ߒߞߏ ߘߏ߲߬ߖߟߎ߬ߡߊ߬ߘߊ ߛߍ߲ߓߊ߫ ߞߊ߬ ߒߞߏ ߛߓߍߛߎ߲߫ ߞߊ߲ߡߊߛߙߋߡߊ ߛߌ߲ߘߌ ߛߊ߲߬ ߇߇߲ ߢߊ߬ߢߊ߮ ߛߌ߲߬ߝߏ߲߬ߧߊ߫ ߟߍߙߊߓߏ߲߫ ߟߊ߲߲ߛߌ߬ߣߍ߬ ߥߟߌߦߊߡߛ ߟߋ߬ ߞߣߐ߫ ߞߊ߲ߞߊ߲߫߸ ߡߍ߲ ߕߘߍ߬ߒ߬ߘߐ߬ߓߊ߮ ߓߐ߫ ߘߊ߫ ߖߌ߬ߣߍ߬ ߜߍߞߊ߲ߠߊ ߝߊ߲߬ ߛߌߦߊߡߊ߲߫ ߘߐ߫߸ ߦߏ߫ ߛߌ߯ߙߌ߲߫߸ ߞߙߎ߬ߛߊ߫߸ ߡߊ߲߬ߖߊ߲߬ߠߊ߫߸ ߣߏߙߊߛߏߓߊ߫߸ ߓߊ߬ߣߊ߲߬ߞߘߐ߫، ߞߵߏ߬ ߟߊ߫ ߞߐߣߊߞߙߌ߫ ߞߊ߲߬.

ߢߌ߬ߣߊ߲߫ ߜߊ߬ߙߊ ߞߍ߫ ߘߊ߫ ߞߎ߲߬ߕߐ߮ ߡߍ߲ ߞߘߐ߫߸ ߏ߬ ߟߋ: <<ߊ߲ ߧߴߊ߲ ߠߊ߫ ߞߊ߲ ߠߎ߬ ߡߐ߬ߟߐ߲߬ߡߊ߬ߦߊ߫߸ ߞߊ߬ ߥߙߎߞߌ ߛߋ߲߬ߠߊ߬ߞߊߟߌߦߊ߫>>߸ ߒߞߏ ߕߐ߲ ߠߎ߬ ߕߊ߬ߣߍ߲ ߞߵߊ߬ ߟߊ߫ ߒߞߏ ߞߊ߲߬ߜߍ߬ߘߊ ߞߊ߲߬߸ ߟߞߊ߬ߙߊ߲߬ߠߌ߲߬ߠߊ ߟߎ߬ ߣߌ߫ ߕߌߙߌ߲ߠߌ߲ߠߊ ߟߎ߬ ߣߌ߫ ߝߘߊ߬ߝߌ߲߬ߧߊ ߞߊ߬ߣߌ߲߬ߓߊ߰ ߛߌߦߊߡߊ߲߫ ߕߘߍ߬ ߞߣߍ ߞߊ߲߬، ߜߊ߬ߙߊ ߞߍ߫ ߘߊ߫ ߤߊ߲ߞߟߌ߫ ߟߊߞߎߣߎ߲߫ ߜߙߊ ߟߋ߬ ߘߌ߫߸ ߞߊ߬ ߝߊ߬ߛߏ߬ ߞߊ߲߬ ߞߏ ߕߐ߬ߣߐ ߟߊ߫ ߞߣߍ ߞߊ߲߬߸ ߟߐ߲ߞߏ ߟߊߥߙߎߞߌ ߓߊ߯ߙߊ ߟߎ߬ ߣߌ߫ ߟߐ߲ߠߌ߲ߦߊ ߣߌ߫ ߛߐ߬ߘߐ߲ ߘߊߞߎ߲ ߠߎ߬ ߘߐ߫ ߝߘߊ߬ߝߌ߲߬ߠߊ߫.

