ߥߙߏ߬ߘߎ߰ ߊߝߙߌߞߌ߬ ߘߎ߰ ߞߎ߲ߓߊ ߛߌߦߊߡߊ߲߫ ߠߋ߬ ߟߊߡߊ߰ ߘߊ߫ ߞߐ߬ߟߏ߲ ߣߌ߲߬ ߡߊ߬ ߂߀߂߆ ߥߊ߬ߛߌ߬ߥߙߊ ߕߟߋ߬ ߃߀߸ ߞߵߏ߬ ߞߎ߲߭ ߞߍ߫ ߔߊߞߌߛߦߊ ߘߌ߫ ߞߊ߬ ߓߍ߲߬ ߕߎ߲ߞߊ߲߫ ߠߊ߫ ߕߊ߯ߟߌ ߞߍߢߊ߫ ߖߎ߮ ߞߍ߬ߟߍ ߡߊ߬، ߡߐ߰ ߥߊ߯ ߦߙߌߞߊ߫ ߟߋ߬ ߓߐ߫ ߘߊ߫ ߛߌߟߓߊ ߟߎ߫ ߞߊ߲߬߸ ߖ߭ߏߤߊߣߍߛߑߓߎߙ ߞߣߐ߫߸ ߊ߬ ߣߌ߫ ߘߎߙߑߓߊ߲߫߸ ߞߵߊ߬ ߦߌ߬ߘߊ߬ ߞߏ߫ ߛߓߍ߫ ߕߍ߫ ߟߏ߲ߟߊ߲߫ ߛߌ߫ ߟߴߊ߬ߟߎ߬ ߟߊ߫ ߖߡߊ߬ߣߊ ߞߣߐ߫߸ ߓߍ߯ ߦߋ߫ ߦߋ߲߬ ߓߌ߬ߟߊ߬، ߞߙߎ ߘߏ߫ ߟߎ߫ ߟߋ߬ ߦߋ߲߬߸ ߡߍ߲ ߠߎ߬ ߣߐ߬ ߊ߬ߟߎ߬ ߟߊߘߍ߬ ߟߊ߫߸ ߞߊ߬ ߓߌ߬ ߘߌ߫ ߞߊ߬ߛߙߋ߬ߡߊ߬ߟߊ ߞߐߘߊ߲ ߘߌ߫.

ߓߌ߬ ߛߐ߰ߡߊ߬ߘߊ ߢߌ߲߬ ߠߊ߫߸ ߔߊߞߌߛߦߊ ߘߊߡߌ߬ߣߊ߬ ߘߊ߫ ߡߊ߬ߝߊ ߖߍ߬ߘߍߖߍ߬ߘߍ ߟߋ߬ ߞߣߐ߫، ߓߊ߬ߙߌ߬߸ ߡߊ߲߬ߞߊ߲ ߞߍ߫ ߘߊ߫ ߦߙߐ ߘߏ߫ ߟߎ߫ ߘߐ߫߸ ߞߊ߬ ߓߋ߬ ߘߏ߫ ߟߎ߫ ߞߊ߲߬߸ ߔߊߞߌߛߦߊߟߊ ߟߎ߬ ߣߌ߫ ߕߐ߲ߓߟߏߡߊ ߟߎ߫ ߞߵߊ߬ ߛߌ߰ ߢߐ߲߮ ߞߎ߲߬ ߦߙߐ߫ ߛߌߦߊߡߊ߲߫ ߘߐ߫، ߊߟߎ߫ ߦߴߊ߬ ߟߐ߲߫߸ ߊ߬ߟߋ߬ ߟߏ߲ߟߊ߲߫ ߠߊߜߏߦߊߢߍ߫ ߡߊ߲ߞߊ߲ ߣߌ߲߬ ߓߘߊ߫ ߞߍ߫ ߕߙߎ߬ ߘߌ߫ ߞߊ߬ ߕߎ߲ߞߊߙߊ߲ߞߋ߫ ߡߐ߰ ߣߊ߯ߣߌ߲߫ ߓߐ߬ߣߐ߫ ߊ߬ ߣߌ ߘߐ߫ ߞߘߐ߬ߡߊ߲߬߸ ߡߏߖ߭ߊ߲ߓߌߞߊ߫ ߡߐ߰ ߂߸ ߋߗߏߔߌߞߊ߫ ߁ ߣߌ߫ ߡߟߊߥߌߞߊ߫ ߁، ߓߋ߬ ߓߘߊ߫ ߞߍ߫ ߟߏ߲ߟߊ߲߫ ߛߌߦߊߡߊ߲߫ ߞߊ߲߬߸ ߡߍ߲ ߠߎ߬ ߦߋ߫ ߖߎ߬ߟߊ߬ߦߊ ߟߊ߫ ߦߋ߲߬، ߛߌߟߊ߲ ߣߌ߫ ߖߐ߬ߘߐ ߞߏߛߐ߲߬ ߏ߬ ߘߐ߫߸ ߟߏ߲ߟߊ߲߫ ߛߌߦߊߡߊ߲߫ ߓߘߴߊ߬ߟߎ߬ ߡߊߞߍ߫ ߦߌߟߊ ߓߌ߬ߟߊ߬߸ ߞߵߊ߬ߟߎ߬ ߟߊ߫ ߖߎ߬ߟߦߊ߬ ߦߙߐ ߟߎ߬ ߘߊߕߎ߲߯߸ ߤߊߞߍߕߏ߫ ߊ߬ߟߎ߬ ߛߌߟߊ߲ߣߍ߲߫ ߛߴߊ߬ߟߎ߬ ߞߊߣߊ߬ ߜߊ߰ߢߊ߬ߜߊ߯ߢߊ߫ ߔߊߞߌߛߦߊߟߊ ߟߎ߬ ߓߟߏ߫.

ߡߍ߲ ߠߎ߬ ߓߐߣߍ߲߫ ߛߌߟߊ ߞߊ߲߬ ߣߌ߲߬߸ ߊ߬ߟߎ߬ ߞߊ߲߫ ߞߏ߫ ߛߓߍ߫ ߕߍ߫ ߕߎ߲߲ߞߊߙߊ߲ߞߋ ߡߍ߲ ߠߎ߬ ߟߊ߫ ߕߋ߲߬߸ ߏ߬ ߟߎ߬ ߓߘߊ߫ ߓߊ߯ߙߊ ߛߐ߬ߘߐ߲߫ ߊ߬ߟߎ߬ ߟߊ߫ ߖߡߊ߬ߣߊ ߞߣߐ߫߸ ߞߊ߬ ߓߋ߬ߒ߬ߞߊ߲߬ߠߌ߲ ߝߊ߲߬ߞߊ ߟߊߥߙߊ߬. ߊ߬ ߞߏ߬ߣߌ߲߸ ߥߙߏ߬ߘߎ߯ ߝߘߊ߬ߝߌ߲߬ߠߊ߫ ߞߎ߲߬ߠߊ߬ߛߌ߮ ߞߊ߲߫ ߞߏ߫ ߊ߬ ߛߋ ߦߋ߫ ߝߊ߰ߡߊ ߟߎ߫ ߟߋ߬ ߘߐߙߐ߲߫ ߦߋ߫߸ ߞߊ߬ ߕߎ߲ߞߊ߲߫ ߠߊ߫ ߛߌ߯ߟߌ ߛߊ߬ߙߌ߬ߦߊ ߟߊߓߊ߯ߙߊ߫، ߏ߬ ߟߋ ߖߍ߬ߘߍ ߞߏߛߐ߲߬߸ ߊ߬ߟߎ߬ ߟߊ߫ ߞߊ߲ߕߌ߮ ߛߙߌߟ ߙߡߊ߬ߝߏߖ߭ߊ߬ ߞߊ߲߫ ߞߏ߫ ߊ߬ ߓߘߴߊ߬ ߟߐ߲߫ ߖߐ߫߸ ߊ߬ ߟߊ߫ ߖߡߊ߬ߣߊ߬ߘߋ߲ ߠߎ߬ ߤߊߡߌ߲ߣߍ߲߫، ߒ߬ߞߊ߬߸ <<ߊ߲ ߕߴߛߋ߫ ߛߐ߲߬ ߠߊ߫ ߕߌߢߍߟߌ ߞߍߢߊ߫ ߛߌ߫ ߡߊ߬߸ ߡߍ߲ ߘߌ߫ ߖߡߊ߬ߣߊ ߟߊߟߏ߲߬ߓߏ߲߬ߟߊ߲ߓߊ߲߫.>>

