ߘߊߦߟߍߟߌ߫ ߖߊ߲ߖߏ߲ ߣߌ߲߬ ߞߍ߫ ߘߊ߫ ߡߐ߰ ߛߌߦߊߡߊ߲߫ ߠߋ߬ ߢߣߊ߫߸ ߞߊ߲ߞߊ߲߫ ߝߊ߰ߡߊ ߟߎ߬߸ ߟߊ߬ߞߟߏ߬ߞߟߏ߬ߟߌ ߝߊ߰ߡߊ ߟߎ߬߸ ߞߵߏ߬ ߟߊ߫ ߘߎ߰ߘߋ߲߬ ߛߌߦߊߡߊ߲߫ ߞߊ߲߬߸ ߛߏ ߘߌ߯ߣߊ߫ ߢߍߡߐ߮ ߟߎ߬ ߣߌ߫ ߞߟߌߣߍ߲߫ ߞߙߍߞߙߍߣߍ߲ ߠߎ߬ ߘߐ߫.

ߞߊ߬ߙߊ߲߬ߓߏ߲ ߢߌ߲߬ ߟߐ߬ߣߍ߲߫ ߥߊߟߖߌ߫ ߟߊ߱ߖߌ߫ ߛߎ߬ߟߋ߬ߡߊ߯ߣ ߛߘߌ߬ߓߋ߫ ߟߋ߬ ߖߎߝߊ߫ ߞߣߐ߫ ߥߊߘߌ ߟߊ߫߸ (ߞߊ߬ߙߊ߲߬ߡߐ߯ ߛߏ߬ߟߏ)، ߞߊ߬ߙߊ߲߬ߛߏ ߣߌ߲߬ ߛߏ߯ߙߏߣߍ߲߫ ߞߵߊ߬ ߞߍ߫ ߓߏ߲ߓߊ߫ ߝߌ߬ߟߊ߫ ߟߋ߬ ߘߌ߫߸ ߡߍ߲ ߞߊ߬ߙߊ߲߬ߓߏ߲ ߦߙߌߞߊ ߦߋ߫ ߓߏ߲ߞߣߐ߫ ߃߀߸ ߞߵߏ߬ ߟߊ߫ ߛߓߍߘߊ߫ ߣߊ߯ߣߌ߲߫ ߞߊ߲߬ (ߊ߬ ߕߊ߫ ߝߊ߲߬ ߘߐ߫).

ߞߊ߬ߙߊ߲߬ߕߊ ߣߌ߲߬ ߓߊ߯ߙߊ ߡߎ߰ߡߍ ߞߍߣߍ߲߫ ߛߊ߲߭ ߛߊ߬ߓߊ߫ ߟߋ߬ ߞߣߐ߫، ߞߵߊ߬ ߟߛߊߣߌ߲ߧߊ߫ ߞߵߊ߬ ߓߊ߯ߙߊ ߞߎ߲߭ߝߊ߰߸ ߏ߬ ߞߍ߫ ߘߊ߫ ߕߙߎߞߌ߫ ߣߌ߫ ߖߌ߬ߣߍ߬ ߟߊ߫ ߟߐ߬ߟߌ߬ ߞߏߟߊߘߍ ߟߋ߬ ߓߟߏ߫ (ߖ߭ߋ.ߕߋ.ߛߋ).

ߡߊߡߊߘߎ߫ ߡߊߕߐߛ ߞߊ߬ ߞߊ߬ߙߊ߲߬ߓߏ߲ ߣߌ߲߬ ߟߐ߬ ߢߊ ߣߴߊ߬ ߛߙߊߛߌ߰ ߢߊ ߟߎ߬ ߢߊߝߐ߫߸ ߊ߬ߟߋ ߡߍ߲ ߦߋ߫ ߟߐ߬ߟߌ߬ ߞߏߟߊߘߍ ߢߌ߲߬ ߞߏ߲߬ߘߏ ߡߊߡߙߊ߬ߓߊ߮ ߘߌ߫، ߞߵߊ߬ ߦߌ߬ߘߊ߬ ߞߏ߫ ߞߊ߬ߙߊ߲߬ߓߏ߲ ߦߋ߫:

