ߓߌ߬ ߞߊ߯ߙߌ ߂߀߂߆ ߘߓߊ߬ߓߌߟߊ ߕߟߋ߬ ߃߀ ߣߌ߲߬ ߡߊ߬߸ ߖߟߊߞߘߐ߫ ߣߴߊ߬ ߟߊߡߌߣߌ߲ ߠߎ߬ ߞߊ߬ ߛߘߊߞߊߓߐߓߊ ߟߋ߬ ߞߍ߫߸ ߊ߬ߟߎ߬ ߛߍߥߊ ߞߏߛߐ߲߬ ߖߟߊߞߘߐ߫ ߞߍ ߘߌ߫ ߡߙߊ߬ߘߊ߬ߓߊ ߘߌ߫߸ ߖߊ߬ߡߊ ߟߋ߬ ߓߐ߫ ߘߊ߫ ߖߋ߬ߟߌ߬ߓߊ߬ߘߎ߯ ߖߟߊߞߘߐ߫ ߓߌ߬߸ ߞߵߊ߬ߟߎ߬ ߟߊߘߍ߬ ߉ ߕߎߡߊ ߟߊ߫߸ ߞߊ߬ ߞߎ߬ߙߣߊ߬ ߞߊߙߊ߲ ߠߎ߬ ߞߍ߫߸ ߞߊ߬ ߕߌ߲ߞߌ߫ ߓߎ߰ߓߎ߰ߣߍ߲ ߠߎ߬ ߞߍ߫߸ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߖߍ߬ߘߍ ߟߊ߫ ߗߋߘߋ߲߫ ߓߟߏߡߊߞߊ߬ߣߍ߲ ߘߏ߫ ߟߎ߫ ߕߍ߬ߘߍ ߦߋ߫ ߞߣߍ ߣߌ߲߬ ߞߊ߲߬ ߦߋ߲߬߸ ߊ߬ ߘߐ߯ߡߛߏ߫ ߊߦߌߛ߭ߊ߫ ߘߎ߲ߓߎߦߊ߫ ߕߍ߬ߘߍ߫ ߣߌ߲߬ ߞߣߍ ߞߊ߲߬߸ ߏ߬ ߡߍ߲ ߦߴߊ߬ ߟߊ߫ ߗߋߘߋ߲ ߠߎ߬ ߕߍߡߊ߬.

ߖߊ߬ߡߊ ߣߌ߲߬ ߞߊ߬ ߢߐ߲߮ ߠߊߘߍ߬ ߖߟߊߞߘߐ߫ ߕߌ߲ߓߌߘߌ߲ߘߓߊ ߟߋ߬ ߟߊ߫ ߉ ߕߎߡߊ ߝߊ߲߭ߝߍ߬߸ ߞߊ߬ ߘߎ߬ߥߊ߬ߎ ߣߌ߫ ߛߘߊߞߊߓߐ ߞߎ߲߭ ߘߏ߲߬ ߛߊߟߌߝߣߊ߫ ߕߎߡߊ ߟߊ߫، ߛߘߊߞߊߓߐ ߣߌ߲߬ ߞߎ߲߭ ߕߎ߲߬ ߕߍ߫ ߘߏ߫ ߜߘߍ߫ ߘߌ߫߸ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߊ߬ ߟߊ߬ߕߍ߰ߦߊ ߡߍ߲ ߠߊߓߐ߫ ߂߀߂߆ ߘߓߊ߬ߓߌߟߊ ߕߋ߬ߟߋ߫ ߂߀ ߠߊ߫߸ ߏ߬ ߡߍ߲ ߞߍ߫ ߘߴߊ߬ ߕߊ߫ ߟߏ߲߫ ߘߐ߬ߝߐ ߟߏ߲ߓߊ߫ ߘߌ߫ ߖߌ߬ߣߍ߬ ߞߣߐ߫߸ ߞߊ߬ ߓߍ߲߬ ߡߊ߬ߡߙߊ߬ߟߌ ߔߊ߬ߔߘߊ ߘߐߦߟߍ߬ߡߊ߲ ߡߊ߬، ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߟߊ߬ߕߍ߰ߦߊ ߏ߬ ߘߐ߫߸ ߊ߬ ߞߊ߬ ߛߌ߯ߙߌ߲߫ ߣߌ߫ ߓߋߟߊ߫ ߞߍ߫ ߕߌ߲߬ߞߎ߬ߘߎ߲߬ ߓߟߏߡߊߞߊ߬ߣߍ߲ ߘߌ߫߸ ߞߊ߬ ߓߊ߲߫ ߞߊ߬ ߡߙߊ߬ߘߊ߬ߙߋ߲߬ ߁߁ ߞߍ߫ ߡߙߊ߬ߘߊ߬ߓߊ ߘߌ߫ ߖߌ߬ߣߍ߫ ߝߊ߲߬ ߛߌߦߊߡߊ߲߫ ߘߐ߫.

ߟߊ߬ߕߍ߰ߦߊ ߏ߬ ߡߍ߲ ߞߟߊ߬ߣߐ߬ߦߊ߫ ߘߊ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߓߟߏ߫߸ ߡߍ߲ ߘߐ߬ߞߊ߬ߙߊ߲߬ ߘߊ߫ ߝߊ߬ߛߏ ߖߌ߬ߦߊ߬ߞߊ߲߬ߛߏ ߟߊ߫، ߕߌ߲߬ߞߎߘߎ߲߫ ߝߌ߬ߟߊ ߟߋ߬ ߟߊߘߊ߲߫ ߘߊ߫ ߏ߬ ߞߣߐߡߊ߬߸ ߞߊ߬ ߡߙߊ߬ߘߓߊ߬ ߕߊ߲ߣߌߞߋߟߋ߲߫ ߟߊߘߊ߲߫߸ ߒ߬ߓߊ߬߸ ߖߟߊߞߘߐ߫ ߛߐ߬ߘߐ߲߬ ߘߊ߫ ߡߙߊ߬ߘߓߊ߬ ߕߊ߲ߣߌߞߋߟߋ߲߫ ߏ߬ ߟߋ߬ ߘߐ߫߸ ߏ߬ ߟߋ߬ ߛߍߥߊ ߞߍ߫ ߘߊ߫ ߊ߬ߟߎ߬ ߓߟߏ߫ ߓߌ߬ ߞߊ߯ߙߌ ߢߌ߲߬ ߡߊ߬߸ ߞߵߏ߬ ߞߍ߫ ߛߘߊߓߐ߫ ߓߟߋߓߟߋ߫ ߘߌ߫ ߊ߬ߟߎ߬ ߓߟߏ߫߸ ߛߘߊߞߊߓߐ ߢߌ߲߬ ߘߐ߫߸ ߊ߬ߟߎ߫ ߛߐ߰ ߘߊ߫ ߘߎ߬ߥߊ߬ߥߎ ߟߋ߬ ߡߊ߬߸ ߞߣߊ߬ߕߏ߫ ߣߌ߬ߛߌ߫ ߉߆ ߖߋ߬ߟߌ ߟߊߓߐ߲߬ ߠߊ߫.