ߛߏ߬ߓߏ ߘߊ ߓߘߊ߫ ߦߟߍ߬ ߞߊ߲ߞߊ߲߫ ߞߣߐ߫ ߕߟߋ߬ߝߌ߬ߟߊ߬ߣߍ߲ ߣߌ߲߬ ߘߐ߫ ߞߏߛߓߍ߫، ߞߊ߬ߕߎ߲߯߸ ߞߌߘߊ ߕߎ߬ ߦߋ߫ ߖߕ ߄߅ ߀߀߀ ߡߍ߲ ߘߌ߫߸ ߏ߬ ߓߘߊ߫ ߛߋ߫ ߇߀ ߀߀߀ ߣߌ߫ ߈߀ ߀߀߀ ߘߐ߫ ߥߊ߬ߦߌ߬ߛߏ ߘߏ ߟߎ߫ ߞߣߐ߫߸ ߏ߬ ߡߍ߲ ߓߘߊ߫ ߞߍ߫ ߦߋ߲߬ ߛߌ߰ߓߊ߮ ߘߏ߫ ߟߎ߫ ߡߊ߬ ߞߣߐ߬ߘߐ߬ߝߟߌ.

ߥߊ߬ߦߌ߬ߛߏ ߖߋ߬ߓߌ߬ߦߊ߬ߟߊ ߘߏ߫ ߛߋ߫ ߘߊ߫ ߘߊߘߐߢߌ߬ߣߌ߲߬ߞߊ߬ ߟߊ߫ ߞߎߣߎ߲ߟߏ߲߸ ߏ߬ ߦߌ߬ߘߊ߬ ߞߏ߫ ߕߎ߬ߢߊ ߟߋ߬ ߛߐ߲߬ߞߐ߬ ߟߊ߬ߦߟߍ߬ ߞߏ ߘߌ߫ ߝߛߊߦߌ߫߸ ߓߊ߬ߙߌ߬ ߣߛߌ߬ ߛߐߘߐ߲ ߠߋ߬ ߓߘߊ߫ ߜߟߍ߬ߦߴߊ߬ߟߎ߬ ߝߣߊ߫ ߡߊ߬. <<ߕߎ߬ߢߊ ߟߋ߬߸ ߊ߲ ߓߘߊ߫ ߘߏ߫ ߟߊ߫ ߛߏ߬ߓߏ ߛߐ߲߬ߞߐ ߞߊ߲߬߸ ߓߊ߬ߙߵߏ߬ ߞߎ߲߭ ߞߍߣߍ߲߫ ߜߟߍ߬ߦߊ ߘߏ߫ ߟߎ߫ ߟߋ߬ ߘߴߊ߲ ߞߊ߲߬، ߣߴߏ߬ ߕߍ߫߸ ߛߎ߲ߞߊߙߏ ߡߎ߰ߡߍ ߓߊ߲߫ ߘߊ߫ ߟߋ߬߸ ߊ߲ ߧߋ߫ ߛߏ߬ߓߏ ߝߙߋ߬ ߟߊ߫ ߅߀ ߀߀߀ ߟߊ߫߸ ߤߊ߲߯ ߛߎ߲ߞߊߙߏ ߕߋ߬ߟߋ߫ ߂߇߸ ߊ߬ ߦߋ߫ ߛߐ߲߬ߞߐ ߏ߬ ߘߐ߫، ߊ߬ ߕߋ߬ߟߋ߫ ߂߈ ߠߋ߬ ߡߊ߬ ߛߊ߫߸ ߊ߲ ߞߊ߬ ߛߐ߲߬ߞߐ߬ ߟߊ߬ߦߟߍ ߣߌ߲߬ ߞߍ߫، ߣߴߊ߲ ߡߴߏ߬ ߞߍ߫߸ ߊ߲ ߕߴߛߋ߫ ߣߌ߬ߛߌ ߛߊ߲߬ ߠߊ߫.>> ߞߏߟߊߕߍ߮ ߘߏ߫ ߟߋ߬ ߞߊ߲߫ ߕߋ߲߬.

