ߡߊ߬ߛߎ߬ߓߊ߬ߞߏ߫ ߟߋ߬ ߕߍ߰ߣߍ߲߫ ߖߟߊߞߘߐ߫ ߛߌ߬ߣߌ߲߬ߟߏ߲ ߣߌ߲߬ ߡߊ߬߸ ߂߀߂߆ ߥߊ߬ߛߌ߬ߥߙߊ ߕߋ߬ߟߋ߫ ߂߆߸ ߊ߬ߟߋ ߦߋ߫ ߡߙߊ߬ߘߊ߬ߙߋ߲ ߠߋ߬ ߘߌ߫ ߡߊ߲߬ߖߊ߲߬ߠߊ߫ ߡߙߊ߬ߘߊ߬ߓߊ ߘߐ߫߸ ߞߎߘߍ߫ ߁߃߅ ߖߊ߬ߕߋ߬ ߟߊ߫، ߒ߬ߓߊ߬߸ ߛߏ߰ߟߊ ߟߋ߬ ߓߏ߬ߙߌ߬ߣߍ߲߫ ߦߋ߲߬ ߡߐ߮ ߟߎ߫ ߞߊ߲߬ ߓߌ߬߸ ߗߍ߬ߓߊ߬ߟߋ߲߬ߣߍ߲߫ ߛߊ߲߬ ߈ ߘߏ߫ ߟߋ߬ ߕߎߣߎ߲߫ ߘߊ߫ ߞߎߣߎ߲߬߸ ߊ߬ ߕߐ߯ ߞߏ߫ ߛߌߘߌ߬ ߛߊ߬ߞߐ߫߸ ߏ߬ ߛߎ߭ ߟߊߦߟߍ߬ߣߍ߲߫ ߞߐ߬ߟߐ߲ ߞߣߐ߫ ߓߌ߬ ߛߐ߰ߡߊ߬ߘߊ ߟߊ߫.

ߛߋ߲߬ߞߐ߫ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߝߐߟߌ߫ ߘߐ߫߸ ߘߎ߰ߘߋ߲ ߏ߬ ߡߍ߲ ߡߊߛߐ߬ߘߐ߲߬ ߘߴߊ߲ ߠߊ߫ ߛߍߝߍ߲ߘߊ ߓߟߏ߫ ߜߋߟߋ߲ߜߋߟߋ߲ ߠߊ߫߸ ߊ߬ߟߋ߫ ߞߵߊ߬ ߦߌ߬ߘߊ߬ ߞߏ߫ ߘߋ߲ߣߍ߲ ߟߐ߬ ߘߊ߫ ߞߋߟߊ ߟߋ߬ ߟߊ߫ ߞߏ߫ ߊ߬ ߦߋ߫ ߥߊ߫ ߞߌߣߌ߲ ߡߊߟߐ߬ ߣߛߌ߬ߜߍ߲߬ߘߋ߲ ߠߎ߬ ߟߊ߫ ߥߊ߭ ߘߐ߫.

