ߋߣߍߙߑߖ߭ߌ߫ ߞߊ߬ߙߊ߲߬ߕߊ߬ ߓߊߖߎߟߞߊ ߞߊ߬ ߥߛߊ߬ߛߙߋ߬ ߟߕߊ߬ߡߌ߲߬ ߖߊ߲ߖߏ߲ ߠߋ߬ ߛߌ߲߬ߝߏ߲߬ߧߊ߫ ߓߌ߬ ߞߎߣߎ߲ߟߏ߲ ߣߌ߲߬ ߡߊ߬߸ ߂߀߂߆ ߥߊ߬ߛߌ߬ߥߙߊ ߕߋ߬ߟߋ߫ ߃ ߡߊ߬߸ ߞߊ߬ ߞߣߐߘߐߘߌߦߊ߫ ߞߐ߲ߘߐ߲߫ ߘߌ߫ ߞߊ߬ߙߊ߲߬ߘߋ߲ ߘߏ߫ ߟߎ߫ ߡߊ߬߸ ߡߍ߲ ߠߎ߬ ߞߵߊ߬ߟߎ߬ ߘߐߖߊ߬ ߞߘߐߓߐߟߌ߫ ߕߊ߬ߡߌ߲߬ߣߍ߲ ߘߐ߫، ߞߊ߬ߙߊ߲߬ߕߊ ߞߎ߲߬ߠߊ߬ߛߌ߰ߓߊ߮ ߟߎ߬ ߟߊ߫ ߝߐߟߌ߫ ߘߐ߫߸ ߊ߬ߟߎ߫ ߣߐ߬ ߢߌ߲߬ ߠߊߥߟߌ߬ ߟߊ߫ ߘߋ߲ߣߍ߲ ߠߎ߬ ߞߟߊߓߎߘߏ߲߭ ߠߋ߬ ߡߊ߬߸ ߞߵߊ߬ߟߎ߬ ߟߊ߫ ߓߊ߯ߙߊ߫ ߞߍߣߍ߲ ߘߌߦߊߘߏ߲߬ ߊ߬ߟߎ߬ ߘߐ߫.

ߞߣߐߘߐߘߌߦߊ߫ ߞߐ߲ߘߐ߲ ߣߌ߲߬ ߡߊ߫ ߘߌ߫ ߞߊ߬ߙߊ߲߬ߘߋ߲ ߓߍ߯ ߡߊ߬ ߘߋ߬߸ ߓߊ߬ߙߌ߬߸ ߡߍ߲ ߠߎ߬ ߞߵߊ߬ߟߎ߬ ߘߐߖߊ߬ ߞߘߐߓߐߟߌ ߘߐ߫، ߛߊ߫ ߞߊ߬ߙߊ߲߬ߘߋ߲ ߠߎ߬ ߘߌ߫ ߞߟߊߓߎ ߛߐ߬ߘߐ߲߫ ߞߵߊ߬ߟߎ߬ ߘߐߖߊ߬.

ߌߓߙߊߤߌߡߊ߬ ߞߐ߲ߘߍ߫ ߡߍ߲ ߦߋ߫ ߋߣߍߙߑߖ߭ߌ߫ ߞߊ߬ߙߊ߲߬ߕߊ ߗߋߕߌ߮ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫: <<ߊ߲ ߣߐ߬ ߞߐ߲ߘߐ߲ ߢߌ߲߬ ߠߎ߬ ߘߌ߫ ߟߊ߫ ߞߊ߬ߙߊ߲߬ߘߋ߲ ߠߎ߬ ߡߊ߬ ߟߋ߬߸ ߛߊ߫ ߞߊ߬ ߞߟߊߓߎ߫ ߘߌ߫ ߊ߬ߟߎ߫ ߡߊ߬، ߣߴߌ ߞߊ߬ ߘߋ߲ߣߍ߲ ߟߐ߬ ߓߊ߯ߙߊ ߟߊ߫߸ ߊ߬ ߞߵߊ߬ ߞߍ߫߸ ߊ߬ ߘߏ߲߬ ߓߍ߲߬ ߘߊ߫߸ ߝߏ߫ ߌ ߦߴߊ߬ ߞߣߐߘߐߘߌߦߊ߫ ߟߋ߬߸ ߞߵߊ߬ ߛߙߊ߬ ߞߏ߬ߢߌߡߊ ߞߍ߫.>> ߊ߬ ߞߵߏ߬ ߢߊߝߐ߫.