<<ߟߞߊ߬ߙߊ߲߬ߠߌ߲ ߓߏ߲ߓߊ߫ ߝߌ߬ߟߊ߫ ߟߋ߬ ߘߌ߫߸ ߊ߬ ߣߌ߫ ߡߊ߬ߡߙߊ߬ߟߌ ߓߏ߲ߓߊ߫ ߞߋߟߋ߲߫߸ ߊ߬ ߡߎ߰ߡߍ ߦߋ߫ ߞߊ߬ߙߊ߲߬ߓߏ߲߬ ߃߀ ߟߋ߬ ߘߌ߫߸ ߞߵߏ߬ ߟߊ߫ ߞߊ߬ߙߊ߲߬ߕߊ ߡߊߡߙߊ߬ߓߊ߮ ߟߎ߬ ߟߊ߫ ߛߓߍߘߊ߫ ߣߊ߯ߣߌ߲߫ ߞߊ߲߬.>>

ߊ߬ ߞߵߊ߬ ߦߌ߬ߘߊ߬ ߝߣߊ߫ ߞߏ߫ ߞߊ߬ߙߊ߲߬ߓߏ߲ ߣߌ߲߬ ߞߣߐߞߍߣߍ߲߫ ߠߋ߬ ߞߏ߫ ߛߌߦߊߡߊ߲߫ ߠߊ߫: <<ߛߊߣߌ߲ߧߊ߫ ߦߙߐ ߟߎ߬ ߘߝߊߣߍ߲߫߸ ߢߎߡߍ߫ ߞߏ ߘߝߊߣߍ߲߫ ߠߋ߬ ߞߐߟߌߞߐߟߌ߫، ߞߊ߬ߕߎ߲߯߸ ߢߍ߲߯ ߞߣߐ߫ ߥߐ߯ߙߐ߫ ߦߋ߫ ߓߏ߲ߓߊ ߢߌ߲߬ ߓߟߌߕߍ ߓߍ߯ ߟߊ߫߸ ߤߊ߲߯ ߓߟߌߕߍ ߛߊ߲ߘߐߕߊ ߟߊ߫߸ ߊ߬ ߓߍ߯ ߦߋ߫ ߕߋ߲߬ ߠߋ߬.>> ߊ߬ ߞߵߏ߬ ߢߊߝߐ߫.

ߞߊ߲ߞߊ߲߫ ߕߌ߲߬ߞߎߘߎ߲ ߟߊ߬ߞߟߏ߬ߞߟߏ߬ߟߌ ߜߋ߬ߟߎ߲߬ߓߊ߮߸ ߡߎߛߊ߫ ߞߋߕߊ߬ ߞߵߊ߬ ߟߊ߫ ߛߍߦߊ ߦߌ߬ߘߊ߫ ߣߌ߲߬ ߞߏ ߘߐ߫ ߊ߬ ߢߊ ߖߍ߬ߘߍߖߍ߬ߘߍ ߡߊ߬، ߞߵߊ߬ ߦߌ߬ߘߊ߬ ߞߏ߫ ߛߌߞߊ߫ ߕߴߊ߬ ߘߐ߫߸ ߓߏ߲ ߣߌ߲߬ ߟߐ߭ ߦߋ߫ ߛߋ߲߬ߕߊ߬ ߓߟߋߓߟߋ߫ ߟߋ߬ ߘߌ߫ ߥߙߎߞߌ ߡߊ߬ߘߎ߮ ߘߐ߫.

