ߞߌ߲ߘߌߦߊ߫ ߛߌ߰ߣߍ߲߫ ߛߣߍ߬ߞߍ ߟߋ߬ ߡߊ߬߸ߏ߬ ߡߍ߲ ߦߴߊ߬ ߦߌ߬ߘߊ߬ ߟߊ߫ ߞߏ߫ ߞߌ߲ߘߌߦߞߊ ߝߊ߲߬ߓߊ ߛߌ߰ߣߍ߲߫ ߛߍ߬ߣߍ ߟߋ߬ ߡߊ߬߸  ߏ߬ ߘߏ߫ ߟߎ߫ ߟߋ߬ ߣߊߞߐ߫ ߝߋ߲ ߠߎ߬ ߓߊ߯ߙߊ ߘߌ߫ ߦߏ߫ ߖߊ߬ߓߌߓߌ ߣߌ߫ ߛߊ߬ߦߌߙߊ ߣߌ߫... ߞߵߏ߬ ߟߊ߫ ߦߙߌ߫ ߛߍ߲ ߕߘߎ߫ ߟߎ߬ ߞߊ߲߬߸ߏ߬ ߡߍ߲ ߦߴߊ߬ߟߎ߬ ߟߊ߫ ߘߐ߬ߝߐ ߘߐ߫ ߞߊ߬ߦߌ߯.

ߒ߬ߓߊ߬߸ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫ ߛߋ߲߬ߠߊ߬ߓߐ߬ߟߌ ߟߋ߬ ߞߊ߲߬߸ߞߵߊ߬ ߓߍ߲߬ ߓߊ߯ߙߊ ߏ߬ ߟߎ߬ ߞߍߓߊ߮ ߟߎ߬ ߛߌ߰ߝߊߘߌ ߟߎ߬ ߣߴߊ߬ߟߎ߬ ߟߊ߫ ߓߊ߯ߙߊ ߏ߬ ߟߎ߬ ߟߐ߲ ߡߊ߬.

ߊ߲ ߛߋ߫ ߘߊ߫ ߞߊ߬ ߣߊߞߐ߫ ߓߊ߯ߙߟߊ ߘߏ߫ ߟߎ߫ ߘߟߊߛߎ߲ߓߎ߫ ߊ߬ߟߎ߬ ߟߊ߫ ߦߙߌ߫ ߛߍ߲߫ ߕߘߎ ߞߏߢߊ  ߞߊ߲߬.

ߦߏ߫ ߛߟߊߕߌ߯ ߊߓߎߓߞߊߙ ߛߌ߬ߛߋ ߗߍߙߑߣߐ߫ ߖߘߌߦߊ߲߫ ߞߌ߲߬ߘߊ ߟߊ߫.

<< ߝߊߦߌߘߊ߫ ߓߊ߯ߙߘߊ ߡߍ߲ ߦߋ߫ ߣߌ߲߬ ߣߊߟߌ߬ߡߎ߲߫ ߦߙߌ߫ ߛߍ߲߫ ߕߘߎ ߟߎ߬ ߘߌ߫ ߸ߊ߲ߠߎ߬ ߛߐ߬ߘߐ߲߬ߣߍ߲߫ ߣߌ߲߬ ߘߐ߫ ߟߋ߬ ߞߵߊ߬ ߕߘߍ߬ ߊ߲ ߠߊ߫ ߡߐ߰ߓߊ ߟߎ߬ ߦߋ߫ ߣߌ߲߬ ߞߊ߲߬߸ߊ߲ߠߎ߬ ߝߣߊ߫ ߦߋ߫ ߛߌߟߊ߫ ߞߋߟߋ߲ ߏ߬ ߟߋ߬ ߞߊ߲߬، ߞߊ߬ߕߎ߲߯،ߌ ߞߵߌ ߛߐ߬ߘߐ߲߬ߓߊ߮ ߟߎ߬ ߕߘߍ߬ ߓߊ߯ߙߊ ߡߍ߲ ߞߊ߲߬ ߸ߞߵߌߟߋ ߓߊߟߏ߫ ߏ߬ ߘߐ߫߸ߌ ߞߍ߫ ߜߏ߫ ߞߊ߬ ߓߊ߯ߙߊ߫ ߜߘߍ߫ ߡߊߞߊ߬ߙߊ߲߬ߧߊ߫ ߞߵߌ ߛߐ߬ߘߐ߲߬ߓߊ߮ ߟߎ߬ ߕߊ ߏ߬ ߕߏ߫ ߦߋ߲߬߸ߏ߬ ߘߐ߫ ߤߊ߲߯ ߕߋ߲߬ ߒ߬ߠߎ߬ ߝߣߊ߫ ߦߋ߫ ߢߊ ߏ߬ ߟߋ ߡߊ߬߸ ߞߊ߬ ߒ߬ ߠߊ߫ ߞߐߙߍ߫ ߟߎ߬  ߓߊߟߏ߫، ߓߊ߸ߛߍ߬ߣߍ ߕߴߊ߬ ߕߌ߱ ߖߊ߲߬ߝߊ߬ ߟߊ߫߸ ߏ߬ ߟߋ߬ ߞߏߛߐ߲߬ ߊ߲ ߝߣߊ߫ ߣߐ߬ ߓߊ߯ߙߘߊ ߣߌ߲߬ ߛߎߥߊ߲ߘߌ߫ ߟߊ߫ >>