ߊ߬ ߓߊ߲߫ ߘߊ߫ ߞߵߊ߬ ߞߊ߲ߠߊߘߌ߫ ߟߞߊ߬ߙߊ߲߬ߠߌ߲߬ߠߊ ߟߎ߬ ߣߌ߫ ߘߋ߲ߓߊߕߌ߮ ߟߎ߬ ߡߊ߬߸ ߞߏ߫ ߊ߬ߟߎ߬ ߦߴߊ߬ߟߎ߫ ߖߊ߲߬ߕߏ߬ ߘߋ߲ߣߍ߲ ߠߎ߬ ߘߐ߫߸ ߏ߬ ߟߎ߬ ߡߍ߲ ߦߋ߫ ߖߡߊ߬ߣߊ ߡߙߊ߬ߓߊ߮ ߘߌ߫ ߛߌߣߌ߲߫ ߣߊ߬ߕߐ ߟߎ߬ ߘߐ߫.

<<ߒ ߧߴߊ߬ ߝߐ߫ ߟߊ߫ ߘߋ߲ߓߊߕߌ߮ ߟߎ߬ ߦߋ߫ ߓߌ߬ ߢߐ߲߰ ߟߏ߲߫߸ ߊ߬ߟߎ߬ ߦߴߊ߬ߟߎ߬ ߞߙߐ߬ߛߌ߬ ߕߏ߫ ߘߋ߲ߣߍ߲ ߠߎ߬ ߘߐ߫ ߞߵߊ߬ߟߎ߬ ߖߏ߯ߘߏ߲߬߸ ߞߊ߬ߕߎ߲߯߸ ߊ߲ ߠߊ߫ ߛߌߣߌ߲߫ ߠߋ߬ ߘߋ߲ߣߍ߲ ߠߎ߬ ߘߌ߫߸ ߞߵߊ߬ ߝߐ߫ ߘߋ߲ ߠߎ߬ ߝߣߊ߫ ߦߋ߫ ߊ߬ߟߎ߬ ߝߣߊ߫ ߦߴߊ߬ߟߎ߫ ߛߍ߬ߓߍߘߏ߲߬ ߞߊ߬ߙߊ߲ ߡߊ߬߸ ߞߵߊ߬ ߝߐ߫ ߞߊ߬ߙߊ߲߬ߡߐ߮ ߟߎ߬ ߝߣߊ߫ ߢߣߊ߫߸ ߊ߲ ߓߍ߯ ߦߋ߫ ߘߍ߬ ߞߊ߬ ߘߋ߲ߣߍ߲߫ ߠߎ߬ ߖߏ߯ߘߏ߲߬߸ ߏ߬ ߟߋ߬ ߘߌߡߊ߲߫ ߊ߲ ߓߍ߯ ߟߊ߫.>> ߊ߬ ߞߵߏ߬ ߝߙߊ߬ ߞߎߡߊ ߞߊ߲߬.

ߟߞߊ߬ߙߊ߲߬ߠߌ߲߬ߠߊ߫ ߊߦߌߛߊߕߊ߬ ߛߌ߬ߟߊ ߝߣߊ߫ ߣߐ߬ ߛߙߊ߬ߣߎ߲ ߕߊ߬ ߟߊ߸ ߊ߬ ߞߊ߬ ߕߊ߲߬ߘߏ߬ߟߌ ߟߊߛߋ߫ ߟߊ߲ߝߊ߲ ߣߎߥߊߙ ߡߊ߬߸ ߏ߬ ߡߍ߲ ߞߊ߬ ߟߊ߬ߞߐ߰ߟߌ߬ ߞߏ ߡߙߌߦߊ߫ ߓߘߍ ߕߊ߬߸ ߞߊ߬ ߛߋ߫ ߞߊ߬ߙߊ߲߬ߘߋ߲߬ ߛߌߦߊߡߊ߲߫ ߛߐ߫ ߟߊ߫ ߞߟߊߓߎ߫ ߞߍ߲ߘߍ ߟߊ߫.

