ߞߊ߬ߙߊ߲ ߛߊ߯ߘߊ߫ ߝߟߐ ߓߊ߲߬ߘߊ߬ߡߌߣߊ (ߞߛߝߓ) ߡߍ߲ ߦߋ߫ ߛߐ߬ߟߐ ߘߌ߫߸ ߏ߬ ߂߀߂߆ ߞߘߐߓߐߟߌ ߓߘߊ߫ ߘߊߡߌ߬ߣߊ߬، ߞߊ߲ߞߊ߲߫ ߕߊ ߕߊߟߊ߲߫ ߝߟߐ ߜߊ߬ߛߌ߬ ߘߊ߫ ߝߊ߰ߡߊ ߟߎ߬ ߓߟߏ߫ ߡߊߙߌߦߌ߲߫ ߒߜ߭ߎ߬ߥߊ߬ߓߌ߫ ߞߊ߬ߙߊ߲߬ߘߊ ߣߌ߫ ߞߊ߬ߙߊ߲߬ߘߊ߬ߓߊ ߟߋ߬ ߟߊ߫ ߥߊ߬ߛߌ߬ߥߙߊ ߕߋ߬ߟߋ߫ ߂߂ ߣߌ߲߬ ߡߊ߬، ߛߌߟߊ ߟߊߞߊ߬ ߘߊ߫ ߕߌ߲߬ߞߎߘߎ߲ ߞߎ߲߬ߠߊ߬ߛߌ߰ߟߊ ߟߋ߬ ߓߟߏ߫߸ ߝߊߙߌ߲߫ ߊ߬ߟߌ ߓߊߘߊ߬ߙߊ ߞߡߊ߬ߙߊ߬߸ ߞߵߊ߬ ߛߐ߬ߘߐ߲߬ ߡߙߊ߬ߓߊ߮ ߢߊ ߦߋ߫ ߜߍ ߘߐ߫߸ ߝߊߙߌ߲߫ ߡߏ߬ߤߊ߬ߡߍ߬ߘ ߢߊ߲ߜ߭߸ ߞߵߏ߬ ߟߊ߫ ߡߙߊ߬ߘߊ߬ߓߊ ߣߌ߫ ߕߌ߲߬ߞߎߘߎ߲ ߟߊ߬ߞߟߏ߬ߞߟߏ߬ߟߌ ߘߏ߲߬ߞߏ ߟߎ߫ ߞߊ߲߬߸ ߊ߬ ߣߌ߫ ߡߙߊ߬ߘߊ߬ߓߊ ߞߘߐߓߐߟߌ߫ ߝߊ߬ߛߏ߬ߟߊ߬ߞߊ ߜߋ߬ߟߎ߲߬ߓߊ߮ ߟߎ߬.

ߞߊ߬ ߞߐ߲߰ ߥߟߊ߬ߘߊ ߟߎ߬ ߛߓߍߝߙߏߞߏ ߘߟߊߞߊ߭ ߢߍ߫߸ ߝߊ߰ߡߊ ߟߎ߫ ߛߐ߰ ߘߊ߫ ߞߘߐߓߐߓߊ߯ߕߐ ߟߎ߬ ߟߊߟߌ ߟߋ߬ ߡߊ߬ ߡߎߣߎ߲߬߸ ߡߊ߬ߝߊ ߟߊ߫߸ ߊ߬ ߣߌ߫ ߞߊ߬ߙߏ߲ ߡߊߕߊ߲߬ߞߊ ߟߊ߫، ߓߊߏ߬߸ ߞߏߘߐߣߐ߯ߦߊ߫ ߕߴߊ߬ ߘߐ߫ ߡߎ߰ߡߍ߫.

