ߞߊ߲ߞߊ߲߫ ߓߘߊ߫ ߞߊ߬ߝߏ߬ߙߋ߲߬ߕߌ߰ ߞߎߘߊ߫ ߛߐ߬ߘߐ߲߬߸ ߡߍ߲ ߕߐ߯ ߞߏ߫ ߟߊ߬ߡߌߣ ߟߊߓߏ߫ ߞߙߎ߬ߡߊ߬، ߞߊ߬ߦߌ߯ ߘߓߊ߬ߕߊ ߕߟߋ߬ ߃߁ ߠߋ߬ ߡߊ߬߸ ߖߌ߬ߣߍ߬ߞߊ ߓߍ߯ ߞߵߊ߬ ߞߊ߲ߠߊߓߐ߫߸ ߞߵߊ߬ߟߎ߬ ߟߊ߫ ߞߎ߲߬ߕߌ߮ ߟߎ߬ ߛߎߥߊ߲ߘߌ߫ ߥߛߊ߬ߘߋ߲߬ߧߊ߬ ߞߎ߲߬ߠߊ߫߸ ߊ߬ ߣߌ߫ ߞߊ߬ߝߏ߬ߙߋ߲߬ ߞߎ߲ߘߊ߫، ߏ߬ ߟߋ ߘߐ߫߸ ߞߊ߲ߞߊ߲߫ ߞߵߊ߬ ߟߊ߫ ߞߊ߬ߝߏ߬ߙߋ߲ ߞߏߟߊߕߍ߯ ߞߎߘߊ ߛߎߥߊ߲ߘߌ߫߸ ߡߐ߰ ߥߊ߯ ߗߡߍ߬ ߣߊ߯ߣߌ߲߫ ߣߌ߫ ߞߐ߫ ߞߵߊ߬ߟߎ߬ ߓߟߏ ߟߐ߬ ߡߍ߲ ߠߎ߬ ߟߊ߫. ߞߊ߬ߝߏ߬ߙߋ߲߬ߕߌ߰ ߞߎߘߊ ߛߍߥߊߣߍ߲ ߞߵߊ߬ ߛߍ߲߬ߓߍ߬ ߊߟߊ߫ ߘߐ߫߸ ߞߊ߬ ߞߊ߲ߞߊ߲߫ ߞߊ߬ߝߏ߬ߙߋ߲ ߘߏ߲߬ ߊߟߊ߫ ߓߟߏ߫߸ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߣߌ߫ ߛߏ߫ ߞߣߐ߫ ߡߐ߮ ߟߎ߫ ߟߋ߬ ߞߍߕߐ߫ ߞߏ ߟߎ߬ ߟߊߕߍ߰ ߟߊ߫ ߢߐ߲߮ ߝߍ߬، ߞߊ߬ߝߏ߬ߙߋ߲߬ߕߌ߰ ߓߐߓߊ߯ߕߐ ߊ߬ߙߊ߬ߝߊ߲߬ ߡߎߛߊ߫ ߞߎ߬ߟߌߓߊ߬ߟߌ߫ ߞߵߊ߬ ߦߌ߬ߘߊ߫ ߘߊ߲߬ߕߍ߰ߟߌ ߘߐ߫߸ ߞߏ߫ ߊ߬ߟߋ߫ ߞߊ߬ ߛߊ߲߭ ߝߌ߬ߟߊ߬ ߣߌ߫ ߞߊߙߏ߫ ߝߌ߬ߟߊ߬ ߣߌ߫ ߕߟߋ߬ ߕߊ߲ ߡߍ߲ ߞߍ߫ ߞߊ߲ߞߊ߲߫ ߞߊ߬ߝߏ߬ߙߋ߲ ߞߎ߲߬ߠߊ߫߸ ߊ߬ ߞߵߊ߬ ߛߋߞߏ ߞߍ߫ ߛߊߣߌ߲ߧߊ ߘߐ߫߸ ߝߏߟߏ߲߫ ߘߓߐ ߘߐ߫، ߞߊ߬ ߓߊ߲߫ ߞߊ߬ ߞߊ߬ߝߏ߬ߙߋ߲ ߓߏ߲ߓߊ߫ ߞߋߟߋ߲ ߣߴߊ߬ ߞߣߐ߫ ߛߓߍߘߊ ߡߎ߰ߡߍ ߟߊߞߎߘߦߊ߫ ߞߵߊ߬ߟߎ߬ ߞߣߐߞߍ߫، ߊ߬ߟߎ߫ ߞߵߊ߬ߟߎ߬ ߛߋߞߏ ߞߍ߫ ߓߌߦߊ߲ ߠߎ߬ ߟߊ߫ ߞߎ߲߬ߠߊ߬ߓߌߟߊ ߞߍ߬ߟߍ ߘߐ߫߸ ߞߊ߬ ߦߙߌ߫ ߕߘߎ ߟߎ߬ ߞߍ߫

.