<<ߒ ߘߌ߫ ߛߋ߫ ߡߍ߲ ߝߐ߫ ߟߊ߫ ߞߊ߬ߙߊ߲߬ߘߋ߲ ߕߐ߭ ߟߎ߬ ߦߋ߫ ߛߊ߲߭ ߣߊ߬ߕߐ ߕߊ ߘߐ߫߸ ߊ߬ߟߎ߬ ߦߴߊ߬ߟߎ߬ ߘߐߖߊ߬ ߞߊ߬ ߞߟߊߓߎ ߕߊ߬߸ ߖߐ߲߰ߛߊ߫ ߊ߬ߟߎ߬ ߝߣߊ߫ ߘߌ߫ ߝߙߊ߬ ߛߊ߲߭ ߣߊ߬ߕߐ ߞߣߐߘߐߘߌߦߊߓߊ߯ߕߐ ߟߎ߫ ߞߊ߲߬، ߊ߬ߟߎ߬ ߦߴߊ߬ߟߎ߬ ߘߐߖߊ߬ ߟߊ߬ߞߐ߰ߟߌ ߟߎ߬ ߡߊ߬߸ ߊ߬ ߓߐ߫ ߘߊ߫ ߝߊ߲߬ ߛߌ߫ ߘߐ߫߸ ߘߋ߲ߣߍ߲ߧߊ߫ ߞߏ߫ ߕߴߊ߬ ߘߐ߫ ߡߐ߰ߓߊ߬ߦߊ߫ ߞߏ߫ ߕߴߊ߬ ߘߐ߫.>> ߊ߬ ߞߵߏ߬ ߦߌ߬ߘߊ߬.

ߞߊ߬ߙߊ߲߬ߘߋ߲ ߡߍ߲ ߠߎ߬ ߝߣߊ߫ ߞߊ߬ ߞߣߐߘߐߘߌߦߊ ߛߐ߬ߘߐ߲߬߸ ߘߊ߬ߝ߭ߌߘ ߙߏ߬ߖ߭ߋ ߛߊߥߏߟߌ߫ ߦߴߏ߬ ߘߏ߫ ߟߋ߬ ߘߌ߫߸ ߏ߬ ߞߵߊ߬ ߟߊ߫ ߛߍߥߊ ߦߌ߬ߘߊ߬߸ ߊ߬ ߣߴߊ߬ ߞߎ߲߬ߠߊ߬ߦߋߙߋ߲ ߡߍ߲ ߦߴߊ߬ ߞߊ߲߬߸ ߞߊ߬ ߓߊ߲߫ ߞߵߊ߬ ߘߍ߬ߢߐ߲߮ ߕߐ߭ ߟߎ߬ ߞߟߌ߫ ߘߐ߬ߖߊ ߡߊ߬ ߞߊ߬ ߞߊ߬ߙߊ߲ ߡߌ߬ߣߊ߫ ߛߍ߬ߓߍ ߟߊ߫.

<<ߒߠߋ ߛߍߥߊߣߍ߲߫ ߒ ߠߊ߫ ߛߙߋߓߍ ߣߌ߲߬ ߛߐ߬ߘߐ߲ ߘߐ߫ ߒ ߓߟߏ߫ [...] ߒ ߧߋ߫ ߒ ߞߊ߲ߠߊߘߌ߫ ߟߊ߫ ߒ ߘߍ߬ߢߐ߲߮ ߕߐ߭ ߟߎ߫ ߡߊ߬߸ ߊ߬ߟߎ߬ ߦߴߊ߬ߟߎ߬ ߘߐߖߊ߬ ߞߊ߬ߙߊ߲ ߞߊ߲߬߸ ߓߊߏ߬߸ ߣߌ߫ ߡߐ߱ ߡߊ߫ ߞߊ߬ߙߊ߲߬߸ ߝߏߣߌ߲߬ ߌ ߞߍ߫ ߘߊ߫ ߞߊ߬ߙߊ߲߬ߠߊ ߟߎ߬ ߟߊ߫ ߖߐ߲߭ ߘߌ߫، ߏ߬ ߘߐ߫߸ ߡߣߊ߬ߡߣߊ ߕߍ߫ ߥߊ߫ ߟߊ߫ ߞߊ߬ߙߊ߲ ߘߌ߫߸ ߣߴߌ ߡߊ߫ ߝߋ߲߫ ߟߐ߲߫߸ ߡߍ߲ ߞߊ߬ ߘߏ߫ ߟߐ߲߫߸ ߌ ߡߊߘߏ߲߬ ߏ߬ ߟߊ߫.>>  ߊ߬ ߞߵߏ߬ ߦߌ߬ߘߊ߬.