ߘߊߦߟߍߟߌ ߞߐ ߟߋ߬ ߞߍ߫ ߘߊ߫ ߞߊ߲ߞߊ߲߫ ߡߙߊ߬ߓߊ߮ ߡߊߢߌ߬ߣߌ߲߬ߞߊ ߘߌ߫߸ ߝߊߙߌ߲߫ ߡߏ߬ߤߊ߬ߡߍ߬ߘ ߢߊ߲ߜ߭߸ ߊ߬ߟߋ߫ ߞߵߊ߬ ߦߌ߬ߘߊ߬ ߞߏ ߞߏ ߟߎ߬ ߘߊߡߌ߬ߣߊ߬ ߢߊ ߞߊ߫ ߢߌ߲߬ ߕߊ߲ߓߊ߲߫ ߞߣߐߟߊ ߟߎ߬ ߘߐ߫، <<ߊ߲ ߓߘߴߊ߬ ߦߋ߫ ߞߏ߫ ߦߙߐ ߓߍ߯ ߘߐߛߎߡߊߣߍ߲߫ ߞߏߢߊ߬، ߘߋ߲ߣߍ߲ ߠߎ߬ ߘߐߓߍ߲߬ߣߍ߲ ߓߘߊ߫ ߣߊ߬߸ ߊ߬ߟߎ߬ ߞߟߊߓߎ ߞߍ߲ߘߍ߫߸ ߊ߬ߟߎ߬ ߓߌߣߍ߲߫ ߞߊ߬ ߞߘߐߓߐߟߊ߲߫ ߝߟߐ ߣߌ߲߬ ߝߌߘߊ߲߫ ߞߵߊ߬ ߓߐ߫ ߦߋ߲߬ ߝߋߎ߫.>> ߊ߬ ߞߵߏ߬ ߟߊߛߋ߫.

ߡߙߊ߬ߓߊ߮ ߞߊ߬ ߛߙߊ߬ߣߎ߲߫ ߛߐ߬ߘߐ߲߫ ߞߵߊ߬ ߝߐ߫ ߡߊ߬ߡߌ߬ߣߊ߬ߟߌ߬ߟߊ ߟߎ߬ ߣߌ߫ ߜߋ߬ߟߎ߲߬ߠߌ߲߬ߠߊ ߟߎ߬ ߦߋ߫، ߊ߬ߟߋ ߝߍ߬߸ ߞߎ߲߬ߠߊ߬ߛߌ߰ߟߊ ߊ߬ߟߌ ߓߊߘߊ߬ߙߊ ߞߡߊ߬ߙߊ߫ ߞߊ߬ ߓߍ߯ ߦߟߌߓߌ߬ߟߊ߫ ߟߋ߬߸ ߞߏ߫ ߓߍ߯ ߦߴߌ ߓߊ߫ ߓߟߏ߫߸ ߞߏߘߐߣߐ߯ߦߊ߫ ߕߴߊ߬ ߘߐ߫ ߡߎ߰ߡߍ߫، <<ߒ ߘߌ߫ ߡߍ߲ ߝߐ߫ ߡߊ߬ߡߌ߬ߣߊ߬ߟߌ߬ߟߊ ߟߎ߬ ߦߋ߫߸ ߞߎ߲߬ߠߊ߬ߛߌ߰ߟߊ ߞߵߊ߬ ߝߐ߫ ߟߋ߬ ߞߵߊ߬ ߝߊ߬ߘߊ ߓߐ߫ ߊ߬ ߡߊ߬߸ ߞߏ߫ ߞߏߘߐߣߐ߯ߦߊ߫ ߕߴߊ߬ ߘߐ߫ ߤߊߟߌ߬ ߞߋߟߋ߲߫، ߌ ߓߊ߯ ߡߍ߲ ߞߍ߫߸ ߌ ߦߴߏ߬ ߟߋ ߛߐ߬ߘߐ߲߬ ߠߊ߫، ߡߐ߰ ߦߴߌ ߛߍ߲߫ ߠߴߌ ߣߐ߬ߜߍ ߟߋ߬ ߟߊ߫߸ ߌ ߞߎ߲߬ߜߍ ߕߍ߫ ߘߋ߬، ߊ߬ ߞߵߊ߬ ߝߐ߫ ߟߋ߬ ߊ߬ ߡߴߊ߬ ߡߊߟߍ߬ߟߍ߬߸ ߞߏ߫ ߓߍ߯ ߦߴߊ߬ ߘߐߖߊ߬ ߟߋ߬ ߞߊ߬ ߘߏ߫ ߞߍ߫߸ ߘߏߞߍ ߟߋ߬ ߦߋ߫ ߕߊ߬ ߟߊ߫.>> ߝߊߙߌ߲߫ ߡߏ߬ߤߊ߬ߡߍ߬ߘ ߢߊ߲ߜ߭ ߟߋ߬ ߞߊ߲߫ ߕߋ߲߬.

