ߘߓߊ߬ߓߌߟߊ ߕߟߋ߬ ߃߁ ߦߋ߫ ߝߘߊ߬ߝߌ߲߬ ߓߊߛߌߦߊ ߟߏ߲ߓߊ ߟߋ߬ ߘߌ߫߸ ߡߍ߲ ߦߋ߫ ߛߌ߲߬ߝߏ߲߬ߧߊ߬ ߟߊ߫ ߝߘߊ߬ߝߌ߲߬ߠߊ߫ ߞߋ߬ߟߋ߲߬ߧߊ ߓߟߏ߫ ߛߊ߲߭ ߺ ߊ ߺ ߛߊ߲߬، ߒ߬ߓߊ߬߸ ߏ߬ ߓߍ߲߬ߒ߬ߛߋ߲߬ߡߊ ߟߋ߬ ߞߏߛߐ߲߬߸ ߞߊ߲ߞߊ߲߫ ߒ.ߓ.ߘ ߞߊ߬ ߦߙߌ߫ ߕߘߎ ߓߙߊߡߊߖߊ߲ߓߊ߲ ߠߊߥߟߌ߬߸ ߞߊ߬ ߥߊ߫ ߦߙߌ߫ ߛߌߦߊߡߊ߲߫ ߕߘߎ߫ ߦߙߌߝߍ ߘߏ߫ ߘߐ߫ ߞߊ߲ߞߊ߲ߞߎߘߊ߫، ߞߊ߬ߕߎ߲߯߸ ߦߙߌ߫ ߇߅ ߖߊ߬ߕߋ߫ ߟߋ߬ ߕߘߎߣߴߊ߬ߟߎ߬ ߓߟߏ߫߸ ߓߊߛߌ߫ ߦߙߌ ߦߋ߫ ߡߍ߲ ߠߎ߬ ߘߐ߫߸ ߊ߬ ߣߌ߫ ߦߙߌ߫ ߘߋ߲ߕߊ ߟߎ߬ ߣߌ߫ ߕߎ ߟߊߞߊ߲ߘߊ߫ ߦߙߌ ߘߏ߫ ߟߎ߫߸ ߏ߬ ߟߎ߫ ߟߋ߬ ߕߘߎ߫ ߘߊ߫ ߘߎ߱ ߘߐ߫ ߊ߬ߟߎ߬ ߓߟߏ߫߸ ߊ߬ߟߎ߬ ߣߌ߫ ߥߊ߭ ߟߊߞߊ߲ߘߊ ߞߏߟߊߕߍ߮ ߟߎ߫ ߟߋ߬ ߕߘߍ߬ ߞߣߍ ߣߌ߲߬ ߞߊ߲߬ ߓߌ߬.
ߊ߬ ߛߋ߲߬ߢߊ߬ ߝߟߐ ߟߎ߬ ߕߋ߲߬߸ ߞߊ߲ߞߊ߲߫ ߒߞߏ ߓߊߛߌߦߊ ߣߴߊ߬ ߘߊ߲ߘߊߟߌ ߘߍ߭ ߦߋ߫ ߝߘߊ߬ߝߌ߲߬ ߓߊߛߌߦߊ ߟߏ߲ߓߊ ߣߌ߲߬ ߠߊߢߣߊߡߦߊ߫߸ ߞߵߏ߬ ߞߍ߫ ߒ.ߓ.ߘ ߟߊ߫ ߦߙߌ߫ ߕߘߎ ߓߙߊߡߊߖߊ߲ߓߊ߲߫ ߝߟߐ ߝߣߊ߫ ߘߌ߫ ߞߊ߲ߞߊ߲߫.