<<ߘߋ߲ߣߍ߲ ߓߋ߬ ߘߊ߫ ߞߐ߬ߟߐ߲ ߠߋ߬ ߞߣߐ߫߸ ߕߏ߬ߝߊ߬ ߜߊ߬ߛߌ߬ߟߊ ߟߎ߬ ߟߊ߫ ߕߏ߬ߘߊ ߞߊ߲ ߠߊ߫، ߞߊ߬ߕߎ߲߯߸ ߦߋ߬ ߦߋ߫ ߕߏ߬ߝߊ߬ ߥߎ߬ߟߋ߲߬ ߖߋ߬ߣߌ߲߬ ߦߙߐ ߟߋ߬ ߘߌ߫߸ ߏ߬ ߟߎ߬ ߦߴߊ߬ߟߎ߬ ߟߊ߫ ߖߌ ߕߊ߬ ߟߊ߫ ߞߐ߬ߟߐ߲ ߡߍ߲ ߞߣߐ߫߸ ߘߋ߲ߣߍ߲ ߓߋ߬ߣߴߏ߬ ߟߋ ߘߐ߫. ߞߊ߬ߕߎ߲߯߸ ߌߞߏߡߌ߲߬ ߢߐ߬ߝߍ ߛߌ߰ߣߍ߲߫ ߕߍ߬ߘߍ߫ ߞߐ߬ߟߐ߲߬ ߞߊ߲ ߠߊ߫߸ ߛߌߞߊ߫ ߞߍߣߍ߲߫ ߞߏ߫ ߊ߬ ߣߐ߬ ߘߌ߫ ߞߍ߫ ߢߐ߭ ߟߋ߬ ߛߌ߰ ߟߊ߫ ߞߏ߫ ߊ߬ ߦߋ߫ ߖߌ ߟߊߦߟߍ߬ ߟߊ߫߸ ߖߟߎ߬ߝߍ ߝߊ߲߬ߞߊ ߦߋ߫ ߥߊ߬ߙߴߊ߬ ߡߊ߬߸ ߊ߬ ߦߋ߫ ߖߌ߰ ߞߐ߬ߟߐ߲ ߞߣߐ߫>>

ߘߋ߲ߣߍ߲ ߓߋ߬ߣߍ߲߫ ߞߐ߬ߟߐ߲ ߞߣߐ߫ ߦߙߐ ߡߍ߲ ߘߐ߫ ߕߋ߲߬߸ ߕߏ߬ߝߊ߬ ߜߊ߬ߛߌ߬ ߦߙߐ ߟߋ߬، ߛߊ߬ߡߊ ߓߊ߯ ߛߋ߫߸ ߦߋ߲߬ ߓߊ߯ߙߊ ߦߋ߫ ߡߊߓߍ߲߬ ߠߊ߫ ߟߋ߬ ߞߵߏ߬ ߞߎ߲߭ ߞߍ߫ ߛߊ߲ߖߌ߫ ߞߏ ߘߌ߫، ߏ߬ ߟߋ ߞߏߛߐ߲߬߸ ߘߋ߲ߣߍ߲ ߓߋ߬ ߘߊ߫ ߞߐ߬ߟߐ߲ ߞߣߐ߫ ߞߊ߬ ߡߍ߲߫߸ ߊ߬ ߡߊ߫ ߛߋ߫ ߟߊߞߏߟߐ߲߫ ߠߊ߫.

<<ߞߐ߬ߟߐ߲ ߦߋ߫ ߘߋ߲߬ߞߊ ߟߋ߬ ߞߣߐ߫߸ ߊ߬ ߟߊߞߙߐ߬ߛߌ߬ ߜߏߡߊ߲߫ ߥߎߟߊ ߟߊ߫، ߢߌߣߌ߲ߠߌ߲ߠߊ ߟߎ߬ ߥߊߣߍ߲߫ ߛߎ߬ߡߊ߲߬ ߕߛߊ ߟߋ߬ ߛߌ߰ߣߍ߲ ߦߋ߫ ߟߊ߫ ߞߐ߬ߟߐ߲߬ ߞߊ߲ ߠߊ߫ ߡߎ߬ߕߎ߲߬߸ ߏ߬ ߟߋ ߞߵߊ߬ ߞߍ߫ ߊ߬ߟߎ߫ ߞߊ߬ ߘߋ߲ߣߍ߲ ߛߎ߭ ߦߋ߫ ߖߌ ߞߊ߲߬.>> ߊ߬ ߞߵߏ߬ ߦߌ߬ߘߊ߬.

