߡߊ߫ ߟߴߊ߬ߟߎ߬ ߕߍ߫ ߝߣߊ߫ ߡߎߣߎ߲߬، ߛߎ߭ ߟߎ߬ ߞߏ߬ߣߌ߲ ߣߌ߫ ߡߊ߬ߘߌ߬ߡߌ߲߬ߓߊ߰ߕߐ ߟߎ߬ ߦߋ߫ ߝߊ߰ߡߊ ߟߎ߬ ߕߊ߫ ߓߟߏߟߊ߫ ߦߊ߬ߣߴߊ߬ ߞߏ ߢߊߘߐߜߍ ߟߊ߲ߞߣߍߡߊ ߕߍ߫.
Aucun commentaire pour le moment.