ߣߊߞߐ߫ ߓߊ߯ߙߟߊ ߛߌ߬ߛߋ ߞߵߊ߬ ߦߌ߬ߘߊ߬ ߞߏ߫߸ ߊ߬ ߛߌ߰ߣߍ߲߬ ߕߍ߫ ߦߙߌ߫ ߛߍ߲߫ ߕߘߎ ߘߐߙߐ߲߫ ߡߊ߬ ،ߓߊ߬ߙߌ߬ ߊ߬ ߦߋ߫ ߘߏ߫ ߜߘߍ߫ ߟߎ߬ ߞߍ߫ ߟߴߊ߬ ߓߟߏ߫ ߝߍ߬ :

<< ߒߠߋ ߓߊ߯ߙߊ߫ ߜߘߍ߫ ߞߍ߫ ߟߊ߫ ߡߍ߲ ߣߌ߫ ߦߙߌ߫ ߛߍ߲߫ ߕߘߎ ߣߌ߲߬ ߕߍ߫ ߞߋߟߋ߲߫ ߘߌ߫ ߸ ߊ߬ ߞߐ߬ߣߌ߲߬ ߝߣߊ߫ ߦߋ߫ ߘߎ߰ߞߟߏ߬ ߓߊ߯ߙߊ ߟߋ߬ ߘߌ߫ ߣߊߟߌ߬ߡߎ߲߫ ߣߊߞߐ߫ ߝߋ߲ ߠߎ߬ ߘߌ߫ (ߖߊ߬ߘߏ ߣߌ߫ ߛߊ߬ߦߌߙߊ... ) ߸ ߏ߬ ߡߍ߲ ߓߍ߯ ߦߋ߫ ߊ߲ ߠߊ߫ ߦߙߌ߫ ߛߍ߲߫ ߕߘߎ ߣߌ߲߬ ߘߐ߫ ߸ߊ߲ ߧߴߏ߬ ߟߎ߬ ߓߍ߯ ߟߋ߬ ߓߊ߬ߛߊ߲߬ ߠߊ߫ ߢߐ߲߮ ߘߐ߫>>.

ߊ߬ ߞߵߊ߬ ߟߊ߫ ߛߙߊ߬ߣߎ߲ ߣߌ߲߬ ߞߎ߲߭ ߘߏ߲߬ ߊ߬ ߘߍ߬ߢߐ߲߰ ߝߏߣߌ߲ߞߋ ߟߎ߫ ߓߌ߬ߟߊ߬ߛߌߟߊ ߟߋ߬ ߟߊ߫߸ߊ߬ ߜߋ߲ߜߋ߲߫ ߡߍ߲ ߠߎ߬ ߓߘߊ߫ ߓߊ߲߫ ߞߊ߬ߙߊ߲ ߠߊ߫.

