ߞߊ߲ߞߊ߲߫ ߝߊ߰ߡߊ ߟߎ߬ ߟߊ߫ ߝߐߟߌ߫ ߘߐ߫ ߓߌߟߏ߲߸ ߏ߬ ߟߏ߲ ߞߍ߫ ߘߊ߫ ߟߏ߲߫ ߘߝߐ߬ߡߊ߬ߓߊ߫ ߟߋ߬ ߘߌ߫، ߞߊ߬ߕߎ߲߯߸ ߖߌ߬ߣߍ߫ ߡߊ߬ߞߍ߬ߦߙߐ ߟߎ߫ ߣߊ߲߬ߝߟߏ߬ߦߊ߬ߟߌ ߥߛߊ߬ߓߊ߰ߦߊ ߟߊ߫ ߗߋߦߊߟߌ ߟߋ߬ ߛߣߍߡߊ߫ ߘߊ߫߸ ߞߊ߬ ߣߊ߬ ߡߊ߬ߦߙߐ߬ ߁ ߀߀߀ ߟߐ߬ ߞߏ߬ ߞߎߡߊ ߝߐ߫ ߞߊ߲ߞߊ߲߫ ߕߌ߲߬ߞߎߘߎ߲ ߘߐ߫، ߏ߬ ߛߋ߲߬ߢߊ߬ ߝߟߐ ߟߋ߬ ߦߴߏ߬ ߘߌ߫ ߖߡߊ߬ߣߊ ߞߣߐ߫߸ ߛߊ߫ ߘߏ߫ ߘߌ߫ ߓߐ߫ ߖߌ߬ߣߍ߫ ߡߊ߬ߞߍ߬ߦߙߐ߬ ߞߏ߬ߖߊ ߟߊ߫ ߢߊ ߡߍ߲ ߡߊ߬.

ߗߋߘߋ߲ ߠߎ߬ ߢߍߡߌ߬ߣߊ߬ߣߍ߲߫ ߕߍ߬ߘߍ߫ ߝߘߏ߬ߓߊ߬ ߗߋߕߌ߮ ߟߋ߬ ߓߟߏ߫߸ ߡߎߛߊ߫ ߦߍߛ ߞߊ߬ߓߊ߸ ߏ߬ ߣߌ߫ ߞߊ߲ߞߊ߲߫ ߝߊ߰ߡߊ ߟߎ߫ ߞߊ߬ ߢߐ߲߯ߦߋ߫.

ߞߊ߲ߞߊ߲߫ ߞߎ߲߬ߠߊ߬ߛߌ߰ߟߊ߫ ߞߎߓߋߘߐ ߗߋߕߌ߮ ߊ߬ߟߌ߬ߡߊߡߌ߲߬ ߊ߬ߟߌߦߊ߬ ߕߎ߲߬ߞߊߙߊ߬ ߡߴߊ߬ ߟߊ߫ ߛߍߥߊ ߘߏ߲߰: <<ߊ߲ ߛߍߥߊߣߍ߲ߓߊ ߟߋ߬߸ ߣߴߊ߬ ߡߊ߫ ߢߊ߬ ߞߏ߫ ߊ߲ߠߎ߬ ߦߋ߫ ߕߌ߲߬ߞߎߘߎ߲ ߞߏߟߊߕߍ߮ ߘߏ߫ ߟߋ߬ ߘߌ߫߸ ߞߏ߫ ߛߎ߲߮ ߣߌ߲߬ ߓߊ߯ ߓߌ߬ߟߵߊ߲ ߠߊ߫ ߕߌ߲߬ߞߎߘߎ߲ ߤߊ߬ߙߌ߬ߖߍ߮ ߘߐ߫ ߏ߬ ߘߐ߫߸ ߘߊ߲߬ ߕߴߏ߬ ߛߍߥߊ ߟߊ߫، ߗߋߦߊߟߌ ߡߍ߲ ߣߊ߬ߣߍ߲߫ ߣߌ߲߬߸ ߞߊ߬ ߣߵߊ߬ ߝߐ߫ ߞߏ߫ ߡߊ߬ߞߍ߬ߦߙߐ߬ ߁ ߀߀߀ ߞߊ߫ ߞߊ߲߫ ߞߊ߬ ߟߐ߬ ߞߊ߲ߞߊ߲߫ ߕߌ߲߬ߞߎߘߎ߲ ߘߐ߫߸ ߏ߬ ߦߋ߫ ߛߍߥߊ߫ ߞߏߓߊ߫ ߟߋ߬ ߘߌ߫.>> ߊ߬ ߞߵߏ߬ ߦߌ߬ߘߊ߬