ߜߙߊ߬ߦߊ߬ߟߊ߫ ߡߐ߰ ߣߊ߯ߣߌ߲߫ ߠߋ߬ ߞߊ߬ ߖߊ߲߬ߖߏ߲ ߣߌ߲߬ ߞߍ߫ ߖߊ߲߬ߖߏ߲ ߘߌ߫، ߡߎߛߊ߫ ߓߊߟߊ߲ߘߎ߯ ߖߊߟߏ߫ ߞߎߡߊ߫ ߘߊ߫ ߖߎ߲߯ߛߊ ߞߊ߲߬߸ ߞߊ߬ ߡߍ߲ߘߋߟߌߦߍߝ߭ ߟߊ߫ ߝߛߌ߬ ߥߟߊ ߟߎ߬ ߓߛߊߞߟߌߕߋ߫، ߛߏ߬ߙߌ߫ ߡߊ߲߬ߘߋ߲߬ߞߊ ߞߎߡߊ߫ ߘߊ߫ ߛߟߏ߬ߡߣߊ߬ ߞߊ߲ߕߍ߫ ߘߎ߲߬ߘߎ߬ߡߊ߬ߞߏ߬ ߁߀ ߞߊ߲߬߸ ߞߊ߬ ߓߍ߯ ߘߊ ߥߊ߯ ߛߟߏ߬ߡߣߊ߬ ߞߏ ߘߐ߫، ߏ߬ ߟߋ ߞߐ߫߸ ߛߌߙߋ߬ ߓߊߥߊ߬ߞߊߟߌ߫ ߞߊ߬ߓߊ ߞߊ߬ ߖߊ߲߬ߖߏ߲ ߞߎ߲߬ߕߐ߰ߓߊ ߘߐߥߍߘߍ߲ߞߍ߫ ߢߊߞߘߐߛߋ߫ ߞߎߡߊ ߘߝߊߣߍ߲ ߘߐ߫، ߞߏ߲߬ߓߏ ߞߏߕߍߓߊ߲߫ ߞߡߊ߬ߙߊ߬߸ ߏ߬ ߞߊ߬ ߟߐ߲ߞߏ ߣߌ߫ ߞߊ߲ ߠߊ߫ ߓߌ߬ߟߊ߬ߢߐ߲߰ߡߊ߬ ߖߟߎ ߥߎߙߋ߲ߛߋ߲ߓߐ߫.

ߒߞߏ ߘߏ߲߬ߖߟߎ߬ߡߊ߬ߘߊ ߛߍ߲ߓߊ߫ ߞߊ߲ߕߌ߮߸ ߓߊߛߓߊ߬ߕߌ߫ ߛߘߌ߬ߓߋ߫ ߞߊ߬ ߖߊ߲߬ߖߏ߲ ߟߊ߬ߢߌߣߌ߲ ߠߎ߬ ߢߊߝߐ߫: <<ߊ߲ ߞߊ߬ ߖߊ߬ߡߊ ߡߊߞߟߌ߫ ߊ߬ߟߎ߬ ߤߊ߲ߞߟߌߓߌ߬ߟߊ߬ ߞߊ߲ ߠߋ߬ ߡߊ߬ ߒߞߏ ߟߊߓߐ ߛߊ߲߬ ߇߇߲ ߢߊ߰ߢߊ߮ ߘߐ߫، ߏ߬ ߞߍߣߍ߲߫ ߊ߲ ߓߟߏ߫ ߟߋ߬߸ ߖߐ߲߰ߛߊ߫ ߡߌ߬ߙߌ߲߬ߘߌ ߡߍ߲ ߠߎ߬ ߖߊ߲߬ߓߐ߬ߣߍ߲߫ ߒߞߏߞߏ ߞߐ߫߸ ߞߊ߬ ߏ߬ ߟߎ߫ ߖߊ߲߭ߓߌ߬ߟߊ߬ ߒߞߏ ߟߊ߫ ߞߍߣߍ߲ ߠߎ߬ ߞߐ߫، ߊ߲ ߠߊ߫ ߜߊ߬ߙߊ ߣߌ߲߬ ߞߎߡߊ߫ ߘߊ߫ ߡߍ߲ߘߋߟߌߦߍߝ߭ ߟߊ߫ ߝߛߌ߬ ߥߟߊ ߟߎ߫ ߞߊ߲߬، ߞߎߡߊ߫ ߞߍ߫ ߘߊ߫ ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߘߎ߲߬ߘߎ߬ߡߊ߬ ߞߏ߬ ߕߊ߲ ߞߊ߲߬ ߊ߬ ߟߊ߫ ߟߐ߲ߞߏߕߌ߯ߦߊ ߦߌ߬ߘߊ߬ߛߙߋ ߘߌ߫، ߞߣߊ߬ ߞߊ߲ ߠߎ߬ ߡߐ߬ߟߐ߲߬ߡߊ߬ߦߊ ߞߍߢߊ ߢߊߝߐ߫߸ ߞߊ߬ ߥߙߎߞߌ ߛߌߟߊ ߕߊ߬، ߞߊ߬ ߓߊ߲߫߸ ߞߎߡߊ߫ ߞߍ߫ ߘߊ߫ ߞߊ߲ ߛߋߞߏߦߊ ߞߊ߲߬ ߟߐ߲ߞߏ ߡߊ߬ߘߎ߮ ߘߐ߫.>>

ߞߏ߲߬ߓߏ ߞߏߕߍߓߊ߲߫ ߞߡߊ߬ߙߊ߬ ߡߍ߲ ߦߋ߫ ߜߙߊ߬ߦߊ߬ߟߊ߫ ߘߌ߫߸ ߊ߬ߟߋ߫ ߞߵߊ߬ ߦߌ߬ߘߊ߬ ߞߏ߫ ߒߞߏ ߘߏ߲߬ߞߏ ߟߎ߬ ߓߘߊ߫ ߢߌ߬ߣߊ߬ ߘߎߢߊ߫ ߥߙߎߞߌ߫ ߞߏ߫ ߛߊ߬ߓߊ ߞߐ߫، ߝߣߊ߫߸ ߊ߬ ߞߵߊ߬ ߞߊ߲ߠߊߘߌ߫ ߒߞߏ ߞߝߊ߬ ߛߓߍ߬ߟߊ ߟߎ߬ ߣߴߊ߬ ߕߌߙߌ߲ߠߌ߲ߠߓߊ ߟߎ߬ ߡߊ߬߸ ߞߏ߫ ߊ߬ߟߎ߬ ߦߋ߫ ߟߐ߲ߠߌ߲߫ ߛߎ߲ߞߎ߲ߡߊ ߟߎ߫ ߟߋ߬ ߟߊߦߌ߬ߙߌ߲߬ߘߌ߬ ߒߞߏ ߘߐ߫ ߛߐ߲߬: <<ߞߊ߲ ߠߋ߬ ߛߍ߲ ߘߌ߫ ߞߊ߬ ߡߐ߱ ߣߌ߫ ߝߋ߲ ߠߎ߬ ߓߌ߬ߟߊ߬ ߢߐ߲߮ ߡߊ߬، ߒߞߏ ߓߘߴߊ߬ ߟߊ߫ ߞߊ߲ ߕߊ߬ ߞߍ߬، ߓߊ߬ߙߌ߬߸ ߒߞߏ ߞߝߊ %߈߀ ߓߍ߯ ߞߍߣߍ߲߫ ߞߊ߬ ߡߐ߰ ߜߘߍ ߟߎ߬ ߟߊ߫ ߟߐ߲ߠߌ߲ߦߊ ߟߋ߬ ߦߟߍ߬ߡߊ߲߫ ߊ߲ ߠߊ߫ ߞߊ߲ ߘߐ߫ ߊ߬ ߝߊ߬ ߖߡߊߣߊ ߞߊ߲߬، ߣߌ߫ ߡߍ߲ ߡߊ߫ ߥߊ߫ ߊߙߊߓߎ ߟߎ߬ ߕߊ ߘߟߊߡߌ߬ߣߊ߫ ߞߵߏ߬ ߓߌ߬ߟߴߊ߲ ߞߎ߲߬߸ ߏ߬ ߘߌ߫ ߥߊ߫ ߕߎ߬ߓߊ߬ߓߎ ߟߎ߬ ߕߊ ߕߊ߬، ߌߟߋ ߞߊ߲߫ ߞߏ߫ ߌ ߦߴߌ ߝߊ߬ ߓߘߊ ߡߊߘߍ߬ߡߍ߲߬ ߠߊ߫߸ ߦߴߌ ߝߊ߬ ߓߘߊ ߛߏ߲߬ߧߊ ߞߊ߲߬ ߞߵߊ߬ ߖߊ߲߬ߝߊ߬߸ ߓߊ߬ߙߵߌ ߕߴߊ߬ ߞߊ߬ߟߊߡߊ߬، ߏ߬ ߝߍ߭ ߦߋ߫ ߒߞߏ߫ ߡߐ߮ ߟߎ߬ ߟߊ߫.