ߞߊ߲ߞߊ߲߫ ߕߌ߲߬ߞߎߘߎ߲ ߞߎ߲߬ߠߊ߬ߛߌ߰ߟߊ ߟߊ߫ ߞߎ߲߬ߠߊ߬ߛߌ߰ߟߌ ߞߣߐߡߊ߬߸ ߡߍ߲ ߞߍ߫ ߘߊ߫ ߞߊ߲ߞߊ߲߫ ߡߙߊ߬ߓߊ߰ ߢߊߞߘߐ߫߸ ߊ߬ ߣߌ߫ ߟߊ߬ߞߟߏ߬ߞߟߏ߬ߟߌ ߞߎ߲߬ߕߌ߰ ߛߌߦߊߡߊ߲߫߸ ߞߘߐߓߐߟߌ ߕߊߟߊ߲߫ ߞߊ߲ ߜߊ߬ߛߌ߬ ߘߊ߫ ߛߐ߱ ߢߌ߲߬ ߡߊ߬، ߊ߬ߟߎ߬ ߦߙߌߞߊ ߦߋ߫ ߡߊ߬ߡߌ߬ߘߊ߬ߟߊ߬ ߂ ߉߄߅ ߟߋ߬ ߘߌ߫߸ ߡߍ߲ ߠߎ߬ ߕߐ߮ ߛߓߍߣߍ߲߫ ߢߌ߬ߣߊ߲߬ ߞߘߐߓߐߟߌ ߘߐ߫، ߛߊ߲߬ ߦߙߌߞߊ ߞߊ߬ߙߊ߲ ߞߐߝߍ߬߸ ߊ߬ߟߎ߬ ߞߘߐߓߕߐ߫ ߏ߬ ߟߋ ߟߊ߫ ߢߌ߬ߣߊ߲߬߸ ߞߊ߬ߙߊ߲ ߛߌߓߟߏߡߊ߫ ߓߐߣߍ߲߫ ߢߐ߲߰ ߡߊ ߟߎ߫ ߞߊ߲߬߸ ߞߏ߲ߞߏߘߐߕߊ ߜߋߙߋ߲ߜߋߙߋ߲ߧߊ ߦߴߏ߬ ߟߋ ߘߐ߫߸ ߛߍߡߦߊ ߦߴߏ߬ ߟߋ ߘߐ߫߸ ߕߌ߲߬ߞߘߐ߬ߛߌ߮ ߦߴߏ߬ ߟߋ ߘߐ߫߸ ߞߵߏ߬ ߟߊ߫ ߖߊ߬ߕߋ߬ߓߐ ߡߊ߬ߡߙߊ߬ߟߌ ߣߌ߫ ߞߊ߬ߙߊ߲߬ߕߊ߬ ߢߍߓߌߟߊ ߟߎ߫ ߟߞߊ߬ߙߊ߲߬ߠߌ߲ ߣߌ߫ ߝߘߏ߬ߓߊ߬ߕߊ ߟߎ߫ ߞߊ߲߬߸ ߊ߬ ߣߌ߫ ߓߊ߯ߙߊ߫ ߡߞߊߙߊ߲߫ ߕߊ߲ߓߊ߲ ߠߎ߬ ߝߣߊ߫߸ ߏ߬ ߟߎ߬ ߓߍ߯ ߟߋ߬ ߦߴߌߘߐ߫ ߢߐ߲߯ ߝߍ߬ ߣߌ߲߬.

ߡߊ߬ߡߌ߬ߘߊ߬ߟߌ߬ߟߊ ߢߌ߲߬ ߠߎ߬ ߛߏ߯ߙߏߣߍ߲߫ ߕߊ߲ߓߊ߲߫ ߥߐߙߐ߲ߝߌ߬ߟߊ߫ ߟߋ߬ ߕߍ߫: ߣߊ߯ߣߌ߲߫ ߦߋ߫ ߞߊ߲ߞߊ߲߫ ߛߏ ߞߣߐ߫߸ ߝߌ߬ߟߊ߬ ߦߋ߫ ߛߌ߯ߙߌ߲߫߸ ߞߋߟߋ߲߫ ߦߋ߫ ߡߊ߲߬ߖߊ߲߬ߠߊ߫، ߛߐ߰ߡߘߊ߬ ߖߏߣߊ ߟߋ߬ ߟߊ߫߸ ߞߘߐߓߐߟߌ ߞߏߟߊߕߍ߮ ߟߎ߫ ߞߵߊ߬ ߦߌ߬ߘߊ߬ ߞߏ߫߸ ߡߍ߲ ߠߎ߬ ߣߊ߬ߓߊߟߌ ߦߋ߫߸ ߏ߬ ߡߊ߲߫ ߛߌߦߊ߫، ߞߏ ߟߎ߬ ߘߏ߲߬ ߝߣߊ߫ ߓߘߊ߫ ߘߊߡߌ߬ߣߊ߬ ߣߌ߫ ߖߎ߯ߡߊ߲߫ ߣߌ߫ ߓߌ߬ߟߊ߬ߒ߬ߘߐ߬ ߕߍ߫.

