ߟߊ߬ߞߐ߰ߟߌ߬ ߕߊ߲ߓߊ߲ ߡߍ߲ ߕߐ߯ ߞߏ߫ ߘߏߡߍߛ ߖߌߣߋ߸ ߏ߬ ߘߊ ߓߘߊ߫ ߟߊߞߊ߬ ߞߵߊ߬ ߓߌ߬ߟߊ߫ ߖߌ߬ߣߍ߬ߞߊ ߓߍ߯ ߟߊߘߍ߬ߣߍ߲ ߛߊ߬ߥߏ߬ ߘߐ߫، ߟߊ߬ߞߐ߰ߟߌ߬ ߕߊ߲ߓߊ߲ ߣߌ߲߬ ߦߋ߫ ߝߙߋߞߋ߫ ߝߎߟߋ߲߫ ߦߙߐ ߟߋ߬ ߘߌ߫߸ ߡߍ߲ ߠߎ߬ ߓߊ߲ߣߍ߲߫ ߞߊ߬ߙߊ߲ ߠߊ߫ ߓߊ߯ߙߊ߫ ߕߴߊ߬ߟߎ߬ ߓߟߏ߫߸ ߌ ߞߊ߬ ߒߞߏ߫ ߞߍ߫ ߓߊ߬߸ ߥߟߊ߫ ߝߊ߬ߙߊ߲߬ߛߌ߬߸ ߤߊߡߊ߲ߕߍ߫ ߊߙߊߓߎ߫߸ ߊ߬ߟߋ ߦߴߏ߬ ߟߎ߬ ߓߍ߯ ߟߋ߬ ߘߍ߬ߡߍ߲߬ ߠߊ߫ ߞߵߊ߬ߟߎ߬ ߟߊ߫ ߟߐ߲ߠߌ߲ ߡߊߞߊ߬ߝߏ߬߸ ߞߵߊ߬ߟߎ߬ ߓߟߏߘߏ߲߬ ߓߊ߯ߙߊ ߘߏ߫ ߟߊ߫߸ ߛߋߒߞߏߟߦߊ ߣߌ߫ ߓߟߏߟߊߓߊ߯ߙߊ ߡߊ߬ߘߎ߮ ߘߐ߫߸ ߊ߬ߟߎ߬ ߦߋ߫ ߛߋ߫ ߘߏ߫ ߞߍ߫ ߟߴߊ߬ߟߎ߫ ߖߘߍ߬ ߦߋ߫.
ߒ߬ߓߊ߬߸ ߟߊ߬ߞߐ߰ߟߌ߬ ߕߊ߲ߓߊ߲ ߣߌ߲߬ ߘߊߦߟߍߟߌ ߛߋ߲߭ߝߍ߬߸ ߊ߬ ߝߘߏ߬ߓߊ߬ ߞߟߊ߬ߕߌ߮߸ ߛߘߊߡߊߘߌߦߊ߫ ߡߊ߬ߡߊ߬ߘߌ߫ ߞߙߏ߬ߡߊ߫ ߞߊ߬ ߟߊ߬ߞߐ߬ߟߌ߬ ߕߊ߲ߓߊ߲ ߣߌ߲߬ ߘߟߊߞߊ߬ ߞߎ߲ ߠߎ߬ ߢߊߝߐ߫߸ ߞߵߊ߬ ߞߣߐ߫ ߓߊ߯ߙߊ߫ ߞߍߕߊ ߟߎ߬ ߝߐ߫߸ ߞߵߏ߬ ߟߴߊ߬ ߞߊ߬ߙߊ߲ ߞߍߢߊ ߟߎ߫ ߞߊ߲߬.