ߛߓߏ߬ߝߊ߰ߟߊ ߢߌ߲߬ ߠߎ߬ ߞߊ߲߫ ߞߏ߫ ߣߌ߬ߛߌ ߛߐ߬ߘߐ߲߬ ߞߏ ߟߋ߬ ߓߘߊ߫ ߜߟߍ߬ߦߊ߫ ߕߋ߲߬߸ ߊ߬ ߕߌ߯ߕߌ߯ ߡߊ߬ߟߌ߬ߞߊ ߟߎ߬ ߟߊ߫ ߕߍ߬ߡߍߞߘߎ߬ߡߊ߸ ߏ߬ ߟߎ߫ ߕߍ߬ߘߍ߫ ߛߐ߬ߘߐ߲߬ ߠߊ߫ ߘߊ߫ ߘߌߡߊ߲ ߠߊ߫ ߟߋ߬ ߝߋߎ߫، <<ߊ߲ ߕߎ߲߬ ߦߴߏ߬ ߟߎ߫ ߛߊ߲߬ ߠߊ߫ ߛߍߝߊ ߟߋ߬ ߘߐ߫، ߊ߬ߟߎ߬ ߓߘߊ߫ ߡߊ߬ߟߌ ߕߍ߬ߡߍߞߘߎ߬ߡߊ ߏ߬ ߟߎ߬ ߜߍ߲߫، ߏ߬ ߟߎ߫ ߟߋ߬ ߘߏ߲߬ ߕߎ߲߬ ߦߴߊ߬ ߘߌ߫ ߟߴߊ߲ ߡߊ߬ ߛߐ߲߬ߞߐ߬ ߣߐ߲߮ ߠߊ߫، ߐ߲߬ߤߐ߲߫߸ ߕߋ߲߭ߕߋ߲߭ ߣߌ߲߬ ߘߐ߫ ߏ߬ ߘߐ߫߸ ߊ߲ ߕߍ߫ ߝߋ߲߫ ߛߐ߬ߘߐ߲߬ ߠߴߏ߬ ߟߎ߬ ߟߊ߫، ߊ߲ ߧߋ߫ ߥߊ߫ ߟߊ߫ ߡߊ߬ߟߌ ߟߋ߬ ߟߊ߫ ߕߋ߲߬ ߞߵߊ߬ ߛߊ߲߬ ߦߋ߲߬، ߌ ߓߴߊ߬ ߛߊ߲߬ ߛߍߝߊ ߘߐ߫߸ ߌ ߕߍ߫ ߝߋ߲߫ ߛߐ߬ߘߐ߲߬ ߠߊ߫، ߣߌ߫ ߞߊ߲ߞߊ߲ߞߊ ߟߎ߫ ߡߊ߬ߤߌߣߊ ߕߍ߫߸ ߛߊ߫ ߛߏ߬ߓߏ ߞߊߣߊ߬ ߘߛߍ߫ ߡߐ߱ ߟߎ߬ ߘߐ߫߸ ߣߌ߫ ߖߡߊ߬ߣߊ߬ߘߋ߲ ߠߎ߬ ߟߊ߫ ߟߊ߬ߘߌߦߊߢߍ ߏ߬ ߕߍ߫ ߝߋߎ߫߸ ߌ ߓߴߊ߬ ߝߙߋ߬ ߖߕ ߅߀ ߀߀߀ ߟߊ߫߸ ߌ ߕߍ߫ ߝߏߦߌ߬ ߛߐ߬ߘߐ߲߬ ߠߊ߫.>> ߊ߬ ߞߵߏ߬ ߝߙߊ߬ ߞߎߡߊ ߞߊ߲߬.