ߒ.ߓ.ߘ ߞߊ߲ߕߌ߮ ߡߊ߬ߡߊ߬ߘߌ߬ ߖߐ߲ߖߐ߲ ߞߋߕߊ߬߸ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߛߋ߫ ߘߊ߫ ߦߙߌ߫ ߛߎ߯ߦߊ߫ ߛߌߦߊߡߊ߲߫ ߠߋ߬ ߕߘߎ߫ ߟߊ߫߸ ߊ߬ ߞߊ߬ ߡߎ߲߬ ߝߐ߫߸ ߊ߬ ߞߊ߲߫ ߞߏ߫
<<ߓߌ߬ ߕߊ ߢߌ߲߬ ߘߐ߫߸ ߊ߲ ߠߊ߫ ߖߊ߬ߕߋ߬ߡߌ߬ߣߊ߬ ߓߟߏ ߡߊ߬߸ ߊ߲ ߛߋ߫ ߘߊ߫ ߞߊ߬ ߦߙߌߛߍ߲߫ ߇߅ ߖߊ߬ߕߋ߬ ߕߘߎ߫ ߓߌ߬ ߛߐ߰ߡߊ߬ߘߊ ߢߌ߲߬ ߠߊ߫߸ ߊ߬ ߣߌ߫ ߦߙߌ߫ ߛߎ߯ߦߊ߫ ߛߌߦߊߡߊ߲߫߸ ߊ߲ ߕߍ߫ ߛߋ߫ ߡߍ߲ ߓߍ߯ ߡߊߘߊ߲߫ ߠߊ߫ ߦߊ߲߬߸ ߓߊߛߌߦߊ߫ ߦߙߌ ߟߎ߬߸ ߦߙߌ߫ ߘߋ߲ߕߊ ߟߎ߬߸ ߊ߬ ߣߌ߫ ߡߍ߲ ߠߎ߬ ߖߍ߬ߘߍ ߦߋ߫ ߕߘߎ߫ ߟߊ߫ ߊ߲ ߠߊ߫ ߥߊ߭ ߟߊߞߊ߲ߘߊ ߡߐ߱ ߟߎ߬ ߓߟߏ߫ ߞߘߐ߬ߡߊ߲߬.>> ߊ߬ ߞߵߏ߬ ߝߐ߫.
ߦߙߌ ߡߍ߲ ߠߎ߬ ߕߘߎߣߍ߲߫ ߓߊ߬߸ ߡߍ߲ ߠߎ߬ ߦߋ߫ ߥߊ߭ ߘߐ߫ ߞߘߐ߬ߡߊ߲߫ ߓߊ߬߸ ߏ߬ ߓߍ߯ ߟߊߞߊ߲ߘߊ ߦߋ߫ ߒ.ߓ.ߘ ߡߊ߬ ߘߌߦߊߜߏߦߊ ߟߋ߬ ߘߌ߫߸ ߊ߬ ߞߏߟߊߕߍ߮ ߟߎ߬ ߟߊ߫ ߝߐߟߌ߫ ߘߐ߫، ߊ߬ߟߎ߬ ߟߊ߫ ߦߙߌ߫ ߓߌ߫ ߦߙߌߞߊ߫ ߕߘߎߣߍ߲ ߢߌ߲߬ ߠߎ߬ ߟߊ߫ ߞߏ ߘߐ߫ ߏ߬ ߘߐ߫߸ ߞߊ߲ߕߌ߮ ߞߵߊ߬ ߦߌ߬ߘߊ߬ ߞߏ߫ ߝߏ߫ ߛߌ߲߬ߝߏ߲ ߠߎ߬ ߖߍ߬ߘߍ ߟߋ߬ ߦߋ߫ ߞߍ߫ ߦߙߌ ߣߌ߲߬ ߟߊߞߊ߲ߘߊߓߊ߮ ߘߌ߫߸ ߓߌ߲ ߠߎ߬ ߓߊ߯ ߖߊ߬ ߕߎ߬ߡߊ ߡߍ߲߸ ߞߊ߬ ߞߊߘߊ߲߫ ߞߍ߫߸ ߕߊ߫ ߛߎߟߊ߫ ߞߊߣߊ߬ ߛߋ߫ ߦߙߐ߫ ߢߌ߲߬ ߘߐ߫.