>> ߊ߬ ߣߊ߬ ߘߊ߫ ߕߏ߫ ߊ߬ ߟߊ߫ ߟߊ߫ ߞߎߡߊ ߞߊ߲߬ ߌߞߐ߫ ߞߏ߫: <<ߥߎߦߊ ߡߊ߲߫ ߞߊ߲߫ ߞߊ߬ ߛߓߍ߫߸ ߡߐ߰ ߜߘߍ ߟߊ߫ ߞߏ߫ ߟߊߓߐߣߍ߲ ߡߍ߲ ߕߣߐ߬ ߕߍߣߊ߬ ߛߋ߫ ߟߴߌ ߡߊ߬߸ ߏ߬ ߡߊ߲߫ ߞߊ߲߫ ߞߊ߬ ߛߓߍ߫، ߡߐ߱ ߖߘߍ߬ߞߊߣߌ߲ ߠߊ߫ ߟߐ߲ߠߌ߲ߦߊ߸ ߌ ߞߊ߫ ߞߊ߲߫ ߞߵߏ߬ ߟߋ ߛߓߍ߫ ߞߵߌ ߝߊ߬ߛߏ߬ ߡߐ߮ ߟߎ߬ ߡߊߘߍ߬ߡߍ߲߫ ߏ߬ ߟߊ߫.>> ߊ߬ ߞߵߊ߬ ߖߊ߬ ߦߙߐ ߏ߬ ߞߊ߲߬ ߞߏߛߓߍ߫.

ߛߏ߬ߙߌ߫ ߡߊ߲߬ߘߋ߲߬ߞߊ߫ ߞߓߊ߬ ߡߍ߲ ߦߋ߫ ߒߞߏ ߛߓߍߦߟߊ߫ ߣߌ߫ ߥߎ߬ߦߊ߲߬ߞߟߌ߬ߟߊ߫ ߣߌ߫ ߒߞߏߞߏ ߛߍ߬ߘߏ߲߬ߠߊ߫ ߘߌ߫߸ ߏ߬ ߞߊ߬ ߦߟߌߓߌߟߊߟߌ߫ ߞߍ߫ ߒߞߏ ߛߌ߲ߘߌ ߕߎ߬ߡߊ߬ߘߊ ߘߐ߫ ߁߉߄߉ ߞߏ߲ߞߏߘߓߌ ߕߟߋ߬ ߁߄߸ ߓߍ߲߬ߛߍ߬ߘߎ߯ (ߜߋ߲ߞߐ߰ߖߌ߬ߘߊ ߟߊ߫)߸ ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߓߟߏ߫، ߊ߬ ߓߊ߲߫ ߘߊ߫ ߞߊ߬ ߖߌ߬ߣߍ߫ ߞߎ߲߬ߠߊ߬ߛߌ߮ ߕߊ߲߬ߘߏ߫ ߡߙߌߘߐ߫ ߕߊ߬ ߛߊ߲߬ ߞߎߘߊ ߘߏ߫ ߟߊ߫: <<ߞߏ߲ߞߏߘߓߌ ߦߋ߫ ߟߌ߬ߤߙߐ߬ߡߊ߬ ߞߊߙߏ ߟߋ߬ ߘߌ߫߸ ߊ߬ ߦߋ߫ ߞߊߙߏߓߊ߫ ߟߋ߬ ߘߌ߫ ߡߊ߲߬ߘߋ߲߬ ߡߌߙߌ߲ߘߌ ߓߟߏ߫، [...] ߞߎ߲߬ߠߊ߬ߛߌ߮ ߞߍ ߞߊ߬ ߒߞߏ ߘߊ߲ߞߎ߲߫߸ ߏ߬ ߦߋ߫ ߒߞߏߡߐ߮ ߟߎ߬ ߟߊ߫ ߛߍ߬ߘߏ߲ ߠߋ߬ ߘߌ߫، ߓߊߏ߬߸ ߝߊ߬ߛߏ߬ ߞߊ߲߬ ߞߏ ߛߍ߬ߘߏ߲ ߞߍ ߜߍ ߘߐ߫߸ ߒߞߏ ߡߐ߮ ߟߎ߫ ߟߋ߬ ߞߵߏ߬ ߘߌ߬ߡߌ߬ߣߊ߬، ߣߌ߫ ߞߎ߲߬ߠߊ߬ߛߌ߮ ߞߵߊ߬ ߝߐ߫ ߓߌ߬ ߞߏ߫ ߞߊ߬ ߒߞߏ ߟߊߘߏ߲߬ ߞߊ߬ߙߊ߲߬ߕߊ ߟߎ߬ ߟߊ߫߸ ߒߞߏ ߞߊߙߊ߲ߡߐ߮ ߟߎ߬ ߓߌߣߍ߲߫ %߁߀߀ ߟߊ߫.>>

ߘߊߞߎ߲߫ ߞߋߟߋ߲ ߏ߬ ߟߋ ߝߣߊ߫ ߘߐ߫߸ ߛߌߙߋ߬ ߓߊߥߊ߬ߞߊߟߌ߫ ߞߊ߬ߓߊ ߞߊ߬ ߝߊ߬ߛߏ߬ ߞߊ߲߬ ߞߊߙߊ߲ ߡߊߜߟߍ߬ߦߊ߫ ߝߘߊ߬ߝߌ߲ ߠߎ߬ ߦߋ߫، ߓߊߏ߬ <<ߞߊ߲ߞߏ ߟߋ߬ ߞߏߓߊ ߘߌ߫ ߊߘߡߊߘߋ߲ ߠߊ߫ ߡߐ߰ߦߊ ߞߣߐ߫، ߊ߬ߟߋ ߡߐ߱ ߡߙߌ߫ ߢߊ ߟߎ߬ ߟߊߡߙߊ߬ ߟߊ߫߸ ߞߊ߬ ߦߟߌߡߊߛߙߋ߫ ߖߐ߲ߖߐ߲߫ ߘߌ߫ ߓߐ߲ߛߐ߲ ߠߎ߬ ߡߊ߬، ߊ߲ ߓߘߊ߫ ߡߐ߮ ߟߎ߬ ߦߴߊ߬ߟߎ߫ ߓߏ߬ߙߌ߬ ߟߊ߫ ߞߊ߬ ߥߊ߫ ߝߋ߲ ߡߍ߲ ߞߐ߫ ߞߐߞߊ߲߫ ߖߡߊߣߊ ߟߎ߬ ߘߐ߫߸ ߏ߬ ߟߎ߫ ߞߊ߬ ߦߟߌߣߐ ߘߏ߫ ߟߋ߬ ߟߊߘߊ߲߫ ߞߵߊ߬ ߛߌ߰ ߊ߬ߟߎ߬ ߓߐ߲ߛߐ߲ ߠߎ߬ ߢߍ߫، ߞߊ߲ ߠߋ߬ ߘߏ߲߬ ߦߴߏ߬ ߞߍ߫ ߟߊ߫.>> ߊ߬ ߞߵߊ߬ ߟߊ߫ ߞߎߡߊ߫ ߞߋߟߋ߲ ߣߌ߲߬ ߞߊ߲߬ ߌߞߐ߫߸ ߞߏ߫: <<ߣߴߊ߬ ߝߐ߫ ߘߴߌ ߡߊ߬ ߞߏ߫ ߌ ߝߊ߬ ߞߊ߲߬ ߞߊ߬ߙߊ߲߬ߓߊߟߌ߸ ߛߌߞߊ߫ ߕߴߊ߬ ߘߐ߫߸ ߣߊ߬ߣߌ߲߬ߠߌ߲ ߓߍ߯ ߘߐ߫ ߞߐߘߊ߲ ߠߋ߬ ߟߊ߲߬ߓߋ߬ ߟߴߌ ߟߊ߫.>>