ߞߊ߬ ߓߍ߲߬ ߏ߬ ߟߋ ߞߏߢߊ ߡߊ߬ ߛߊ߫߸ ߥߊ߬ߦߌ ߟߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߫ ߜߊ߲ߛߊ߲ ߓߍ߲߬ ߘߴߊ߬ ߡߊ߬߸ ߞߏ߫ ߊ߬ߟߎ߬ ߦߋ߫ ߛߐ߲߬ߞߐ߬ ߞߏ ߣߌ߲߬ ߢߊߓߐ߫، <<ߊ߲ ߛߊ߬ߥߏ߬ ߕߍ߫، ߊ߲ ߓߊ߲ ߞߐ ߖߊ߬ߡߊ ߟߊߘߍ߬ ߟߊ߫، ߓߍ߲߬ ߞߍ߫ ߘߴߊ߬ ߡߊ߬ ߞߏ߫ ߛߏ߬ߓߏ ߞߟߏߡߊ ߝߙߋ߬ ߖߕ ߆߀ ߀߀߀ ߟߋ߬ ߟߊ߫߸ ߓߎ߬ߡߊ ߦߋ߫ ߖߕ ߇߀ ߀߀߀ ߘߌ߫، ߓߊ߬ߙߌ߬߸ ߡߙߌߦߊ ߏ߬ ߕߴߊ߲ ߣߌ߫ ߞߎ߲߬ߠߊ߬ߛߌ߮ ߟߎ߬ ߟߊ߫ ߓߍ߲߬ߡߊ߬ ߡߙߌߦߊ߫ ߘߌ߫ ߘߋ߬، ߊ߲ ߣߌ߫ ߞߊ߬ߝߏ߬ߙߋ߲߬ߕߌ߮ ߡߊ߫ ߓߍ߲߬ ߏ߬ ߡߊ߬߸ ߊ߲ ߣߌ߫ ߡߙߊ߬ߓߊ߮ ߡߊ߫ ߓߍ߲߬ ߏ߬ ߡߊ߬߸ ߞߎߡߊߕߍ߫ ߞߎ߲߬ߠߊ߬ߛߌ߰ߟߊ ߡߊ߬߸ ߏ߬ ߟߎ߫ ߛߋ߲߬ ߕߴߊ߬ ߘߐ߫ ߝߋߎ߫، ߊ߲ ߜߊ߲߰ߛߊ߲ ߓߍ߲߬ߞߊ߲߬ߡߊ ߟߵߏ߬ ߘߌ߫.>> ߖߋ߬ߓߌ߬ߦߊ߬ߟߊ ߞߊ߬ ߦߙߐ ߏ߬ ߟߊߜߍ߫ ߞߏߛߓߍ߫.

ߊ߬ߟߎ߬ ߟߊ߫ ߝߐߟߌ߫ ߘߐ߫߸ ߡߙߌߦߊ ߏ߬ ߕߊ߬ߣߴߊ߬ߟߎ߬ ߓߟߏ߫ ߟߋ߬߸ ߛߊ߫ ߛߏ߬ߓߏ ߟߋ߬ ߞߊߣߊ߬ ߘߛߍ߫ ߢߊ ߡߍ߲ ߡߊ߬، <<ߣߴߊ߲ ߡߊ߫ ߣߌ߲߬ ߞߍ߫߸ ߡߐ߱ ߟߎ߬ ߕߍߣߊ߬ ߛߏ߬ߓߏ ߛߐ߬ߘߐ߲߬ ߠߊ߫، ߊ߲ ߘߏ߲߬ ߦߋ߫ ߦߊ߲߬ ߘߎ߰ߘߋ߲ ߣߌ߬ ߞߎ߲߬ߠߊ߬ߛߌ߮ ߟߎ߫ ߟߋ߬ ߟߊ߫ ߛߓߏ߬ ߞߏ ߢߊߓߐ߫ ߞߊ߲ߡߊ߬، ߏ߬ ߘߐ߫߸ ߊ߲ ߧߴߊ߬ ߢߌߣߌ߲߫ ߠߴߊ߬ߟߎ߫ ߝߍ߬߸ ߊ߬ߟߎ߬ ߦߋ߫ ߘߌ߬ߢߍ߬ ߖߕ ߆߀ ߀߀߀ ߞߏ ߣߌ߲߬ ߡߊ߬ ߖߊ߱ߣߌ߲߬.>> ߊ߬ ߞߊ߬ ߦߙߐ ߏ߬ ߝߣߊ߫ ߡߊߜߟߍ߬ߦߊ߬ ߞߏߛߓߍ߫.

