ߡߏߙߌ߫ ߞߊ߬ߡߙߊ߫ ߖߐ߲߬ߡߊߛߌߣߌ߲ߟߐ߲߫ ߡߍ߲ ߦߋ߫ ߞߟߊ߬ߘߏ߲ߛߏ ߟߎ߬ ߘߐ߫ ߓߏ߲߬ߓߊ ߘߏ߫ ߘߌ߫߸ ߊ߬ ߟߊ߫ ߞߊ߲ߞߊ߲߫ ߣߊߟߌ ߢߌ߲߬ ߘߐ߫߸ ߊ߬ ߛߋ߫ ߘߊ߫ ߛߙߊ߬ߣߎ߲߬ ߠߊ߫ ߞߊ߬ ߓߍ߲߬ ߊ߬ ߟߊ߫ ߛߓߍߟߌ߫ ߞߏ ߟߌ߬ߤߟߊ ߡߊ߬، ߞߊ߬ߕߎ߲߯߸ ߊ߬ ߦߋ߫ ߡߐ߰ ߛߌߦߊߡߊ߲߫ ߢߣߊ߫ ߟߋ߬ ߝߘߊ߬ߝߌ߲߬ߠߊ߫߸ ߞߏ߫ ߞߏ ߟߎ߬ ߦߋ߫ ߛߎߓߊ߯ߦߊ߫ ߞߏ߫ ߣߌ߫ ߜߎ߲߬ߘߎ߬ ߞߏ߫ ߟߋ߬ ߘߌ߫، ߓߊ߬ߙߌ߬߸ ߞߊ߬ߙߊ߲߬ߝߊ ߞߊ߲߫ ߞߏ߫ ߊ߬ߟߋ ߓߊ߯ߙߊ ߟߋ߬ ߛߓߍߟߌ ߘߌ߫، ߊߘߡߊߘߋ߲ ߓߍ߯ ߣߴߊ߬ ߟߊ߫ ߓߊ߯ߙߊ߫ ߦߋ߫ ߢߊ ߡߍ߲ ߖߐ߫߸ ߊ߬ߟߋ ߝߣߊ߫ ߕߊ ߏ߬ ߟߋ ߛߓߍߟߌ.

ߊ߬ ߞߵߊ߬ ߦߌ߬ߘߊ߬ ߞߏ߫: <<ߓߍ߯ ߣߴߌ ߘߊ߲߫ ߢߊ߫ ߟߵߊߟߊ߫ ߓߟߏ߫߸ ߊߟߊ߫ ߝߣߊ߫ ߞߵߊ߲ߠߎ߬ ߘߊ߲߫ ߏ߬ ߟߋ ߞߊ߲ߡߊ߬߸ ߣߴߊ߬ ߦߋ߫ ߛߓߍߟߌ ߘߌ߫.>> ߊ߬ ߞߵߏ߬ ߝߐ߫.