ߡߊߡߊߘߎ߫ ߊߟߌߝߊ߬ ߓߊߟߑߘߋ߬ ߡߍ߲ ߦߋ߫ ߞߊ߲ߞߊ߲߫ ߕߌ߲߬ߞߎߘߎ߲ ߞߘߐߓߐߟߌ ߟߎ߬ ߘߏ߲߬ߖߟߎ߬ߡߊ߬ߟߌ߬ߟߊ߫ ߝߊ߬ߛߏ߬ߟߊ߬ߞߊ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߛߍߥߊߣߍ߲߫ ߓߊ߯ߙߊ ߘߊߡߌ߬ߣߊ߬ ߢߊ ߟߊ߫. <<ߊ߲ ߣߌ߫ ߗߋߘߋ߲ ߠߎ߬ ߦߋ߫ ߢߐ߲߮ ߞߊ߬ߟߊߡߊ߬ ߞߏߛߓߍ߫߸ ߡߍ߲ ߠߎ߬ ߟߊߕߊ߯ߣߍ߲߫ ߛߌ߯ߙߌ߲߫߸ ߊ߬ ߣߌ߫ ߡߊ߲߬ߖߊ߲߬ߠߊ߫، ߞߘߐߓߐߟߌ ߘߏ߲߬ ߘߊߡߌ߬ߣߊ߬ߣߍ߲߫ ߊ߬ ߓߍ߯ ߘߐ߫ ߡߊ߬ߝߊ ߟߋ߬ ߘߐ߫ ߝߛߊߦߌ߫.>> ߊ߬ ߞߵߏ߬ ߦߌ߬ߘߊ߬.

ߞߘߐߓߐߟߌ ߣߌ߲߬ ߦߋ߫ ߥߊ߫ ߟߊ߫ ߝߊ߬ߘߌ ߡߍ߲ ߠߎ߬ ߘߐ߫߸ ߞߏߟߊߕߍ߮ ߣߌ߲߬ ߞߵߏ߬ ߢߊߝߐ߫߸ ߞߊ߬ ߓߍ߲߬ ߞߘߐߓߐߟߌ ߛߊ߬ߙߌ߬ߦߊ ߟߎ߬ ߘߐߖߊ߭ ߡߊ߬، ߊ߬ ߞߊ߲߫ ߞߏ߫ <<ߞߘߐߓߐߓߊ߯ߕߐ ߟߎ߬ ߦߴߊ߲ ߠߊ߫ ߡߞߊ߬ߙߊ߲߬ߘߋ߲ ߠߎ߫ ߟߋ߬ ߘߌ߫߸ ߊ߲ ߧߋ߫ ߦߊ߲߬ ߊ߬ߟߎ߬ ߞߘߐߓߐ߫ ߞߊ߲ ߠߋ߬ ߡߊ߬߸ ߊ߬ߟߎ߬ ߘߐߛߌߟߊ߲߫ ߞߏ߫ ߣߴߊ߬ߟߎ߫ ߖߛߎ߬ ߟߊ߬ߓߐ߬ ߞߏ߫ ߕߍ߫ ߘߋ߬.>> ߊ߬ ߞߵߏ߬ ߦߙߐ ߘߐߞߣߍ߫، ߊ߬ ߞߵߊ߬ ߘߊߣߐ ߕߏ߫ ߊ߬ ߡߊ߬ ߝߣߊ߫߸ ߞߏ߫ ߞߊ߬ ߓߍ߲߬ ߛߍ߬ߓߍ ߛߌߟߊ ߕߊ߯ߡߊ ߡߊ߬߸ ߘߐ߬ߞߏ߬ߦߊ߬ߟߌ߬ ߣߌ߫ ߘߐߣߐ߰ߦߊ߬ߟߌ߬ ߕߴߊ߬ ߘߐ߫، ߏ߬ ߞߎ߲߬ ߕߍ߫ ߘߋ߬ ߞߏ߫ ߞߊ߬ ߞߘߐߓߐߓߊ߯ߕߐ ߟߎ߬ ߛߋ߲߬ߓߐ߫، ߓߊ߬ߙߌ߬߸ ߞߊ߬ ߕߋߟߋ߲ ߣߌ߫ ߜߍߦߊ ߓߊ߲ߓߊ߲߫ ߞߘߐߓߐߟߌ ߞߎ߲߬ߕߊ߰ ߞߣߐ߫.

ߕߋ߲߭ߕߋ߲߭ ߣߌ߲߬ ߘߐ߫߸ ߟߏ߲߫ ߝߟߐ ߕߊ߬ߡߌ߲߬ ߘߴߊ߬ ߢߌ߬ߡߊ ߟߊ߫߸ ߓߌ߬ߟߊ߬ߒ߬ߘߐ߬ ߝߏߦߌ߬ ߡߊ߫ ߟߊߞߙߐ߬ߛߌ߬߸ ߞߊ߬ߙߏ߲߬ ߞߏ߬ ߞߎߡߊ߫ ߘߏ߲߬ ߡߊ߫ ߡߍ߲߫ ߕߊ߲ߓߊ߲߫ ߞߎ߲ߝߊ߲ߓߐߣߍ߲ ߠߎ߬ ߘߐ߫، ߊ߬ ߞߏ ߘߊߡߌߣߊ߫ ߢߊ ߞߏ߬ߣߌ߲߬ ߘߌ߫ ߡߐ߰ ߖߌ߰ߡߝߊ߬߸ ߞߘߐߓߐߓߊ߯ߕߐ߫ ߥߊ߯ ߛߊ߬ߓߊ ߣߌ߲߬ ߕߍߡߊ߬߸ ߓߊ߯ߙߊ߫ ߡߊߞߊ߬ߙߊ߲߬ߣߍ߲ ߣߌ߫ ߟߐ߲ߠߌ߲߫ ߛߐ߬ߘߐ߲߬ߣߍ߲ ߖߐ߲ߓߐ߲߫ ߢߌߣߌ߲ ߘߊߞߎ߲ ߘߐ߫߸ ߞߎ߲߬ߢߐ߲߮ ߣߌ߲߬ ߕߍ߫ ߞߎ߲߬ߢߐ߲߰ ߘߋ߲߬ߣߍ߲߫ ߘߌ߫.