ߝߊ߰ߡߊ ߟߎ߫ ߣߊ߭ ߡߍ߲ ߞߍ߫ ߘߊ߫ ߡߎ߬ߕߎ߲߬ ߛߊ߫߸ ߛߎ߭ ߟߊߦߟߍ߬ ߘߊ߫ ߞߐ߬ߟߐ߲ ߞߣߐ߫، ߞߊ߬ߕߎ߲߯߸ ߊ߬ߟߋ߬ ߛߙߋ߫ ߞߋߟߋ߲ ߠߊ߫ ߝߐߟߌ߫ ߘߐ߫߸ ߕߐ߲ߕߌ߯ ߘߋ߲߬ߓߊ߫ ߣߊ߭ ߡߍ߲ ߞߍ߫ ߘߊ߫߸ ߏ߬ ߟߋ ߞߐ ߞߍ߫ ߘߊ߫ ߓߊߙߊ߲ߕߏ߲߫ ߥߎߟߋ߲ ߣߊ߭ ߘߌ߫.

<<ߕߐ߲ߕߌ߮ ߞߊ߬ ߓߊߙߊ߲ߕߏ߲߫ ߥߎߟߋ߲ ߞߟߌ߫، ߏ߬ ߡߐ߱ ߟߎ߫ ߣߊ߭ ߡߍ߲ ߞߍ߫ ߘߊ߫߸ ߏ߬ ߟߎ߫ ߟߋ߬ ߞߊ߬ ߛߎ߭ ߟߊߦߍ߬ߟߍ߫ ߞߵߊ߬ ߘߌ߫ ߞߐߙߍ ߡߊ߬.>>

ߘߎ߰ߕߌ߮ ߡߍ߲ ߕߐ߯ ߞߏ߫ ߡߏߙߌ߬ ߞߎ߬ߟߌߓߊ߬ߟߌ߬߸ ߏ߬ ߞߊ߬ ߞߎߡߊ ߏ߬ ߟߊߛߙߋߦߊ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ ߟߋ߬ ߞߊ߬ ߕߐ߲ߓߟߏߡߊ ߟߎ߬ ߞߟߌ߫߸ ߞߵߏ߬ ߟߊ߫ ߓߊߙߊ߲ߕߏ߲߫ ߥߎߟߋ߲ ߞߊ߲߬.

<<ߒߠߋ ߟߊߟߐ߲ߠߌ߲ ߡߍ߲ ߞߍ߫ ߘߊ߫߸ ߒ ߥߊ߫ ߘߊ߫ ߛߋ߫ ߞߐ߬ߟߐ߲߬ ߞߊ߲ ߠߊ߫ ߦߋ߲߬، ߒ ߞߊ߬ ߒ ߞߊ߲ߠߊߘߌ߫ ߟߊ߬ߞߊ߲߬ߘߊ߬ߟߌ ߘߏ߲߬ߞߏ ߟߎ߫ ߡߊ߬߸ ߊ߬ ߣߌ߫ ߓߊߙߊ߲ߕߏ߲߫ ߥߎߟߋ߲، ߓߊߙߊ߲ߕߏ߲߫ ߥߎߟߋ߲ ߠߋ߬ ߞߊ߬ ߛߎ߭ ߟߊߦߍ߬ߟߍ߫ ߡߎ߬ߕߎ߲߬ ߛߊ߫߸ ߞߵߊ߬ ߘߌ߫ ߕߐ߲ߓߟߏߡߊ ߟߎ߫ ߡߊ߬߸ ߏ߬ ߟߎ߫ ߞߊ߬ ߛߎ߭ ߘߌ߫ ߞߐߙߍ ߡߊ߬.>> ߡߏߙߌ߫ ߞߎ߬ߟߌߓߊ߬ߟߌ߫ ߟߋ߬ ߞߊ߲߫ ߕߋ߲߬.