ߒ ߓ ߘ ߛߌ߲߬ߝߏ߲ ߠߎ߬ ߟߊ߫ ߓߊ߯ߙߊ߫ ߘߊ߲߬ ߕߍ߫ ߦߙߌ߫ ߕߘߎ߫ ߣߌ߲߬ ߞߋߟߋ߲߫ ߘߌ߫ ߘߋ߬߸ ߊ߬ߟߎ߬ ߦߴߊ߬ߟߎ߬ ߖߊ߲߬ߕߏ߫ ߟߊ߫ ߟߋ߬ ߥߊ߭ ߘߐ߫߸ ߞߊ߬ ߦߙߌ ߟߎ߬ ߞߣߐ߬ߜߍ߲߫ ߥߊ߭ ߘߐ߫߸ ߞߊ߬ ߕߊ߲߬ߞߊ߫ ߞߍ߫ ߦߙߌ ߟߎ߬ ߖߊߛߌ߫ ߡߊ߬، ߡߊ߬ߡߊ߬ߘߌ߬ ߖߐ߲ߖߐ߲߫ ߞߋߕߊ߬ ߞߵߊ߬ ߦߌ߬ߘߊ߫ ߞߏ߫ ߣߌ߲߬ ߦߋ߫ ߒ.ߓ.ߘ ߖߍ߬ߘߍ ߟߊ߫ ߓߊ߯ߙߊ߫ ߘߌߦߊߜߏߦߊߣߍ߲ ߠߋ߬ ߘߌ߫ ߓߐ߲ߛߐ߲ߘߊ߫ ߣߊ߬ߕߐ ߟߎ߬ ߦߋ߫.
ߡ߰<<ߡߐ߰ ߺ ߐ ߺ ߡߐ߰ ߣߴߌ ߘߏ߲߬ ߘߊ߫ ߒ.ߓ.ߘ ߛߓߍߘߊ ߘߐ߫߸ ߌ ߓߘߊ߫ ߕߘߍ߬ ߥߊ߭ ߟߊߞߊ߲ߘߊ ߡߐ߱ ߟߎ߬ ߛߙߍߘߍ ߘߐ߫ (...) ߒ ߓ ߘ ߛߌ߲ߝߏ߲ ߦߋ߫ ߝߊ߲߭ ߺ ߊ ߺ ߝߊ߲߬߸ ߊ߲ ߓߍ߯ ߦߴߊ߲ ߞߊߘߊ߲߫߸ ߊ߲ ߧߋ߫ ߛߴߊ߲ ߕߊ߫ ߡߊ߬ߜߍ߲ ߘߏ߫ ߞߍ߫ ߟߊ߫ ߥߊ߭ ߟߊߞߊ߲ߘߊ ߘߐ߫، ߏ߬ ߓߊ߯ ߞߍ߫߸ ߓߐ߲ߛߐ߲߫ ߣߊ߬ߕߐ ߡߍ߲ ߠߎ߬ ߣߊ߬ߕߐ߫ ߘߏ߲߬ ߠߴߊ߲ ߘߐ߫ ߘߍ߭ ߞߣߐ߫، ߏ߬ ߟߎ߬ ߘߴߊ߬ ߦߋ߫ ߞߏ߫ ߥߊ߭ ߟߊߞߊ߲ߘߊ ߤߊߡߌ߲ ߦߴߊ߲ ߠߊ߫.>> ߏ߬ ߟߋ߬ ߞߍ߫ ߘߊ߫ ߒ.ߓ.ߘ ߞߊ߲ߕߌ߮ ߡߊ߬ߡߊ߬ߘߌ߬ ߖߐ߲ߖߐ߲߫ ߞߋߕߊ߬ ߟߊ߫ ߞߎߡߊ ߘߌ߫.