ߊ߬ ߞߵߊ߬ ߝߙߊ߬ ߞߎߡߊ ߞߊ߲߬ ߌߞߐ߫߸ ߞߏ߫ ߖߊ߬ߕߋ߬ߘߐ߬ߛߌ߮ ߣߌ߲߬ ߘߏ߲߬ ߕߍߣߊ߬ ߘߊ߲߬ ߠߊ߫ ߞߊ߲ߞߊ߲߫ ߘߋ߬:

<<ߖߊ߬ߕߋ߬ߘߐ߬ߛߌ߮ ߣߌ߲߬ ߕߍ߫ ߞߊ߲ߞߊ߲߫ ߞߋߟߋ߲߫ ߠߊ߫ ߞߎ߲߬ߠߊ߫߸ ߊ߬ ߦߋ߫ ߖߡߊ߬ߣߊ ߟߊߥߙߎߞߌ ߡߙߌߦߊ ߟߋ߬ ߘߌ߫ ߓߍ߯ ߞߍߕߐ߫ ߘߏ߫ ߛߐ߬ߘߐ߲߬ ߠߊ߫ ߡߍ߲ ߘߐ߫ ߖߌ߬ߣߍ߫ ߡߎ߰ߡߍ ߞߣߐ߫.>>

ߞߊ߲ߞߊ߲߫ ߡߙߊ߬ߓߊ߮߸ ߝߊߙߌ߲߫ ߡߏ߬ߤߊ߬ߡߍ߬ߘ ߢߊ߲ߜ߭ ߝߣߊ߫ ߞߵߏ߬ ߢߐ߲߰ ߛߍߥߊߣߊ߲߫ ߞߊ߲߫ ߠߋ߬ ߝߐ߫: <<ߣߌ߲߬ ߦߋ߫ ߛߍߥߊߣߊ߲߫ ߞߏߓߊ߫ ߟߋ߬ ߘߌ߫߸ ߟߊ߬ߥߛߊ ߟߋ߬߸ ߞߎ߲߬ߠߊ߬ߦߋߙߋ߲ ߠߋ߬، ߊ߲ ߓߘߴߊ߬ ߟߐ߲߫ ߡߎ߬ߕߎ߲߬ ߞߏ߫ ߞߊ߲ߓߍ߲ ߞߊ߲ߕߌ߮ ߕߟߏ߫ ߦߋ߫ ߖߡߊ߬ߣߊ߬ߘߋ߲ ߠߎ߬ ߟߊ߫߸ ߊ߬ߟߎ߬ ߤߊߡߌߣߊ߲߫ ߞߏ ߟߎ߬ ߦߊ߬ߙߊ ߘߐ߫.>>

ߖߌ߬ߣߍ߫ ߡߊ߬ߞߍ߬ߦߙߐ ߟߎ߫ ߣߊ߲߬ߝߟߏ߬ߦߊ ߖߋ߬ߕߌ߰ߘߊ ߗߋߕߌ߮ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߟߊ߫ ߖߋ߬ߕߌ߰ߘߊ ߕߍ߫ ߡߊ߬ߞߍ߬ߦߙߐ ߢߌ߲߬ ߠߎ߫ ߟߐ߬ ߟߴߊ߬ߟߎ߫ ߖߘߍ߬ ߦߋ߫ ߘߋ߬، ߊ߬ߟߎ߬ ߦߴߊ߬ ߣߊ߲߬ߝߟߏ߬ߦߊ߬ ߟߊ߫ ߟߋ߬߸ ߞߵߊ߬ ߘߐߖߊ߬ߥߏ߬߸ ߞߵߊ߬ ߓߌ߬ߟߊ߫ ߡߐ߱ ߟߎ߫ ߛߊ߬ߥߏ߬ ߘߐ߫، ߊ߬ߟߎ ߝߣߊ߫ ߣߌ߫ ߓߏ߲߫ ߞߏ ߓߊ߯ߙߊߞߍߟߊ ߟߎ߫ ߟߋ߬ ߓߟߏ߫ ߢߐ߲߮ ߓߟߏ߫ ߡߎ߬ߕߎ߲߬ ߛߊ߫߸ ߏ߬ ߟߎ߫ ߟߋ߬ ߘߐ߱ߘߏ߲߬ߣߍ߲߫ ߓߏ߲ ߟߐ߭ ߟߊ߫.