ߞߊ߬ ߓߍ߲߬ ߘߋ߲ߣߍ߲ ߠߊ߫ ߓߐߒߣߘߐ ߢߊߝߐ߫ ߢߊ ߡߊ߬ ߛߊ߫߸ ߏ߬ ߟߋ ߘߐߝߌ߲߬ߣߍ߲߬ ߣߍ߲ߞߍ߫، ߞߊ߬ߕߎ߲߯߸ ߛߋ߲߬ߞߐ߫ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߊ߲߫ ߞߏ߫ ߊ߬ ߥߊߣߍ߲߫ ߕߍ߬ߘߍ߫ ߛߎ߬ߡߊ߲߬ ߡߊ߬ߟߐ߬ ߦߌߟߊ ߟߋ߬ ߘߐ߫ ߣߛߌ߬ߜߍ߲߬ߘߋ߲ ߠߎ߬ ߟߊ߫ ߥߊ߭ ߘߐ߫، ߘߎ߰ߕߌ߮ ߞߊ߲߫ ߞߏ߫ ߊ߬ ߥߊߕߐ߫ ߕߘߍ߬ ߝߋ߲߫ ߡߊߟߐ߫ ߦߌߟߊ ߟߋ߬ ߘߐ߫ ߊ߬ ߞߐ߬ߘߐ߸ ߊ߬ ߣߐ߬ ߛߌߟߊ ߟߋ߬ ߝߘߊ߫ ߟߊ߫ ߞߊ߬ ߥߊ߫ ߦߙߐ ߏ߬ ߘߐ߫ ߦߋ߲߬߸ ߡߐ߰ ߕߴߊ߬ ߞߊ߬ߟߊߡߊ߬. ߘߎ߰ߕߌ߮ ߞߵߊ߬ ߦߌ߬ߘߊ߬ ߞߏ߫:

<<ߘߋ߲ߣߍ߲ ߝߊ߬ ߓߘߊ߬ ߡߐ߮ ߟߎ߫ ߞߊ߬ ߡߍ߲ ߝߐ߫ ߒ ߧߋ߫߸ ߞߏ߫ ߊ߬ ߥߊߕߐ߫ ߕߘߍ߬ ߝߋ߲߫ ߡߊߟߐ߫ ߦߌߟߊ ߟߋ߬ ߘߐ߫ ߊ߬ ߞߐ߬ߘߐ ߟߎ߬ ߟߊ߫، ߌߞߏߡߌ߲߬ ߊ߬ ߡߍ߲߫ ߘߊ߫߸ ߊ߬ ߡߊ߫ ߛߋ߫ ߦߋ߲߬߸ ߊ߬ ߞߐ߬ߘߐ ߟߎ߫ ߞߊ߬ ߞߟߌߟߌ ߞߍ߫ ߞߏ߫ ߊ߫߹ ߡߐ߱ ߡߍ߲ ߥߊߣߍ߲߫ ߝߋ߲߫ ߕߊ ߟߊ߫ ߛߏ߫߸ ߊ߬ ߡߊ߫ ߛߋ߫ ߦߋ߲߬߸ ߛߏ߫ ߡߐ߮ ߟߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ ߞߐߛߊߦߌ߲߫ ߡߊ߫ ߦߋ߫ ߡߎߣߎ߲߬، ߊ߬ ߢߌߣߌ߲ ߘߊߡߌ߬ߣߊ߬ ߢߊ ߟߋ߬ ߞߍߣߴߏ߬ ߘߌ߫ ߊ߲ ߓߟߏ߫.>>

ߊ߬ ߞߵߊ߬ ߦߌ߬ߘߊ߬ ߞߏ߫ ߘߋ߲ߣߍ߲ ߕߏߣߍ߲߫ ߞߐ߬ߟߐ߲ ߞߣߐ߫ ߦߙߐ ߡߍ߲ ߘߐ߫߸ ߊ߬ ߣߌ߫ ߛߏߞߣߐߟߊ ߕߍ ߡߊ߲߫ ߖߊ߲߬، ߞߏ߬ߣߌ߲߬߸ ߊ߬ ߟߊߕߍ߰ߣߍ߲߫ ߠߋ߬ ߛߊ߬ߡߊ ߢߌ߲߬ ߘߐ߫ ߕߋ߲߬.