ߥߊ߭ ߟߊߞߊ߲ߘߊ ߡߐ߱ ߟߎ߬ ߟߊ߫ ߞߎ߲߬ߕߌ߮ ߢߊ ߕߘߍ߬ ߜߍ ߘߐ߫، ߒ߬ߓߊ߬߸ ߏ߬ ߟߎ߬ ߟߊ߫ ߖߋ߬ߓߌ߬ߦߊ߬ߟߊ ߡߍ߲ ߞߎߡߊ߫ ߘߊ߫߸ ߣߊߟߌ߬ߡߎ߲߫ ߡߊ߬ߡߊ߬ߘߌ߬ ߞߎߦߊߕߍ߫ ߘߌ߫߸ ߊ߬ߟߋ ߞߵߊ߬ ߦߌ߬ߘߊ߬ ߞߏ߫ ߊ߬ ߛߍߥߊߣߍ߲߫ ߊ߬ߟߎ߬ ߟߊ߫ ߞߏߛߓߍ߫، ߊ߬ ߣߌ߫ ߓߏ߲߬ߧߊ ߡߍ߲ ߞߍߣߴߊ߬ߟߎ߬ ߦߋ߫߸ ߞߊ߬ ߥߊ߫ ߣߌ߲߬ ߞߏ ߟߊߛߴߊ߬ߟߎ߫ ߡߊ߬߸ ߏ߬ ߘߌߦߊߣߴߊ߬ߟߎ߬ ߦߋ߫ ߊ߬ ߢߊ ߡߊ߬.
ߞߊ߬ߕߎ߲߯߸ ߊ߬ߟߎ ߦߋ߫ ߓߊ߯ߙߊ ߡߍ߲ ߘߊߞߘߐ߫߸ ߒ.ߓ.ߘ ߓߘߴߊ߬ ߦߌ߬ߘߊ߬ ߞߏ߫ ߊ߬ߟߎ߬ ߝߣߊ߫ ߘߏ߬ߣߌ߲ ߠߋ߬ ߦߴߏ߬ ߘߌ߫، ߊ߬ ߞߊ߲߫ ߞߏ߫:
<<ߊ߬ߟߎ߬ ߓߘߴߊ߬ ߦߌߘߊߞߵߊ߲ ߠߊ߫ ߞߏ߫ ߦߙߌ߫ ߟߊ߲ ߖߡߊ߬ߣߊ ߢߌ߲߬ ߞߣߐ߫߸ ߏ߬ ߤߊߡߌ߲ ߦߴߊ߬ߟߎ߬ ߝߣߊ߫ ߟߊ߫، ߥߊߟߌߘߊ ߕߐ߯ ߘߐ߫߸ ߊ߲ ߠߊ߫ ߞߎ߲߬ߕߌ߮ ߡߍ߲ ߦߋ߫ ߦߋ߲߬ ߊߓߎߓߞߊߙ ߖߊߟߏ߫߸ ߊ߬ ߛߍߥߊߣߍ߲߫ ߊ߬ ߢߊ ߖߍ߬ߘߍߖߍ߬ߘߍ ߡߊ߬߸ ߊ߬ ߦߋ߫ ߓߊߙߌߞߊߓߌߟߊ ߝߏ߬ߟߌ ߟߊߛߋ߫ ߟߊ߫ ߒߞߏ ߓߊߛߌߓߐ ߡߐ߰ߓߊ ߟߎ߬ ߡߊ߬.>> ߊ߬ ߞߵߏ߬ ߟߊߛߋ߫.
ߡߊ߬ߡߊ߬ߘߌ߬ ߞߎߦߊߕߍ߫ ߞߵߊ߬ ߦߌ߬ߘߊ߬ ߞߏ߫ ߝߏ߫ ߞߊ߬ ߖߊ߲߬ߕߏ߬ ߞߍ߫ ߦߙߌ߫ ߕߘߎߣߍ߲ ߡߍ߲߬ ߠߎ߬ ߘߐ߫ ߟߋ߬، ߞߊ߬ ߘߐ߰ߘߏ߲߬ ߞߍ߫ ߊ߬ߟߎ߬ ߟߊ߫߸ ߞߵߊ߬ߟߎ߫ ߕߊ߲߬ߞߊ߫ ߥߊ߬ ߖߋ߬ߣߌ߲߬ ߕߊ ߟߎ߫ ߡߊ߬، ߊ߬ߟߋ ߟߊ߫ ߝߐߟߌ߫ ߘߐ߫߸ ߝߏ߫ ߞߊ߬ ߞߊߘߊ߲߫ ߞߍ߫ ߟߋ߬߸ ߊ߬ߟߎ߬ ߦߋ߫ ߛߋ߫ ߓߊߟߏ߫ ߟߊ߫߸ ߞߊ߬ ߕߐ߬ߣߐ ߛߐ߬ߘߐ߲߫ ߊ߬ ߟߊ߫ ߤߊߓߎߕߊߦߌ߫.