ߊ߬ ߞߊ߬ ߞߊ߬ߙߊ߲߬ߡߐ߯ ߛߏ߬ߟߏ ߝߏ߬ ߊ߬ ߟߊ߫ ߘߎ߰ߘߋ߲߬ ߓߘߍ߬ߦߊ ߟߊ߫߸ ߊ߬ ߓߘߴߏ߬ ߡߍ߲ ߓߐ߫ ߝߐߟߌ ߘߐ߫߸ ߞߵߊ߬ ߓߌ߬ߟߊ߬ ߞߍߟߌ ߘߐ߫، ߞߊ߬ߕߎ߲߯߸ ߞߏ߫ ߞߊ߬ߙߊ߲߬ߡߐ߯ ߛߏ߬ߟߏ ߕߎ߲߬ ߓߘߊ߫ ߓߊ߯ߙߓߊ߫ ߜߘߍ߫ ߞߍ߫ ߞߘߐ߬ߡߊ߲߬߸ ߞߊ߬ ߞߊ߬ߙߊ߲߬ߕߊ߫ ߝߌ߬ߟߊ߫ ߞߊ߬ߙߊ߲߬ߓߏ߲ ߘߏ߫ ߟߎ߫ ߘߐߓߍ߲߬߸ ߞߊ߬ ߞߣߐ߫ ߛߓߊ߬ ߘߐߓߍ߲߬ ߏ߬ ߞߋ߬ߟߋ߲߬ߞߋ߬ߟߋ߲߬ߠߊ ߞߣߐ߫߸ ߞߵߊ߬ߟߎ߬ ߞߣߐߞߍ߫߸ ߞߵߊ߬ ߛߐ߬ߘߐ߲߬ ߊ߬ ߡߊ߫ ߝߏߦߌ߬ ߢߌߣߌ߲߫ ߝߊ߰ߡߊ߫ ߝߍ߬ ߞߎߡߊߕߍ߫ ߡߐ߰ ߜߘߍ߫ ߡߊ߬.

<<ߣߴߌ ߘߏ߲߬ ߞߊ߬ ߣߊ߲߬ߝߟߏ ߘߏ߲߬ ߞߊ߬ߙߊ߲߬ ߞߏ ߘߟߊ߫߸ ߏ߬ ߦߴߊ߬ ߦߌ߬ߘߊ߬ ߟߊ߫ ߟߋ߬ ߞߏ߫ ߌ ߓߘߊ߫ ߓߏ߲߬ߓߊ߫ ߕߊ߬ ߖߊ߬ߡߊ ߘߏ߬ߣߌ߲ ߘߐ߫، ߒ߬ߓߊ߬߸ ߞߊ߬ߙߊ߲߬ߓߏ߲߬ ߞߎߘߊ ߣߌ߲߬ ߞߊ߫ ߞߊ߲߫ ߞߊ߬ ߞߍ߫ ߟߊߒߡߊ ߟߋ߬ ߘߌ߫ ߞߊ߬ߙߊ߲ ߛߎ߯ߦߊ ߘߐ߫߸ ߊ߬ ߣߌ߫ ߖߏ߯ߘߏ߲ ߘߐ߫.>> ߡߎߛߊ߫ ߞߋߕߊ߬ ߞߵߏ߬ ߦߌ߬ߘߊ߬.

ߕߌ߲߬ߞߎߘߎ߲ ߟߊ߬ߞߟߏ߬ߞߟߏ߬ߟߌ ߜߋ߬ߟߎ߲߬ߓߊ߮ ߞߊ߬ ߞߊ߲ ߘߏ߫ ߟߎ߫ ߝߐ߫߸ ߞߊ߬ ߞߊ߬ߙߊ߲߬ߕߊ߬ ߞߎߘߊ ߣߌ߲߬ ߞߎ߲߬ߕߌ߮ ߟߎ߬ ߟߊߟߌ߫ ߏ߬ ߟߊ߫، ߊ߬ ߞߵߊ߬ ߦߌ߬ߘߊ߬߸ ߞߏ߫ ߞߊ߬ ߖߡߊ߬ߣߊ ߞߊ߬ߙߊ߲ ߞߎ߲߬ߕߋߟߋ߲ ߣߴߊ߬ ߕߐ߲߫ ߠߊߛߌ߰ߣߍ߲ ߠߎ߬ ߡߊߓߏ߲߬ߧߊ߬߸ ߞߊ߬ ߞߊ߬ߙߊ߲߬ߘߋ߲ ߞߋ߬ߟߋ߲߬ߞߋ߬ߟߋ߲߬ߠߊ ߟߊ߫ ߟߐ߲ߠߌ߲߫ ߛߐߘߐ߲ ߓߌ߬ߟߊ߬ ߢߍߝߍ߬، ߞߊ߬ ߓߊ߲߫ ߝߣߊ߫߸ ߞߊ߬ ߟߊ߬ߛߐ߲ ߣߌ߫ ߝߊ߲ߡߊߖߌ߮ ߣߌ߫ ߘߐ߬ߖߊ ߛߌߟߊ ߓߌ߬ߟߊ߫ ߞߊ߬ߙߊ߲߬ߘߋ߲ ߠߎ߬ ߞߘߐ߫.