ߊ߬ ߛߋ߲߭ ߕߊ߬ ߢߊ߬ ߘߏ߲߬ ߕߍ߫ ߘߏ߫ ߜߘߍ߫ ߘߌ߫: ߘߋ߲ߡߌߛߍ߲߫ ߛߌߦߊߡߊ߲߫ ߠߋ߬ ߦߋ߫ ߓߊ߲߫ ߠߊ߫ ߞߊ߬ߙߊ߲ ߠߊ߫߸ ߒߞߏ ߘߐ߫߸ ߝߊ߬ߙߊ߲߬ߛߌ ߘߐ߫߸ ߊߙߊߓߎ ߘߐ߫߸ ߞߊ߬ ߞߣߐ߬ߘߐߝߟߌ߬ ߓߊ߯ߙߊ߫ ߛߐߘߐ߲߫ ߞߏ ߘߐ߫ ߗߏ߫، ߒ߬ߓߊ߬߸ ߘߏߡߍߛ ߖߌߣߋ ߣߊ߬ߣߍ߲߫ ߏ߬ ߟߋ ߝߙߋߞߋ ߝߎߟߋ߲߫ ߞߊ߲ߡߊ߬߸ ߞߊ߬ ߓߐߘߊ߫ ߖߐ߲ߖߐ߲߫ ߘߌ߫ ߘߋ߲ߡߌߛߍ߲߫ ߞߊ߬ߙߊ߲߬ߣߍ߲ ߠߎ߫ ߡߊ߬߸ ߊ߬ ߣߌ߫ ߘߋ߲ߓߊߕߌ߮ ߟߎ߬ ߝߣߊ߫ ߡߊ߬.
ߦߏ߫ ߛߘߊߡߊߘߌߦߊ߫ ߡߊ߬ߡߊ߬ߘߌ߫ ߞߙߏ߬ߡߊ߫ ߞߵߊ߬ ߦߌ߬ߘߊ߬ ߢߊ ߡߍ߲ ߡߊ߬: << ߡߐ߱ ߟߎ߬ ߦߋ߫ ߓߊ߲߫ ߠߊ߫ ߞߊ߬ߙߊ߲ ߠߊ߫ ߊߙߊߓߎ߫ ߣߌ߫ ߝߊ߬ߙߊ߲߬ߛߌ ߣߌ߫ ߒߞߏ ߘߐ߫، ߓߊ߬ߙߌ߬߸ ߊ߬ߟߎ߬ ߓߊ߯ ߓߊ߲߫߸ ߊ߬ߟߎ߬ ߞߊ߫ ߞߊ߲߫ ߞߵߊ߬ߟߎ߫ ߛߌ߰ ߡߍ߲ ߡߊ߬߸ ߏ߬ ߕߴߦߋ߲߬، ߊ߲ ߞߵߏ߬ ߟߋ ߖߊ߬ߕߋߡߌ߬ߣߊ߬߸ ߞߊ߬ ߕߊ߲ߓߊ߲ߘߊ ߣߌ߲߬ ߘߊߦߟߍ (...) ߘߊ߲߬ ߕߍ߫ ߞߍ߫ ߟߊ߫ ߟߊ߬ߞߐ߰ߟߌ߬ ߜߍ ߡߊ߫ ߦߋ߲߬ ߕߋ߲߬ ߘߋ߬߸ ߓߟߏߦߊߟߌ ߝߣߊ߫ ߞߍߕߐ߫ ߟߋ߬ ߟߊ߬ߞߐ߰ߓߊ߰ߕߐ ߟߎ߬ ߓߟߏ߫ ߞߵߊ߬ ߟߴߊ߬ ߞߊ߲߬.>> ߊ߬ ߞߵߏ߬ ߦߌ߬ߘߊ߬.