ߒ.ߓ.ߘ ߝߘߏ߬ߓߊ߬ ߟߊ߬ߟߌ߬ߟߌ߬ߟߊ߸ ߞߏ߲߬ߓߏ ߛߋߞߎ߬ ߓߙߋߕߋ߫ ߞߵߊ߬ ߦߌ߬ߘߊ߬߸ ߞߏ߫ ߝߍߘߍ߲ߝߋ߲ ߠߎ߬ ߞߍߣߍ߲߫ ߠߋ߬ ߦߏ߫ ߊߘߡߊߘߋ߲ ߠߎ߬.
<<ߣߌߡߦߊ ߕߴߛߋ߫ ߛߓߊ߬ߕߌ߬ ߟߊ߫ ߣߌ߫ ߝߍߘߍ߲ߝߋ߲ ߠߎ߬ ߕߍ߫، ߊߘߡߊߘߋ߲ߧߊ ߖߍ߬ߘߍ ߓߎ߲ߓߎ߲ߣߍ߲߫ ߝߍߘߍ߲ߝߋ߲ ߠߎ߬ ߟߋ߬ ߡߊ߬ (...) ߌ ߓߊ߯ ߦߙߌ߫ ߖߎߣߍ߲߫ ߞߋߟߋ߲߫ ߔߋ߫ ߕߍ߰ ߞߵߊ߬ ߓߌ߬ߟߊ߬ ߝߎ߯߸ ߏ߬ ߓߊ߯ ߞߍ߫ ߒ.ߓ.ߘ ߡߐ߱ ߡߍ߲ ߢߣߊ߫߸ ߣߴߊ߬ ߡߊ߫ ߛߋ߫ ߛߐ߬ߘߐ߲߬ ߞߴߌ ߞߍ߬ߟߍ߫߸ ߒ ߡߴߏ߬ ߝߐ߫، ߊ߬ ߞߏ߬ߣߌ߲ ߘߴߌ ߟߊߟߌ߫߸ ߞߊ߬ ߓߍ߲߬ ߊ߬ ߣߊ߬ߝߊ ߡߊ߬.>> ߊ߬ ߞߵߏ߬ ߟߋ ߝߐ߫.
ߒ.ߓ.ߘ ߛߌ߲߬ߝߏ߲ ߠߎ߬ ߟߊ߫ ߖߊ߬ߕߋ߬ ߘߐ߫߸ ߕߎ ߟߊߞߊ߲ߘߕߊ ߟߋ߬߸ ߊ߬ߟߋ ߟߋ߬ ߓߊߛߌߦߊ ߞߐߞߟߏ ߘߌ߫، ߏ߬ ߘߐ߫߸ ߦߙߌ߫ ߕߍ߯ ߓߊ߲ߓߊߟߌ ߡߍ߲ ߠߎ߬ ߦߴߌߘߐ߫߸ ߊ߬ߟߎ߫ ߞߵߊ߬ߟߎ߬ ߘߊߣߐ ߕߏ߫ ߏ߬ ߦߙߐ ߡߊ߬.
ߓߊߏ߬߸ ߦߙߌ ߘߏ߫ ߟߎ߫ ߦߋ߫ ߕߎߣߎ߲ ߠߋ߬ ߘߊߞߘߐ߫ ߕߋ߲߬، ߏ߬ ߟߋ ߖߍ߬ߘߍ ߞߏߛߐ߲߬߸ ߛߋߞߎ߬ ߓߙߋߕߋ߫ ߞߎߡߊ߫ ߘߊ߫ ߜߋ߲ߕߍ߮ ߞߊ߲߬߸ ߡߍ߲ ߕߘߍ߬ ߟߊߓߊ߯ߙߊ߫ ߟߊ߫ ߡߐ߱ ߟߎ߬ ߓߟߏ߫ ߞߵߊ߬ ߞߍ߫ ߝߊߘߌߦߊߓߐ ߘߌ߫.