ߡߊ߬ߡߊ߬ߘߌ߬ ߞߊ߲ߛߊ߲߫ ߘߎ߲߬ߓߎ߬ߦߊ߬ ߡߍ߲ ߞߍ߫ ߘߊ߫ ߞߊ߲ߞߊ߲߫ ߕߌ߲߬ߞߎߘߎ߲ ߞߎ߲߬ߠߊ߬ߛߌ߰ߟߊ ߞߐߦߌߘߊ ߘߌ߫ ߞߣߍ ߣߌ߲߬ ߞߊ߲߬߸ ߏ߬ ߞߊ߬ ߓߊ߯ߙߊ߫ ߞߍߣߍ߲ ߢߌ߲߬ ߕߊ߲߬ߘߏ߫߸ ߞߵߊ߬ ߦߌ߬ߘߊ߬ ߞߏ߫ ߞߊ߬ߙߊ߲߬ߓߏ߲߬ ߜߊ߲ߛߊ߲߫ ߕߍ߫ ߢߌ߲߬ ߘߌ߫.

ߊ߬ߟߋ ߟߊ߫ ߝߐߟߌ߫ ߘߐ߫߸ ߞߊ߬ߙߊ߲߬ߓߏ߲ ߢߌ߲߬ ߞߍߕߐ߫ ߓߐ߲ߛߐ߲߫ ߞߎߘߊ߫ ߣߊ߬ߕߐ ߟߎ߬ ߟߊ߫ ߞߊ߬ߙߊ߲ ߛߋ߲߬ߓߊ߬ߛߋ߲ ߠߋ߬ ߘߌ߫.

ߊ߬ ߞߊ߬ ߛߊ߲߬ߘߊ߬ ߞߘߐ߬ߓߊ ߘߏ߫ ߟߊߞߎߘߦߊ߫ ߦߋ߲߬߸ ߞߵߊ߬ ߦߌ߬ߘߊ߬ ߞߏ߫ <<ߡߍ߲ ߓߊ߯ ߞߊ߬ߙߊ߲߬ߓߏ߲߬ ߞߋߟߋ߲߫ ߟߐ߬߸ ߏ߬ ߓߘߊ߫ ߥߛߎߖߌ߲߫ ߛߌߦߊߡߊ߲߫ ߠߋ߬ ߘߊߕߎ߲߯ ߏ߬ ߘߌ߫.>> ߞߊ߲ߛߊ߲߫ ߓߊ߲߫ ߘߊ߫ ߝߣߊ߫ ߞߊ߬ ߞߊ߬ߙߊ߲߬ߕߊ ߛߌ߲ߘߌߓߊ߮ ߝߏ߬߸ ߊ߬ ߟߊ߫ ߘߐ߬ߖߊ ߞߏߛߐ߲߬ ߞߊ߬ߙߊ߲ ߠߊߛߓߊ߬ߕߌ ߘߐ߫߸ ߊ߬ ߣߌ߫ ߖߡߊ߬ߣߊ ߟߊ߫ ߛߌߣߌ߲߫ ߣߊ߬ߕߐ ߓߊ߯ߙߟߊ ߟߎ߬ ߘߐߓߍ߲߭ ߘߐ߫.