ߖߊ߲߬ߖߏ߲߬ ߞߋߟߋ߲ ߣߌ߲߬ ߘߊߞߎ߲ ߘߐ߫߸ ߞߊ߲ߞߊ߲߫ ߖߊ߯ߓߘߊ߫ ߗ߭ߎ߳ߟߌߛ ߒߢߙߋߙߋ߫ ߟߞߊ߬ߙߊ߲߬ߠߌ߲߬ߠߊ߫ ߕߌߙߌ߲ߠߌ߲ߠߊ ߓߐ߬ߟߐ߲߬ߞߊ߫ ߞߊ߬ߡߊߙߊ߬ ߝߊߕߎߡߊߕߊ߬ ߓߊ߲߬ߓߊ ߕߘߍ߬ ߞߣߍ ߞߊ߲߬߸ ߊ߬ߟߋ ߡߍ߲ ߕߎ߲߬ ߦߋ߫ ߖߊ߲߬ߖߏ߲ ߣߊߓߘߍ ߘߌ߫߸ ߊ߬ ߞߵߊ߬ ߦߌ߬ߘߊ߬ ߞߏ߫: <<ߥߎߟߊ ߡߍ߲ ߕߊ߯ߡߊߣߍ߲߫ ߁߉߄߉ ߣߌ߫ ߛߌߛߍ߲߬ ߕߍ ߘߐ߫߸ ߏ߬ ߓߘߴߊ߬ ߦߌ߬ߘߊ߬ ߞߏ߫ ߘߏ߫ ߓߘߊ߫ ߞߍ߫ ߒߞߏߡߐ߮ ߟߎ߬ ߓߟߏ߫، ߓߌ߬ ߢߐ߲߰ ߟߏ߲߫߸ ߒߞߏ ߦߋ߫ ߞߊ߬ߙߊ߲߬ ߠߊ߫ ߘߎߢߊ߫ ߝߊ߲߬ ߛߌߦߊߡߊ߲߫ ߘߐ߫߸ ߟߐ߲ߞߏ ߓߏߟߏ߲߫ ߛߌߦߊߡߊ߲߫ ߦߴߊ߬ ߘߐ߫، ߣߴߊ߲ ߕߍ߬ߘߍ߫ ߞߊ߬ ߞߊ߬ߙߊ߲ ߞߍ߫ ߊ߲ ߠߊ߫ ߞߊ߲ ߘߐ߫߸ ߛߴߊ߲ ߝߣߊ߫ ߦߴߊ߲ ߠߊ߫ ߡߎ߯ߖߎ߮ ߟߎ߬ ߘߐߓߍ߲߬ ߠߊ߫ ߓߌ߬߸ ߞߴߊ߲ ߠߊ߫ ߞߎߟߎ߲ߞߎߟߎ߲ ߠߎ߬ ߘߐߓߍ߲߬.>> ߊ߬ߟߋ߫ ߞߵߏ߬ ߦߌ߬ߘߊ߬߸ ߞߊ߬ ߓߊ߲߫ ߞߊ߬ ߖߡߊ߬ߣߊ ߞߎ߲߬ߠߊ߬ߛߌ߮ ߝߏ߬ ߝߊ߬ߛߏ߬ ߞߊ߲ ߠߎ߬ ߘߊ߲ߞߎ߲ ߘߐ߫.

ߒߞߏ ߛߌ߲ߘߌ ߛߌߡߊߟߌ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߖߊ߲߬ߖߏ߲ ߣߌ߲߬ ߞߍ߫ ߘߊ߫ ߡߙߌ ߣߌ߫ ߡߙߌ߫ ߡߝߊߟߋ߲ ߞߣߍ ߟߋ߬ ߘߌ߫ ߝߘߊ߬ߝߌ߲߬ ߞߊ߲ ߠߎ߬ ߛߊ߲ߞߘߐߕߊ߭ ߘߐ߫، ߝߊߦߌߘߊ߫߸ ߞߎߡߟߊ ߓߍ߯ ߞߵߊ߬ ߦߌ߬ߘߊ߫ ߟߋ߬ ߞߏ߫ ߒߞߏ ߦߋ߫ ߝߘߊ߬ߝߌ߲߬ߠߊ߫ ߜߙߋ ߟߊ߫ ߥߙߎߞߌ ߓߊ߬ߙߏ߲߬ߡߊ ߘߏ߫ ߟߋ߬ ߘߌ߫.