ߓߌ߬ ߞߐ߬ߟߏ߲ ߂߀߂߆ ߞߊ߬ߙߌ߬ߝߐ ߕߟߋ߬ ߇ ߡߊ߬߸ ߛߊ߬ߞߐ߬ߘߎ߰ ߞߎ߲ߖߊ߲ߞߊ ߟߎ߬ ߢߊ ߟߊߞߊ߬ߣߍ߲߫ ߡߊ߬ߛߎߓߊ ߣߌ߫ ߛߎ߬ߣߎ߲ ߠߋ߬ ߡߊ߬ ߢߐ߲߯ ߝߍ߬ ߊ߬ߟߎ߬ ߟߊ߫ ߛߏ ߞߣߐ߫، ߞߎ߲ߖߊ߲߫ ߣߌ߲߬ ߦߋ߫ ߡߙߊ߬ߘߊ߬ߙߋ߲ ߠߋ߬ ߘߌ߫߸ ߡߍ߲ ߦߋ߫ ߡߊ߲߬ߖߊ߲߬ߠߊ߫ ߡߙߊ߬ߘߊ߬ߓߊ ߘߐ߫ ߞߎߘߍ߫ ߓߌߛߋ߬ߦߌ߲߬ ߣߌ߫ ߘߏ߫ ߟߊ߫. ߒ߬ߓߊ߬߸ ߗߍ߬ ߛߊ߲߬ ߄߈ ߘߏ߫ ߟߋ߬ ߣߐ߬ ߊ߬ ߖߘߍ߬ ߘߎ߲߫ ߠߴߊ߬߬ ߟߊ߫ ߛߍ߬ߣߍ ߘߐ߫ ߓߌ߬߸ ߊ߬ ߞߊ߬ ߛߓߍߟߌ ߞߍ߫ ߦߙߋߟߋ߲ ߘߏ߫ ߝߊ߲߬ ߞߋߟߋ߲ ߝߍ߬ ߞߵߏ߬ ߟߊ߫.

ߊ߲ ߠߊ߫ ߟߌ߬ߤߟߊ߫ ߛߐ߬ߘߐ߲߬ߣߍ߲ ߠߎ߬ ߘߐ߫߸ ߗߍ߭ ߣߌ߲߬ ߦߋ߫ ߘߋ߲ߓߦߊߕߌ߮ ߟߋ߬ ߘߌ߫߸ ߡߏ߬ߛߏ߫ ߝߌ߬ߟߊ߬ ߦߴߊ߬ ߞߎ߲߬߸ ߘߋ߲ ߠߎ߬ ߦߴߊ߬ ߓߟߏ߫، ߊ߲ ߠߊ߫ ߞߐߦߌߘߊ ߡߍ߲ ߦߋ߫ ߛߊ߬ߞߐ߬ߘߎ߰ ߡߙߊ ߘߐ߫߸ ߊߡߙߊ߫ ߘߎ߲ߓߎߦߊ߫߸ ߊ߬ߟߋ߫ ߞߵߊ߬ ߦߌ߬ߘߊ߬ ߞߏ߫ ߊ߬ ߛߏ߬ߙߌ߬ ߘߊ߫ ߓߐ߫ ߟߊ߫ ߓߌ߬ ߛߎߓߊ߮ ߟߋ߬ ߝߍ߬ ߞߊ߬ ߥߊ߫ ߕߏ߯ߘߊ ߟߊ߫߸ ߊ߰ ߝߐ߫ ߟߊ߫ ߕߏ߯ߘߊ ߡߍ߲ ߡߊ߬ ߞߏ߫ ߝߊ߬ߟߌ߬ߜߍ߫، ߊ߬ ߛߎ߭ ߥߊߣߍ߲߫ ߦߋ߫ ߟߊ߫ ߕߌߓߏ߲ ߘߏ߫ ߟߋ߬ ߞߣߐ߫ ߛߍ߬ߣߍ ߘߐ߫ ߦߋ߲߬߸ ߊ߬ ߘߎ߲ߣߍ߲߫ ߖߎ߬ߟߎ ߛߊ߲ߛߙߊ ߟߊ߫.