ߕߎ߬ߡߊ߬ߣߍ߲߬ ߞߋߟߋ߲ ߏ߬ ߟߊ߫߸ ߥߊ߬ߦߌ ߟߎ߬ ߓߘߊ߫ ߖߊ߰ߛߙߋ߫ ߞߊ߬ߛߙߋ ߟߊ߫ ߘߊ߲߬ߠߕߊ߬ߡߌ߲߬ߠߊ ߟߎ߬ ߦߋ߫ ߛߐ߲߬ߞߐ߬ ߞߏ ߘߐ߫߸ ߡߍ߲ ߠߎ߬ ߦߴߊ߬ߟߎ߫ ߘߊ߲߬ߠߊߕߊ߬ߡߌ߲߬ ߠߊ߫ ߓߘߍߞߍ߭. <<ߡߐ߰ ߛߌ߫ ߦߋ߫ ߘߊ߫ ߛߏ߬ߓߏ ߝߙߋ߬ ߟߊ߫ ߖߕ ߇߀ ߀߀߀ ߛߊ߲ߝߍ߬߸ ߊߟߎ߫ ߦߴߏ߬ ߞߏߝߐ߫،  ߊ߲ ߘߴߏ߬ ߛߋ߲߬ߓߐ߫ ߥߊ߬ߦߌ߬ߦߊ ߘߐ߫ ߝߋߎ߫، ߆߀ ߀߀߀ ߟߋ߬ ߞߟߏߡߊ ߛߐ߲߬ߞߐ ߘߌ߫߸ ߓߎ߬ߡߊ ߛߐ߲߬ߞߐ ߦߋ߫ ߖߕ ߇߀ ߀߀߀ ߟߋ߬ ߘߌ߫، ߊ߬ ߦߋ߫ ߦߙߐ ߓߍ߯ ߘߐ߫ ߕߋ߲߬ ߠߋ߬߸ ߛߌ߯ߙߌ߲߫ ߓߊ߬߸ ߡߊ߲߬ߖߊ߲߬ߠߊ߫ ߓߊ߬، ߣߌ߬ߛߌ߫ ߟߋ߬ ߕߴߦߋ߲߬ ߓߏ߲߬، ߣߴߊ߲ ߡߴߏ߬ ߞߍ߫߸ ߊ߲ ߕߍߣߊ߬ ߣߌ߬ߛߌ߫ ߛߐ߬ߘߐ߲߬ ߠߊ߫ ߕߟߋ߬ߡߊ ߣߌ߲߬ ߘߐ߫ ߡߎ߰ߡߍ߫.>> ߊ߬ ߞߵߏ߬ ߟߊ߬ߛߏ߬ߓߌ߬ߟߌ ߞߍ߫.