ߊ߬ ߞߎߡߊ߫ ߘߊ߫ ߜߋ߬ߟߎ߲߬ߠߌ߲߬ߠߊ ߟߎ߬ ߝߣߊ߫ ߦߋ߫ ߞߵߊ߬ߟߎ߬ ߟߊߟߌߌ߫߸ ߞߏ߫ ߊ߬ߟߎ߬ ߦߴߊ߬ߟߎ߬ ߤߊ߲ߞߟߌ ߟߊߓߊ߯ߙߊ߫߸ ߞߵߊ߬ߟߎ߬ ߞߍߕߊ ߟߐ߲߫߸ ߖߐ߲߰ߛߊ߫ ߞߘߐߓߐߟߌ ߘߌ߫ ߕߊ߬ߡߌ߲߫ ߊ߬ ߢߌ߬ߡߊ ߟߊ߫ ߢߊ ߡߍ߲ ߡߊ߬.

ߟߊ߬ߞߟߏ߬ߞߟߏ߬ߟߌ߬ߟߊ ߟߎ߬ ߟߊ߫ ߞߎ߲߬ߠߊ߫߸ ߞߊ߲ߞߊ߲߫ ߕߌ߲߬ߞߎߘߎ߲ ߟߊ߬ߞߟߏ߬ߞߟߏ߬ߟߌ ߜߋ߬ߟߎ߲߬ߓߊ߮ (ߕߟߜ) ߡߎߛߊ߫ ߞߋߕߊ߬ ߞߊ߬ ߢߌ߬ߣߊ߲߬ ߞߘߐߓߐߟߌ ߖߊ߬ߕߋ߬ߛߎ ߝߐ߫، ߊ߬ ߟߊ߫ ߝߐߟߌ߫ ߘߐ߫߸ ߞߊ߲ߞߊ߲߫ ߕߌ߲߬ߞߎߘߎ߲ ߞߊ߬ ߡߊ߬ߡߌ߬ߘߊ߬ߟߌ߬ߟߊ߫ ߁߄ ߉߆߃ ߟߋ߬ ߕߐ߮ ߛߓߍ߫ ߢߌ߬ߣߊ߲߬߸ ߡߛߏ߬ߡߊ߲߬ ߅ ߁߂߂ ߦߴߏ߬ ߘߐ߫߸ ߡߍ߲ ߠߎ߬ ߞߍߕߐ߫ ߊ߬ߟߎ߬ ߟߊ߫ ߞߘߐߓߐߟߌ ߞߍ߫ ߟߊ߫ ߕߊ߲ߓߊ߲߫ ߆߄ ߞߣߐ߫߸ ߝߘߏ߬ߓߊ߬ ߟߞߊ߬ߙߊ߲߬ߠߌ߲ ߛߌߟߊ ߝߍ߬.

ߡߎߛߊ߫ ߞߋߕߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߘߌ߫ ߕߡߊ߬ߖߌ ߓߐ߫ ߓߍ߯ ߘߐ߫߸ ߊ߬ߟߎ߬ ߓߘߊ߫ ߓߟߏߘߐߓߍ߲ ߠߎ߬ ߞߍ߫ ߊ߬ ߢߊ ߡߊ߬، <<ߕߌ߲߬ߞߎߘߎ߲ ߘߏ߲߬ߖߟߎ߬ߡߊ߬ߟߌ ߟߎ߬ ߦߴߊ߬ ߞߊ߲߬ ߞߏߛߓߍ߫߸ ߞߊ߬ ߓߍ߲߬ ߞߏߕߌ߮ ߟߊ߫ ߖߡߊ߬ߙߌ߬ ߘߌߣߍ߲ ߡߊ߬، ߏ߬ ߟߎ߫ ߟߋ߬ ߞߘߐߓߐߟߊ߲ ߠߎ߬ ߟߊߞߊ߲ߘߊ ߘߌ߫߸ ߊ߬ ߣߌ߫ ߓߊ߯ߙߟߊ ߟߎ߬ ߛߏ߬ߓߌ߬ߟߊ߬ߞߎߣߎ߲߸ ߞߵߏ߬ ߟߴߊ߬ ߦߌ߬ߘߊ ߞߊ߲߬ ߞߏ߫ ߘߐ߬ߞߏ߬ߦߊ߬ߕߏ߬ߟߌ߬ ߕߴߊ߬ ߘߐ߫ ߞߊ߬ߙߏ߲ ߞߍߢߊ߫ ߛߌ߫ ߘߐ߫.>> ߊ߬ ߞߵߏ߬ ߢߊߝߐ߫.