<< ߒߠߋ ߞߐ߬ߣߌ߲߬ ߘߌ߫ ߛߋ߫ ߡߍ߲ ߝߐ߫ ߟߊ߫ ߘߋ߲ߡߌߛߍ߲ ߠߎ߬ ߦߋ߫ ߊ߬ ߜߋ߲ߜߋ߲߫ ߡߍ߲ ߠߎ߬ ߓߊ߲ߣߍ߲߫ ߞߊ߬ߙߊ߲ ߠߊ߫،ߓߊߏ߬ ߞߊ߬ߦߌ߯ ߂߀߁߀ ߠߋ߬ ߟߊ߫ ߒ߬ߠߎ߬ ߓߊ߲߫ ߘߊ߫ ߞߊ߬ߙߊ߲ ߠߊ߫߸ߓߊ߬ߙߌ߬، ߛߊߣߌ߲߬ ߒ߬ ߧߋ߫ ߒ߬ ߛߌ߰ ߞߊ߬ ߞߎ߲߬ߠߊ߬ߛߌ߮ ߡߊߞߣߐ߬߸ߊ߲ߠߎ߬ ߣߐ߬ ߒ߬ ߓߌ߬ߟߊ߬ ߟߊ߫ ߘߊ߬ߓߊ ߟߋ߬ ߞߐ߫ ߏ߬ ߡߍ߲ ߕߍ߫ ߡߐ߱ ߡߊߦߟߍ߫ ߟߊ߫߸ ߒߠߋ ߘߴߊ߬ ߝߐ߫ ߝߏߣߌ߲ߞߋ ߟߎ߬ ߓߍ߯ ߢߍ߫ ߞߏ߫ ߊ߬ߟߎ߬ ߦߴߊ߬ߟߎ߫ ߥߟߌ߬ ߞߵߊ߬ߟߎ߫ ߘߙߎ߬ߞߕߐ߫، ߖߐ߲߰ߛߴߊ߬ߟߎ߬ ߦߋ߫ ߛߋ߫ ߒ߬ߠߎ߬ ߕߊ߫ ߛߎ߮ ߣߌ߲߬ ߞߍ߫ ߟߊ߫ ،ߞߊ߬ߕߎ߲߯ ߊ߲ߠߎ߬ ߦߋ߫ ߒ ߠߊ߫ ߞߐߙߍ߫ ߟߎ߬ ߓߊߟߏ߫ ߟߊ߫ ߣߌ߲߬ ߠߋ߬ ߘߐ߫߸ ߏ߬ ߓߟߏߡߊ߬ ߊ߲ߠߎ߬ ߘߌ߫ ߡߊ߰ߙߌ߬ߓߊ ߕߊ߲߬ߘߏ߬،ߓߊ߸ ߊ߲ ߕߍ߫ ߥߊ߫ ߟߊ߫ ߛߌߟߘߊ ߟߎ߬ ߝߍ߬ ߞߊ߬ ߕߙߊߟߌ ߞߍ߫߸ ߌ ߘߏ߲߬ ߕߴߊ߲ ߧߋ߫ ߜߞߋ߬ߡߌ߬ߘߊ ߟߎ߬ ߟߊ߫߸ߞߣߍ ߓߊ߯ ߓߐ߫ ߌߞߘߐ߫ ߊ߲ ߧߋ߫ ߒ߬ ߛߌ߲߫ ߠߊ߫ ߒ߬ ߗߋ ߟߋ߬ ߟߊ߫ >>ߊߓߎߓߞߊߙ ߛߌ߬ߛߋ ߟߋ߬ ߞߊ߲߫ ߕߋ߲߬߸ ߗߍߙߑߣߐ߫ ߖߘߌߦߊ߲߫ ߞߌ߲߬ߘߊ ߣߊߞߐ߫ ߓߊ߯ߙߟߊ ߘߏ߫

ߓߐ߬ߟߐ߲߬ߞߊ ߊߦߌߛߊߕߊ߬ ߞߋߕߊ߬ ߝߣߊ߫ ߛߋ߫ ߘߊ߫ ߞߵߊ߬ ߝߍ߬ߟߊ ߦߌ߬ߘߊ߬ ߦߙߌ߫ ߛߍ߲߫ ߓߊ߯ߙߊ ߣߌ߲߬ ߘߐ߫ ߞߵߊ߬ ߓߍ߲߬ ߊ߬ߟߎ߬ ߣߌ߫ ߗߍ߭ ߟߎ߬ ߕߍߟߊ ߡߊ߬.

<< ߊ߲ߠߎ߬ ߡߏ߬ߛߏ ߟߎ߬ ߘߐߙߐ߲߫ ߕߍ߫ ߓߊ߯ߙߊ߫ ߟߊ߫ ߦߊ߲߬߸ ߊ߲ ߣߌ߫ ߗߍ߭ ߟߎ߫ ߟߋ߬ ߓߊ߯ߙߊ ߟߎ߬ ߞߍ߫ ߟߊ߫ ߢߐ߲߮ ߝߍ߬، ߊ߲ ߞߐ߬ߙߐ ߟߎ߬ ߞߊ߬ߣߌ߲߬߸ߓߊߏ߬ ߊ߲ߠߎ߬ ߡߏ߬ߛߏ ߟߎ߬ ߡߴߊ߬ ߓߍ߯ ߢߊߟߐ߲߫߸ ߊ߬ߟߎ߫ ߟߋ߬ ߦߋ߫ ߒ߬ ߠߊ߫ ߓߊ߯ߙߊ ߟߎ߬ ߜߋ߬ߟߎ߲߬ ߠߊ߫ ߞߴߊ߬ ߞߍߢߊ߫ ߓߘߍ ߟߎ߬ ߦߌ߬ߘߊ߬. ߦߏ߫ ߣߌ߫ ߖߊ߲߬ߞߊߙߏ ߦߋ߫ ߛߍ߲߭ ߠߎ߬ ߟߊ߫،ߞߵߏ߬ ߣߌ߫ ߦߙߌߜߙߊ ( greffage) ߟߎ߬ ߣߌ߫ ߟߊ߬ߕߟߐ߬ߟߌ ( engrais) ߟߎ߬ ߢߊߦߌ߬ߘߊ߫ ߒ߬ߠߎ߬ ߟߊ߫. ߓߊ߸ ߊ߲ߠߎ߬ ߡߊ߲߫ ߞߎ߬ߛߊ߲߫ ߦߙߌߜߙߊ ߟߎ߬ ߟߊ߫ ( greffage)>>  ߞߊ߬ߣߌ߲߬.