ߛߊ߬ߓߊ߰ߕߐ ߣߌ߲߬ ߡߍ߲ ߕߐ߯ ߣߌ߲߬ ߞߏ߫ ߛߌߘߌ߬ ߛߊ߬ߞߐ߫߸ ߊ߬ ߝߊ߬ ߕߐ߯ ߟߋ߬ ߞߏ߫ ߣߊߡߊ߲߬ ߛߊ߬ߞߐ߸ ߊ߬ ߣߊ߫ ߕߐ߯ ߞߏ߫ ߡߊߡߌ߲߫ ߞߎ߬ߟߌߓߊ߬ߟߌ߬، ߊ߲ ߠߊ߫ ߟߌ߬ߤߟߊ߫ ߛߐ߬ߘߐ߲߬ߣߍ߲ ߠߎ߬ ߘߐ߫߸ ߊ߬ ߦߴߊ߬ ߓߊߙߌ߲ߞߍ߫ ߟߋ߬ ߓߟߏ߫ ߖߟߊߞߘߐ߫߸ ߏ߬ ߕߐ߯ ߞߏ߫ ߛߌߘߌ߬ ߞߎ߬ߟߌߓߊ߬ߟߌ߬.

ߘߎ߰ߕߌ߮ ߞߵߊ߬ ߦߌ߬ߘߊ߬ ߞߏ߫ ߘߋ߲ߣߍ߲ ߕߎߣߎ߲߸ ߊ߬ߟߎ߫ ߞߵߏ߬ ߞߋߟߊ ߟߊߛߋ߫ ߟߋ߬ ߞߎߡߊߛߏ ߟߊ߫߸ ߞߊ߬ ߓߊ߲߫ ߞߵߊ߬ ߘߏ߲߬ ߖߋ߬ߟߌ߬ߞߍ ߘߏ߫ ߘߊ߫ ߏ߬ ߦߴߊ߬ ߟߊߛߋ߫ ߛߏ ߝߊ߲߭ ߓߍ߯ ߘߐ߫، ߓߌ߬ ߖߎߡߊ߫ ߛߊߟߌ߫ ߞߐ ߟߋ߬ ߘߐ߫ ߡߎ߬ߕߎ߲߬ ߛߊ߫߸ ߘߋ߲ߣߍ߲ ߛߎ߭ ߘߏ߲߬ ߘߊ߫. ߣߌ߲߬ ߞߏ߬ߣߌ߲ ߓߘߊ߫ ߕߊ߬ߡߌ߲߬ ߦߟߌߓߌߟߊ߫ ߞߍ߫ ߟߊ߫߸ ߞߊ߬ ߓߍ߲߬ ߢߊ ߟߐ߬ ߞߏ ߡߊ߬ ߓߊ߯ߙߊ߫ ߘߌ߲ߞߌߙߊ߫ ߛߎ߮ ߢߌ߲߬ ߠߎ߫ ߞߐ߬ߟߐ߲߬ ߞߏ ߘߐ߫߸ ߊ߬ߟߎ߬ ߘߊߕߎ߲߯ ߞߏ ߘߐ߫߸ ߊ߬ ߣߴߊ߬ߟߎ߬ ߟߊߕߊ߲߬ߞߊ߬ ߞߏ ߘߐ߫ ߞߊ߬ ߓߐ߫ ߘߋ߲ߣߍ߲ ߠߎ߬ ߟߊ߫ ߕߣߐ߬ߓߐ߬ߟߌ ߡߊ߬߸ ߏ߬ ߡߍ߲ ߞߐߝߟߌ ߦߋ߫ ߥߟߏ߫ ߟߊ߫ ߡߊ߬ߛߎߓߊ ߟߊ߫ ߕߎ߬ߡߊ ߘߏ߫ ߟߎ߫ ߟߊ߫.