ߕߊ߲ߓߊ߲ ߣߌ߲߬ ߞߣߐ߫߸ ߟߊ߬ߞߐ߰ߟߌ ߞߍߕߐ߫ ߓߏߟߏ߲߫ ߘߊ߲ߘߐ߫ ߟߋ߬ ߞߊ߲߬: << ߞߊ߬ ߡߐ߱ ߟߎ߬ ߟߊߞߐ߯ ߢߎߡߍߦߋߙߋ߲ߦߊߟߌ ߣߌ߫ ߢߎߡߍߦߊߟߌ ߣߌ߫ ߕߙߏ߬ߞߏ߬ߦߊ߬ߟߌ ߣߌ߫ ߕߟߋ߬ߓߊ߰ߦߊ߬ߟߌ ߟߎ߬ ߣߌ߫ ߒߞߏ ߟߊ߫.>>
ߛߊ߲߬ ߦߙߌߞߊ߫ ߓߟߏߘߐߓߍ߲ ߠߎ߬ ߞߐ ߘߐ߫߸ ߞߵߊ߬ ߞߊ߬ߝߊ ߟߎ߬ ߛߓߍ߫߸ ߟߊ߬ߞߐ߬ߟߌ߬ ߕߊ߲ߓߊ߲ ߣߌ߲߬ ߘߌ߫ ߛߴߊ߬ ߢߌߣߌ߲ߞߏ ߟߎ߬ ߟߊߛߐ߬ߘߐ߲߬ ߠߊ߫ ߡߎ߬ߕߎ߲߬ ߝߛߊߦߌ߫، ߞߊ߬ߕߎ߲߯߸ ߟߊ߬ߞߐ߰ߟߌ ߓߊ߯ ߞߍ߫ ߥߊ߬ߟߊ ߟߊ߫߸ ߓߟߏߦߊߟߌ ߝߣߊ߫ ߘߌ߫ ߞߍ߫ ߜߍ ߘߐ߫߸ ߊ߬ ߞߏ ߟߎ߬ ߛߙߊߛߌ߰ߣߍ߲߫ ߕߊ߲߬ ߠߋ߬.
ߣߌ߫ ߟߊ߬ߞߐ߬ߓߊ߰ߕߐ ߟߎ߬ ߓߊ߲߫ ߘߊ߫ ߟߊߞߐ߯ ߟߊ߫߸ ߊ߬ߟߎ߬ ߘߌ߫ ߖߐ߲ߓߐ߲߫ ߛߐ߬ߘߐ߲߬߸ ߡߍ߲ ߘߴߊ߬ ߟߊߛߙߋߦߊ߫ ߞߏ߫ ߊ߬ߟߎ߬ ߓߘߊ߫ ߓߏߟߏ߲ ߏ߬ ߟߐ߲ߠߌ߲ ߛߐ߬ߘߐ߲߬، ߏ߬ ߟߋ ߘߏ߲߬߬ ߞߍߕߐ߫ ߓߊ߯ߙߊ߫ ߛߐߘߐ߲ ߛߋ߲߬ߠߊ߬ߞߊߟߌߦߊ߫ ߟߊ߫ ߓߊ߯ߙߊ߫ ߢߌߣߌ߲ ߘߐ߫߸ ߊ߬ ߣߴߊ߬ ߘߌ߫ ߖߘߍ߬ߦߋ߬ߓߊ߯ߙߊ ߟߊߣߐ߰ߦߴߊ߬ߟߎ߬ ߓߍ߯ ߟߊߘߍ߬ߣߍ߲ ߡߊ߬ ߞߐߘߍ߫.
ߏ߬ ߟߋ ߘߐ߫߸ ߘߊߦߟߍߟߌ ߓߊ߲ ߢߊ ߡߍ߲ ߌߞߘߐ߫߸ ߕߐ߯ߛߓߍߟߌ ߛߌ߰ ߘߊ߫ ߛߋ߲߬ߠߊ߫، ߕߋ߲߭ߕߋ߲߭ ߣߌ߲߬ ߘߐ߫߸ ߘߊ߲߬ ߕߴߊ߬ ߟߊ߫ ߝߟߐ߫، ߏ߬ ߘߐ߫߸ ߡߐ߰ ߛߌ߫ ߓߴߊ߬ ߕߐ߮ ߛߓߍ߫ ߕߋ߲߬߸ ߓߍ߯ ߘߌ߫ ߟߊߞߐ߮ ߘߊߡߌ߬ߣߊ߬߸ ߣߌ߫ ߥߟߊ߬ߘߊ ߘߌ ߖߎ߭ߛߌ߰ ߘߊ߫ ߕߎ߬ߡߊ ߡߍ߲ ߠߊ߫.