ߊ߬ ߞߎ߲߬ߢߐ߲߰ ߦߙߌߞߊ ߟߋ߬ ߕߋ߲߬߸ ߕߏ߰ߝߏ ߣߌ߲߬ ߓߘߊ߫ ߞߍ߫ ߕߙߎ߬ ߘߌ߫ ߞߊ߬ ߟߏ߲ߟߊ߲߫ ߛߌߦߊߡߊ߲߫ ߟߐ߬ ߖߡߊ߬ߣߊ ߣߌ߲߬ ߓߌ߬ߟߊ߬ ߟߊ߫، ߊ߲ ߧߋ߫ ߦߙߐ ߡߍ߲ ߘߐ߫ ߕߋ߲߬߸ ߟߏ߲ߟߊ߲߫ ߂߅ ߀߀߀ ߓߘߊ߫ ߥߙߏ߬ߘߎ߯ ߝߘߊ߬ߝߌ߲߬ߠߊ߫ ߓߌ߬ߟߊ߬߸ ߊ߬ ߕߌ߯ߕߌ߯ ߸ߡߟߊߥߌߞߊ ߟߎ߬ ߣߌ߫ ߖ߭ߌ߲ߓߊߓߎߦߋߞߊ ߟߎ߬ ߣߌ߫ ߡߏߖ߭ߊ߲ߓߌߞߊ ߟߎ߬ ߣߌ߫ ߖߋ߬ߟߌ߬ߓߟߊ߬ߞߊ ߟߎ߬߸ ߞߵߏ߬ ߝߙߊ߬ ߜߊ߯ߣߞߊ ߟߎ߫ ߞߊ߲߬، ߘߏ߫ ߟߎ߫ ߞߊ߬ ߖߌ߰ߖߊ߮ ߟߋ߬ ߕߊ߬ ߞߵߊ߬ߟߎ߬ ߓߘߊ ߡߊߜߍ߲߫߸ ߘߏ߫ ߟߎ߫ ߝߣߊ߫ ߟߊ߫ ߖߡߊ߬ߣߊ ߞߊ߬ ߓߐߟߌ ߓߟߏߘߐߓߍ߲ ߠߎ߬ ߞߍ߫ ߞߊ߬ ߥߴߊ߬ߟߎ߫ ߕߊ߬.

ߓߌ߬ ߕߊ ߣߌ߲߬ ߞߏ߬ߣߌ߲ ߘߐ߫߸ ߕߐ߲ߓߟߏߡߊ ߟߎ߬ ߟߊߖߌ߰ ߘߊ߫ ߡߙߊ߬ߓߏ߬ߟߏ߲߬ ߛߌߦߊߡߊ߲߫ ߠߋ߬ ߞߣߐ߫߸ ߛߊ߫ ߕߊ߲߬ߞߊ߬ ߘߌ߫ ߞߍ߫ ߥߢߊߞߌߦߊ ߡߊ߬ ߢߊ ߡߍ߲ ߡߊ߬ ߟߏ߲ߟߊ߲߫ ߠߊߜߏߦߊߢߍ ߣߌ߲߬ ߘߐ߫. ߊ߬ ߞߏ ߞߏ߬ߣߌ߲ ߞߎߡߊ ߓߘߊ߫ ߛߌߦߊߦߊ߫، ߓߊߏ߬߸ ߊ߬ߟߎ߬ ߞߊ߲߫ ߞߏ߫ ߓߟߏߞߏߟߏ߲ߧߊ߫ ߓߊ߲ߓߊߟߌ ߡߍ߲ ߖߡߊ߬ߣߊ ߞߣߐ߫߸ ߟߏ߲ߟߊ߲ ߠߎ߫ ߟߵߊ߬ ߕߎ߬ߙߎ ߘߌ߫.