ߊ߬ߟߎ߬ ߓߊ߲߫ ߘߊ߫ ߞߵߊ߬ߟߎ߬ ߞߊ߲ߠߊߘߌ߫ ߘߎ߰ߘߋ߲ ߠߎ߬ ߡߊ߬߸ ߞߏ߫ ߡߐ߰ ߛߌ߫ ߓߊ߯ ߦߋ߫ ߘߊ߲߬ߠߕߊ߬ߡߌ߲߬ ߝߙߋ ߟߊ߫߸ ߓߍ߯ ߦߴߴߏ߬ ߕߌ߱ ߞߏߝߐ߫ ߝߊ߰ ߞߎ߲ߘߊ߫. <<ߡߐ߰ ߛߌ߫ ߞߊ߬ ߤߊߟߌ߬ ߘߙߐߡߍ߫ ߞߋߟߋ߲ ߠߋ߬ ߟߊ߫ ߛߐ߲߬ߞߐ߬ ߝߐߣߍ߲ ߣߌ߲߬ ߞߊ߲߬߸ ߊߟߎ߫ ߦߴߏ߬ ߕߌ߱ ߞߏߝߐ߫ ߕߐ߲ߓߟߏߡߊ ߟߎ߬ ߦߋ߫ ߥߟߊ߫ ߞߟߍ߬ߡߐ߰ߘߊ ߟߊ߫، ߊ߲ ߠߊ߫ ߛߓߍߘߊ ߕߍߣߵߊ߬ ߛߋ߲߭ߓߌ߬ߟߊ߬ ߟߴߏ߬ ߘߐ߫߸ ߓߊߏ߬߸ ߏ߬ ߕߌ߱ ߡߴߊ߲ ߠߊ߫ ߡߙߌߘߐ߫ ߕߊ߬ߣߍ߲ ߡߊߓߏ߲߬ߧߊ߬، ߡߍ߲ ߠߎ߬ ߦߴߊ߬ ߝߙߋ߬ ߟߊ߫ ߈߀ ߀߀߀ ߠߊ߫߸ ߏ߬ ߟߎ߬ ߦߴߊ߬ߟߎ߫ ߘߏ߲߰ ߠߊ߫ ߟߋ߬.>> ߊ߬ ߞߵߏ߬ ߝߐ߫ ߞߵߊ߬ ߦߌ߬ߘߊ߫ ߖߍ߬ߘߍ ߞߏ߫ ߞߎߡߊ ߏ߬ ߘߏ߫ ߕߎ߲߬ ߓߘߊ߫ ߛߴߊ߬ߟߎ߫ ߡߊ߬ ߦߋ߲߬ ߞߊ߬ ߓߍ߲߬ ߛߏ߬ߓߏ ߝߋ߬ߙߋ ߡߊ߬ ߘߊ߲߬ߠߕߊ߬ߡߌ߲߬ ߛߐ߲ߞߐ ߟߊ߫.

ߛߐ߲߬ߞߐ߬ ߟߊ߬ߦߟߍ ߣߌ߲߬ ߓߍ߯ ߣߴߊ߬ ߕߊ߫߸ ߥߊ߬ߦߌ ߟߎ߬ ߞߊ߲߫ ߞߏ߫ ߘߏ߫ ߘߌߣߊ߬ ߓߐ߫ ߛߏ߬ߓߏ ߛߐ߲߬ߞߐ ߟߊ߫ ߛߊߟߌ ߞߐ ߘߐ߫ <<ߣߌ߫ ߛߊߟߌ ߓߊ߲߫ ߘߊ߫߸ ߊ߲ ߘߴߊ߲ ߞߐߛߊ߬ߦߌ߲߬ ߖߕ ߅߀ ߀߀߀ ߘߐ߫.>> ߊ߬ ߞߵߏ߬ ߟߊ߬ߤߘߌ ߕߊ߬.