ߞߟߊ߬ߘߏ߲ߛߏ ߞߵߊ߬ ߦߌ߬ߘߊ߬ ߞߏ߫ ߣߴߊ߬ߟߋ ߡߊ߫ ߛߓߍߟߌ߫ ߞߍ߫ ߟߏ߲ ߡߍ߲߸ ߊ߬ ߖߎ߬ߛߎ ߕߍ߫ ߘߌߦߊ߫ ߟߴߊ߬ ߟߊ߫، ߞߵߊ߬ ߟߴߊ߬ ߞߊ߲߬߸ ߞߏ߫ ߊ߬ ߕߍ߫ ߛߍ߰ ߟߊ߫ ߛߓߍߟߌ ߟߋ߬ ߝߣߊ߫ ߘߐ߫ ߊ߬ ߟߊ߫ ߢߣߊߡߦߊ ߞߣߐ߫، ߊ߬ ߞߊ߲߫ ߞߏ߫: <<ߞߊ߬ ߕߋ߬ߟߋ ߓߐ߫ ߞߊ߬ ߓߋ߬ ߊ߲ ߡߊ߫ ߛߓߍߟߌ ߞߍ߫߸ ߊ߬ ߦߋ߫ ߟߋ߬ ߦߏ߫ ߌ ߓߊ߯ ߣߵߊ߬ ߝߐ߫ ߊ߲ ߡߊ߬ ߞߏ߫ ߌ ߣߊ߬ ߓߘߊ߫ ߛߊ߬، ߦߏ߫ ߌ ߡߊ߲ߛߊ ߛߊ߲߬ߞߊ ߓߊ߯ ߟߊߕߋ߬ ߌ ߟߊ߫، ߏ߬ ߦߴߌ ߖߛߎ߬ߞߎ߲ ߕߌߢߍ߫ ߟߊ߫ ߢߊ ߡߍ߲ ߗߐ߫߸ ߕߋ߬ߟߋ ߝߍߘߍ߲߫ ߞߊ߬ ߥߴߊ߬ ߛߌ߰ ߥߎ߬ߙߊ ߟߊ߫߸ ߊ߲ ߡߊ߫ ߝߋ߲߫ ߛߓߍ߫߸ ߏ߬ ߦߴߏ߬ ߟߋ ߢߐ߲߰ ߞߍ߫ ߟߴߊ߲ ߠߊ߫.>> ߊ߬ ߝߐ߫، ߞߵߊ߬ ߦߌ߬ߘߊ߬ ߞߏ߫ ߊ߬ߟߋ ߦߋ߫ ߞߊ߬ߟߊ ߟߋ߬ ߟߊߕߏߟߏ߲߫ ߠߊ߫ ߛߎ ߣߌ߫ ߕߋ߬ߟߋ، ߓߊߏ߬߸ ߊ߬ ߘߊ߲ߣߍ߲߫ ߏ߬ ߟߋ ߞߊ߲ߡߊ߬.

ߛߊ߲߬ ߛߋߦߌ߲߫ ߞߘߐ߫߸ ߊ߬ ߛߋ߫ ߘߊ߫ ߞߊ߬ߝߊ߫ ߂߀߀ ߛߓߍ߫ ߟߊ߫، ߊ߬ߟߋ߫ ߖߍ߬ߘߍ ߞߊ߲߫ ߞߏ߫ ߊ߬ ߓߘߊ߫ ߞߊ߬ߝߊ߫ ߂߀߀ ߞߐߛߊ߬ߥߏ߬، ߓߊ߬ߙߌ߬߸ ߞߏ߫ ߊ߬ ߡߊ߫ ߝߏߦߌ߬ ߞߍ߫ ߏ߬ ߘߌ߫ ߡߎߣߎ߲߬، ߊ߬ ߦߴߏ߬ ߖߊ߬ߕߋ߬ ߟߊ߫ ߞߏ߫ ߘߊߡߌߣߊ߫ ߜߊ߲ߛߊ߲ ߠߋ߬ ߘߌ߫.

<<ߊ߲ ߓߘߊ߫ ߛߋ߫ ߞߊ߬ ߞߊ߬ߝߊ߫ ߂߀߀ ߛߓߍ߫߸ ߓߊ߬ߙߌ߫߸ ߏ߬ ߕߍ߫ ߝߋ߲߫ ߘߌ߫ ߘߋ߬߸ ߓߊߏ߬߸ ߊ߲ ߧߴߊ߬ ߝߍ߬ ߞߊ߬ ߡߍ߲ ߛߓߍ߫߸ ߛߋ߫ ߡߊ߫ ߞߍ߫ ߏ߬ ߕߟߊ ߘߐ߫ ߝߟߐ߫.>> ߊ߬ ߞߵߏ߬ ߝߐ߫.

ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߟߊ߫ ߞߊ߬ߝߊ ߟߎ߬ ߦߋ߫ ߢߊ߫ ߛߊ߬ߓߊ߫ ߟߋ߬ ߡߊ߬߸ ߛߓߍߦߊߣߍ߲ ߠߎ߬߸ ߘߟߊߡߌ߬ߣߊ߬ߣߍ߲ ߠߎ߬߸ ߊ߬ ߣߌ߫ ߓߊߕߐ߬ߡߐ߲߬ߣߍ߲ ߠߎ߬، ߞߊ߬ߝߊ ߏ߬ ߟߎ߬ ߘߐ߫߸ ߘߏ߫ ߟߎ߫ ߞߐߜߍ߫ ߗߡߍ߬ ߦߙߌߞߊ߫߸ ߘߏ߫ ߟߎ߫ ߥߊߣߍ߲߫ ߝߏ߯ ߞߐߜߍ߫ ߥߊ߯ ߞߋߟߋ߲߫ ߣߌ߫ ߞߐ߫، ߏ߬ ߡߍ߲ ߦߴߊ߬ ߟߊ߫ ߓߊ߯ߙߊ߫ ߞߟߊ߬ߥߟߎ ߣߴߊ߬ ߟߊ߫ ߕߌߙߌ߲ߠߌ߲߫ ߤߐߞߌ ߦߌ߬ߘߊ߬ ߟߊ߫߸ ߊ߬ ߞߣߐߘߐ߫ ߟߐ߲ߠߌ߲ ߠߎ߬ ߟߊߕߊ߬ߡߌ߲ ߘߐ߫ ߒߞߏ ߛߓߍߟߌ ߘߐ߫.

ߓߊ߯ߙߓߊ߫ ߛߎ߮ ߏ߬ ߘߏ߲߬ ߕߍ߫ ߞߍ߫ ߦߋ߲߬ ߕߋ߲߬߸ ߣߌ߫ ߡߊ߬ߞߕߌ߬ߟߌ߬ ߓߊ߲ߓߊߟߌ ߟߎ߬ ߕߍ߫، ߏ߬ ߟߋ ߘߐ߫߸ ߘߏ߫ ߟߎ߫ ߦߴߊ߬ ߖߌ߰ ߟߊ߫ ߞߏ߫ ߊ߬ ߟߊ߫ ߞߊ߬ߝߊ ߟߎ߬ ߦߋ߫ ߞߝߊ߬ ߘߟߊߡߌ߬ߣߊ߬ߣߍ߲ ߠߎ߫ ߟߋ߬ ߘߌ߫߸ ߡߍ߲ ߠߎ߬ ߕߍ߫ ߓߊ߯ߙߊ߫ ߜߍߟߍ߲߫ ߘߌ߫߸ ߥߟߴߊ߬ ߕߴߛߋ߫ ߞߍ߫ ߟߊ߫ ߛߓߍߦߟߊߓߊ ߘߌ߫ ߏ߬ ߞߏߛߐ߲߬.

ߡߏߙߌ߫ ߞߡߊ߬ߙߊ߫ ߖߐ߲߬ߡߊߛߌߣߌ߲ߟߐ߲߫ ߡߊ߫ ߛߐ߲߬ ߞߎߡߊ ߝߐ߫ ߢߊ ߏ߬ ߡߊ߬، ߊ߬ߟߋ ߟߊ߫ ߝߐߟߌ߫ ߘߐ߫߸ ߞߊ߬ߝߊ ߝߊ߬ߓߏ߲ ߓߍ߯ ߡߊ߬ߞߏ ߦߋ߫ ߟߐ߲ߠߌ߲ ߞߛߊߞߊ ߘߏ߫ ߟߋ߬ ߟߊ߫߸ ߓߊߓߋߟߌ ߖߍ߬ߘߍ ߘߐ߫ ߝߋߎ߫، ߓߊߏ߬߸ ߊ߬ ߓߕߐ߫ ߞߊ߲ ߡߍ߲ ߘߐ߫߸ ߊ߬ ߕߊ߯ߕߐ߫ ߞߊ߲ ߡߍ߲ ߘߐ߫߸ ߝߏ߫ ߞߵߏ߬ ߝߌ߬ߟߊ ߓߍ߯ ߟߋ߬ ߓߊߓߋ߬.

<<ߌ ߕߴߛߋ߫ ߝߋ߲߫ ߛߓߍ߫ ߟߊ߫߸ ߌ ߡߊ߫ ߡߍ߲ ߟߐ߲߫.>> ߊ߬ ߞߵߏ߬ ߟߋ ߞߍ߫ ߖߋ߬ߓߌ߬ߟߌ ߘߌ߫.