ߞߎ߲߬ߠߊ߬ߛߌ߰ߟߊ ߞߐߦߌߘߊ ߞߵߊ߬ ߞߊ߲ߠߊߘߌ߫ ߟߞߊ߬ߙߊ߲߬ߠߌ߲߬ߠߊ ߟߎ߫ ߡߊ߬߸ ߞߏ߫ ߊ߬ߟߎ߬ ߦߴߊ߬ߟߎ߬ ߟߊ߫ ߘߊ ߟߊߓߐ߫، ߊ߬ ߞߵߊ߬ ߢߌߣߌ߲߫ ߞߊ߬ߙߊ߲߬ߘߋ߲ ߠߎ߬ ߝߣߊ߫ ߝߍ߬߸ ߞߏ߫ ߊ߬ߟߎ߬ ߦߋ߫ ߞߊ߬ߙߊ߲ ߡߌ߬ߣߊ߫ ߛߍ߬ߓߍ ߟߊ߫߸ ߞߊ߬ ߡߊ߬ߝߊ ߟߊ߫ ߏ߬ ߘߟߊ߫߸ ߞߊ߬ߙߊ߲ ߕߊ߬ ߕߡߌߣߊ߲ߘߌߦߊ ߣߌ߫ ߞߟߊߓߎ ߟߊ߫.

ߖߊ߲߬ߖߏ߲ ߣߌ߲߬ ߘߊߞߎ߲ ߘߐ߫߸ ߞߊ߬ߙߊ߲߬ߕߊ ߤߊߖߊ߬ ߡߊߙߌߦߡߊ߫ ߛߘߌ߬ߓߋ߬ ߟߊ߫ ߟߊ߬ߢߌߣߌ߲ ߠߎ߬ ߢߊߝߐ߫ ߘߊ߫ ߞߊ߬ߙߊ߲߬ߡߐ߯ ߛߏ߬ߟߏ ߘߋ߲ ߠߎ߬ ߓߟߏ߫ ߞߊ߲߫ ߛߊ߬ߓߊ߫ ߟߋ߬ ߘߐ߫߸ ߝߊ߬ߙߊ߲߬ߛߌ߬ ߞߊ߲߸ ߊߙߊߓߎ߫ ߞߊ߲߸ ߊ߬ ߣߌ߫ ߊ߲߬ߜ߭ߌ߬ߟߋ߬ ߞߊ߲.

ߒ߬ߓߊ߬߸ ߛߍߥߊ ߣߌ߫ ߢߊ߰ߢߊ߮ ߏ߬ ߟߋ ߞߣߐ߫߸ ߊ߬ ߣߌ߫ ߛߎߘߊ߲ ߣߊ߬ߕߊ ߞߊ߬ߙߊ߲߬ߕߊ ߦߋ߫߸ ߊ߬ ߟߞߊ߬ߙߊ߲߬ߠߌ߲߬ߠߊ ߟߎ߬ ߦߋ߫߸ ߊ߬ ߣߴߊ߬ ߞߊ߬ߙߊ߲߬ߘߋ߲ ߠߎ߬ ߦߋ߫߸ ߏ߬ ߟߋ ߞߍ߫ ߘߊ߫ ߞߊ߬ߙߊ߲߬ߕߊ ߘߊߦߟߍ߬ߣߍ߲ ߘߌ߫ ߞߵߊ߬ ߓߌ߬ߟߊ߬ ߖߊ߬ߡߊ ߛߊ߬ߥߏ߬ ߘߐ߫߸ ߛߊ߫ ߛߊ߲߭ ߣߊ߬ߕߐ ߞߊ߬ߙߊ߲ ߘߌ߫ ߞߍ߫ ߊ߬ ߞߣߐ߫ ߞߎ߲߬ߠߊ߬ߦߋߙߋ߲ ߘߝߊߣߍ߲ ߘߐ߫.