ߡߍ߲ ߓߍ߲߬ߣߍ߲߫ ߊ߬ ߟߐ߲ ߡߊ߬߸ ߣߌ߫ ߝߛߏ߬ߝߛߊ ߘߏ߫ ߟߎ߫ ߓߘߊ߫ ߟߊߞߙߐ߬ߛߌ߫ ߕߌ߲߬ߞߎߘߎ߲ ߞߣߐ߫߸ ߕߟߜ ߞߵߏ߬ ߝߣߊ߫ ߕߡߊ߬ߖߌ ߓߊ߲߫، <<ߒ ߧߋ߫ ߞߎߡߊ߫ ߟߴߊߟߎ߫ ߦߋ߫ ߦߙߐ ߡߍ߲ ߘߐ߫ ߣߌ߲߬߸ ߊ߲ ߡߊ߫ ߝߙߋߞߋ߫ ߝߏߦߌ߬ ߟߋ߬ ߟߊߞߏߟߐ߲߫ ߡߎߣߎ߲߬ ߞߊ߬ ߝߘߊ߫ ߕߌ߲߬ߞߎߘߎ߲ ߡߙߊ߬ߘߊ߬ߓߊ ߟߎ߬ ߟߊ߫، ߡߟߗ ߡߍ߲ ߺ ߍ ߺ ߡߍ߲߫ ߞߟߌߣߴߊ߲ ߓߟߏ߫߸ ߏ߬ ߟߎ߬ ߓߍ߯ ߞߵߊ߬ ߦߌ߬ߘߴߊ߲ ߠߊ߫ ߟߋ߬ ߞߏ߫ ߖߎ߯ߡߊ߲߫ ߛߌ߫ ߕߴߊ߬ߟߎ߫ ߝߍ߬ ߦߋ߲߬.>> ߊ߬ ߞߵߏ߬ ߦߌ߬ߘߊ߬.

ߡߍ߲ ߓߍ߲߬ߣߍ߲߫ ߞߊ߬ߙߊ߲ ߢߍߥߟߊ ߟߎ߫ ߟߊߓߊ߲߫ ߞߏ ߡߊ߬߸ ߡߎߛߊ߫ ߞߋߕߊ߬ ߞߵߊ߬ ߦߌ߬ߘߊ߬ ߞߏ߫ ߢߍߥߟߊ ߓߍ߯ ߓߘߊ߫ ߓߐ߫ ߊ߬ ߛߌߌߟߊ ߝߍ߬ ߘߌ߲߬ߞߌߙߊ ߟߎ߬ ߘߐ߫ %߉߀ ߤߊ߲߯ %߉߉ ߢߐ߲߰ ߠߊ߫، ߊ߬ߟߋ ߝߍ߬߸ ߜߟߍ߬ߦߊ߬ ߛߌ߫ ߕߴߦߋ߲߬߸ ߡߍ߲ ߘߌ߫ ߞߊ߬ߙߊ߲߬ߘߋ߲ ߠߎ߫ ߞߢߊ߬ ߞߘߐߓߐߟߌ ߞߍ߫ ߟߊ߫.

ߊߓߎߓߞߊߙ ߞߊ߬ߓߊ ߡߍ߲ ߞߍ߫ ߘߊ߫ ߝߊ߬ߛߏ ߞߘߐߓߐߟߌ ߜߋ߬ߟߎ߲߬ߠߌ߲߬ߠߊ ߘߌ߫ ߞߊ߲ߞߊ߲߫ ߡߙߊ߬ߘߊ߬ߓߊ ߞߣߐ߫߸ ߣߴߊ߬ ߝߘߊ߫ ߘߊ߫ ߞߐߣߊߞߙߌ߫ ߟߊ߫، ߏ߬ ߞߵߊ߬ ߦߌ߬ߘߊ߬ ߞߏ߫ ߝߊ߰ߡߊ ߟߎ߫ ߞߵߊ߬ߟߎ߫ ߛߋ߲߭ߓߌ߬ߟߊ߫ ߟߋ߬ ߣߌ߲߬ ߞߏ ߘߐ߫ ߞߊ߬ߦߌ߯ ߊ߬ ߞߊߡߌߣߊ، <<ߞߊ߬ߦߌ߯ ߊ߬ ߘߊߡߌߣߊ ߤߊ߲߯ ߕߋ߲߬߸ ߝߊ߰ߡߊ ߟߎ߬ ߓߘߴߊ߬ߟߎ߬ ߛߋߞߏ ߞߍ߫ ߘߊߞߎ߲ ߓߍ߯ ߘߐ߫، ߊ߲ ߡߊ߫ ߓߌ߬ߟߊ߬ߒ߬ߘߐ߬ ߝߏߦߌ߬ ߛߐ߬ߘߐ߲߬ ߡߎߣߎ߲߬߸ ߡߍ߲ ߘߌ߫ ߞߍ߫ ߖߎ߯ߡߊ߲߫ ߘߌ߫ ߕߋ߲߬.>> ߊ߬ ߞߵߏ߬ ߟߊߕߍ߰.