ߊ߬ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߕߎ߬ߢߊ ߞߏ߬ߣߌ߲ ߦߋ߫ ߡߍ߲ ߘߌ߫߸ ߥߊ߬ߦߌ ߟߎ߬ ߣߌ߫ ߝߊ߰ߡߊ ߟߎ߫ ߓߍ߲߬ߣߍ߲߫ ߛߐ߲߬ߞߐ ߡߍ߲ ߡߊ߬߸ ߏ߬ ߟߋ ߖߕ ߄߅ ߀߀߀ ߘߌ߫߸ ߜߟߍ߬ߦߊ ߟߋ߬ ߣߐ߬ ߊ߬ߟߎ߫ ߟߐ߬ ߟߊ߫ ߢߌ߲߬ ߠߊ߫، <<ߕߎ߬ߢߊ ߟߊ߫߸  ߓߍ߲߬ߡߊ߬ߞߊ߲ ߦߋ߫ ߡߍ߲ ߘߌ߫߸ ߏ߬ ߟߋ ߖߕ ߄߅ ߀߀߀ ߘߌ߫، ߣߴߊߟߎ߫ ߞߵߊ߲ ߦߟߍ߬ߣߍ߲ ߦߋ߫ ߏ߬ ߛߊ߲ߝߍ߬߸ ߊ߬ ߓߍ߲߬ߣߍ߲߫ ߠߋ߬ ߕߍ߫، ߣߴߊ߲ ߡߴߏ߬ ߞߍ߫߸ ߡߐ߱ ߟߎ߬ ߕߍߣߊ߬ ߛߏ߬ߓߏ ߛߐ߬ߘߐ߲߬ ߠߊ߫.>>

ߥߊ߬ߦߌ ߟߎ߫ ߞߵߊ߬ߟߎ߬ ߞߊ߲ߠߊߘߌ߫ ߖߡߊ߬ߣߊ ߛߣߍ߬ߞߍ߬ߟߊ ߟߎ߬ ߣߌ߫ ߡߊ߬ߟߌ ߓߌߦߊ߲߫ ߝߙߋߟߊ ߟߎ߬ ߡߊ߬߸ ߞߏ߫ ߊ߬ߟߎ߬ ߦߋ߫ ߓߍ߲߬ ߞߋߟߋ߲߫ ߘߐ߫߸ ߛߊ߫ ߟߐ߯ߝߍ ߘߌ߫ ߓߍ߲߬. <<ߊ߲ ߧߴߊ߬ ߢߌߣߌ߲߫ ߠߊ߫ ߛߣߍ߬ߞߍ߬ߟߊ ߟߎ߬ ߣߌ߫ ߡߊ߬ߟߌ ߕߡߍ߬ߞߘߎ߬ߡߊ߬ ߕߌ߮ ߟߎ߫ ߝߍ߬߸ ߊ߬ߟߎ߬ ߦߋ߫ ߓߍ߲߬ ߞߋߟߋ߲߫ ߘߐ߫، ߊ߲ ߘߌ߫ ߛߋ߫ ߣߌ߬ߛߌ ߛߊ߲߬ ߠߴߊ߲ ߓߘߊ ߦߊ߲߬߸ ߓߊ߬ߙߵߊ߬ ߦߋ߫ ߘߌ߫ ߟߊ߫ ߛߐ߲߬ߞߐ ߡߍ߲ ߠߊ߫߸ ߊ߬ ߕߴߛߋ߫ ߛߊ߲߬ ߠߊ߫.>>

ߛߐ߲߬ߞߐ߬ ߦߟߍ ߣߌ߲߬ ߞߏߛߐ߲߬߸ ߢߊ ߓߍ߯ ߥߟߏߣߍ߲߫ ߝߊ߰ߡߊ ߟߎ߫ ߟߋ߬ ߘߐ߫ ߕߋ߲߬، ߛߴߊ߬ߟߎ߬ ߘߌ߫ ߞߎߡߊ߫߫ ߣߌ߲߬ ߞߏ ߘߐ߫߸ ߡߍ߲ ߘߌߡߊ߲߫ ߖߡߊ߬ߣߊ߬ߘߋ߲ ߠߊ߫߸ ߞߵߏ߬ ߞߍ߫، ߞߊ߬ ߥߊ߯ߕߌ ߟߌ߬ߤߟߊ ߡߊߝߟߍ߫ ߛߐ߬ߘߐ߲ ߘߊߞߎ߲ ߘߐ߫߸ ߞߊ߬ ߛߐ߲߬ߞߐ ߢߊߓߐ߫ ߞߊ߬ ߓߍ߲߬ ߏ߬ ߡߊ߬.