ߞߊ߬ ߓߍ߲߬ ߗߍ߭ ߛߎ߭ ߦߋ߫ ߢߊ ߡߊ߬߸ ߞߊ߬ߝߏ߬ߙߋ߲߬ߕߌ߮ ߞߵߊ߬ ߦߌ߬ߘߊ߬ ߞߏ߫: <<ߡߍ߲ ߠߎ߬ ߥߊ߫ ߘߊ߫ ߣߛߌ߬ߘߓߊ߬ ߛߣߍ߬ ߦߙߐ ߛߎߓߊ߮ ߣߌ߲߬ ߝߍ߬߸ ߏ߬ ߟߎ߫ ߟߋ߬ ߞߵߊ߬ ߛߎ߭ ߦߋ߫ ߞߊ߬ ߟߊ߬ߟߐ߲߬ߠߌ߲߬ߠߌ߲ ߞߍ߫.>> ߊ߬ ߞߵߏ߬ ߝߐ߫.

ߝߊ߰ߡߊ ߟߎ߬ ߟߊߟߐ߲ߠߌ߲߫ ߘߊ߫ ߣߌ߲߬ ߞߏ ߟߊ߫

ߞߎ߲ߖߊ߲߫ ߞߊ߬ߝߏ߬ߙߋ߲߬ߕߌ߮ ߦߊߦߊ߬ ߞߐ߲ߘߍ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ ߟߊߟߐ߲ߠߌ߲ ߡߍ߲ ߞߍ߫ ߘߊ߫߸ ߊ߬ ߝߣߊ߫ ߞߊ߬ ߟߊ߬ߞߊ߲߬ߘߊ߬ߟߌ ߘߏ߲߬ߞߏ ߟߎ߬ ߟߊߟߐ߲ߠߌ߲߫߸ ߞߵߏ߬ ߟߊ߫ ߓߊߙߊ߲ߕߏ߲߫ ߥߎߟߋ߲ ߣߌ߫ ߘߊ߲ߘߊߟߌߟߊ ߟߎ߬ ߞߊ߲߬߸ ߞߵߊ߬ߟߎ߫ ߞߎ߲߬ߛߌ߲߫ ߘߌ߲߬ߞߌߙߊ ߏ߬ ߟߊ߫، ߊ߬ߟߎ߬ ߛߋ ߦߋ߲߬߸ ߘߊ߲ߘߊߟߌߟߊ ߟߎ߫ ߞߵߊ߬ߟߎ߬ ߟߊ߫ ߡߊ߬ߝߟߍ߬ߟߌ ߞߍ߫، ߞߊ߬ߝߏ߬ߙߋ߲߬ߕߌ߮ ߞߵߊ߬ ߦߌ߬ߘߊ߬ ߞߏ߫ : <<ߘߊ߲ߘߊߟߌߟߊ ߟߎ߫ ߞߵߊ߬ߟߎ߬ ߟߊ߫ ߡߊ߬ߝߟߍ߬ߟߌ ߓߍ߯ ߞߍ߫، ߘߊ߲ߘߟߊ ߞߵߊ߬ ߦߌ߬ߘߊ߬ ߞߏ߫ ߊߟߊ߫ ߟߊ߫߸ ߛߦߊ߬ ߛߎ߲ߞߎ߲ߡߊ ߟߋ߬، ߊ߲ ߡߊ߫ ߘߊ߫ ߦߴߊ߬ ߟߊ߫߸ ߊ߲ ߡߊ߫ ߡߙߎ߬ߣߐ߫ ߦߴߊ߬ ߡߊ߬߸ ߊ߲ ߡߊ߫ ߞߟߍ߬ߞߍ߬ߣߐ߬ ߝߣߊ߫ ߦߋ߫ ߦߙߐ ߏ߬ ߘߐ߫ ߦߋ߲߬، ߊ߬ ߞߋߟߋ߲߫ ߠߋ߬ ߥߊ߫ ߘߊ߫߸ ߞߵߊ߬ ߥߴߊ߬ ߖߘߍ߬ ߘߎ߲߫ ߞߵߊ߬ ߖߍ߬ߘߍ߫ ߝߊ߰. >> ߦߊߦߊ߫ ߞߐ߲ߘߍ߫ ߞߵߏ߬ ߝߐ߫.