ߊ߬ ߞߊ߬ ߦߟߌߓߌߟߊߟߌ ߞߍ߫ ߝߣߊ߫߸ ߞߏ߫ ߞߊ߬ ߖߊ߲߬ߕߏ߬ߒ߬ߘߐ ߟߊߥߙߊ߬ ߞߘߐߓߐߟߌ ߕߎ߬ߡߊ ߢߌ߲߬ ߠߊ߫ ߞߏߛߓߍ߫، <<ߤߊߟߌ߬ ߣߴߊ߬ ߦߋ߫ ߛߐ߬ߘߐ߲߬ ߞߏ߫ ߖߎ߯ߡߊ߲߫ ߡߊ߫ ߓߌ߬ߟߴߊ߬ ߘߐ߫ ߡߎߣߎ߲߬߸ ߥߟߴߊ߲ ߡߊ߫ ߞߊ߬ߙߏ߲߬ ߞߏ߬ ߞߎߡߊ߫ ߡߍ߲߫ ߡߎߣߎ߲߬، ߝߏ߫ ߊ߲ ߧߋ߫ ߖߡߊ߬ߣߊ ߟߊ߫ ߣߊ߬ߝߊ ߟߋ߬ ߡߞߊߘߊ߲߫.>> ߊ߬ ߞߵߊ߬ ߖߊ߬ ߦߙߐ ߏ߬ ߞߊ߲߬.

ߊ߬ߟߋ ߟߊ߫ ߝߐߟߌ߫ ߘߐ߫߸ ߢߌ߬ߣߊ߲߬ ߛߊ߲ ߢߌ߲߬ ߣߌ߫ ߛߊ߲߭ ߕߐ߭ ߟߎ߬ ߓߍ߯ ߞߢߊߡߊ߲߫، ߘߊ߲߬ߝߘߊ߬ߓߐ ߞߍߣߍ߲߫ ߜߋ߬ߟߎ߲߬ߠߌ߲ ߝߊ߲߬ߞߊ ߟߊ߫ ߥߊ߬ߙߊ ߟߋ߬ ߘߌ߫ ߢߌ߬ߣߊ߲߬، <<ߊ߬ ߓߍ߯ ߦߋ߫ ߛߟߐ߬ ߛߎ߯ ߞߋߟߋ߲߫ ߠߋ߬ ߘߌ߫، ߓߊ߬ߙߌ߬߸ ߓߟߏߘߐߓߍ߲ ߠߎ߬ ߟߋ߬ ߝߊ߲߬ߞߊߘߏ߲߬ߣߍ߲߫، ߜߋ߬ߟߎ߲߬ߠߌ߲߬ߠߊ߫ ߝߌ߬ߟߊ߬߸ ߝߏ߮ ߞߋ߬ߟߋ߲߬ߞߋ߬ߟߋ߲߬ߠߊ ߞߣߐ߫، ߊ߬ ߣߌ߫ ߞߵߊ߬ߟߎ߬ ߓߍ߯ ߟߊߛߏ߬ߓߌ߬ ߓߘߍߞߍ߭ ߝߋߎ߫.>> ߊ߬ ߞߵߏ߬ ߝߐ߫.

ߞߊ߲ߞߊ߲߫ ߞߣߐ߫߸ ߂߀߂߆ ߛߐ߬ߟߐ ߘߊߡߌ߬ߣߊ߬ߣߍ߲߫ ߡߊ߬ߝߊ ߟߋ߬ ߞߣߐ߫، ߝߊ߰ߡߊ ߟߎ߬ ߞߊ߲߫ ߞߏ߫ ߞߣߐ߬ߘߐ߬ߝߟߌ߬ ߛߌ߫ ߕߴߊ߬ ߘߐ߫، ߟߊ߬ߞߟߏ߬ߞߟߏ߬ߟߌ ߝߊ߰ߡߊ ߟߎ߬ ߞߊ߲߫ ߞߏ߫ ߊ߬ߟߎ߬ ߘߴߊ߬ߟߎ߬ ߛߋߞߏ ߓߍ߯ ߞߍ߫߸ ߞߊ߬ ߞߘߐߓߐߟߌ ߣߌ߲߬ ߞߌ߫ ߜߍߦߊ ߞߣߐ߫߸ ߟߊ߬ߞߊ߲ߘߊ ߞߣߐ߫.