ߊ߬ߙߊ߬ߝߊ߲߬ ߡߎߛߊ߫ ߞߎ߬ߟߌߓߊ߬ߟߌ߬ ߟߊ߫ ߘߊ߲߬ߕߍ߰ߟߌ ߣߌ߲߬ ߘߐ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߛߋ߫ ߘߊ߫ ߞߊ߬ߙߊ߲߬ߓߏ߫ ߛߊ߬ߓߊ߫ ߟߐ߬ ߟߊ߫߸ ߡߍ߲ ߠߎ߬ ߦߋ߫ ߞߊ߬ߙߊ߲߬ߕߊ߬ ߓߊߖߎߟߞߊ ߘߌ߫، ߝߊߙߊ߲ߞߏ߫ ߊߙߊߓߎ߫ ߞߋߟߋ߲߫ ߦߴߏ߬ ߘߐ߫، ߗߋߘߋ߲߫ ߓߟߏߡߊߞߊ߬ߣߍ߲ ߠߎ߬ ߢߍߡߐ߯ ߞߘߐ ߞߵߊ߬ ߦߌ߬ߘߊ߬߸ ߞߏ߫ ߊ߬ߟߎ߬ ߓߘߊ߫ ߞߊ߲ߞߊ߲߫ ߥߊ߬ߦߌ߬ߘߊ ߟߊߞߎߘߦߊ߫ ߛߌ߰ ߛߋ߲߭ߞߊ߲߬߸ ߞߵߏ߬ ߟߊ߫ ߖߌߓߘߎ߫ ߝߌ߬ߟߊ߫ ߟߐ߭ ߞߊ߲߬߸ ߏ߬ ߟߎ߬ ߡߍ߲ ߠߎ߬ ߓߊ߯ߙߊ ߟߎ߬ ߦߴߌߘߐ߫ ߤߊ߲߯ ߕߋ߲߬.

ߟߊ߬ߓߊ߲ ߘߐ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߞߵߊ߬ ߟߊߥߟߌ߬ ߛߏ ߛߊߣߌ߲ߧߊ ߡߊ߬،ߤߊߟߌ߬ ߣߴߊ߬ ߢߊ߫ ߕߍ߫ ߜߍ߫ ߘߐ߫߸ ߞߏ߫ ߊ߬ߟߎ߬ ߛߋ߫ ߘߊ߫ ߘߊ߲߬ߞߊ߬ߞߎߟߎ߲߫ ߝߌ߬ߟߊ߬ ߣߌ߫ ߕߙߏ߬ߞߏ߬ߘߓߊ߬ ߞߋߟߋ߲߫ ߛߊ߲߬ ߠߊ߫ ߞߵߏ߬ ߕߏ߫ ߊ߬ߟߎ߬ ߞߐ߫.

ߏ߬ ߟߋ ߞߍ߫ ߘߴߊ߬ߟߋ ߟߊ߫ ߛߙߊ߬ߣߎ߲ ߠߊߢߐߢߐ߲ߣߍ߲ ߘߌ߫߸ ߞߵߏ߬ ߞߍ߫ ߛߙߊ߬ߒ߬ߞߊ߲߬ߠߊ ߘߌ߫߸ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ ߓߘߊ߫ ߥߊ߫.

ߘߊ߲߬ߕߍ߰ߟߌ߬ ߛߊߣߌ߲ ߏ߬ ߟߎ߬ ߓߍ߯ ߞߐߝߍ߬߸ ߘߊ߫ ߞߏ߬ߣߌ߲߬ ߡߊ߫ ߛߎ߫ ߣߊ߲߬ߝߟߏ߬ ߞߏ ߘߐ߫߸ ߡߍ߲ ߛߐ߬ߘߐ߲߬ ߘߊ߫ ߦߋ߲߬߸ ߡߍ߲ ߕߏ߫ ߘߊ߫ ߦߋ߲߬.

ߞߊ߬ߝߏ߬ߙߋ߲߬ߕߌ߰ ߞߎߘߊ߫ ߟߊ߬ߡߌߣ ߟߊߓߏ߫ ߞߙߎ߬ߡߊ߫ ߞߊ߬ ߟߊ߬ߤߘߌ ߕߊ߬ ߞߊ߲ߞߊ߲߫ ߦߋ߫߸ ߞߏ߫ ߟߊߒߠߦߊ ߡߍ߲ ߟߊߣߴߊ߬ ߘߐ߫߸ ߊ߬ ߘߴߏ߬ ߡߝߊ߫، ߝߊ߬ߛߏ߬ ߞߊߣߌ߲ ߠߊ߫߸ ߊ߬ ߣߌ߫ ߖߡߊ߬ߣߊ ߛߊ߬ߙߌ߬ߦߊ ߟߎ߬ ߡߊߓߏ߲߬ߧߊ ߟߊ߫.