ߊ߬ ߞߵߊ߬ ߦߌ߬ߘߊ߬ ߞߏ߫ ߞߟߍ߬ߡߐ߮ ߟߎ߫ ߕߊ߬ߣߍ߲ ߞߵߊ߬ ߟߊ߫ ߘߊ߲ߘߊߟߌߟߊ ߟߎ߫ ߞߊ߲߬߸ ߏ߬ ߟߎ߫ ߞߊ߬ ߞߊ߲߬ߞߎߡߊ ߡߍ߲ ߘߌ߫߸ ߏ߬ ߓߍ߯ ߞߵߏ߬ ߟߋ ߦߌ߬ߘߊ߬.

ߢߌ߬ߣߌ߲߬ߞߊ߬ߟߌ߬ ߞߍ߫ ߘߴߊ߲ ߓߟߏ߫߸ ߞߊ߬ ߓߍ߲߬ ߗߍ߭ ߟߊ߫ ߖߘߍ߬ ߝߊ߮ ߞߎ߲߭ ߡߊ߬، ߊ߬ ߦߌ߬ߘߊ߬ ߘߴߊ߲ ߠߊ߫߸ ߞߏ߫ ߞߟߍ߬ ߕߴߊ߬ ߣߌ߫ ߡߐ߰ ߕߍ߫߸ ߖߊ߲߬ߞߊߙߏ߫ ߘߏ߲߬ ߕߎ߲߬ ߕߴߊ߬ ߤߊ߲ߞߟߌ߫ ߟߊߝߌߙߌ߲ߝߌߙߌ߲߫ ߖߊ߲ߞߊߙߏ߫ ߘߐ߫، ߞߊ߬ߕߎ߲߯߸ ߞߏ߫ ߝߙߋߞߋ߫ ߕߴߊ߬ ߣߌ߫ ߡߐ߰ ߛߌ߫ ߕߍ߫ ߞߐߙߍ ߞߣߐ߫߸ ߊ߬ ߣߴߊ߬ ߓߊߘߋ߲ ߠߎ߬ ߟߋ߬ ߞߊ߬ ߥߎ߬ߙߟߊ߬ ߞߏ ߓߍ߯ ߞߍ߫ ߢߐ߲߯ ߝߍ߬، ߞߊ߬ߝߏ߬ߙߋ߲ߕߌ߮ ߖߍ߬ߘߍ ߞߵߊ߬ ߦߌ߬ߘߊ߬ ߞߏ߫: <<ߊ߲ ߞߵߊ߬ ߕߋߙߌ ߟߎ߬ ߡߊߢߌ߬ߣߌ߲߬ߞߊ߬߸ ߞߵߊ߬ ߟߊ߫ ߘߋ߲ߓߦߊ ߡߊߢߌ߬ߣߌ߲߬ߞߊ߬، ߏ߬ ߟߎ߬ ߞߊ߲߫ ߞߏ߫ ߊ߬ ߣߌ߫ ߡߐ߰ ߛߌ߫ ߕߍ߫ ߢߐ߲߯ ߠߊ߫߸ ߊ߬ߟߎ ߦߋ߫ ߡߍ߲ ߞߊ߬ߟߊߡߊ߬، ߖߊ߲߬ߞߊߙߏ߫ ߘߏ߲߬ ߕߴߊ߬ ߟߊ߫.>> ߊ߬ ߞߵߏ߬ ߝߐ߫.

