ߓߊ߬ߛߌߙߎ߬ ߖߏ߬ߡߊߦߌ߬ ߝߊߦߌ߬ ߡߍ߲ ߦߋ߫ ߛߣߍ߬ߜ߭ߊ߬ߟߌ߬ ߞߊ߲ߓߍ߲ ߞߊ߲ߕߌ߮ ߘߌ߫߸ ߏ߬ ߓߘߊ߫ ߞߍ߫ ߛߘߋߦߊߥߏ ߞߊ߬ߝߏ߬ ߞߎ߲ߕߌ߮ ߟߎ߬ ߟߊ߫ ߜߊ߬ߙߊ ߞߊ߲ߕߌ߮ ߘߌ߫߸ ߊ߬ ߣߌ߫ ߝߘߊ߬ߝߌ߲߬ߠߊ߫ ߕߟߋ߬ߓߋ߬ ߞߊߝߏ ߟߎ߬ ߟߊ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߘߍ߬ߓߊ ߞߎ߲߬ߠߊ߬ߛߌ߮ ߟߎ߬ ߞߊ߲ߕߌ߮.
ߊ߬ ߞߍ߫ ߘߊ߫ ߛߘߋߦߊߥߏ ߞߊ߲ߕߌ߮ ߘߌ߫ ߞߊ߯ߙߌߟߏ߲ ߠߋ߬ ߡߊ߬߸ ߂߀߂߆ ߞߊ߬ߙߌ߬ߝߐ ߕߟߋ߬ ߁߉߸ ߝߕߞߡߘ ߟߊ߫ ߘߋ߬ߙߌ߬ߣߊ߲߬ ߟߊߘߍ ߆߉߲ ߛߋ߲߭ߝߍ߬ ߝߌ߬ߙߌߕߐ߲߬، ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߖߏ߬ߡߊߦߌ߬ ߣߌ߫ ߟߐ߬ߘߎ߮ ߏ߬ ߦߊ߫ ߞߊ߲߫ ߠߋ߬ ߝߋߝߋ߫، ߛߣߍ߬ߜ߭ߊߟߌ߬ ߞߊ߲ߓߍ߲ ߞߊ߲ߕߌ߯ߘߊ ߝߣߊ߫ ߞߵߊ߬ ߟߊ߫ ߛߘߋߦߊߥߏ ߞߊ߲ߕߌ߯ߦߊ߫ ߞߏ ߢߌ߲߬ ߠߊߛߋ߫ ߟߋ߬ ߜߍ ߘߐ߫ ߥߛߊߞߙߊ߫߸ ߊ߬ߟߋ߬ ߟߏ߲߫ ߞߋߟߋ߲ ߡߎ߰ߡߍ ߡߊ߬.
ߓߊ߬ߛߌߙߎ߬ ߖߏ߬ߡߊߦߌ߬ ߝߊߦߌ߬ ߓߌ߬ߟߊ߬ߣߍ߲߫ ߛߙߊ߬ߟߏ߲߬ ߞߊ߲ߕߌ߮ ߖ߭ߎ߳ߟߌߛ ߡߊ߯ߘߊ߫ ߓߌߦߏ߫ ߟߋ߬ ߣߐ߭ ߘߐ߫߸ ߏ߬ ߡߍ߲ ߕߘߍ߬ ߛߘߋߦߊߥߏ ߞߊ߬ߝߏ߬ ߞߎ߲ߕߌ߮ ߟߎ߬ ߣߌ߫ ߞߎ߲߬ߠߊ߬ߛߌ߮ ߟߎ߬ ߟߊ߫ ߜߊ߬ߙߊ ߞߊ߲ߕߌ߯ߦߊ ߟߊ߫ ߤߊߟߌ߬ߛߊ߫߸ ߊ߬ ߣߌ߫ ߟߊ߬ߘߍ߬ ߞߍ߫ ߘߴߊ߬ߟߋ ߟߋ߬ ߟߊ߫ ߖߡߊ߬ߣߊ ߞߣߐ߫ ߛߙߊ߬ߟߏ߲߬.
ߊߟߎ߫ ߦߴߊ߬ ߟߐ߲߫ ߞߏ߫ ߛߘߋߦߊߥߏ ߞߊ߲ߕߌ߯ߦߊ ߣߌ߫ ߥߛߊ߬ߓߊ߰ߦߊ ߞߊ߲ߕߌ߯ߦߊ ߕߍ߫ ߞߋߟߋ߲߫ ߘߌ߫، ߞߊ߬ߕߎ߲߯߸ ߛߘߋߦߊߥߏ ߞߊ߲ߕߌ߮ ߟߊ߫ ߓߊ߯ߙߊ ߟߋ߬ ߘߍ߭ ߟߊ߫ ߓߘߍ߬ߓߘߍ߬ߟߌ ߟߊ߬ߛߌ߲ ߠߎ߬ ߢߊߓߐ ߘߌ߫߸ ߝߘߊ߬ߝߌ߲߬ߠߊ߫ ߕߟߋ߬ߓߋ߬ ߖߡߊߣߊ ߓߍ߯ ߞߊ߲ߕߌ߮ ߦߋ߫ ߘߍ߭ ߡߍ߲ ߘߐ߫߸ ߏ߬ ߟߊ߫ ߕߊ߯ߡߊ߫ ߛߌߟߊ ߟߎ߬ ߢߊߓߐ ߦߴߊ߬ߟߋ ߟߋ߬ ߓߟߏ߫ ߕߍߓߊ߯ߦߊ߫ ߞߏ ߟߎ߬ ߣߌ߫ ߟߊ߬ߞߊ߲߬ߘߊ߬ߟߌ ߣߌ߫ ߛߌ߲߬ߝߏ߲߬ߘߊ߬ ߞߏ ߟߎ߬ ߟߊ߫ ߞߎ߲߬ߠߊ߫.