ߌߞߏߡߌ߲߬ ߞߏ ߓߍ߯ ߣߴߊ߬ ߡߊ߲߬ߕߙߐ ߟߋ߬߸ߊߦߌߛߊߕߊ߬ ߞߋߕߊ߬ ߞߵߊ߬ ߦߌ߬ߘߊ߬ ߞߏ߫ ߡߊ߲߬ߕߙߐ߫ ߘߏ߫ ߟߎ߫ ߦߴߊ߬ߟߎ߫ ߞߊ߲߬ ߞߵߊ߬ ߓߍ߲߬ ߦߙߌ߫ ߛߍ߲ ߣߌ߫ ߡߎ߬ߙߊ߲߬ ߞߏ ߘߐ߫:

<< ߡߊ߲߬ߕߙߐ ߡߍ߲ ߦߴߊ߲ ߞߊ߲߬߸ ߒ߬ ߦߋ߫ ߓߐ߫ ߟߊ߫ ߟߋ߬ ߦߊ߲߬ ߞߊ߬ ߕߊ߯ ߦߙߌ߫ ߛߍ߲ ߠߎ߬ ߢߌߣߌ߲߫ ߥߊ߭ ߟߎ߬ ߣߌ߫ ߛߏߣߍ߲ ߠߎ߬ ߞߣߐ߫ ߞߊ߬ߣߵߊ߬ ߘߌ߫߸ ߏ߬ ߖߍ߬ߘߍ ߝߣߊ߫߸ ߞߓߐ߫ ߡߌߛߍ߲ ߠߎ߬ ߦߋ߫ ߞߍ߫ ߟߊ߫ ߘߏ߫ ߟߎ߫ ߟߊ߫ ߛߐ߲߬ ߞߊ߬ ߛߍ߲߭ ߠߎ߬ ߕߌߢߍ߫ ߞߵߊ߬ ߓߌ߬ߟߊ߬ ߝߋ߲ ߠߎ߬ ߝߣߊ߫ ߕߌߢߍ߫ ߊ߬ߟߎ߫ ߛߊ߲߬ ߕߎߡߊ ߢߍ߫߸ ߏ߬ ߕߙߐߦߊ ߦߴߊ߲ ߞߊ߲߬،ߓߊ߸ ߊ߲ ߧߴߊ߬ߟߎ߬ ߝߍ߫ ߟߊ߫ ߟߋ߬ ߤߊ߲߯ ߞߊ߬ ߛߍ߰>>

<< ߓߊ߯ߙߊ߫ ߡߎߙߊ߲߫ ߞߏ ߡߊ߬ߝߊ߲ ߝߍ߬߸ ߥߏ߲߬ߕߙߏ ߣߌ߫ ߛߐߓߟߎ ߣߌ߫ ߘߊ߬ߓߊ ߣߌ߫ ߞߏ߬ߙߏ߲߬ߘߏ߬ߟߊ߲ ߠߎ߬ ߛߌ߫ ߕߍ߫ ߦߊ߲߬߸ߊ߬ ߣߌ߫ ߦߙߌ߫ ߕߍ߯ߟߊ߲ ߠߎ߲߬ ߝߣߊ߫.>>

ߒ߬ߓߊ߬߸ߡߊ߲߬ߕߙߐ ߡߍ߲ ߦߋ߫ ߗߍߙߑߣߐ߫ ߖߘߌߦߊ߲߫ ߞߌ߲߬ߘߊ ߣߊߞߐ߫ ߓߊ߯ߙߟߊ ߟߎ߬ ߞߊ߲߫ ߕߋ߲߬، ߏ߬ ߟߴߏ߬ ߘߌ߫߸ߞߎ߲߬ߠߊ߬ߛߌ߮ ߣߌ߫ ߡߐ߰ ߢߌߡߊ ߟߎ߬ ߞߊ߫ ߞߊ߲߫ ߞߵ ߊ߬ߟߎ߬ ߢߊ ߡߊߖߌ߰ ߡߍ߲ ߠߎ߬ ߝߍ߬ ߘߍ߬ߡߍ߲߬ߠߌ߲ ߛߌߟߊ ߝߍ߬ ߖߐ߲߰ߛߊ߫ ߞߵߊ߬ߟߎ߬ ߞߟߊߓߎ ߘߏ߲߬.