<<ߡߊ߬ߞߍ߬ߦߙߐ߬ ߁ ߀߀߀ ߣߌ߲߬ ߟߐ߬ߕߐ߫ ߟߋ߬߸ ߛߊ߫ ߘߏ߫ ߘߌ߫ ߓߐ߫ ߕߌ߲߬ߞߎߘߎ߲ ߡߊ߬ߞߍ߬ߦߙߐ߬ ߞߏ߬ߖߊ ߟߊ߫߸ ߊ߬ ߣߌ߫ ߖߌ߬ߣߍ߫ ߡߎ߰ߡߍ، ߞߊ߲ߓߍ߲ ߞߊ߲ߕߌ߮ ߟߊ߫ ߡߙߌߦߊ߫ ߓߘߍ ߞߏߛߐ߲߬߸ ߓߊ߯ߙߊ ߞߍߞߏ߫ ߝߟߐ ߣߌ߲߬ ߞߍߣߍ߲߫ ߞߊ߲ߞߊ߲߫ ߠߋ߬ ߤߊ߬ߙߌ߬ߖߍ߮ ߘߌ߫߸ ߦߊ߬ߣߴߊ߬ ߦߋ߫ ߖߡߊ߬ߣߊ ߕߌ߲߬ߞߎߘߎ߲ ߕߐ߭ ߟߎ߬ ߟߊߛߐ߬ߘߐ߲߬.>>

ߊ߬ ߞߵߊ߬ ߦߴߌ߬ߘߴߊ߬ ߟߊ߫ ߞߎߡߊ ߘߐ߫߸ ߞߏ߫ ߊ߬ߟߎ߬ ߓߘߊ߫ ߡߐ߰ ߟߎ߫ ߛߐ߬ߘߐ߲߫ ߖߍ߬ߘߍ߸ ߡߍ߲ ߠߎ߬ ߓߌߣߍ߲߫ ߞߊ߬ ߘߏ߲߬ ߊ߬ߟߋ߬ ߡߊ߬ߞߍ߬ߦߙߐ ߟߎ߬ ߘߐ߫߸ ߣߌ߫ ߓߊ߯ߙߊ ߓߊ߲߫ ߘߊ߫ ߕߎ߬ߡߊ ߡߍ߲ ߠߊ߫.

ߊ߬ߟߎ߬ ߟߊ߫ ߡߊ߬ߞߍ߬ߦߙߐ ߡߍ߲ ߦߋ߫ ߕߋ߲߬߸ ߗߋߘߊߕߌ߮ ߟߎ߬ ߣߌ߫ ߖߡߊ߬ߣߊ ߓߊ߯ߙߊߞߍߟߊ ߟߎ߬߸ ߏ߬ ߟߎ߫ ߟߋ߬ ߝߟߐ߫ ߦߋ߫ ߢߍ ߘߐ߫ ߊ߬ ߛߐ߬ߘߐ߲ ߘߐ߫، ߘߎ߰ߘߋ߲ ߕߐ߭ ߟߎ߬ ߕߊ߸ ߓߍ߯ ߘߌ߫ ߛߴߊ߬ ߡߊߝߟߍ߫ ߟߴߊ߬ ߛߐ߬ߘߐ߲߬ ߞߏ ߘߐ߫߸ ߝߏ߫ ߌ ߞߏ߬ߣߌ߲ ߛߙߊߕߌ߫ ߝߐߣߍ߲ ߠߎ߬ ߡߝߊ߫ ߟߋ߬، ߏ߬ ߝߟߐߝߟߐ ߟߋ߬ ߖߌ߬ߣߍ߬ߞߊ߬ߦߊ ߘߌ߫ ߡߎߣߎ߲߬، ߊ߬ ߦߌ߬ߘߊ߬ߣߍ߲߫ ߞߏ߫ ߡߊ߬ߞߍ߬ߦߙߐ ߢߌ߲߬ ߠߎ߬ ߘߌߕߐ߫ ߡߐ߱ ߟߎ߫ ߡߊ߬ ߛߐ߲߬ߞߐ߬ ߣߐ߲߮ ߘߝߊߣߍ߲ ߠߋ߬ ߟߊ߫.

ߖߋ߬ߕߌ߰ߘߊ ߢߌ߲߬ ߠߊ߫ ߝߐߟߌ߫ ߘߐ߫߸ ߣߌ߫ ߞߊ߲ߞߊ߲߫ ߕߊ ߓߊ߲߫ ߘߊ߫߸ ߕߌ߲߬ߞߎߘߎ߲ ߕߐ߭ ߟߎ߬ ߕߊ ߘߌ߫ ߢߊߓߐ߫، ߞߊ߲ߞߊ߲߫ ߝߊ߰ߡߊ ߟߎ߬ ߛߍߥߊ߫ ߘߊ߫ ߣߌ߲߬ ߞߏ ߟߊ߫߸ ߞߵߊ߬ߟߎ߬ ߞߊ߲ߠߊߘߌ߫ ߓߍ߯ ߡߊ߬߸ ߞߏ߫ ߓߍ߯ ߦߋ߫ ߖߊ߬ߕߋ߬ߘߐ߬ߛߌ߮ ߣߌ߲߬ ߞߐߡߊߓߌ߲ߓߌ߲߫߸ ߞߵߊ߬ ߛߌ߰ ߊ߬ ߞߓߊ߫ ߝߟߐ߫ ߛߌ߮ ߟߊ߫.