ߊ߬ ߟߊ߫ ߟߐ߬ߒ߬ߞߋ߬ߟߊ ߘߊߡߌ߬ߣߊ߬ߣߴߊ߬ ߓߟߏ߫ ߛߘߋߦߊߥߏ ߞߎ߲߬ߠߊ߫ ߟߋ߬ ߣߌ߲߬߸ ߞߵߊ߬ ߛߐ߬ߘߐ߲߬߸ ߡߙߊ߬ߒ߬ߡߊ߬ߝߋ߲߬ߕߌ߰ ߞߙߎ ߟߎ߬ ߓߘߊ߫ ߖߊߡߊ߲߫ ߕߟߋ߬ߓߋ߬ ߊߝߙߌߞߌ߬ ߞߊ߲߬߸ ߓߘߍ߬ߓߘߍ߬ߟߌ߬ ߞߏ߬ ߡߊ߲ߞߊ߲ ߠߎ߬ ߦߴߌߘߐ߫߸ ߡߊ߬ߟߌ ߕߊ߬ߣߍ߲ ߞߵߊ߬ ߟߊ߫ ߓߙߎߞߌߣߊ߫ ߝߊ߬ߛߏ߬ ߣߌ߫ ߖߋ߬ߟߌ߬ߓߊ߬ߘߎ߯ ߞߊ߲߬߸ ߏ߬ ߟߎ߬ ߓߘߴߊ߬ߟߎ߫ ߛߋ߲߬ߓߐ߫ ߛߘߋߦߊߥߏ ߘߐ߫߸ ߓߌ߲߬ߓߊߥߏ ߓߋ߬ߣߍ߲߫ ߖߡߊ߬ߣߊ ߘߏ߫ ߟߎ߫ ߞߊ߲߬߸ ߛߐ߬ߘߐ߲ ߓߌ߲߬ߓߊߥߏ߸ ߊ߬ ߣߌ߫ ߖߌ߰ߣߌ߬ߦߟߍ ߘߐߣߐ߰ߦߊ ߓߌ߲߬ߓߊߥߏ.
߂߀߂߄ ߠߊ߫߸ ߓߊ߬ߛߌߙߎ߬ ߖߏ߬ߡߊߦߌ߬ ߝߊߦߌ߬ ߟߋ߬ ߞߙߍߞߙߍ߫ ߘߊ߫ ߛߘߋߦߊߥߏ ߓߟߏ߫ ߞߵߊ߬ ߞߍ߫ ߕߍߝߐߟߊ ߘߌ߫ ߛߘߋߦߊߥߏ ߣߌ߫ ߞߌ߬ߢߍ߬ߞߏ߲߬ߞߏ߬ ߞߊߝߏ ߟߎ߬ ߟߊ߫ ߢߌ߲߬ߘߍ ߕߍ߫، ߏ߬ ߘߐ߫߸ ߊ߬ ߟߊ߫ ߟߐ߬ߘߎ߰ ߞߎ߬ߘߊ߬ ߛߐߘߐ߲ ߢߌ߲߬ ߞߊ߫ ߞߊ߲߫ ߞߊ߬ ߞߍ߫ ߊ߬ ߓߟߏ߫ ߘߊߘߐߖߊߥߏ ߟߋ߬ ߟߊ߫.
ߏ߬ ߘߐ߫߸ ߡߍ߲ ߕߎ߲߰ߣߍ߲߫ ߛߎߥߊ߲ߘߟߌ ߢߌ߲߬ ߠߊ߫߸ ߊ߬ ߞߊ߫ ߞߊ߲߫ ߞߵߊ߬ ߟߊ߫ ߞߍߕߊ߫ ߜߘߋߜߘߋ ߟߎ߫ ߟߋ߬ ߢߊߝߐ߫ ߡߎ߬ߕߎ߲߬߸ ߊ߬ ߞߊ߫ ߞߊ߲߫ ߞߊ߬ ߝߟߐߦߊ ߘߌ߫ ߡߍ߲ ߠߎ߬ ߡߵߊ߬ ߟߊ߫ ߟߐ߬ߒ߬ߞߋ߬ߟߊ ߞߎ߲߬ߕߊ߮ ߣߌ߲߬ ߞߣߐ߫߸ ߞߊ߬ ߓߍ߲߬ ߟߊ߬ߞߊ߲߬ߘߊ߬ߟߌ ߓߊ߲ߓߊ߲ ߡߊ߬߸ ߛߐ߬ߘߐ߲ ߘߟߊߞߢߊ ߡߊ߬߸ ߊ߬ ߣߌ߫ ߛߘߋߦߊߥߏ ߣߌ߫ ߞߞߢ ߓߟߏ ߘߌ ߢߐ߲߮ ߡߊ߬.
Aucun commentaire pour le moment.