ߏ߬ ߟߋ ߘߐ߫߸ ߝߘߏ߬ߓߊ߬ ߞߟߊ߬ߕߌ߮ ߞߊ߬ ߕߡߊ߬ߖߌ ߓߐ߫ ߓߍ߯ ߘߐ߫: <<ߕߐ߯ߛߓߍߟߌ ߞߏ߬ߣߌ߲ ߘߊߦߟߍ߬ ߘߊ߫ ߞߎߣߎ߲߬ ߠߋ߬߸ ߘߏ߫ ߟߎ߫ ߖߍ߬ߘߍ ߓߘߴߊ߬ ߕߐ߮ ߛߓߍ߫߸ ߡߐ߰ ߟߊ߬ߞߐ߰ߕߊ ߞߏ߬ߣߌ߲ ߘߊ߲߬ߠߊߕߍ߰ߣߍ߲߬ ߕߍ߫߸ ߡߍ߲ ߠߎ߬ ߓߊ߯ ߊ߬ߟߎ߬ ߕߐ߮ ߛߓߍ߫߸ ߏ߬ ߟߎ߬ ߟߊ߫ ߟߊ߬ߞߐ߰ߟߌ ߘߌ߫ ߘߊߡߌ߬ߣߊ߫.>>
ߘߊߦߟߍߟߌ߫ ߖߊ߲ߖߏ߲ ߣߌ߲߬ ߘߐ߫߸ ߞߊ߬ߙߊ߲߬ߡߐ߯ ߡߊ߬ߡߊ߬ߘߌ߬ ߖߐ߲ߖߐ߲ ߞߋߕߊ߬ ߕߘߍ߬ ߞߣߍ ߞߊ߲߬߸ ߞߊ߲ߞߊ߲߫ ߒ.ߓ.ߘ ߞߊ߲ߕߌ߮، ߏ߬ ߝߣߊ߫ ߞߊ߬ ߟߊ߬ߞߐ߰ߟߌ߬ ߕߊ߲ߓߊ߲ ߣߌ߲߬ ߡߙߌߦߊ ߞߐߡߊߓߌ߲ߓߌ߲߫ ߞߏߛߓߍ߫:
<<ߊ߲ ߧߴߊ߬ ߟߐ߲߫ ߞߏ߫ ߛߓߍߟߌ ߦߋ߫ ߓߐ߬ߘߐ ߟߋ߬ ߘߌ߫߸ ߟߐ߲ߠߌ߲ ߦߋ߫ ߟߊߡߊ߲߬ߘߌ߬ ߟߊ߫ ߡߍ߲ ߞߣߐ߫߸ ߣߴߏ߬ ߦߋ߫ ߞߏ ߟߎ߬ ߣߴߊ߬ߟߎ߬ ߞߍߢߊ ߘߌ߫، ߞߏ߬ߣߌ߲߬ ߡߌ߬ߙߌ߲߬ߘߌ ߡߍ߲ ߡߊ߫ ߞߏ߫ ߟߐ߲߫߸ ߊ߬ ߡߴߊ߬ ߞߍߢߊ߫ ߟߐ߲߫߸ ߏ߬ ߛߋߕߐ߫ ߡߋ߬ߘߋ ߟߊߡߊ߲߬ߘߌ߬ ߟߴߊ߬ ߟߊ߫ ߛߓߍߟߌ ߘߐ߫ ߡߍ߲ ߘߌ߫ ߖߡߊ߬ߣߊ ߟߊߥߙߎߞߌ߫؟ ߞߊ߬ ߛߋ߫ ߛߓߍߟߌ ߞߍ߫ ߟߊ߫ ߞߵߊ߬ ߞߊ߬ߙߊ߲߬߸ ߌ ߓߘߊ߫ ߓߘߐ߬ ߘߐ߬ߞߏߟߏ߲ ߘߏ߫ ߛߐ߬ߘߐ߲߬، ߞߊ߬ ߛߋ߫ ߞߏ ߘߏ߫ ߟߐ߲߫ ߠߊ߫ ߞߵߊ߬ ߓߟߏߦߊ߫߸ ߌ ߓߘߴߌ ߟߊ߫ ߓߐ߬ߘߐ ߘߐߞߍ߫، ߊ߬ ߝߟߍ߫ ߞߍ߬߸ ߌ ߡߴߊ߬ ߟߐ߲߫ ߓߘߐ߬ ߘߐ߬ߞߏ߬ߟߏ߲߬ ߕߌ߮ ߞߊ߫ ߛߌߦߊ߫ ߖߡߊ߬ߣߊ ߞߣߐ߫ ߓߌ߬؟ ߞߏ߫ ߒ ߓߘߊ߫ ߞߊ߬ߙߊ߲߬߸ ߞߏ߬ߣߌ߲߬ ߒ ߕߍ߫ ߓߊ߯ߙߊ߫ ߟߊ߫، ߘߏߡߍߛ ߖߌ߬ߣߍ߫ ߓߘߊ߫ ߣߵߊ߬ ߞߊ߲ߠߊߘߌ߫ ߓߘߐ߬ ߕߌ߮ ߟߎ߫ ߡߊ߬߸ ߣߊߟߌ߬ߡߎ߲߫ ߛߓߍߟߌ߫ ߟߐ߲ߠߊ ߟߎ߬ ߘߌ߫: ߒߞߏ ߘߐ߫߸ ߊߙߊߓߎ ߘߐ߫߸ ߝߊ߬ߙߊ߲߬ߛߌ ߘߐ߫، ߞߏ߫ ߓߍ߯ ߦߋ߫ ߣߵߊ߬ ߕߊ߫ ߓߐ߬ߘߐ߫ ߞߘߎ߬߬ ߟߐ߲ߠߌ߲ ߘߐ߫߸ ߌ ߘߌ߫ ߛߋ߫ ߡߍ߲ ߓߟߏߦߊ߫ ߟߊ߫ ߒߞߘߐ߫߸ ߞߵߌ ߓߐ߫ ߛߌ߰ߒ߬ߖߘߍ߬ߡߊ ߘߐ߫.>>
ߞߵߊ߬ ߟߊߥߟߌ߬ ߓߊ߯ߙߊ ߣߌ߲߬ ߓߐߢߟߊ ߡߊ߬߸ ߊ߬ ߣߴߊ߬ ߞߊ߬ߙߊ߲߬ ߞߍߕߊ ߟߎ߬ ߟߊߓߘߍ߬ߦߊ ߣߊ߬ߕߊ ߞߏߛߐ߲߬߸ ߘߏߡߍߛ ߓߊ߯ߙߊ ߞߊ߬ߙߌ߬ߝߊ߬ߣߍ߲߫ ߞߟߊ߬ߡߊ߬ߓߊ߰ ߞߙߎ ߟߎ߫ ߟߋ߬ ߟߊ߫، ߕߊ߲ߓߊ߲ ߞߎ߲߬ߧߊ ߦߋ߫ ߛߟߊߕߌ߯ ߡߏ߬ߤߊ߬ߡߍߘ ߘߎ߲ߓߎߦߊ߫ ߟߋ߬ ߓߟߏ߫߸ ߏ߬ ߟߋ ߦߋ߫ ߝߘߏ߬ߓߊ߬ ߗߋߕߌ߮ ߘߌ߫.
ߒ߬ߓߊ߬߸ ߘߏߡߍߛ ߖߌߣߋ߫ ߞߏ ߣߌ߲߬ ߡߙߌߦߊ ߞߏߛߐ߲߬߸ ߊ߬ ߘߌ߫ ߞߍ߫ ߛߊߓߎ߫ ߘߌ߫ ߞߵߊ߬ ߛߋߞߏ ߞߍ߫ ߖߌ߬ߣߍ߬ ߟߊߥߙߎߞߌ ߓߊ߯ߙߊ ߟߎ߬ ߘߐ߫߸ ߞߊ߬ ߡߌ߬ߙߌ߲߬ߘߌ ߡߊߘߍ߬ߡߍ߲߬ ߓߊ߯ߙߊ߫ ߞߏ ߘߐ߫߸ ߞߊ߬ ߛߌ߰ߒߖߘߍ߬ߡߊ ߞߟߍ߬߸ ߞߊ߬ ߘߋ߲ߡߌߛߍ߲ ߛߴߊ߬ߟߎ߫ ߖߘߍ߬ ߞߘߐ߫.
Aucun commentaire pour le moment.