ߏ߬ ߢߊ߫ ߞߋߟߋ߲ ߠߋ߬ ߡߊ߬߸ ߡߊߙߌߦߡߊߜߍ߫ ߖߊ߬ߞߌ߬ߕߋ߬ ߡߍ߲ ߦߋ߫ ߞߊ߬ߙߊ߲߬ ߠߊ߫ ߞߊ߬ߙߊ߲߬ߕߊ ߦߌߟߡߊ߫ ߆߲ ߠߊ߫߸ ߏ߬ ߝߣߊ߫ ߞߵߊ߬ ߟߊ߫ ߛߍߥߊ ߦߌ߬ߘߊ߬ : << ߒ ߛߍߥߊߣߍ߲߫ ߒ ߠߊ߫ ߝߌߛߙߌ ߡߊߛߐ߬ߘߐ߲߬ ߘߐ߫ ߞߊ߬ ߝߘߊ߫ ߒ ߞߊ߬ߙߊ߲߬ߡߐ߮ ߟߎ߬ ߟߊ߫߸ ߝߋ߲߫ ߡߍ߲ ߦߴߊ߬ ߘߌ߫ ߊ߬ ߣߊ߬ߝߊ ߞߊ߫ ߓߏ߲߬߸ ߊ߬ ߘߏ߲߬ ߘߌ߫ ߒ ߡߊ߬ߞߏ ߢߊ߬ ߝߣߊ߫߸ ߛߍߥߊ ߡߊ߬ ߒ ߕߴߛߋ߫ ߞߊ߬ ߒ ߘߐߝߎߟߋ߲߫ ߞߎߡߊ ߘߐ߫.  ߒ ߘߌ߫ ߛߋ߫ ߡߍ߲ ߝߐ߫ ߟߊ߫ ߒ ߘߍ߬ߢߐ߲߮ ߕߐ߭ ߟߎ߬ ߦߋ߫߸ ߊ߬ߟߎ߬ ߦߋ߫ ߡߣߊ߬ߡߣߊ ߓߐ߫ ߊ߬ߟߎ߫ ߞߎ߲߭ ߘߐ߫ ߞߊ߬ ߞߟߊߓߎ ߕߊ߬߸ ߞߊ߬ ߞߊ߬ߙߊ߲ ߞߍ߫߸ ߊ߲ ߓߍ߯ ߦߋ߫ ߞߊ߬ߙߊ߲ ߞߍ߫.>>

ߖߊ߲߬ߖߏ߲ ߣߌ߲߬ ߛߘߊ߫ ߘߐ߫߸ ߋߣߍߙߑߖ߭ߌ߫ ߞߊ߬ߙߊ߲߬ߕߊ߬ ߓߊߖߎߟߞߊ ߓߘߊ߫ ߘߐ߬ߖߊ ߛߌߟߊ ߟߊߞߊ߬ ߞߊ߬ߙߊ߲߬ߘߋ߲ ߠߎ߬ ߦߋ߫߸ ߞߵߊ߬ߟߎ߫ ߟߐ߬ ߞߊ߬ߙߊ߲ ߡߌ߬ߣߊ߬ ߟߊ߫ ߛߍ߬ߓߍߍ ߟߊ߫߸ ߞߵߊ߬ߟߎ߫ ߟߐ߬ ߡߊ߬ߝߊ ߛߌߟߊ߫ ߓߘߍ ߕߊ߯ߡߊ߫ ߟߊ߫، ߞߊ߬ߙߊ߲߬ߕߊ ߞߎ߲߬ߠߊߛߌ߰ߓߊ߮ ߟߎ߬ ߞߏ߬ߣߌ߲ ߦߟߌߡߊߘߌߦߊߣߍ߲߫߸ ߞߏ߫ ߡߍ߲ ߠߎ߬ ߣߐ߬ ߊ߬ߟߎ߬ ߘߐߖߊ߬ ߟߊ߫ ߣߌ߲߬߸ ߏ߬ ߟߎ߬ ߘߌ߫ ߕߊ߬ߡߌ߲߬ ߘߏ߫ ߟߊ߫ ߟߴߊ߬ߟߎ߬ ߟߊ߫ ߘߐ߬ߖߊ ߞߊ߲߬، ߞߊ߬ ߞߟߊߓߎ ߘߌ߫ ߕߐ߬ߢߐ߲߮ ߠߎ߬ ߝߣߊ߫ ߡߊ߬.