ߗߍ߭ ߣߌ߲߬ ߛߊ߬ߕߐ߬ߟߊ߸ ߊ߬ ߞߐߝߍߟߊ ߤߊߡߌ߲ ߕߍ߬ߘߍ߫ ߊ߬ ߟߊ߫ ߞߏߛߓߍ߫، ߏ߬ ߟߋ ߞߏߛߐ߲߬߸ ߛߓߍ ߘߏ߫ ߣߙߊߣߍ߲ ߦߋ߫ ߘߴߊ߬ ߛߏ߬ߙߏ ߘߐ߫، ߛߓߍ ߏ߬ ߞߣߐ߫߸ ߊ߬ ߞߵߊ߬ ߘߋ߲ ߠߎ߬ ߟߊ߫ ߞߏ ߡߌ߬ߣߊ߬ ߢߊ ߟߋ߬ ߢߊߝߐ߫ ߏ߬ ߞߣߐ߫߸ ߊ߬ ߣߴߊ߬ ߡߏ߬ߛߏ ߟߎ߬، ߖߎ߬ߟߎ ߡߍ߲ ߠߎ߬ ߝߣߊ߫ ߦߴߊ߬ ߟߊ߫߸ ߊ߬ ߞߵߏ߬ ߟߎ߬ ߢߊߝߐ߫ ߛߓߍ ߣߌ߲߬ ߞߣߐ߫߸ ߞߵߊ߬ߟߎ߬ ߜߍߓߟߎ ߦߙߌߞߊ ߛߓߍ߫.

ߊ߬ ߞߏ߬ߣߌ߲ ߦߌ߬ߘߊ߬ߣߍ߲߫ ߞߏ߫ ߊ߬ ߞߵߊ߬ ߟߊ߫ ߖߘߍ߬ ߝߊ߮ ߣߌ߲߬ ߢߊߝߐ߫ ߊ߬ ߕߋߙߌ ߘߏ߫ ߦߋ߫߸ ߞߵߊ߬ ߦߌ߬ߘߊ߫ ߏ߬ ߟߊ߫ ߞߏ߫ ߊ߬ ߖߍ߬ߘߍ ߟߊ߫ ߥߊ߬ߣߌ߲߬ߞߋ߬ߣߍ߲ ߠߋ߬߸ ߡߐ߰ ߡߴߊ߬ ߟߐ߬ ߡߍ߲ ߞߍߟߌ ߟߊ߫، ߊ߬ ߞߵߊ߬ ߛߊ߬ߙߊ߫ ߏ߬ ߟߊ߫ ߟߋ߬߸ ߞߏ߫ ߊ߬ ߦߴߊ߬ ߖߊ߲߬ߕߏ߫ ߊ߬ ߘߋ߲ ߠߎ߬ ߘߐ߫߸ ߊ߬ ߡߏ߬ߛߏ ߟߎ߬ ߘߐ߫، ߊ߬ ߘߋ߲ ߠߎ߬ ߦߋ߫ ߘߏ߲߬ ߞߊ߬ߙߊ߲ ߠߊ߫߸ ߏ߬ ߦߋ߫ ߞߍ߫ ߊߙߊߓߎ߫ ߞߊߙߊ߲ ߠߋ߬ ߝߣߊ߫ ߘߌ߫.

ߝߊ߰ߡߊ ߟߎ߬ ߟߊ߫ ߓߍ߲߬ߘߐ ߟߊ߫߸ ߞߕߌߞߊ߲ߘߊ ߟߊߟߐ߲ߠߌ߲߫ ߘߊ߫߸ ߏ߬ ߞߊ߬ ߛߎ߭ ߘߌ߫ ߞߊ߬ߝߏ߬ߙߋ߲߬ߕߌ߮ ߡߊ߬߸ ߏ߬ ߝߣߊ߫ ߞߊ߬ ߛߎ߭ ߟߊߕߊ߬ߡߌ߲߬ ߞߐߙߍ ߡߊ߬ ߛߎ߬ߘߏ߲߬ ߓߊ߯ߙߊ ߣߴߊ߬ ߡߛߍ߬ߞߍ߬ߡߛߍߞߍ ߟߎ߬ ߞߊ߲ߡߊ߬.