ߊ߬ ߞߵߊ߬ ߦߌ߬ߘߊ߫ ߏ߬ ߟߋ ߘߐ߫ ߞߏ߫: <<ߝߟߐ߫ ߡߐ߰ߓߊ ߟߎ߬ ߕߘߍ߬ ߦߴߏ߬ ߟߋ߬ ߜߊ߬ߛߌ߫ ߟߊ߫߸ ߞߵߊ߬ ߥߐ߲߬ߓߐ ߜߊ߬ߛߌ߫߸ ߞߊ߬ ߓߊ߲߫ ߞߵߊ߬ ߞߙߊ߫ ߊ߬ ߖߍ߬ߘߍ ߝߎ߭ ߟߊ߫߸ ߞߵߌ ߝߊߘߌߦߊߓߐ߫ ߊ߬ ߘߐ߫߸ ߞߊ߬ ߞߙߎ߬ߛߌ ߓߐ߫ ߊ߬ ߘߐ߫ ߞߊ߬ ߘߙߎ߬ߞߌ ߓߐ߫ ߊ߬ ߘߐ߫߸ ߞߊ߬ ߝߎ߯ߟߊ ߟߎ߬ ߓߍ߯ ߓߐ߫ ߊ߬ ߘߐ߫߸ ߏ߬ ߟߋ߬ ߕߐ߯ ߞߏ߫ ߜߋ߲ߕߍ߮߸ ߊ߬ ߓߘߊ߫ ߕߎߣߎ߲߫ ߕߋ߲߬ ߝߊߦߌߘߊ߫.>> ߊ߬ ߞߵߏ߬ ߢߊߝߐ߫.
ߊ߬ ߘߏ߲߬߸ ߝߘߏ߬ߓߊ߬ ߟߊ߬ߟߌ߬ߟߌ߬ߟߊ ߡߊ߫ ߕߎߣߎ߲ߠߠߌ߲ ߏ߬ ߟߊ߫ ߝߏߦߌ߬ ߞߎ߲߬߸ ߝߏ߫ ߕߎ߫ ߕߍ߯ ߓߊ߲ߓߊߟߌ.
ߒ.ߓ.ߘ ߡߙߌߦߊ ߦߋ߫ ߡߎ߲߬ ߘߌ߫߸ ߞߏ߫ ߦߙߌ ߟߎ߬ ߟߊ߫ ߕߎߣߎ߲ ߡߍ߲ ߏ߬ ߘߌ߫߸ ߏ߬ ߕߍ߫ ߓߐ߰ߝߍ ߘߐߙߐ߲߫ ߘߐߖߊߛߌ߫ ߟߊ߫ ߘߋ߬߸ ߊ߬ ߦߋ߫ ߟߐ߲ߠߌ߲߫ ߞߘߐ ߟߎ߬ ߛߌߟߊߛߊ߭ ߟߋ߬ ߘߌ߫ ߓߐ߲ߛߐ߲ߘߊ߫ ߥߟߌ߬ߕߐ ߟߎ߬ ߦߋ߫.
ߦߙߌ߫ ߇߅ ߡߍ߲ ߕߘߎߣߍ߲߫ ߒ.ߓ.ߘ ߓߟߏ߫ ߣߌ߲߬߸ ߞߵߏ߬ ߓߍ߲߬ ߝߘߊ߬ߝߌ߲߬ ߓߊߛߌߦߊ ߟߏ߲ߓߊ ߡߊ߬߸ ߏ߬ ߦߴߊ߬ ߦߌ߬ߘߊ߬ ߟߊ߫ ߟߋ߬ ߞߏ߫ ߊ߬ߟߎ߬ ߜߎ ߤߊߡߌ߲ ߦߋ߫ ߢߣߊߡߦߊ ߣߌ߫ ߞߍ߲ߘߍߦߊ ߟߊߕߊ߲߬ߞߊ ߟߋ߬ ߘߌ߫߸ ߏ߬ ߡߍ߲ ߕߍ߫ ߥߊ߫ ߝߍߘߍ߲ߝߋ߲ ߠߎ߬ ߞߐ߫.
Aucun commentaire pour le moment.