ߊ߬ ߞߵߊ߬ ߦߌ߬ߘߊ߬ ߞߏ߫ ߛߐ߬ߛߐ߬ߟߌ߬ ߕߴߊ߬ ߘߐ߫ ߝߋߎ߫߸ ߊ߬ ߟߊ߫ ߞߊ߬ߝߊ ߟߎ߬ ߕߍ߫ ߞߋߟߋ߲߫ ߘߌ߫، <<ߊ߲ ߞߊ߬ ߞߊ߬ߝߊ ߂߀߀ ߡߍ߲ ߛߓߍ߫ ߛߊ߲߬ ߈ ߞߘߐ߫߸ ߊ߲ ߞߵߊ߬ ߞߍ߫ ߦߙߋߟߋ߲ ߘߏ߫ ߟߋ߬ ߘߌ߫߸ ߞߊ߬ ߞߊ߬ߝߊ ߂߀߀ ߕߐ߮ ߛߙߍߘߍߦߊ߫ ߞߊ߬ ߖߌ߰߸ ߡߍ߲ ߠߎ߬ ߘߟߊߡߌ߬ߘߊ߬ߣߍ߲߫߸ ߡߍ߲ ߠߎ߬ ߛߓߍߦߊߣߍ߲߫߸ ߡߍ߲ ߠߎ߬ ߓߊߕߐ߬ߡߐ߲߬ߣߍ߲߫.>> ߊ߬ ߟߊ߫ ߛߙߊ߬ߣߎ߲ ߏ߬ ߟߋ ߞߵߊ߬ ߦߌ߬ߘߊ߬ ߞߏ߫ ߊ߬ ߟߊ߫ ߞߊ߬ߝߊ ߟߎ߬ ߦߋ߫ ߛߎ߲߫ ߛߊ߬ߓߊ ߏ߬ ߟߋ ߘߌ߫.

ߞߟߊ߬ߘߏ߲ߛߏ ߟߊ߫ ߝߐߟߌ߫ ߘߐ߫߸ ߘߟߊߡߌߣߊߟߌ ߕߍ߫ ߓߊ߯ߙߊ߫ ߘߋ߲ߣߍ߲߫ ߘߌ߫، ߊ߬ ߞߵߊ߬ ߝߐ߫ ߏ߬ ߟߋ ߘߐ߫ ߞߏ߫: <<ߘߟߊߡߌߘߊߟߌ ߞߊ߫ ߜߍ߬ߟߍ߲߫ ߡߐ߰ ߖߍ߬ߘߍ ߡߙߌߦߊ ߛߓߍ ߘߌ߫߸ ߞߊ߬ ߟߐ߲ߠߌ߲ ߓߐ߫ ߞߊ߲ ߘߏ߫ ߘߐ߫ ߞߵߊ߬ ߟߊߣߊ߬ ߞߊ߲߫ ߜߘߍ߫ ߘߐ߫߸ ߏ߬ ߜߍ߬ߟߍ߲߬ߡߊ߲߫ ߌߟߋ ߖߍ߬ߘߍ ߞߍ ߘߌ߫ ߞߵߌ ߛߌ߰ ߞߊ߬ ߌ ߖߍ߬ߘߍ ߟߊ߫ ߟߐ߲ߣߍ߲ ߘߏ߫ ߛߓߍ߫.>> ߊ߬ ߞߵߏ߬ ߦߌ߬ߘߊ߬.

ߡߊ߬ߞߕߌ߬ߟߌ ߣߌ߲߬ ߞߏ߬ߣߌ߲ ߓߍ߯ ߣߴߊ߬ ߕߊ߫߸ ߊ߬ ߦߋ߫ ߟߐ߲ߠߌ߲ ߠߊߖߘߌߥߊ ߞߊ߲߬ ߝߊ߬ߛߏ ߛߓߍߟߌ ߘߐ߫ ߖߐ߫، ߊ߬ ߞߊ߲߫ ߞߏ߫ ߊ߬ ߟߊ߫ ߞߝߊ߬ ߛߌߦߊߡߊ߲߫ ߛߓߍߣߍ߲ ߏ߬ ߟߎ߬ ߦߋ߫ ߞߏ߫ ߘߊߡߌߣߊ ߟߋ߬ ߘߐߙߐ߲߫ ߘߌ߫ ߡߎߣߎ߲߬߸ ߡߍ߲ ߕߐ߬ߓߊ ߦߋ߫ ߞߐ߫.