ߊ߬ ߞߊ߬ ߟߊ߬ߤߘߌ ߕߊ߬߸ ߞߏ߫ ߊ߬ ߘߴߊ߬ ߕߟߏߡߊߟߐ߬ ߞߊ߲ߞߊ߲ߞߊ ߟߎ߬ ߟߊ߫߸ ߓߏ߲߬ߧߊ ߞߣߐ߫، ߞߵߊ߬ߟߎ߬ ߓߟߏ ߟߊ߫ ߢߐ߲߯ ߞߊ߲߬، ߞߏ߫ ߊ߬ ߘߌ߫ ߞߊ߲ߞߊ߲߫ ߞߊ߬ߝߏ߬ߙߋ߲ ߞߍ߫ ߝߘߏ߬ߓߊ ߘߌ߫߸ ߡߍ߲ ߘߊ ߟߊߞߊ߬ߣߍ߲߬ ߓߍ߯ ߦߋ߫߸ ߣߌ߫ ߢߣߊߕߐߡߐ߲ߠߌ߲߫ ߕߍ߫.

ߊ߬ ߞߵߊ߬ ߟߊ߫ ߛߙߊ߬ߣߎ߲ ߞߎ߲߭ߝߊ߰  ߞߟߌߟߌ ߟߋ߬ ߡߊ߬߸ ߞߊ߬ ߞߊ߲ߞߊ߲ߞߊ ߟߎ߬ ߞߟߌ߫߸ ߞߏ߫ ߊ߬ߟߎ߬ ߦߋ߫ ߓߍ߲߬߸ ߞߵߊ߬ߟߎ߬ ߓߟߏ ߘߌ߫ ߢߐ߲߮ ߡߊ߬.

ߟߊߓߏ߫ ߞߙߎ߬ߡߊ߬ ߟߊߛߌ߱ ߊ߬߫ ߟߊ߫ ߥߊ߰ߣߍ߲ ߘߐ߫߸ ߞߊ߲ߡߊߞߍ ߓߌ߬ߟߊ߬ ߘߴߊ߬ ߣߴߊ߬ ߟߊ߫ ߛߙߍߞߍ ߓߍ߯ ߟߋ߬ ߞߊ߬ߡߊ߲߬ ߠߊ߫߸ ߖߡߊ߬ߣߊ ߕߐ߰ߡߊ߬ߛߙߋ ߘߌ߫ ߖߏ߲߬ߖߏ߲߫ ߞߟߐ߬ ߛߓߊ߬ߡߊ ߘߐ߫.

ߞߏߟߊߕߍ߯ ߄߅ ߓߍ߯ ߢߊ ߕߘߍ߬ ߜߍ ߘߐ߫، ߡߍ߲ ߖߊ߲߬ߖߏ߲ ߞߎ߲߬ߠߊߛߌ߰ ߘߊ߫ ߞߊ߲ߞߊ߲߫ ߡߙߊ߬ߓߊ߮ ߓߟߏ߫، ߞߊ߬ߝߏ߬ߙߋ߲ ߞߣߐߟߊ ߝߊߣߍ߲߫ ߠߋ߬ ߕߘߍ߬߸ ߓߍ߯ ߟߊߘߍ߬ߣߍ߲ ߛߍߥߊߣߍ߲߫ ߡߐ߰ ߞߎߘߊ ߟߎ߬ ߟߊ߫߸ ߞߵߊ߬ ߛߐ߬ߘߐ߲߬ ߓߊ߯ߙߊ߫ ߘߍ߬ߜߍ ߛߌ߰ߣߍ߲߫ ߞߵߊ߬ߟߎ߬ ߡߊߞߐ߬ߣߐ߲߬، ߊ߬ߟߎ߬ ߓߘߊ߫ ߣߊ߬ ߞߊ߲ߞߊ߲߫ ߞߊ߬ߝߏ߬ߙߋ߲ ߞߎ߲߬ߠߊ߫߸ ߊ߬ߟߎ߬ ߡߴߊ߬ ߟߐ߲߫ ߊ߬ߟߎ߫ ߞߊ߬ ߖߊ߬ߕߋ ߡߍ߲ ߛߐ߬ߘߐ߲߫ ߞߏ߲߬ߘߏ ߟߊ߫߸ ߞߘߐ߬ߡߊ߲ ߡߊ߫ ߘߊ߲߬ߕߍ߰ߟߌ߬ ߞߍ߫߸ ߊ߬ߟߎ ߖߍ߬ߘߍ ߝߣߊ߫ ߡߊ߫ ߝߋ߲߫ ߝߐ߫ ߊ߬ ߞߏ ߞߊ߲߬، ߡߐ߰ ߄߅ ߓߘߊ߫ ߣߊ߬ ߡߐ߰ ߁߁ ߣߐ߬ߘߐߓߌ߬ߟߊ߬، ߓߍ߯ ߞߏ߬ߣߌ߲ ߢߊ ߥߛߎߣߴߊ߬ߟߎ߬ ߘߐ߫߸ ߞߵߊ߬ ߟߐ߲߫߸ ߊ߬ߟߎ߬ ߛߋߕߐ߫ ߡߍ߲ ߞߍ߫ ߟߊ߫ ߛߊ߲߬ ߟߏ߯ߟߎ߫ ߣߊ߬ߕߐ ߣߌ߲߬ ߞߣߐ߫.